Matius 15 - Eipomek

Yesus arye ninye talima malye winina ati, nyabuk yupu

¹ Ura, Farisi nang ap, yuk Yahudi yala nang nirya ap ara, sik din talye mangkau asa kum dilamik. Sikda, Musa sekamukce nyapdeiamuk touk, ‘Kanye talima malye upsilyak’ tenen, taruk mek liknaryuk dilamik. Sik apu yapu, Yahudi yala sik deiyok nang winilamik touk, sik babye aninguk talibuka ulamik. Aning-aning nirya tenelamika ati, tonok talak ara Farisi nang ap, Allah arye, ‘Wininamlulume, aning ara kum wininamlulume,’ nyapdeibukba Musa arye sekeiamuk yupu peterena deiyok nang ap, Yerusalem mutuku anyuk Yesus ulamuk aik bulubuka dilyayik. Dinmek bukni, Yesus el yupu kekebuka dobolbalamik nang ara, din dinmek.

² Sik din dinmek talak ara, Farisi nang arye, ‘Kanye talima malye upsilyak’ tenen, taruk mek liklamik touk, Yesus el mapu ara taruk mek kum ilikmekce talye urdem dinmeka ati, Farisi nang arye Yesus ati nyabik. “An yupu kekebuka dobolbakikce nang ara, nun apu yapu arye mem yupu nyapdeiamsika atonun, kum wininyake. Sikda, taruk mek ilikna kumce, talye urdem dinmake. Winibuka dinmak deice arye, nun apu yapu nyapdeiamsik yupu yanipmaka ara, yata deiyok ati do?” nyabik.

³ Nyabikopura, Yesus arye tamubuka nyabuk. Sik Farisi nang ara, Allah elce “Wininamlulume” nyalilamuk ati, sik Allah yupu laka nyalamik nang sekamik yupu ara, akunum bataklume. Anggunda, talye ninye arye peterelamik ning yupu uk talibuka winilulum ning ara, yata ati do? Anggunda Allah elce, “Wininamlulume,” nyalilamuk yupu bataklumce, ‘Nun apu yapu peterelamik ning, ayupu uk talibuka wininamabe,’ tenemunce winimunye ning ara, laka nyapnusine.

⁴ Ara, Allah arye nyapdeibukba, Musa arye ayupu sekiamuk. ‘Anggun ni yapu ap, anggun nin yapu ap, kibuka kil-kil asa arye melinamlulume. Yata kil do, yatanye do, anggun ni yapu ap, anggun nin yapu ap ati, malye yupu nyabikcopura, wenebuka opnamlulume.’ Musa arye nyapdeiamuk. (Keluaran 20:12; 21:17)

⁵ Musa arye nyapdeiamuk bukni, sik Farisi nang arye nyanyake. Tonoknye birye el li ap, el lin ap ati, “Aning-aning nirya arepkitinye bukni, Allah el si erena ati arepnamna ati, aning nirya ara melibuka kum arepnusine,” nyaptue. Nyapturye, el li ap, el lin ap, kum arelantuopura, anggun Farisi nang ara, “Aning ara telebe, Allah ati arena ara, weik mambul anya arye, anggun nin yapu ap, anggun ni yapu ap ati, melibuka arena ara dauplule,” nyalulume.

⁶ Ayupu nyamunya deice arye, Allah yupu yaniptabuka malye kilulume. Anggun apu yapu peterelamik ning kekelamlumce, peteremunya deice arye, Allah nyalilamuk yupu nirya yaniltamunce, malye-malyeuk winilulume. Yesus arye sik Farisi nang ati nyabuk.

⁷ Nyabukopura, ayupu ton nyabuk. “Allah el yupu laka nyalamuknye Yesaya arye anggunti nyapdeiamsuk ning ara, dipkoprop nyapsuke. Anggunda talye yupu nyabuka, malye ululum nang anya arye, Yesaya arye anggun malye winilulum touk wininyak nang ati, sekdeiyamuk yupu ara anyapnusine. Allah arye nyapdeibukba, nabi Yesaya arye sekamuk yupu atia.”

⁸ Allah arye nyabuk. ‘Anang ara, sik talye nyaltakne yupu deice arye, nong bol deiceuk nati si erenenyak bukni, sik kanye talima noutamak ara, dipkoprop nati kanye deibuka kum talininyake.

⁹ Na si erenyak nang ara, talyauk wininyake. Sik peterelamik yupu ara, ‘Winina telebe, winina meme,’ nyabuka nyalamak yupu ara, ninye kanye aryuk peterenyak yupu uk peterenyake, nyabuk.’ (Yesaya 29:13) “Allah arye nyapdeibukura, Yesaya arye sekamuk.” Yesus arye Yesaya nyamuk yupu dobuka, anang ati nyabuk.

¹⁰ Yesus arye nyabukopura, awekmek ninye nirya ati, ayupu tonap nyabuk. “Na dam bulubuka yalulume,” nyabukba bulubuka yayikopura, ayupu nyabuk. “Anggun nirya na yupu moubuka kekepmunce, ‘Deiyok ani’ tenen, kel kiplulume.

¹¹ Yata ning do nirya, ninye nong buru tam ulye ning nirya ara, dilulumba, si bam bol bisik arye anggun mun pum wekesulul bukni, adeice arye anggun talima malye kum winilisulule. Aning kum bukni, anggun talima ap, anggun kanye ap noutamak ulye ning ap, malye tenelulum ning ap ara, talima noutamak tenemunya deice arye, malye winilulume. Winibuka malye umunye ning deice anggunce anggun bidamnye ati malye winililalulume,” Yesus arye Farisi nang awekuka kekenmeka ati nyabuk.

¹² Nyabukura, aminyan talak, el mapu arye Yesus dam yayikce nyabik, “Naie, anyapmamu yupu ati, Farisi nang yu upmalba, derenmakiaka ara, bikmalam do?” nyabuka asipdeyik.

¹³ Asipdeyikba, Yesus arye tamubuka adomon yupu deice arye nyabuk. “Yata ning do nirya, na ni im deicanye, elce aning-aning nirya kum kouamuk ning ara, yating ap, nong ap, nirya kwiniplopnamle. Ara talye palamle ning ati kwiniplopnamle.

¹⁴ Ati, na mapu anggunti nyapsine. Anggunce sik Farisi nang ati, tenena kume, sik dauplye. Sik Farisi nang ara, bisik peterena deiyok nang atonun unyak bukni, dipkoprop ara asing kun nang atonun unyake. Tonok asing kunanye birye, yuk asing kunanye biti, ‘Narye an taruk talibuka teleb bisik bobinukine,’ nyaplirye, bobuka banmaliba, bisik noutamak weik pum wamlyak barikirye, sik bitinye nang kote sakarurake. Sik Farisi nang ara, na mapu koprop kum unyake. Sik Farisi nang ara, asing kun nang atonun unyak nang ati, dauplye, nyapsine,” Yesus arye el mapu 12 nang ati nyabuk.

¹⁵ Nyabukura, Peterus arye Yesus ati, morobuk. “Naie, kanye talima malye ulisulul ati, domon yupu deice nyapmasilam ning ara, laka kibuka laka nyapsilyame. Ayupu nong ara, laka nyapsilyame,” nyabuka morobuk.

¹⁶ Asipdeyukba, Yesus arye tamubuka nyabuk. “Anggunda tuba walwal upmasil ati asipdenmanulum do? Na nyapman ning ara moubuka kum bikmalum do?

¹⁷ Na nyapmasin yupu deiyok ara, ani. Yata ning do nirya, nun dinmabiba, nun mun pum weksilirye, nun talima malye kum kilisulule. Nun dilamap ning ara, talima pum kum wekesulul bukni, mun pumuk mapmasilya, dei yaltakanyabe. Talya din ning dilamibya deice arye, Allah yupu kum yaniltakanyabe,” nyabuk. [Yesus ayupu nyabuka deice arye, “Din ning, aning-aning nirya dilamibya deice arye, nun kanye talima malye kum kilisulule,” nyabuka, laka nyapsuke. Nun nirya arye, malye ning winilamyap deice arye, malye kililamsulule.]

¹⁸ Nyabukopura, ayupu ton nyabuk. “Bura tam ulamle ning arye, nun nong pum weksiliba, nun talima malye kum kilisulule. Aning kum bukni, ninye talima noutamak malye tenenyap ning ara, ‘Aupmal ning ara, kanye arye dopropnune,’ tenebibya deice arye, malye winibibyopura, awininyaba deice arye, talima malye ulisulule. Din ning dinyaba deice arye, talima malye kum ulisulul bukni, anggun talima noutamak malye tenepmunce, malye winimunya deice aryuk, Allah el yupu yanilulume. Anggun malye winimunye ning deice, anggunce anggun bidamnye atibuk kanye talima malye kililalulume.

¹⁹ Ninye talima malye upliba, anoutam arye elelamle ning ara, ani. Malye tenena ap, ninye ona ap, sik ninye dolana ninye batakukabikirye, yuk nang kil alubuka dona ap, kil talye-talye yona ap, ubula dona ap, yuk nang ati malye-malye yupu nyabuka minina ap, tilila yupu nyana ap, anirya ara, anggun talima noutamak malye una deiyok ning aupsilya deice arye malye kililalulume.

²⁰ Amalye tenelulum ning nirya ara, kanye talima noutamak welebuka, malye winipmunyopura, talima malye kilisulule. Taruk mek likna kum diparyuk, din ning talya mangkau asa dipmunyopura, talima malye kum kilisulule,” nyabuk. Yesus arye el mapu 12 nang ati laka nyabuk.

Kanaan mutuku kil arye, diba tenebuk yupu

²¹ Yesus ara, Genesaret mutuku batakuka welebanmoka ani, Tirus mutuku ap, Sidon mutuku ap, dam biyuk.

²² Amutuku noutamak Kanaan tam ulamuk kil, Israel yala kum kil arye, Yesus dam yayuk. El kilmu talima noutamak ara, isa arye talyamuka ati, utenebuk. ‘Na kilmu talibuk isa ara, Yesus arye dobuka aisa yakuka buru dopkweteptu’ tenen, Yesus ati morolyayuk. Morolyayukce ayupu nyabuk. “Naie, anda nun deiyoknye ulyame. Anda, Daud yalanye birye deipkuknye birye, nati bico tenebuka melipnutume. Na kilmu isa talyamuka deice arye, pia ikin ubukba, kanye imun kanye bolula ati ara, ance na kilmu kweteptume,” nyabuka morobuk.

²³ Nyabuka morobuk bukni, Yesus arye akil ati, yupu tonok babye kum nyabuk. Tunim anauk ubuk. Winibukopura, akil arye pia moronauk unmok ati, Yesus el mapu arye Yesus ati nyabik. “Akil ara, moronauk unmasila ati, ‘Bilyame,’ nyapminba, bilye,” nyabik.

²⁴ Nyabikopura, Yesus arye tamubuka sikti, nyabuk. “Akil ara, Israel yala kum kil bukni, na ni birye dopkwetepnuka ara, Israel yala kum ninye dam bobana ati, kume. Israel ninye bukni, domba basam weilamlanye kum upliba, domba basam talye balamak touk, ‘Kanye walwal unyak ninye, Israel ninye lyepnamle’ tenen, na ni birye dopkwetepnuke,” Yesus arye nyabuk.

²⁵ Nyabukura, akil arye Yesus el dam yayukce, ‘Si erepnun’ tenen, gutam tuku dipdongobuka morobuk. “Naie, anda Daud yala nang arye deipkiknye, ance bico tenebuka melipnilyame,” nyabuka, weik arye morobuk.

²⁶ Akil Israel yala kum kil arye morobukopura, Yesus arye akil ati adomon yupu deice arye nyabuk. “Mapu kwaning kum dipmakibuk, sik kwaning dalubuka kam dam donokona kume. Teleb ning ara, mapu akunum dinmakca ani, sirya akunum dibikcopura, kam arebikiba, kam arye dina telebe,” nyabuk.

²⁷ Yesus arye nyabuk bukni, adiparyuk tamubuka, akil arye Yesus ati nyabuk. “Naie, dib nyapmanilam bukni, mapu dinmakca dam banmalye kam arye, bun pupdopba batakikce ning ara, talye mangkau arye dilule,” nyabuk.

²⁸ Akil arye nyabukopura, Yesus arye tamubuka nyabuk. “Ance nati weik arye dib tenepmanilama ati, an moropmanila atonun, an kilmu talibuk isa ara akunum yakwetepmanaba bindople. Ati, wini talak an kilmu telebuk unmale,” Yesus arye nyabuk. Yesus ayupu nyabuk touk, anyabuk talak aryuk, akil el kilmu talyamuk isa bindobukba, telebuk ubuk.

Yesus arye, ninye yupa weik, 4.000 ninye ati, din ning aribuk yupu

²⁹ Yesus arye, amutuku batakuka balamuka ani, Galilea mekwen kup-kup tam biyuk. Daulamuka ani, yuk sum ara, mitik mutuku kon deice welebuka biyuk. Amutuku deice welebukura, amutuku noutamak ulamik bukni, dana-dana tam ulamik ninye bulubuka yupa weik arye Yesus dam wekelyaik.

³⁰ Amutuku ninye nirya yupa weik arye, bulubuka yayik talak ara, sik tam ninye, aik bulamik ninye ap, asing kun ninye ap, uk arye bite ikilamuk ninye ap, yupu luba ninye ap ara, uk aning-aning dilamuk ninye ap, ‘Yesus arye kwetepnusil’ tenen, sik kayapu nang arye, auk dilamuk ninye bobuka Yesus dam delilyayik. Delilyayikura, Yesus arye auk dilamuk ninye nirya kwetelinmok.

³¹ Yesus arye kwetelimokba, sik yupu lup nang yupu teleb ubuka nyanmek ning ton, ara sikuk arye bite ikilamuk ninye tonda, aik bulamik nang ap, teleb ubuka banmek ning ap, tonda, asing kun nang teleb ubuka elinmek ning ap, amutuku wekmek ninye dinmekce, ngalukunmek. Ara, awekmek ninye nirya arye, Yesus elce ninye kwetenmok ning elinmekce, ngalukunmek. Ngalukunmekce, “Sik Israel ninye talilirye, mikip arye melilul Allah ara, el pia telebe,” nyabuka el si erenmek.

³² Winibukabikce, Yesus dam daunmek bukni, like winilye akunum ubukba, aninye sik din kum ati, Yesus arye el yupu kekebuka el ap, neika melibuka balamik nang ati, “Yalulume,” nyabukba, yayikopura, ayupu nyapdeibuk. “Aunmak ninye ara, na bico tenenune. Sik din ning mitik anun boyanmek bukni, like winilye mabupu anya arye, sik din ning akunum dibikce, pia din bulung unmake. Din patanmalibuk, ‘Anggun mutuku tamubuka bilulume,’ nyabibyopura, ton ninye pera mutuku arye yayika ati, din kum dibikirye, ‘Bisik ak bukbicak’ tenen, anggunda bilulume, kum nyapnune,” nyabuk.

³³ Yesus arye nyabukba, el mapu sik 12 nang arye tamubuka nyabik. “Nunda pia buru mutuku noutamak unmaba ati, ninye weik unmaka anya arye, sik din ning arena ning ati ara, dan mutuku dekelbitibye do?” nyabik.

³⁴ Nyabikopura, Yesus arye tamubuka nyabuk. “Anggun aupmasil din ning roti ara, yata barye aupmasil do?” nyabuka asipdeyuk. Asipdeyukba, sikce, “Roti ara, tekbarye aupmale. Tonda, mitik mekin bal, bitinyeto winilyeto aninguk aupmasile,” nyabik.

³⁵ Nyabikopura, Yesus arye abulubuka wekmek ninye nirya ati nyabuk. “Anggun tuku deice buklulume,” nyabukba, bukik.

³⁶ Sik bukikopura, aupmok din ning roti tekbarye ap, mitik mekin bal ap, dobukabukce, Allah ati, “Telebe,” nyabuka morobukopura, aroti ap, amekin bal ap tobuka, el mapu aribukba, sikce bokuka, awekmek nang nirya ati, arinmek.

³⁷ Arinmekba aninye nirya dinmeka ani, akunum boubukopura, kwal deibik. Dinmeka ani, kwal batakik ning ara, Yesus el mapu arye bulubuka, weik bakul aling arye tekbarye libikopura, akunum langdibuka deibik.

³⁸ Asum ara, abulupmek ninye kan-kan, kilapu ap, mapu ap, kum nukik bukni, sal demuk nukuka, yupa weik 4.000 nang dinmek.

³⁹ Sik aninye arye akunum dibikopura, Yesus arye aninye ati, “Telebe anggun mutuku tamubuka bilulume,” nyabukba, banmek talak ara, Yesus ara, ila tamubuka mek lia yo deice welebukuk. Yesus ap, el mapu 12 nang ap, bukikce Galilea mekwen deice banmeka ani, yuk mutuku el si Magadan mutuku biyik.