Matius 23 - Eipomek

Yesus arye, Farisi nang ap, Musa sekamuk yupu peterena deiyok nang ap ati, wenebuk yupu

¹ Ayupu nyabukopura, Farisi nang ap, Musa sekamuk yupu peterena deiyok nang ap, meneng dam abukmeka ati, Yesus arye el mapu 12 nang ap, ‘El yupu nyapliba kekepnuyaba’ tenen, wekmek nang ap ati, ayupu nirya nyabuk.

² Minop talak Allah arye Musa ati, “Na yupu petereplyame,” nyabuka peterena deiyok aribukba, Musa arye peterelamuk. Minop talak ara, Musa arye peterelamuk touk, wini talak ara, sik Farisi nang ap, Musa sekamuk yupu peterena deiyok nang ap, Allah yupu peterena deiyok nang unyake. Musa arye pil dolamuk touk, wini talak sik anang arye donyake.

³ Apil talibuka unyaka ati, Allah yupu deice peteresinyak yupu ara, moubuka kekepmunce, aning talibuka unamlulume. Bukni, sik Farisi nang ap, Musa sekamuk yupu peteren nang ap arye, Allah yupu peterelamak touk, sik babye moubuka talibikirye dipkoprop kum unyake. Ati, na mapu anggunda, anang sik wininyak ning eipmunce, sik malye wininyak atonun kum wininamlulume.

⁴ Sik Farisi nang ap, Musa sekamuk yupu peterena deiyok nang ap, sik bidamnye kanye tenena deice aryuk tabakuka, “Winipnamlulume,” nyabuka peterenyak ning arye, ninye nirya sik nong deice ikin ning weik delinyake. Ninye nong deice ikin ning weike delinyak bukni, ninye ikin uplye ning ara, ‘Nunce ton melipnusiabe,’ tenebikirye, tonok mitik pil babye, sikce ton pia kum melinyake.

⁵ Sik winilamak ning ap, pil dolamak ning ap nirya ara, ‘Yuk ninye eipsikirye, se anang ara pia teleb nang, tenepnamsiyak’ tenen, wininyake. Sikda kanye talima ereldanyake. Ton ning ara, Allah yupu kekebuka diba tenenyak ninye ara, ‘Allah yupu ati pia tenenamap’ tenen, mitik pala ning deice arye, Allah yupu ayat sekdeipnopura, taruk nakup deice ap, asok deice ap, deibuka kitilongonyak. Bukni, sik Farisi nang ap, Musa sekamuk yupu peterena deiyok nang ap ara, ‘Ninye eipnamsiyak’ tenen, pala weik ning deice kitildongokirye dinyake. Winilamaka nirya ara, ‘Yuk ninye eipsikirye, ara pia teleb nang, weik kel nang tenepnamsiyak’ tenen, wininyake. Ton ning ara, Allah diba tenenyak ninye ara, sik Allah morona talak ara, kisok pakunyak baju mouse ak ara, bumang baju sekuka tipmenikuka mitik-mitikuk kirikildongonyake. Bukni, sik Farisi nang ara, ‘Yuk nang eipsikirye, ara Allah morona weik kel nang tenepnamsiyak’ tenen, weik cang baju sekuka, tipmenikuka mitik-mitikuk kisok pakunyak baju mouse ak kirikildongonyake.

⁶ Ton malye ulamak nang ara, weik kwalina talak nirya ara, kwalina deiyok nang arye akwalina yanuka lukuka dipnopura, sik Farisi nang arye weik nang bukman akuk, ‘Weik nang tenepnamsiyak’ tenen, pia teleb ak bulbanyake. Ton nang ara, Allah yupu peteren talak ara, Farisi nang arye, ‘Yuk nang eipsikirye, teleb nang tenepnamsiyak’ tenen, Yahudi yala nang Allah yupu peteren aik pum, ‘Anyaik ninye sik urasin nirya din tamuk bukibibuk, eipsikirye, se, sik anang ara weik mambul nang, tenepnamsiyak’ tenen, weik nang bulam akuk, bulbanyake.

⁷ Tonda, ‘Ninye nirya din ning deibuka deklamakak ara, pasar noutamak arye babiba, ninye nirya eipsikirye si erenamsiak’ tenen, kanye pin-pin asa banyake. Atonun ton, utenenyake. ‘Ninye nirya arye, sikda nun weik peterena deiyok nang, guru nyapnamsiak’ tenen, kanye pin-pin asa arye wininyake.

⁸ Sik Farisi nang ap, Musa sekamuk yupu peterena deiyok nang ap, wininyak bukni, na mapu anggunda, anang winilamaka atonun kum wininamlulume. Anggun weik deiyoknye tonok, na uniba, anggunda na weit yapu atonun ulaluma ati, yuk nang arye anggunti, “Nun weik peteren nang, nun Guru,” nyabuka, ‘Anggun si erepsikcak’ tenen, anggun bidamnye yupu sekeldongonamlulume.

⁹ Talya tukwak ninye nirya ati, “Na ni,” nyabuka si kum erenamlulume. Anggun ni koprop ara, im deicanye tonok ulula ati, talye tukwak nang ati, “Na ni,” nyabuka si kum erenamlulume.

¹⁰ Aning atonun ton, anggun weik peterena deiyoknye, ninye nirya lyepnirye sik kanye talima talinamnanye bira, Kristus na ununa ati, yuk nang arye anggunti, ‘Nun weik peterenanye, nun Guru, nyapsikcak’ tenen, anggun bidamnye yupu sekeldongonamlulume.

¹¹ Anggun kan-kan Allah arye erebuka weik kibuka deipnamlanye bira, yuk nang sik patalul ning ati, bico tenebuka melinamle. Ara talye pil melin nang arye, sik deiyok nang ati, kanye deibuka, melibuka ulamak touk, Allah arye weik kipdeipnamlanye bira, aning atonun wininamle. Yuk ninye sik amu tam ulirye, melinauk unamle.

¹² Ara talye ati kume. Yata ninye do nirya, sik bidamnye sik damanguk erelilalamikce nang ara, Allah arye anang dobuka amutamuk kipdeipnamle. Bukni, sik talima mitang arye amu tam unyak nang ara, Allah arye aninye erepdeipnamle. Yesus arye anang ati nyabuk.

¹³ Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.

¹⁴ Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggunda bicoe. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning, bola deice ninguk winilulume. Winilulum bukni, anggun talima noutam ara tuba malyeuk ulule. Anggun malye winimunye ning ara, nyapnusine. Ara, anggunce youwak kilapu ati, ‘Dipminyopura, an uminye aik ap, yuk an taliminye ning nirya ap, Allah ati arepnamlame,’ tenebuka arye nyaltakalulume. Bukni, youwak kilapu arye sik ning arebikcopura, angguncuk aning bokuka, weik arye dololulume. Tonda, yuk nang arye, ‘Anang ara Allah morona weik kel nang nyapnamsiak’ tenen, Allah moromunye talak ara, yupu cang arye morolulume. Awinimunye ning nirya ati ara, Allah arye awinilulum nang atonun ninye nirya ati, pia weik arye wenebuka opnamsile. Yesus arye nyabuk. Nyabukopura, ayupu ton nyabuk.

¹⁵ Se, anggun Farisi nang ap, Musa sekamuk yupu peterena deiyok nang ap, anggunda, ‘Tonoknye babye ton, nun yupu kekebuka nun tam kipsutue’ tenen, tukwak bisik bobana ap, mekwen deice bobana ap umunce, mutuku-mutuku nirya peterepra balulume. Anggunda akunum malye nang ululum bukni, peterepra bamunyeba, yuk nang anggun yupu kekebikirye, anggun winimunye ning dobolbanyak deice arye, malye ning weik tonap winibikcopura, anang ara pia malye wininyake. Anggunce yuk ninye ati malye winililulume. Anggun babye, anggun peterepmunyeba, anggun yupu kekebuka dobolbanyak nang babye, Allah arye wenebuka uku din mutuku dopkwetepnamsile. Yesus arye nyabuk. Yesus arye ayupu ton dukdongobuka nyabuk.

¹⁶ Anggunda utenelulume. Ara, ‘Nunda ninye bisik peterelin nang unyabe,’ tenelalulum bukni, anggunda asing kun nang atonun ululume. Ati aning ara, Allah arye wenebuka opnamsila ati, anggun bicoe. Anggunda, anggun malye yupu peteremunye ning ara ani. Ara, ‘Yuk ninye kekepsikirye, dipkoprop nyapmak,’ tenebuka, ‘Dib tenepnamsiyak’ tenen, nyalulume. “Allah ati arelbalamap aik, anyaik si deice arye nyapsine,” nyaptum bukni, anggunce, “Aning ara talye. ‘Anyaik si deice, winipnamne,’ nyanyap yupu ara, kum winibibya babye, telebuka ayupu ara auplule,” nyalulume. Bukni, anggunce yuk nang ati, “Allah arelbalamap aik abelenga deice taplakdeiamik emas, anyaik emas si deice arye nyapsiyabe,” nyalulum ara, adeice arye dib teneptibye. Ara, “Emas ning ara, dipkoprop batakmanto kum ati, anyanyap yupu ara dipkoprop wininamabe,” nyalulume.

¹⁷ Anggunda ayupu nyalulum bukni, anggunda asing kun nang atonun umunce, pia walwal nang ululume. Anggun kum tenipmalum do? Weik mambul ning ara, emas tablakdeibik ning do? ‘Allah arenamap’ tenen, domik aik do? Ataplakeibik emas ara, talye emas bukni, Allah arena aik pum tablakdeibik deice arye, aemas pia mambul ubuke. Mambul updeibuka deiyok ning ara, Allah el aik pum ulula atia.

¹⁸ Tonda, arup nyapmasin yupu atonun tonap, anggun nyalulum yupu ton, nyapnusine. Anggunda nyalulume, “Allah arena ati ining ning obuka delinyap ak, aning si deice arye nyabab yupu ara, dauptue. Bukni, Allah ati arenyap ning, aining ning el si deice arye nyanyap yupu ara, ‘Dauplye’ tenen, kum bataktibye,” nyalulume.

¹⁹ Nyalulum bukni, anggunda asing kun nang atonun umunce, pia walwal nang ululume. Anggun kum tenipmalum do? Ining ning ara, weike aupmal bukni, aning ara mambul kume. Bukni, ining ning dobuka, Allah arena ati deililamak deice akunum deibikcopura, aning ara pia mambul ulule. Ati, mambul kirikuka delilya deiyok ning ara, Allah arena ati deililamakak atia.

²⁰ Aning ati ara, anggunce, “Allah arena ati delinak, si deice arye nyapsiyabe,” tonda anggunce, “Allah ati arenyap ning si deice arye nyapsiyabe,” nyabuka nyamunye yupu ap ara, abitinye yupu ara neiktoto uka ati, ayupu bitinye ara kum bokeipmanto. Aning-aning si deice arye, “Wininamabe,” nyalulum yupu nirya ara, batakaldongona kume. Adip aryuk dipkoprop “Wininamabe,” nyamunye touk, aninguk wininamlulume. ‘Dauplye’ tenen, batakana ara kume. Allah arena ati, delinak ap, aning deice delilulum ning ap ara, kum bokeipmanto.

²¹ Yatanye do nirya, “Allah arelbalamap aik si deice arye, wininamne,” nyalulnye bira, ayupu nyalya deice arye, dipkoprop anyaik pum ululnye Allah, el si deice arye ton ayupu nyalule. Anyapmasin yupu deiyok ara, anyaik ap, anyaik ululnye Allah ap, kum bokeipmanto atia. Yesus arye nyabuk. Nyabukce, ayupu ton dukdongobuka nyabuk.

²² Tonda, “Im deice ulul ning si deice arye, wininamne,” nyalulnye bira, ayupu nyalya deice arye, Allah el si deice ap, Allah el nong ap ati, ayupu nyalule. Aning nirya ara, kum bokeipmanto ati, anggunce, “Aning-aning nirya si deice nyapsine,” nyalulum yupu nirya ara, pia malye nyalulume. Yesus arye anang ati nyabuk. Nyabukce, ayupu ton dukdongobuka nyabuk.

²³ Musa sekamuk yupu peterena deiyok nang ap, anggun Farisi nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bola deiceuk teleb ululume. Winiluluma ati, anggun bico, Allah arye wenebuka opnamsile. Anggun malye winimunye ning ara, ani. Aning-aning nirya ara, ‘Allah elcuk aresulule’ tenen, pia mitik ning bukni, kuma ap, babok ap, erica ap bokuka, seper sepuluh dobuka, Allah el si erena ati ton, arerurume. Winilulum bukni, weik mambul winin ning ara, batakalongolulume. Anggun batakamunye ning ara, ninye bico tenebuka talima arena ap, ‘Na kayapu’ tenen, batakana kumce, kanye deibuka pil dana ap, ninye arye dipkoprop winipmakce touk, yupu bokolina ap, yupu bokolin talak diksukum yupu nyana ap, anirya ara, batakalulume. Allah yupu noutamak ara, ayupu nirya aubuk bukni, anggunce aning nirya batakalulume. Ati, ‘Teleb nang tenepnamsiyak’ tenen, mitik ning dobuka, Allah ati, seper sepuluh bokuka aremunya ara, teleb bukni, aning batakna kumce, weik mambul ning babye winiptume. Weik mambul ning babye, winipmunyopura, ‘Telebe,’ nyapsitinye bukni, anggunce weik mambul ning batakalulum ati, ‘Anggunda tuba malye winilulume,’ nyapsine.

²⁴ Anggunda, ‘Nunda ninye bisik peterelin nang unyabe,’ tenelalulum bukni, asing kun nang atonun ululume. Anggun malye winimunye ning ati, winipmanto yupu deice arye nyapnusine. Anggun mek makau pum sung-sunga aupmalibuk, wibuka dolulum bukni, weik unta basam amek makau noutamak auptopura, diltakana kum diparyuk, talye mangkau arye diptume. Mitik teleb ning winilulum bukni, weik teleb ning, mambul weik ning ara, kum winilulume. Aning ara, pia batakaluluma anya arye, anggunda malye winilulume. Yesus arye nyabuk. Ayupu nyabukopura, ayupu ton nyabuk.

²⁵ Se, anggun Farisi nang ap, Musa sekamuk yupu peterena deiyok nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bol deice ninguk teleb winilulume. Allah arye wenebuka opnamsila ati, anggunda bicoe. Anggun mek makau ap, dina yangana ap, ‘Malye ning palepmasilibuk mangkau arye dibibyeba, malye unyap’ tenen, bola deice tam ara, teleb ubuka mek ilikilulum bukni, anggun kanye talima noutamak pia malye una ap, yuk ninye ning aluldona ap, tuba aupmasil bukni, aning tenena kum diparyuk, talye kanye bobuka anggun bidamnye patapsilye ning uk, pia tenelulume.

²⁶ Anggun asing kun nang atonun ululuma ati, kum tenipmalum do? Anggun mek makau pum mek ilikmunyeba, bola deice tam teleb ulamle touk, anggun talima malye usilye ning ara batakmunce kum upsilyopura, anggun winimunye ning nirya ara teleb upnamsile. Bukni, anggun talima noutamak malye ning tuba awabsilyopura, teleb kum uptume.

²⁷ Se, anggun Farisi nang ap, Musa sekamuk yupu peterena deiyok nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bola deiceuk teleb ululume. Allah arye wenebuka opnamsila ati, anggun bicoe. Ninye dibikceba, keil deiya pum weibikirye, buru tam keil deibikirye, aik likne kurun mek likikcopura, buru tam ara urasin pia teleb ulule. Bura tam urasin teleb ulamle bukni, akeil deiya pum bisik ara, ninye nong lyuplirye, tong ap, yok ap, amalye ninguk ulule. Aning ara, pia malye ulamle touk, anggun winin ning babye, pia malye winilulume.

²⁸ Akeil deiya buru tam urasin teleb ulul bukni, pum tam ara, malye ning ulamla atonun, anggun babye atonun ululume. Anggunda yuk nang asing eipsikirye, ‘Anang ara diksukum teleb ubuka wininyak nang,’ tenesinyak bukni, dipkoprop anggun talima noutamak ara, pia malye ning aupsukba, bola deiceuk teleb pil dobuka winilulume. Bukni, anggun talima noutamak ara, pia malye ning aupmasil bukni, malye ninguk winilulume. Yesus arye nyabuk. Nyabukopura, ayupu ton nyabuk.

²⁹ Se, anggun Farisi nang ap, Musa sekamuk yupu peterena deiyok nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bol deiceuk teleb winilulume. Allah arye wenebuka opnamsila ati, anggun bicoe. Allah yupu laka nyalamik nang, nabi nang olamikba weilbalamikak ara, sik si erena ati, teleb aik dolulume. Tonda, sik diksukum ulamikba olamik nang weilbalamaikak ara, sik si erena ati, urasin teleb ning deililbalulume.

³⁰ Winimunce ayupu nyalulume. “Se, nunda teleb nang anya arye, nun apu yapu ulamikce sik nabi nang olamik talak ara, nun ap ulamtibyetoura, nun ap melibuka anang kum olamtibye,” nyalulume.

³¹ Nyalulum bukni, anggunce anang ati, “Nun apu yapu unyake,” nyanmalum deice arye akunum malye yupu nyaldalulume. Anggun apu yapu malye winilamik touk, anggun babye atonun, talima malye nang umunce, malye winilulume. Diksukum ulamik nang ati olamik deiyok nang ara, anggun apu yapu anya arye, anggunda sik mapu ululuma atia. Ayupu nyamunya deice arye, Allah yupu laka nyalamik nang, nabi-nabi nang olamik deiyok nang ara, “Sik mapu ara, nun unyabe,” nyabuka, anggunce anggun bidamnye arye, malye yupu nyaldalulume.

³² Aning ati ara, anggun apu yapu deiyok koubuka malye winilamik ning ara, anggun wini talak ululum nang arye ton sirya daknamlume. Yesus arye nyabuk. Ayupu nyabukopura, Yesus arye ayupu ton nyabuk.

³³ Ninye on kwatima duknupmalya, ninye mangkau bakiba, eiplirye, si tolamle touk, ululume. Anggunda pia malye nang ululuma anya arye, Allah arye uku din mutuku dopkwetepnamsilak ara, yata wiribuka lyepdana bitum do?

³⁴ Anggun lyepdanmanto kum nang ululuma ati, aminyan talak na dopkwetepnamsin ning ara nyapnusine. Ara, Allah yupu lakak kibuka nyan nang, nabi nang ap, weik kel nang ap, Allah yupu peterena kel nang ap, anggun dam dopdeipnamsine. Dopdeipsinyopura, ton nang ara, oltakanamlume. Ton nang ara, wanwanun yo deice onamlume. Ton nang ara, anggun Allah yupu peteren aik pum arye, kama arye kulanamlume. Ton nang ara, ‘Optibye’ tenen, mutuku-mutuku nirya dobolkirikinamlume.

³⁵ Wininamluma ati, yata nang do nirya, sik diksukum ulamik bukni, oltakalamik nang nirya ara, Habel anyapce opnin yangalamika ani, wini talak Berakia el mi Zakaria, anggun apu yapu arye, Allah arena ati delilamika dam obiknye ap, anang nirya sik ining ara, anggun wini talak ululum nang, anggun taruk deice upnamsile.

³⁶ Anang sik ining ara, anggun wini talak ululum nang, anggun taruk deice upnamla ati, anang olamik ning ati, Allah arye anggun atalak ululum nang ati wenebuka opnamsile. Aoltakalamik nang sik ining ara, atalak umunye nang, Allah arye sik ining ara, anggun nong deice deipnamsile. Yesus arye sik Farisi nang ap, Musa sekamuk yupu peteren nang ap ati, nyabuk. Yesus arye ayupu ton nyabuk. Nyabukce, ayupu ton dukdongobuka nyabuk.

³⁷ Ura, anggun Yerusalem mutuku ululum ninyeo, Allah yupu laka nyabuka peterenyak nang, narye nabi-nabi weike anggun dam dolkwetelamsise bukni, anggunce anabi sik nong deice keil dobuka ona ap, tonda, talye oltakana ap ulalume. Narye anggun Yerusalem mutuku ululum ninye ati, ‘Ayam el mapu irilamle atonunuk, na wiamse ninye kalikuka melinamsin’ tenen, patanululba, anggunti tuba tenesunun bukni, anggunce, ‘Anye Yesus ara, nun like’ tenen, tuba batakanululume.

³⁸ Aning ati ara, anggun Allah si erena ati arelbamunye aik ara, Allah arye batakliba, anyaik ara talye louk upnamle. Allah ara anyaik tuba kum unamle.

³⁹ Narye anggun batakuka bindopsinyopura, dotalak nirya ara, na ton kum elinamnulume. Daulamunya ani, na si erepnamnulum talak ara, eipnamnulume. Atalak ara, anggunce, ‘Se, Ninye Lyenanye, Mesias bira akunum yanmasile,’ tenepnamnulum talak, ayupu nyapnamnulume. “Allah el mikip ap, el si ap deice arye yanmasilnye bira, pia telebuk unamle,” nyabuka, na si erepnamnulum talak, sirya talak ara eipnamnulume. Yesus arye sik Farisi nang ap, Musa sekamuk yupu peterena deiyok nang ap ati, wenebuka nyabuk.