Matius 16 - Eipomek

‘Yesus arye, ninye winipmanto kum pil dopsutue’ tenen, morobik yupu

¹ Magadan mutuku binuka daunmek bukni, Farisi nang ap, Saduki nang ap, Yesus dam yayik. Yesus dam yayikce, ‘Yesus ara, Allah el mikip deice arye dipkoprop apil dolul do, kum do?’ tenen, Yesus asipdeyikce winibik. Sikce nyabik. “ ‘Allah arye dopdeibukba, el mikip deice arye pil dolule,’ tenepnukiyaba ati, ninye kum winipmanto ning ap, sirya dakna pil ap, dopsilyame. Aning dopminyeba eibipyeura, dib tenepkitibye,” nyabuka asibuka, Yesus ati piripdeyik.

² Piripdeyikba, Yesus arye tamubuka nyabuk. “Anggunda, sintam uplye talak im teleb uplirye, mutuku sirye dirina aklyopura, ‘Ambusum dou mapnamale,’ nyalulume.

³ Tonda, inin talak im sukuplirye, dua kunuklyopura, ‘Arup ap, ambusum ning ap, mok deneplirye, cenamle,’ nyalulume. Mok cena ap, dou mana ap ati ara, mutuku urasin eipmunce kel kilulum bukni, na wininye ning ap, peterenun yupu ap, ‘Deiyok ani’ tenen, pia dipkoprop kum bikilulume.” Yesus arye nyabuk.

⁴ Yesus arye anang ati, lik tenebukce, yupu nyabuk, “E, atalak winilul ning ara, ‘Allah el mikip deice arye dipkoprop pil dolul do?’ tenenululume. Yata ati, ‘Ninye winipmanto kum pil dopsutu’ tenen, asipdenmanulumce, winipdenmanulum do? Dipkoprop nyapsine, wini talak ululum ninye ara, malye-malyeuk winimunce, Allah ati batakuka yuk ninguk talibuka ululum ninye ati ara, anggunda ninye domice kilapu batakuka, talye kilapu yoldalamak atonun ululum atia. Anggunce, ‘El Yesus ara, Allah arye dopdeibuk tenepnululume’ tenen, ninye winipmanto kum pil dopnirye, pitin kum kipdeipnamsine. Allah yupu laka nyalamuknye Yunus arye winilamuk ning atonun winipnamasin ati, akunuma. Yuk mambul pil, ninye kum winipmanto ning ton pil kum dopnamsine.” Yesus arye sik Farisi nang ap, Saduki nang ap ati nyabuk. Nyabukce adiparyuk anang abatakuka, el mapu ap, mek lia yo wekuka bulbiyikce, Galilea mekwen deice banmeka ani, mekwen kup-kup otam biyik.

Yesus arye el mapu ati, “Farisi nang wininyak ning eipmunce, adeice arye, malye winipmunyak anya arye, moubuka unamlulume,” nyabuk yupu

⁵ Sik Galilea mekwen, ‘Atam arye, otam binuyap’ tenen, sik binuyik talak ara, Yesus el mapu ara, sik din ning roti kum libikce, luba kibuka biyik. Luba kibik ati, roti kum libikce, talye kanye bobuka, urdem panabuka, mek lia yo deice bukuka biyik.

⁶ Mek liya yo deice bukuka banmek talak ara, Yesus arye el mapu 12 nang ati nyabuk. “Farisi nang ap, sik Saduki nang ap, sik malye wininyak ning ara, mitik anunuk nyabikiba, yuk nang kekebikce deice arye, malye winin ning weik wininyaka anya arye, roti nena deiyok ning ara, roti bun mitik anunuk dongonyak bukni, weik arye balamle touk ulule. Ulula ati, sik Farisi nang ap, Saduki nang ap, sik roti nena atonun ara, ‘Aning arye malye winisulule’ tenen, pia kalikuka dinamlulume,” nyabuk.

⁷ Yesus arye roti nen ning yupu nyabuka ati, Yesus el mapu kekebikce, ‘Ayupu nong anye’ tenen, moubuka kum tenebik ati, ‘Deiyok dan do?’ tenen, sik biyuk yupu talinmek. Yupu talilanmekce, “Ara nun roti din ning libuka kum boyanmapa ati, ayupu nyapmasile,” tenebikce nyapdayik.

⁸ Sik yupu talipdanmek ning ara, Yesus kekebukce, sikti, nyabuk. “Anggunce, ‘Se, Roti din ning kum lipmaba ati, nyapmasile,’ nyapmaluma ara, yata ati do? Anggun asing elina ap, amul kekena ap, moubuka kum tenepmalumce nyanmalum do? Anggunce nati mitik anunuk dib tenepmanulum nang atia. Mitik anunuk diba tenepnulum deice arye, na nyasinye yupu kum kekepmanto nang unmalum do?

⁹ Asing ap, amul ap, aupmasilye bukni, moubuka kum elimunce, na nyanye yupu ati, ‘Deiyok ani’ tenen, kum kekenululum do? Na min arye, ninye kum winipmanto pil dopmasi ning ara, kum biklum arye do? Yupa weik 5.000 ninye wekmekbuk, roti din ning pamubaryeuk aupmok bukni, narye, tobuka arepsibuk, akunum dibikopura, anggunce weik aling arye, din kwal bulubukaplumce, yata barye aling libuka deiplum do? Akunum luba kiplum do?” nyabuka, Yesus arye el mapu ati asipdeyuk.

¹⁰ Nyabukopura, Yesus arye tamubuka ila tonap asipdeyuk. “Yupa weik 4.000 ninye wekmekba, roti din ning tekbaryeuk upmokbuk, narye tobuka arepsiba, dibikce batakik ning ara, weik aling arye, yata barye libuka deiplum do? Akunum luba kiplum do?” nyabuka asipdeyuk.

¹¹ Asipdeyukopura, ayupu ton nyabuk. “Na winipse ning nirya akunum eipluma ati, yata deiyok ati, walwal arye nyanmalum do? Anggunce, ‘E, roti kum dinmaba anya arye, Farisi nang sik roti nen ning ati, malye upsilyak’ tenen, moubuka kalikildanamlulume, nyapmasile, tenepmaluma ara, yata ati do? Talya din ning roti nena deiyok ning ati kum nyapsine. Aning ara kume. Sik Farisi nang ap, Saduki nang ap arye, sik malye wininyak ning ara, roti nena deiyok ning nelamle touk un ning ati ayupu nyapsine,” Yesus arye el mapu ati nyabuk.

¹² Ayupu nyabukopura, adeice arye el mapu moubuka kel kibik. Sikce tenebik. Ura, winira bikmabe. Ninye arye roti dana ati, roti nena deiyok ning, mitik anun dobuka, roti bun noutamak dongobikiba, weik arye balya ani, roti weik arye nelamle touk, sik Farisi nang ap, Saduki nang ap, kanye talima malye tenenyakce, peteresinyak yupu, ‘Mitika ababye kekepmunce, sik kanye tenen ning nirya babye, malye upsilyak’ tenen, nyapmasile. Aning ati ara, ‘Moubuka umunce, anang sik yupu kum kekenamlulume’ tenen, nyapmasile. ‘Talya roti nena deiyok ning ati kum nyapmasile’ tenen, moubuka kel bikik.

Peterus arye Yesus ati, “Anda Allah arye, ‘Ninye weik lyepnamle’ tenen, weipdeipkuknye Kristus ulyame,” nyabuk yupu

¹³ Amutuku batakuka welebikce, bisik mapnin balamika ani, Kaisarea Pilipi mutuku biyik. Biyikopura, Yesus ap, el mapu 12 nang ap arye amutuku noutamak, yupu talipmek talak ara, ayupu ton asipdeyuk. Yesus arye el mapu ati asipdeyuk. “Yuk nang arye nada Ninye Mi Koprop Atonunye ati, yatanye teneninyakce, nyaninyak do?” nyabuk.

¹⁴ Nyabukura, sik nirya arye tamubuka nyabik. Ton nang ara, “Yohanes Pembaptis” nyakinyake, ton nang ara, “Ara Allah yupu laka nyalamuknye nabi Elia ulule,” nyakinyake, ton nang ara, “Allah el yupu ap, elce aminyan talak winipnamle ning ati laka nyananye ulule,” nyakinyake. Ton nang ara, “Anye bira, Allah yupu laka nyalamuknye, nabi Yeremia dibuk bukni, wini talak ila tamubuka kam bukuka daulul darepa,” nyakinyake. Yesus el mapu arye, Yesus ati nyabik.

¹⁵ Nyabikopura, Yesus arye el mapu 12 nang ati tamubuka asipdeyuk. “Anang nirya ara, nyaninyak bukni, anggun na wibuka deipsise mapu ara, nati, yatanye tenenululumce nyanululum do?” nyabuka asipdeyuk.

¹⁶ Asipdeyukba, Simon Peterus arye tamubuka nyabuk. “Nai Yesuso, ‘Ninye mutuku-mutuku nirya noutamak, ninye weik lyeplirye, sik kanye talima talinamle’ tenen, Allah arye wipdeiamkuknye, anda Kristus ulyame. Anda, Allah el Mi Koprop ulyame,” nyabuk.

¹⁷ Peterus arye nyabukba, Yesus arye tamubuka nyabuk. “Anyapmanilama ara, ninye arye kum peterepkike. Na ni Allah im deice ululnye birye, laka kibuka peterepkukba, kel biklume. Aning ati ara Simono, an ni Yona birye deipkuknye bira, telebuk unamlyame.

¹⁸ Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.

¹⁹ Tonda, ‘Ninye weknuyak’ tenen, aik deiyoknye birye buplan kukne ning kunci dobuka, buplan kukeipliba weklamak touk, narye Peterus anda, buplan kukna deiyoknye kipdeipkine. Ara, ‘Allah arye ninye mutuku-mutuku nirya noutamak ninye weik lyeplirye, sik kanye talima talinamsiak, ninye ayala-yala nirya wektinge’ tenen, narye anti kunci atonun ning, deiyok ning akunum arepkine. Ara, ance na yupu peterepminya deice arye, dib tenebikirye, na unyak im deice yanganamake. Ance, ‘Winina meme,’ nyabuka yupu seknalam yupu ara, im deice babye, Allah arye ayupu atonun ati, akunum yupu sekelule. Aning atonun ance, ‘Winina telebe,’ nyapnalam yupu ara, im deice babye, Allah arye atonun, ‘Winina telebe,’ nyabuka akunum nyalule.” Yesus arye Peterus ati nyabuk. ‘Nun song’

²⁰ Nyabukopura, Yesus arye sik nirya ati ayupu nyabuk. “Nara, ninye mutuku-mutuku nirya noutamak arye, ninye weik lyepnirye sik talima talinamne. Nara, weik deiyoknye, Ninye Lyena Deiyoknye, Mesias nyalamaknye, na aunune. Bukni, wini talak ara yuk nang ati, ayupu laka min kum nyalbinamlulume,” nyapdeibuk. Yesus arye el mapu ati ayupu nyapdeibuk.

Yesus arye, el aminyan opnamik ning ati, laka nyabuk yupu

²¹ Yesus arye anyapmok yupu moupdeibukce, el nong deice ikin ning deipnamik ning ap, kanye imun ning upnamuk ning ap, el mapu 12 nang ati, deiyok koubuka peterenmokce nyabuk. “Nara, Ninye Mi Koprop Atonunye unune. Narye Yerusalem mutuku binyopura, sik Yahudi yala nang sik deiyok nang ap, Allah arena ati deiyok nang ap, Allah arye, ‘Winamlulume, aning kum wininamlulume,’ nyapdeibukba, Musa arye sekeiyamsuk yupu, mem yupu peterena deiyok nang ap, anang nirya arye nati, ‘Nun like’ tenen, bataknikirye, ikin ning weik na nong deice deipnikirye opnamniyake. Opnikcopura, dipmanyani, weipnikcopura, like winilye sum arye, ila tamubuka Allah arye kam bukeinamnile,” nyabuk.

²² Ayupu nyabuk ning ara, lak akarye nyamokba, Peterus arye Yesus talibuka yukak biyukce, anyanmok yupu ati yupu sekuk. “Naie, aning ara pia kume. ‘Winibuka winipnikirye, opnamniyake,’ nyanmasilama ara, pia kum winipnamkiyake,” nyabuka wenebukce, yupu sekuk.

²³ Peterus ap, Yesus ap, yukak binmarikce, Peterus arye yupu sekukopura, Yesus arye tamubuka, Peterus ati nyabuk. “Peterus anda yukak bilyame. Na kum dinukine. Allah arye tenyamnuk touk, akunum nyapdeiamnukba, ‘Wininamne,’ tenepse ning, ance yukupmanilama anya arye, winira Isa Mutuku Dongonye atonun wininmanilame. Allah arye patapliba, tenelul ning kum bukni, talya nang arye pataplyeba tenelamak touk, tenepmalamce ayupu nyapmanilame,” Yesus arye Peterus ati nyabuk.

²⁴ Nyabukce, el yupu kekebuka dobolbalamik nang ap, abulubuka wekmek nang nirya ap ati, “Na dam yalulume,” nyabukce ayupu ton nyanmok. Yata kil do, yatanye do, nati diba tenepnikirye, na dobolyanganamniyak nang ara, sik ning atibuk, ‘Aning mambule,’ kum tenenamake. Sik wenebikiba dipnamak nanguk, wanwanun yo bobuka talya mangkau asa balamikirye, ‘Akunuma, anang arye oplopnamniaka ara telebuka, na kam unmana ara mambul kume,’ tenenyak touk, na mapu ababye, ‘Yu nang arye opnamniak do?’ tenena kumce, sik kam un ning ap, sik patalye ning ap atibuk, kum tenenamake. Yesus dib tenenyaka ning ati ara, yuk nang arye opnukcopura, ‘Ara mambul,’ kum tenenamake. Na yupu uk kekebuka dobolyanganamniake.

²⁵ Aning ati ara, yata kil do, yatanye do, nati diba tenenyakba, yuk nang arye, “Opnuyabe,” nyabikiba, ilil upliba, ‘Nun kam una ap, nun bidamnye ati patapsilye ning ap, aninguk mambule. Na tenepce,’ tenebuka batakaninyak ninye ara, aminyan talak Allah arye weneplirye, opliba, dibikcopura, ila tamubuka tonap, sik kam bukuka pia kum unamake. Bukni, nati diba tenepnica, deice arye, yuk nang arye obikiba, dipnamak ninye ap, na yupu dobuka peterelbica ati, opnamak ninye ara, sik nong dipnamak bukni, sik kanye ara, na ap neika pia kam unamabe. Allah arye aninye ila tamubuka kam bukdeipliba, aninye ara pia kam unamake.

²⁶ Tonoknye birye, aning-aning yala weik talyamtuba, nati diba kum tenyamnuturyuk dipturye, uku din mutuku bitopura, atalyamtu ning nirya auamtu bukni, el kanya babye dipmatua ati, el talyamtu ning deice arye lyepmimitu do? El talyamtu ning arye, elti, ila tamubuka teleb kipdeipmimitu do? Ara, pia kume. Aning nirya arye teleb ubuka kum deiptue. Anggun kam una deiyok ning ap, anggun kanya ap ara, yatato ning deice arye dekuka doproptum do? Kume, pia kam una ara, dekmanto kum ning atia.

²⁷ Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.

²⁸ Nyabukopura, ayupu ton nyabuk. “Na dipkoprop yupu nyapsine. Anggun mening dam atikmalum nang kan-kan ara, ton nang ara, ‘Allah arye mutuku-mutuku nirya noutamak arye, ninye weik lyeplirye, el mikip deice sik talima talinamle’ tenen, nara Ninye Mi Koprop Atonunye yanamne talak min kum uplye talak ara, kum dipnamake. Sik aninye ara awinipnamle ning eipnamake.” Yesus arye awekmek ninye ati nyabuk.