Matius 18 - Eipomek

Yesus arye, “Weik deiyoknye upnamak nang ani,” nyabuk yupu

¹ Kapernaum mutuku anyuk tuba unmek talak ara, Yesus el mapu arye Yesus ati asipdeyik. “Allah arye ninye weik lyeplirye, sik talima talinamle talak ara, nun kan-kan arye, yatanye tiklirye, minopce nun weik deiyoknye uplirye, melinamsil do?” nyabuka asipdeyik.

² Nyabuka asipdeyikba, Yesus sik bukmek kan-kan arye, mitik mi tonok yukubukba, yayukopura, Yesus arye amitik mi dobuka, tikeibukce, ayupu nyabuk.

³ Na pia dipkoprop nyapsine. ‘Nun weik nang upnamap’ tenen, kanye talima erelamunya ara, bataklulume. Mitik mapu ara, sik kanye talima nimalya arye unyakce, du nang yupu kekebuka ulamak touk, sik bidamnye kanye tamubuka kum umunyopura, Allah arye anggunti lyepsilirye, kum talinamsile. Lyepsilirye, im deice babye kum weknamlume.

⁴ Aning ati ara, Allah arye ninye mutuku-mutuku nirya noutamak arye, ninye weik lyeplirye, sik kanye talima talinamle talak ara, amitik mi atonun talima lamapdongobuka arye ulamice ninye ara, Allah arye sikti, minopce weik deiyok nang kipdeipnamle.

⁵ Tonda, yatanye do, yata kil do, amitik mi atonun ninye ati, bico tenenyakce, na si deice arye telebe nyabuka, aninye ati melilamikcopura, ara nati melinamniyake. Yuk ninye ati melibicopura, ara na melin atonun ati nyapsine.

⁶ Bukni, yata nang do nirya, sik malye winilamikce ning deice arye, atikmal mi atonun ninye, talima lamapdongobuka ninye arye na diba tenenyak bukni, sik malye nang arye malye winipbikceba, anang ton eibikirye, ‘Sik anang wininyak touk na babye ton atonun winipnun’ tenen, malye winibikcopura, Allah arye sik malye wininyak nang ati, minopce wenebuka opnamle. Ura yuk nang arye minopce malye ulamika deiyoknye bira, weik keil arye el ngang kirikuka, laut mekwen noutam dongoptingba, mekwen dipmimituopura, ara wenena kanam ninge. Bukni, anang atonun nang ara, sik malye wininyak deice arye, yuk nang ati, malye winilinyaka anya arye, Allah weik arye anang ati wenepnamla ara ikin weik upnamle. Allah arye malye ulina deiyok ninye weik arye wenepnamla ati nyapsine.

⁷ Yata ning do, malye winilisusulba, Allah diba tenelulum ning ara, batakalulume. Tukwak mutuku noutamak ara, malye winilisulul ning ara, aupnamla ati, se tenebuka kanye imun usulule. Atonun winin ning ara, pia tuba awininamle bukni, amalye winin ning winililamak deiyok nang ara, sik pia kanye imun upnamle. Yuk nang ati malye ulina deiyok nang ara, Allah weik arye wenepnamla ati nyapsine, Yesus arye nyabuk. Ayupu nyabukopura, ayupu ton nyabuk.

⁸ Anggun taruk arye talibuka malye winina do, anggun yan arye yanibuka bimunce, malye winina do, winibuka malye winipmunyopura, amalye winina ati talipmamunye taruk ap, yan arye malye unak bimunce malye winipmamunye ning ap ara, seklopnamlulume. Teleb ning ara, tonok taruk ap, tonok yan ap aupmasilye diparyuk, pil dobuka unamlulume. Ara kanam uka. Bukni, taruk bitinye ap, yan bitinye ap arye malye tuba winipmunyopura, Allah wenepsilirye, uku pia dilulak dopkwetepnamsil, ara pia mambule. Aning ara dipkoprop ikin upnamsile.

⁹ Tonda, anggun asing eipmunce, malye winipmunyopura, dana tam asing duk lukuka bataklulume. Teleb ning ara, tonok asing dem aryuk Allah arye ninye weik lyeplirye, sik kanye talima talinamlak, im deice binamlume. Ara telebe. Bukni, asing bitinye dimunce, malye tuba winipmunyopura, Allah weneplirye, uku din mutuku dopkwetepnamsil ati, pia mambule. Aning ara, dipkoprop ikine. Ati winina kume nyapsine. Yesus arye nyabuk. Nyabukce, ayupu tonap nyabuk.

¹⁰ Sik nirya arye, amitik mi kanye talima lamapdongobuka ulamle touk unyak ninye ati, ‘Aninye ara, sik mambul kume, daupmalye,’ tenena kume. Allah dib tenebuka, talima lamapdongobuka ulamice ninye ara, ‘Aninye ara mambul kume, daupmalye,’ teneluluma ati, anggun kanye moubuka unamlulume. Aninye ara, sik kalikna ati im deice pil don nang, malaikat, na ni Allah dam unyaka anya arye, ‘Anang ara mambul kume,’ tenena meme. Anang ara sik kalikna malaikat arye laka nyalbikiba, ‘Allah kekeplirye, anggunti wenepsilyak’ tenen, nyapmasina atia. Yesus arye nyabuk.

Yesus domon yupu deice arye, “Domba basam tonok ning tunim abuke,” nyabuk yupu

¹¹ Yesus arye ayupu akunum nyabukopura, winipmanto yupu ton nyabuk. “Nara, Ninye Mi Koprop Atonunye birye tunimalamle ning atonun ning, ‘Eibuka lyepnamne’ tenen, yase. Utenen yasa ati, winipmanto yupu ton nyapnusine,” Yesus arye el mapu ati nyabuk.

¹² Nyabukopura, ayupu ton nyabuk. “Anggun kanye ara, yata tenepmalum do? Tonoknye el domba basam 100 ulamice bukni, tonok ninguk yukak banmalya ani, tunimaplyopura, domba basam yupa weik 99 domba basam amutuku arye asukumuk batakuka, tunimap malye ning ati, ‘Amutuku noutamak ara, na domba tunimapmanil ning ara, daupmalye’ tenen, mangkau kilul do? Kume, domba basam deiyoknye birye, ‘Domba basam tunimap malye ning eipnun’ tenen, epra balule.

¹³ El domba basam 99 yukak kum banmakirye, tuba anyuk unmaca ati, mitikto kanye delilul bukni, tonok domba basam tunimap malye ning ati, eibuka balirye, akunum eiplyopura, pia weik arye kanye delilule.

¹⁴ Adomon yupu nyapmasin touk, anggun ni Allah im deice ululnye el kanye ara, amitik mi atonun, ninye tonoknye babye ton, ‘Na kum bataknamne,’ kum tunimanamake. Atonoknye babye ton lyepnamne. ‘Na mi kopropa unamle’ tenen, patapliba pia tenesulule. Allah arye tukwak ninye nirya ati, ‘Ninye tonok ton uku din mutuku bana ara, na like,’ tenelule.” Yesus arye el mapu 12 nang ati nyabuk.

Yesus arye, “Yuk dib tenen ninye arye anggunti malye winipsicopura, namin kinamlulume,” nyabuk yupu

¹⁵ Yesus arye nyabuk. “Dib tenenyak ninye, anggun ap neika ululum nang arye, anggunti malye winipsicopura, yuk nang ap kume, anggunce sik malye winipmasice nang damak bimunce, ‘Kao malye winipmanulum ning ara, anye,’ nyabuka, malye winipmasice ning ati, laka nyalbinamlulume. Malye kipdeipmasilinye kekepsilirye, ‘Telebe,’ nyapsilyopura, kanye deipdamunce, neika ansinibuka unamlulume.

¹⁶ Bukni, kum kekeplirye, ‘Telebe,’ kum nyapsilyopura, anggun kwit capu tonoknye do, bitinye nang do, dobuka neika bimunce, malye winipdeipsuknye, el dam binuka, yupu tonap lipsisikuka talinamlulume. Yuk nang ap yupu talilbinamluma deiyok ara, Allah yupu noutamak sekeiyamsuk touk, ‘Ninye bitinye nang do, ninye winilye nang do, anye bira, dipkoprop malye winibuke’ tenen, biktingce nyaptingopura, ayupu kekepnamlulume. ‘Tonoknye birye nyaplyopura, kum kekepnamlulume,’ nyabuka sekeiyamsuk touk winamlum tenen, nyapsine,” Yesus arye nyabuk.

¹⁷ “Anggun ap, yuk nang bitinyeto, winilyeto ap, binuka malye ulina deiyoknye biti yupu nyalbimunyeba, anye birye pia kum kekepsilyopura, anggun mutuku bukni, Allah dib tenenyak ninye, yuk ninye sik kekena ati, sik dam binuka ayupu lak nyalbinamlulume. Kekebikirye, anang nirya arye malye winipmasilinye biti, nyabice yupu ton kum kekepsilyopura, anggunce anye biti, utenenamlulume. ‘Anye bira, dipkoprop Allah diba tenena kum ninye, sik ulamak atonun ulule’ tenen, batakanamlulume. Tonda, amutuku talinyaka deiyok nang arena ati, ‘Pajak yo bok dona deiyok nang, sik malye ulamak touk, nunti malye ulina deiyoknye, el ton atonun ulule,’ tenenamlulume. Winibuka tenepmunce, amalye ulina deiyoknye ap neika kum unamlulume,” Yesus arye nyabuk.

¹⁸ Nyabukce, ayupu ton dukdongobuka nyabuk. “Lupkina meme, nati diba tenelulum ninye arye, anggun tukwak mutuku umunye talak ara, ‘Winina ara telebe,’ nyamunye ning ara, anggun ni Allah im deice ululnye ababye, ‘Aning telebe,’ nyanamle. Tonda, anggunce, ‘Winina ara malye ning,’ nyamunye ning ara, anggun ni Allah im deice ululnye ababye, ‘Aning malye ning,’ nyalule.

^19-20 Dan mutuku do nirya, nati dib teneplumce, na si deice arye bulupmunyopura, na babye anggun unmamunyakuk, neika unamabe. Na ap neika unamabe. Tonda neika unamaba ati, anggun Allah moronamlum talak ara, ninye bitinye nang kanye tonok tenebuka, moropmunyopura, na ni Allah im deice ululnye kekepsilirye, anggun moropmamunye touk melinamsile,” Yesus arye el mapu 12 nang ati nyabuk.

Tonoknye, el malye winibuknye biti, kum namin kibukce, tamubuka wenebuk ati nyabuk yupu

²¹ Yesus arye ayupu nyabukba, Peterus arye, Yesus ati asipdeyuk. “Naie, yuk dib tenenanye bukni, nati malye upnilyopura, like yata barye talak arye namin kipnamne do? Like tonok talak arye dipdongobuka, tekbarye namin kipnamne do?” nyabuka asipdeyuk.

²² Asipdeyukbuk, Yesus arye tamubuka nyabuk. “Ance, ‘Like tekbarye talakuk anye namin kipnirye, bataknamne,’ tenena kume. An kwit dib tenenanye birye malye winipkilyeba, namin kipnamlam ning ara, like yupa nirya ara, like yupa tekbarye, ila tonap tekbarye, ara like 77 kali deice arye namin kipnamlame. Ara, malye winipsikce ning ati, batakna kumce, pia namin kinauk wininamlume,” Yesus arye nyabuk.

²³ Yesus nyabukce ayupu ton nyabuk. Allah arye ninye weik lyeplirye, anggun talima talinamsila atonun ning ati, winipmanto yupu nyapnusine. Ayupu ara, ani. Tonok mutuku weik ninye deiyoknye birye, el pil don nang tia doprobik yo bok kopropa ara, ‘Adip aryuk ayo bok tamubuka arepnikiba sirya daknune,’ tenebuk talak ara, el pil don nang deiyok koubukba, yayikopura, deiyok koubuk.

²⁴ Deiyok koubuk talak ara, el melin nang arye, tonoknye dobuka el dam boyayik. Anye bira, el deiyoknye yo bok yupa pia weik dopropmoknye el dam boyayik.

²⁵ El yo bok tia dopropmoknye bira, tamubuka kum arepmanto ubuka ati, anang deiyoknye birye anye biti nyabuk. “Anye el nong ap, el kil ap, el mapu ap, el ning nirya ap dobuka, yuk nang dam dekmunce, ayo bok ara, anye tia talak ati dopromnuk yo bok ati, tamubuka pununa ati arepnamnilyame,” nyabuk.

²⁶ Nyabukura, ayo bok dopropmoknye birye, gutam tuku dipdongobukce weik arye morobuk. “Naie batakmaniminyeba, aminyan ara na dopropse yo bok nirya punubuka arepnamkinca,” nyabuka morobuk.

²⁷ Nyabuka morobukopura, aninye deiyoknye birye elti, bico tenebukce, ‘Dauplye,’ tenebuka el dopropmok yo bok ati mangkau kibuk. Mangkau kibukce, “Na ti tamubuka arena kume, talya mangkau asa dabilyame,” nyabukba, biyuk.

²⁸ Yo bok weik dopropmoknye biyuk bukni, el ap neika pil dolamdiknye, anye el yo bok pia mitika aryuk tia dopromuka ati, el ngang talipnurubuka long-long abukopura, yu asa arye, ayupu nyabuk. “Ance tia dopromlum yo bok ara, adiparyuk arepnilyame,” nyabuk.

²⁹ Nyabukura, el ap pil neika dolamdiknye birye, gutam tuku dipdongobuka weik arye morobuk. “Se nai kwito, batakmaniminyeba, aminyan ara, narye tia talak ati dopropkise yo bok nirya ara, punubuka arepnamkinca,” nyabuk.

³⁰ Nyapdeyukba, anye bira el kwit birye nyanmok yupu kekena kum diparyuk, yuk nang ati nyapdeibukba, anye dobukabukce, wenena aik dongobikce, nyabik. “Anda asukumuk ulaminya ani, ance tia talak ati doproplum yo bok aning nirya tamubuka arepmince akunum sirya dakminyopura, batakdongopnamkiyabe. Kumopura, wenena aik pumuk, apia unamlame,” nyabik.

³¹ Yuk pil don nang arye, winibik ning eibikce bico ubukba, sik deiyoknye el dam lak nyalbiyik.

³² Binuka lak nyabikba, adeiyoknye birye, el yo bok weik tia dopropmoknye biti, yukubukba yayukopura, anye biti nyabuk. “Ance na yo bok weik tia dopromlum bukni, weik arye moropnulama ati, namin kipkisirye, ‘Ayo bok ara, tamubuka kum arepnamnilyame, daupmalye,’ nyapkise.

³³ Narye anti bico tenebuka mangkau kiyamkisi touk, an yo bok tia dopropkuknye biti, atonun namin kipmatum bukni, bico tenebuka kum namin kipluma ara, teleb winiplum do?” nyabuk.

³⁴ Nyabukce, adeiyoknye birye, pia yu ubukba, el yo bok tia talak ati dopropmoknye dobuka, wenena aik deiyok nang aribukba, anang arye el nong dobuka wenen aik dongobik. Dongobikce, “Aulamika ani, aning nirya akunum sirya dakuka akunum tamubuka areplyopura, batakdongobibiba, bitue. Kumopura kume,” nyapdeibik. Yesus arye el mapu ati nyabuk.

³⁵ Ayupu nyabukopura, ayupu tonap, nyabuk. “Winipmanto yupu anyapmasin touk, anggun kayapu nang, yuk dib tenena nang malye upsikiba, kum namin kipmunyopura, na ni Allah im deice ululnye ababye, elce anggun malye winimunye ning ati, ‘Dauplye’ tenen, kum namin kilinamsile, kume kum daneipnamsile.” Yesus arye nyabuk.