Matius 17 - Eipomek

Yesus el urasin dirina weik ubuk yupu

¹ Ayupu nyabukopura, daulamika ani, like naku barye sum akunum mabikopura, Yesus arye winilye nanguk dobuka, weik mutuku dup welebik. Yesus ap mutuku dup welebik nang si ara, Peterus ap, Yakobus ap, el weit kopropa Yohanes ap, Yesus ap, sikuk amutuku welepmekce eiunmek.

² Sik amutuku dup welebikopura, el mapu arye adinmek bukni, Yesus ara el urasin yuk ubuk. Yesus el urasin yuk dayukce, keting deiplirye, til pia daklamle touk dirina weik ubuk. El urasin dirina weik ubuka atonun, el baju kurubukce, dirina weik ubuk.

³ Winibukopura, sik awinilye nang tikmek dam arye, minop talak ulamrik nang ara, nabi Elia ap, Musa ap, tikilyarikba, Yesus ap, Musa ap, nabi Elia ap, neika tikikce, yupu talipmek.

⁴ Sik ayupu talipmek talakuk, Peterus arye Yesus ati nyabuk. “Naie, nun aunmaba ara, pia teleb ati, nun winilye nang arye bara asik ton doptibye. Ton aik ara anti, ton aik ara Musa biti, ton aik ara nabi Elia biti doptibirye, asukumuk uptibye,” Peterus arye nyabuk.

⁵ Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.

⁶ Allah arye nyabukba, Yesus el mapu awinilye nang kekebikce, ilil weik ubukba, kanupdongobikce tukwak amubuka mabik.

⁷ Winibik bukni, Yesus el taruk arye el mapu sik nong talibukce, nyabuk, “Anggun ilil una meme. Anggun nirya buklulume,” Yesus arye nyabuk.

⁸ Yesus arye ayupu nyabukura, adiparyuk sik awinilye nang arye, siktikmekak dana-dana dipdeyik bukni, ninye yuk nang ara, nabi Elia ap, Musa ap kum eibik. Sik winilye nang ap, Yesus ap, sikuk aunmek.

⁹ Amutuku dup arye tamubuka kouluka yangamek talak ara, Yesus arye awinibuk ning nirya, ‘Yuk nang ati laka nyalbikcak’ tenen, yupu sekuk. “Nara, Ninye Mi Koprop Atonunye opnikiba, dipnirye kam buknyopura, amutuku deice winipmalba eipmalum ning ara, aminyan talak laka nyalbinamlum bukni, wini talak ara yuk ninye ati laka nyalbana kume,” nyabuka yupu sekuk.

¹⁰ Aminyan ara, sik anang arye Yesus ati asipdeyik. “Allah arye, ‘Wininamlulume, aning ara kum wininamlulume,’ nyapdeibukba, Musa arye sekeiyamsuk yupu peterena deiyok nang arye, ‘Elia minopce yanamle bukni, aminyan sirya talak ara, Allah arye dopdeipnamlanye, Ninye Lyena Deiyoknye, Mesias nyanyaknye bira, nabi Elia aminyan yanamle,’ nyanyak yupu ara, yata deiyok ati nyanyak do?” nyabuka asipdeyik. Asipdeyikbuk, Yesus arye tamubuka nyabuk.

¹¹ “Sikce, ‘Nabi Elia minopce yanmalirye, aning-aning nirya lipsisikuka kintinipdelinamle,’ nyanyaka ara dipkoprop nyanyake.

¹² Bukni, na dipkoprop nyapsine. Wini talak ara, nabi Elia ulamuka atonunye akunum yayuke. Minop talak arye, ‘Elia yanamle,’ nyalamik ara, Yohanes yanamuka ati nyalamik. Nyalamik touk, Yohanes akunum yayuk bukni, wini talak unyak ninye ara, kum bikik. Kum bikika ati, Allah yupu laka nyalamik nang, sik nabi nang arye, Allah yupu deice sekamik touk, wini talak ara amutuku unyak deiyok nang arye anye Yohanes biti, ‘Optibye,’ tenebuka patalamuka atonun akunum winibik. Anye, elti, winibik touk, na babye, Ninye Mi Koprop Atonunye ikin ning na nong deice deipnikirye, sikce obuka bataknamniyake,” Yesus arye nyabuk.

¹³ Nyabukopura, el mapu arye, ‘E, nabi Elia atonunye nyapmala ara, Yohanes arye dib tenen, ninye dobuka mek dongolamuknye biti, nyapmasila’ tenen, kel kibik.

Yesus arye, isa talyamuk mi, kwetebuk yupu

¹⁴ Sik welepmek mutuku deice arye koulukikce, amutuku amu tam bataka binmek nang unmeka dam yayik. Yaikopura, Yesus el mapu tupne barye bataka binmek nang ap, yuk nang ap, unmekak yayik.

¹⁵ Atikmek nang kan-kan tonoknye Yesus dam yayukce elti, ‘Si erebuka kipnun’ tenen, gutam tuku dipdongobukce, ayupu nyabuk. “Naie, na mi ara isa talyamuka deice arye, pia kanye imun upmalce, donmale. Isa talilye talak nirya ara, isa mikip arye dobuka, tuku deice pouklopliba, si ula weik sakalule. Tonda, isa talyamukce, ‘Uku pum ap, mekwen pum ap, opnamle’ tenen, dongolbalule.

¹⁶ Winilya ati, ‘An mapu arye, aisa yakdonoknamak’ tenen, moropman bukni, sikce aisa kum yakdonokmake.” Isa talyamuk mi el li birye Yesus ati nyabuk.

¹⁷ Nyabukura, Yesus ayupu kekebukce, atikmek nang nirya ati lik ubukba, ayupu nyabuk. “Anggun atalak umunye ninye ara, dib kum tenelulum ninye anya arye, pia malye winilulume. Na lik ati, ‘Yata barye talak arye anggun dam tuba unamne do?’ Tonda, ‘Teleb unamak do?’ tenen, batakna kumce, yata barye talak arye pia dinamsin do? Ati, isa talyamuk mi ara, dobuka na dam boyalulume,” Yesus arye nyabuk.

¹⁸ Yesus arye nyabuka ati, anang arye ami dobuka, Yesus dam boyayik. Boyayikopura, ami talyamuk isa ati, Yesus arye nyabuk. “Ami talimak talipluma batakmince, kutukuka bilyame,” nyabuka yakwetebukopura, atalak aryuk aisa ami talimak arye kutukuka biyuk. Biyukopura, ami teleb ubuk.

¹⁹ Aminyan ara, Yesus ap, el mapu 12 nang ap, sik yuk aik pum wekik talak ara, el mapu arye asipdeyik. “Naie, ami talyamuk isa ara, nunce yakwetepmanto kum upmaba ara, deiyok yata arye do?” nyabuka asipdeyik.

^20-21 Asipdeyikba, Yesus arye tamubuka nyabuk. “Anggunce aisa kum yakwetepmanto upmaluma ara, nati dib tenepnuluma ara, pia mitik anun upsuk arya. Sumik duk pia mitik ning bukni, anggunce nati dib tenepmanulum ning ara, amitik ning sumik duk atonun dib tenepnutumura, anggunce omutuku ati, ‘An bidamnye aryuk erepdakuka, anyaka arye otam delilbilyame,’ nyaptumba, amutuku el bidamnye aryuk erebuka, otam delilbitue. Anyapmasin touk winiptumopura, ‘Aning-aning nirya winipnuyap’ tenen, moroptumura, winiptue. Dib tenepnumunce, moropnumunyopura, kum winipmanto ning ara, ikin kum upsutue. Anggunce moroptum touk uptue.” Yesus arye el mapu 12 nang ati nyabuk.

²² Yesus ap, el mapu ap, amutuku batakuka, Galilea tam noutamak banmek. Ton atalak noutamak arye ayupu nyabuk. “Nara, Ninye Mi Koprop Atonunye bira, opnamniyake. Ara, tonoknye birye, ‘Yuk nang arye Yesus opnamak’ tenen, inipdakuka yalyeura, sik anang arye na dobuka opnamniyake.

²³ Opnikcopura, dipmanya ani, like winilye sum akunum uplyopura, tamubuka kam buknamne,” Yesus arye el mapu ati laka nyanmok. Lak nyamokba, Yesus el mapu 12 nang kekebikce, ‘Se nun ni Yesus opnamake’ tenen, bico ubukba, imun kanye bobik.

Yesus arye, ninye deiyok nang pajak yo bok arena ati, nyabuk yupu

²⁴ Yesus ap, el mapu ap, amutuku batakuka bisik mapnin balamika ani, Kapernaum mutuku biyikopura, Yahudi yala nang sik Allah ati arilbalamik aik wekelban ati, pajak yo bok dona deiyok nang, Peterus el dam yayikce asipdeyik. “An peterena deiyoknye Yesus arye, Allah arena ap, el si erena ap ati, anyaik bana ati, dekna pajak yo bok arelul do, kum arelul do? Ara, Allah si erena aik talina deiyok nang arye, ‘Anyaik bana ati, pajak yo bok areplulume,’ nyapsikce talak ara, Yesus arye arelul do, kum do?” nyabuka asipdeyik.

²⁵ Asipdeyikbuk, Peterus arye tamubuka nyabuk. “Kume, sikce nyapsikce talak ara arelule,” nyabukba, anang kekebikce, biyik. Biyikopura, Peterus arye Yesus unmok aik wekuk. Wekukura, adiparyuk Yesus arye minopce nyabuk. “Simono anda yata ning tenepmalam do? Mutuku-mutuku nirya weik ninye deiyok nang arye, pajak yo bok dolonyak ning ara, sik mapu koprop arye arenyakba dolonyak do? Sik yuk talye nang aryuk arenyakba dolonyak do?” nyabuka asipdeyuk.

²⁶ Yesus arye ayupu nyabuka asipdeyukba, Peterus arye tamubuka nyabuk. “Kume sik mapu koprop arye kum arenyake, yuk talye nang aryuk arenyakba dolonyake,” nyabuk. Nyabukura, Yesus arye, “Dipkoprop nyaplame. Weik ninye deiyoknye el mapu koprop sikcuk pajak yo bok kum arenyake. Aning ati ara, Allah el Mi Koprop na ap, ara anggunda na mapu ap, Allah arena aik bana ati dololamak yo bok, nunce kum arebibyopura, aning babye telebuka.

²⁷ Bukni, ayo bok dona deiyok nang arye, nunti malye tenepsikcak tenen ati, anda Galilea mekwen lilkwa bimince, mekin bal youn ning dobuka, mekwen pum dongopminba, mekin bal tonok youpminyopura, amekin bal si bama baktalibuka dileminba, derakma keil uang tonok awaplyopura, dopropnulyame. Akeil uang ara, nun bitinye nang anyaik wekelbinunama dekna ati, akil uang deklyame. Akeil uang ara, dopropmince Allah el si erena aik deiyok nang ati, arel binulyame,” Yesus arye nyabuk.