Matius 20 - Eipomek

Yesus domon yupu deice arye, wa win nang ati, nyabuk yupu

¹ Yesus arye el mapu 12 nang ati nyabuk. Allah arye ninye mutuku-mutuku nirya noutamak arye, ninye weik lyeplirye, anggun talima talisilya atonun ning ati, winipmanto yupu nyapnusine. Tonok wa deiyoknye birye, ‘Na anggur tapu duk wa pil donamak’ tenen, beren tam talak ninye dolbiyukce, ayupu nyabuk.

² “Asum tonok na wa winmanunye bukni, iniplyopura, dekna teleb keil uang tonok el si ara derakma arepnamasine,” nyabukura, sik anang arye, “Telebe,” nyabuka el wa pil wilbiyik.

³ Anang arye pil donmek bukni, keting jam 9 pagi kibuk. Awa deiyoknye birye, din ning deibuka deklamikak, pasar deklamikak biyuk talak ara, talye urdem balamik nang eipdayikce, ayupu nyabuk.

⁴ “Na wa wilbinumunyopura, anggun pil dopmanumunye touk, narye dekna teleb ning arepnamasine,” nyabukura, anang arye, “Telebe,” nyabuka, el wa wilbiyik.

⁵ Anang nirya arye el wa winmekbuk, awa deiyoknye birye beren tam talak winipmoka atonun, keting noutam jam 11 siang ton, sintam jam 2 sore ton, atonun yuk talye tikda banmek nang ati nyapra banmok. “Na wa wipnumunyopura, pil dopmanumunye touk, dekna teleb ning arepnamasine,” nyapmokba, anang nirya arye yuk-yuk, el wa wilbiyik.

⁶ Atonun ton inilongon talak jam 4 sore arye, awa deiyoknye banmokce, yuk talye daunmek nang epdayikce ayupu nyabuk. “Yata deiyok ati, asukumuk tikmalumce, tonok sum nirya pil kum donmalum do?” nyabuka asipdeyuk.

⁷ Asipdeyukba, sik atalye unmek nang arye tamubuka nyabik. “Pil deiyok nang arye, ‘Nun pil dolbisilyame,’ nyabuka pil kum nukmasiyaka ati, talyauk unmabe,” nyabik. Nyabikopura, awa deiyoknye birye tamubuka nyabuk. “Ati, anggunce, na wa wipnumunyopura, dekna teleb ning arepnusine,” nyabukba, sik anang babye, el wa wilbiyik.

⁸ Anang nirya arye pil donmeka ani, akunum inibukopura, adeiyoknye birye el melinanye biti nyabuk. “Apil donmak nang ara, sik pil kunumna ati dekna ning arepnulam ning ara, aminyan tabakuka pil donmak nang arye deiyok koubuka, arepnin banmaminya ani, beren tam talak arye deiyok koupmangu nang binuka sirya dakdongobuka areplyame. Ati anang yukulbilyame,” nyabuk.

⁹ Yukubukba, el wa winmek nang yayikopura, inilongon talak jam 4 sore deiyok koupmek nang ati, keil uang el si derakma tonok aribukba doprobik.

¹⁰ Arepnin banmoka ani, minopce deiyok koupmek nang yayikce, utenebik. ‘Anang ara pil mitik anunuk pil dopmangubuk, keil uang teleb ning tonok aribmuba dopromaka anya arye, nunda beren tam talak arye pil weik donmaba ati, keil uang weik arye arepnusile,’ tenebik. Utenebik bukni, awa tuku deiyoknye beren tam talak arye, ‘Winibuka arepnamsine,’ nyapmok touk, asum noutamak nirya pil donmek nang babye, keil uang tonokuk aribuk.

¹¹ Keil uang tonok doprobik talak ara, anang arye awa deiyoknye biti, yuk anye bobuka elti, “Malye winipmasile,” nyanmek.

¹² Tonda, nyanmek. “Inilongon talak dopmangu nang ara, keting tonokuk pil dopmangu bukni, keil uang el si ara derakma, tonok arepmalame. Nunda, asum noutamak nirya ikin pil donmapu talak, bupu unmasubuk, donmapue. Nun ap, inilongon talak donmangu nang ap ara, pil neiktotouk kum dopmapu bukni, dekna teleb keil uang, duk tonokuk neiktoto uk arepmasilama ara, teleb kume. Nun kanye ara, aning malye. Ati aning ara yata deiyok ati, neiktotouk tonok keil uang arepmasilam do?” nyabik.

¹³ Nyabikopura, adeiyoknye birye tamubuka nyabuk. “Anango na malye kum winipmasine. Arup beren tam talak arye, ‘Tonok sum pil dobibyopura, tonok weik yo bok dona telebe,’ nyapmanulum do, kum do?

¹⁴ Narye, ‘Weik yo bok tonok arepnamsine,’ nyapmanu touk akunum arepmasina anya arye, anggun dekna keil uang dobuka bilulume. Na kanye ara, ‘Na pil donamak’ tenen, ‘Sirya inilongon talak dopmanu nang ap, beren tam talak dopmanu nang ap, atonun ubuka keil uang tonok arepnamame,’ tenepmanu touk akunum arepmasina ati, winipmana ara, na kanye telebe.

¹⁵ Na arepmasin keil uang ara, na keil uang anya arye, na kanye tenepmanu touk ubuka, akunum arepmasine. Narye tenepnye touk winipsitinye. Bukni, narye ‘Pil weik donmangu nang babye, mitik anunuk pil donmangu nang babye, keil uang ansinibuka tonok arepnun’ tenen, talye mangkau arye arepmana ati ara, anggun yu upmasilba derepmanulum do? Pil weik dopmalum nang ap, pil mitika aryuk donmangu nang ap ati, dekna teleb ning neik touk arepmanu ati ara, yata ati derepnulum do? Awa deiyoknye birye el pil don nang ati nyabuk.” Yesus arye el mapu ati domon yupu deice arye ayupu nyabuk.

¹⁶ Nyabukopura, ayupu nong tonap laka nyabuk. “Arup winipmanto yupu nyapmasin touk, sirya talak ara, wini talak anggun tukwak ninye arye, ‘Se anang ara weik mambule,’ tenelulum ninye ara, amutamuk deipnamne. Aning atonun, anggunce, ‘Se aninye ara, mambul pia kum ninye unyake,’ tenen, luba kilulum ninye ara, Allah arye erepdeiplirye, weik nang kipdeipnamlarya. Allah arye anang dobuka amutamto kipdeipnamle. Wini talak, yuk nang arye, ‘Sikda mambul kum ninye unyake,’ tenenyak ninye ara, Allah arye erepdeipliba, mambul weik ninye unamake.” Yesus arye nyabuk.

Yesus arye, malye nang opnamika ati, nyabuk yupu

¹⁷ Aminyan ara, Yerusalem mutuku binamika ati, bisik banmek talak ara, Yesus el menekuka banmokba, el mapu 12 nang ap, yuk nang ap, aminyan banmek. Banmek talak ara, yuk nang ton aminyan yanganmeka ani, Yesus arye el mapu 12 nang ati, “Na dam yalulume,” nyabukba, yayikopura, yu nang arye aminyan talak el Yesus ati winipnamik ning ara, laka nyabuk.

¹⁸ “Nun nirya Yerusalem mutuku welebibyopura, nara Ninye Mi Koprop Atonunye inibuka bobiniceura, Allah el si erena aik pum pil dona weik deiyok nang ap, tonda Musa sekamuk yupu peterena deiyok nang ap arye, ‘Anye bira opdeipsululume,’ nyabuka morobikirye, Yahudi yala kum nang, amutuku talina deiyok nang ati arepnamniyake.

¹⁹ Arepnikcopura, nong bola deice nalibuka ngilikna ap, maka tuluna ap, kama arye nong deice kulana ap, winipnikirye na nong dobuka, wanwanun yo deice arye opnamniyake. Opnikcopura, dipmanya ani, like winilye sum akunum uplyopura, Allah arye tamubuka kam bukeipnamnile,” Yesus arye nyabuk.

Yakobus ap, Yohanes ap, sik nin birye, Yesus ati morobuk yupu

²⁰ Yesus arye yupu nyabukba, Zebedeus el mapu bitinye Yakobus ap, Yohanes ap, sik nin ap, Yesus dam yayikce, akil arye, ‘Si erepnun’ tenen, gutam tuku dipdongobuka, Yesus ati morobuk.

²¹ Morobukba, Yesus arye nyabuk. “Yata ning patapmakilba morolyanmanilam do?” nyabuk. Nyabukura, akil arye nyabuk. “Naio, na patanmanilba, moropnukin ning ara, ance arepnamsilame,” nyabuka morobuk. Tonda, nyabuk, “Aning-aning nirya talibuka umince, weik ninye deiyoknye unalamak ara, na mapu bitinye bobuka, tonye bira an kwanim taruk tam, tonye bira an sirik taruk tam deipmince, ninye deiyok nang kipdeipminyeba, weik nang keptiring do?” nyabuka morobuk.

²² Morobukba, Yesus arye akil, el mapu bitinye, Yohanes ap, Yakobus ap ati, tamubuka nyabuk. “Anggun asipdenmanurum ning ara, deiyok moubuka kum tenepmarume. Na nong deice ikin ning weik deipnikiba, na donamne touk, anggun babye atonun akanye imun ning dopturum do? Tonda, na nong opnikceba dipnamne touk, anggun babye atonun dipturum do?” nyabuk. Yesus arye nyabukba, sik bitinye nang arye tamubuka nyaprik. “An donmaminya dipnalam touk, nun babye atonun winiptinimnye,” nyaprik.

²³ Nyaprikba, Yesus arye tamubuka nyabuk. “Na nong deice ikin ning deipnamniyaka ap, na donamna ap, dipnamna ap, nirya ara, aminyan talak anggun babye atonun wininamrum bukni, na tukwak mutuku tamubuka yanirye, aning-aning nirya talinamne talak, na kwanim taruk tam ap, sirik taruk tam ap bukuka weik deiyok nang una ati ara, narye aning kum arepsitinye. Narye anggun ninye deiyok nang una ati, kum dopdeipsitinye. Na dana-dana tam deiyok nang kibuka bulyanamak nang ara, na ni Allah arye tenyamukce, kintinibuka wipdeiamuk nanguk, aminyan talak anang wipdeiplyopura, na dam bulyanamdake,” Yesus arye nyabuk.

²⁴ Yakobus ap, Yohanes ap, sik nin birye morobuk ning, Yesus el mapu, sik 10 nang kekebikce, abitinye nang sik nin birye morobuk yupu ati, yu ubukba derebik.

²⁵ Derebikba, Yesus arye el mapu 12 nang nirya ati bulubuka, ila tamubuka ansinipdeibukce ayupu nyabuk. “Anggun nirya kekepnululume. Sik Yahudi yala kum nang arye, ‘Nun deiyok nang ani,’ tenenyak nang ara, adeiyok nang arye sik amu tam unyak ninye ati, yu upliba aninye yanibikirye, sik nong deice ikin ning weik delinyake. Tonda, sik sisinanye arye deice tam unyakce, sik amu tam ninye ati, kanye imun ning sik nong deice deibikirye, talya yupu nyaplobuka ubula dolonyake.

²⁶ Sik Yahudi yala kum ninye, sik deiyok nang ara wininyak bukni, na mapu anggunda aning atonun pia kum wininamlulume. Anggun na mapu ara wininamlume. Anggun awekmalum nang noutamak arye, yatanye do, ‘Nada teleb deiyoknye unamne’ tenen, deiyoknye atonun unamlanye bira, el kwit capu sik amu tam buklirye, sik kanye imun uplye ning ati, melinamle.

²⁷ Tonda, yatanye do, ‘Nada dunye atonun, mambul weiknye unamne,’ teneplinye bira, yuk ninye nirya ati, sik amu tam pil doplirye, sik talya melinanye atonun unamle.

²⁸ Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.

Yesus arye, asing kuamuk nang bitinye kwetebuk yupu

²⁹ Yesus nyabukba, sik nirya amutuku batakuka, bisik mapnin balamika ani, Yeriko mutuku bisibuka asik dolamikak batakuka, Yesus ap, yuk ninye yupa weike ap, banmek.

³⁰ Banmekbuk, asing kuamuk nang sik banmek bisik lilkwak bukmarik. Sik abukmarik talak ara, yuk nang arye, “Yesus yanganmale,” nyabuka laka nyabikba kekeprikce, weik yupu arye nyaprik. “Yesuso, anda Daud yala nang arye deipkiknye anya arye, bico tenepsimince, nun bitinye nang ati melipsilyame,” nyabuka moronmarik.

³¹ Nyabuka moronmarikba, awekmek nang weik arye, “Nyana batakrurume,” nyabuka yupu sekik. Yupu sekik bukni, sik asing kuamuk nang arye, ‘Yesus kekepnusil’ tenen, weik arye tonap, “Anda Daud yala nang arye deipkiknye bico tenebuka nun melipsilyame,” nyabuka weik arye moronmarik.

³² Moronmarikba, Yesus banmoka ani, kekebukopura, anang bitinye dam binuka tikukce, asing kuamuk nang abukmarik ati, ayupu nyabuk. “Anggunda, ‘Yata wiripsutu’ tenen, patapmasilba, moronmanurum do?” nyabuk. Nyabukura, asing kuamuk nang sik bitinye arye tamubuka nyaprik.

³³ “Naie, nun asing kuamsuk bukni, nun asing arye aning-aning teleb ubuka elina patanmasil ati, nun du koproba Yesus ati moropkiname,” nyaprik.

³⁴ Nyaprikba, Yesus arye abitinye nang ati bico tenebukce, el taruk arye sik asing talibukce kwetebuk. Yesus arye sik asing talipdeyukba, atalak aryuk, sik asing teleb ubukura, aning-aning nirya teleb ubuka eiprikce, Yesus bisik banmokba, sik bitinye nang arye aminyan dobolbirikura, Yesus ap neika banmek.