Matius 13 - Eipomek

Yesus arye, tonoknye yo duk doknin banmoka ati, nyabuk yupu

¹ Asum aryuk Yesus arye anyasik batakuka, Galilea mekwen dam bukuka peterenmok.

² Peterenmok bukni, el dam yanuka wekmek nang ara, yupa pia weike bulubuka yanmeka ati, Yesus ara mekwen deice kup-kup ak, mek lia yo deice bukmokce, amekwen lilkwa koprop tikuka wekmek nang ati, el yupu peterenmok.

³ Peterenmok talak ara, domon yupu ton weik arye peterenmok. Apeterenmok domon yupu noutamak arye, ayupu ton nyabuk.

⁴ Anggun kekeplulume, tonok sum tonoknye birye wa wibuka, yo duk doknin banmok. El yo duk doknin banmokak, ton ning ara, el doknin banmok bisik noutamak sakmok. Sakmok bukni, talya maka yayikce, yanuka ayo duk bubuka dodibik.

⁵ Ton ning ara, doknin banmok bukni, keil deice ak mirin tuku mitik anun uamukak sakuk. Sakukce daupnin balamuka ani, mirin tuku mitik anunuk uamukak arye, minopce pabuk.

⁶ Pabuk bukni, yating tukwak teleb ubuka kum binmanto uamuka ati, keting yanuka donokukura, keting bupu arye sisal lebuka koulubuk.

⁷ Atalak bukni, ton yo duk ara doknin banmok bukni, tirmaka weiyang-weiyang kan-kan noutamak arye sakuk. Dawamuka ani, pabuk bukni, tirmaka weiyang-weiyang arye welebukce, apamuk ning koupdongobukce, angkalung kipdongobuka, wen-wen alamuk. Wen-wen alamuka anya arye, duk kum moulamuk.

⁸ Aning ara, duk kum moulamuk bukni, yo duk ton doknin banmok ning ara, mirin tuku teleb ak sakuk. Mirin tuku deice sakuk ning ara, pabukce nebukopura, duk teleb ubuka moulamuk. Yo duk tonok-tonok sakuk bukni, aduk tonok arye pabukce moulamuk ara, ton ning ara 30 moubuk, ton ning ara 60 moubuk, ton ning ara 100 moubuk.

⁹ Yesus arye adomon yupu nyabukopura, ayupu ton nyabuk. “Anggun amul aupmasilyopura, ‘Ayupu deiyok ani’ tenen, kekepmanto ninye ara, kekeplulume,” nyabuk.

¹⁰ Ayupu akunum nyabukopura, aminyan Yesus el yuk unmok talak ara, Yesus el wipdeiamuk nang, sik 12 nang arye, el dam yanuka asipdeyik. “Naie, talya yuk ninye ati domon yupu deice arye nyaminya ara, yata ati do?” nyabuka asipdeyik.

¹¹ Asipdeyikbuk, Yesus arye tamubuka nyabuk. Allah arye ninye weike lyeplirye, sik kanye talima talinamle nyasunun yupu ara, Allah arye nyapdeiamnuk touk, na mapu anggunti yupu nong laka nyasunune. Bukni, yuk talya ninye ati ara, na yupu dib tenebuka, moubuka kum kekenyaka ati, aninye ati domon yupu arye, nong bola deiceuk nyanune.

¹² Yata ninye do nirya, Allah yupu kekena ati, Allah arye kel bikna deiyok ning arepliba, moubuka kekekirye, aninguk batakna kumce, talibuka unyak ninye ara, Allah arye kel bikna deiyok ning weik arye tabakuka arepliba, weik arye kel biknin banamake. Bukni, yata nang do nirya, ‘Ayupu ara nun like’ tenen, amul deice kekeltakakirye, Allah yupu kum talibuka unyak ninye ara, sik min arye mitik tonun bikamikce ning babye, kum danamle.

¹³ Aninye ati domon yupu deice aryuk nyanuna ara, deiyok nyapnusine. Ara, ‘Na wininye ning ara, elininyak bukni, ‘Deiyok anye,’ tenebuka kum biknyake. Na nyanye yupu ara, amul deice aryuk kekenyak bukni, ‘Deiyok ani’ tenen, moubuka kum kekenyake. Lik ati, talya kekeltakanyake.’ (Yesaya 6:9)

¹⁴ Sik wininyaka ara, Allah yupu laka nyalamuknye, nabi Yesaya arye, ‘Wininamak’ tenen, nyalamuk touk wininyake. Yesaya nyalamuk yupu ara ani. ‘Amol arye talya kekeltakanamlum bukni, nong noutamak deiyok ning ara, pia kekebuka kum bikinamlume. Asing arye bola deiceuk elinamlum bukni, ‘Deiyok anye,’ tenebuka, pia kum bikinamlume.

¹⁵ Sik awininamaka ara, talya ati kume. Sik kanye talima pum tam lik upliba, ‘Kekena nun lik’ tenen, akunum batakanyake. Wininyaka anya arye, aninye ara na yupu ‘Lik’ tenen, mitik anunuk kekenyake. Sik talima pum tam lik upliba, ninye asing arye bita kum elilamak atouk akunum wininyake.’ ‘Aning-aning nirya kum winilamtingopura, asing arye teleb kibuka eipnamtinge, tonda amul arye teleb ubuka kekenamtinge. Sik kanye talima ayupu nong noutamak ‘Deiyok ning ara, anye’ tenen, teleb ubuka kel biknamtinge. Sik kanye talima teleb ubuka kel biklamtingtoura, sik malye wininyak ning batakuka, balye tamubuka, na tam kipnitingba, narye sikti, teleb kipdeiptinye.’ (Yesaya 6:9-10) “Yesaya birye nyalamuk touk anang ara, wininyake nyapsine.” Yesus arye el mapu ati nyabuk.

¹⁶ Yesus ayupu nyabukopura, ayupu tonap nyabuk. “Bukni, sik anang wininyak touk, anggun na mapu ara aning kum wininamlulume. Na mapu anggunda, asing arye teleb ubuka elilulume. Anggun wini talak umunce, na donye pil nirya eililulum ning ninye ara, anggunce aning-aning nirya, pia mambul ning eliluluma ati, anggunda pia mambule. Ati, pia teleb kanye bobuka unamlulume. Anggunda amul arye teleb ubuka kekenululume. Ati, anggunda pia teleb kanye bobuka unamlulume.

¹⁷ Na dipkoprop nyapsine. Allah yupu laka nyalamik nang, sik nabi-nabi nang weik ap, lipsisikuka winilamik nang weik ap, anggun eililulum ning ara, pia patalamuk ati, ‘Se aning eiptibye,’ tenelamik bukni, kum elilamik. Tonda, na mapu anggun kekelulum yupu ara, minop talak ulamik ninye pia patalamuk ati, ‘Se aning kekeptibye,’ tenelamik bukni, kum kekelamik. Ati, wini talak anggun teleb ubuka kekena ap, elina ap umunye nang ara, anggunda, pia mambul anya arye, pia teleb kanye bobuka unamlulume. Allah arye teleb kilinamsile.” Yesus arye el mapu obarye (12) nang ati nyabuk.

¹⁸ Ayupu nyabukopura, ayupu ton nyabuk. Anggunda teleb ubuka kekenululum nang anya arye, yo duk yamubuka doknin banmoknye, nyapmanu yupu ara, deiyok laka nyapnusine. Adomon yupu nyapmasunu ning ara, nong laka nyapnusine.

¹⁹ Ura, yo duk dokninbanmok bukni, bisik noutam sakmok ning ara, Allah yupu peterebik bukni, yuk ninye arye, ‘Kekepnuyap,’ tenebikibuk, bita kum kekenyake. Ara, Isa Mutuku Dongonye, malye winina deiyoknye birye, adiparyuk sik talima noutamak arye, ayupu dalubuka dololule. Dopropliba, aninye dib kum, tenenyake.

²⁰ Ton ninye ara, yo duk keil deice sakamuk touk, Allah yupu peterenyak bukni, kekebikirye, dib tenebuka kanye deibuka adiparyuk ayupu dolonyake.

²¹ Dolonyak bukni, yo yating tukwak teleb ubuka kum biyuk arye, koulubuka atonun, aninye ara, Allah yupu pia talipmubuka kum dolonyakce, minopce batakanyake. Ara, dib tenenyaka ati, yuk nang arye yu upliba, ikin ning sik nong deice deibica ati, adiparyuk batakaldongonyake. Tonda, ikin ning yalyopura, aninye ara ikin kanye bobuka, Allah yupu kekemakce ning ara, adiparyuk batakaldongonyake.

²² Ton ninye ara, Allah yupu kekebuka dolonyak bukni, yo duk tirmangka weiyang-weiyang kan-kan sakmok ning atonun wininyake. Ara, tukwak mutuku noutamak arye, ‘Aning doproptinirye teleb uptinye do? Yuk ning aupnutuba teleb uptinye do?’ tenen, teniltona ap, kanye bokoltona ap deice arye, Allah yupu batakalogonyake. Tonda, “Bona weik doproptinirye, telebuk uptinye,” nyabuka, sikce sik bidamang arye, tilila yupu talya nyaldanyake. Tonda, aning-aning nirya weik patapliba, ‘Aning ton doproptinye, aning ton winiptinye,’ tenenyak deice arye, lik upliba Allah yupu batakalogonyake. Wininyaka ara, tirmangka weiyang-weiyanga arye apamuk ning koupdongobukce, angkalung kipdongobukba, wen-wen alamuk touk, talya tukwak ning aning-aning nirya pia tenenyak deice arye, Allah yupu kekelamikce ning ara, batakiceba duk kum mouplirye, talya urdemuk bolule. Ara, teleb ubuka kum kekekirye, Allah yupu pia kum dobolbanyaka ati nyapsine.

²³ Aninye ara wininyak bukni, yuk ninye ara, yo duk yamubuka doknin banmok bukni, mirin tukwak sakmok ning ara, duk weik arye moubuk ara, ton 30, ton 60, tonda yupa weik 100 moubuk touk wininyake. Sikda, Allah yupu kekebikirye, dib tenebuka kanye deibuka, pia dolonyak ninye ara, yo duk weik arye moubuk touk, nati dobolyanganinyak nang ara, Allah el pil weik arye donyake. Yesus arye el mapu ati nyabuk.

Yesus domon yupu deice arye, teleb ning ap, talye palamle ning ap, pabuka ati, nyabuk yupu

²⁴ Ayupu nyabukopura, domon yupu tonok ton nyabuk. Allah arye ninye mutuku-mutuku noutamak nirya, ninye weik lyeplirye, sik talima talilya ara, anyapnusin ning atonun ulule. Wa wina deiyoknye birye, wa wibuka teleb yala ning dokuk.

²⁵ Dokukopura, el ap, yuk nang ap mapmek talak ara, elti, lik tenelamik nang arye, el teleb yala ning wa wibuka dokmok ak, yuk talye palamle ning yanuka turukuka dokik. Dokukabikce, yukak biyik.

²⁶ Sik daulamik bukni, el dokuk ning pabukce, welelamuka ani, duk moubuka muruk kibuk. Muruk kibukopura, talye nang arye turukuka dokamik ning babye welelamuka ani, duk moubuka muruk kibukopura laka ubuk.

²⁷ Atalye palamle ning laka kibukopura, awa deiyoknye, el wa pil melin nang arye elti, nyabik. “Naie, atalye pabuk ning ara, dan tam arye yayuk do? Ance teleb yala ning kum kouplum arye, amalye ning talye pabuk do?” nyabik.

²⁸ Nyabikopura, awa deiyoknye birye tamubuka nyabuk. “Aning ara kume. Nati, lik teneninyak nang arye dokikba, pabuke,” nyabuk. Nyabukopura, el melin nang arye nyabik. “Ati, nun bibirye atalye palamle ning nirya kwinibuka donoknuyap do?” nyabik.

²⁹ Nyabikbuk, elce tamubuka nyabuk. “Kume, malye ning kwenepmunye talak ara, ‘Narye teleb ning koupse ning ap, talya talbalibuka kwiniplopmunyak’ tenen, aning nirya awamlyani, wisiplye talakuk, malye ning kwiniplopnamabe.

³⁰ Dauamli bukni, teleb ning ap, malye ning ap, wisiplyopura, dakuka lipnamap talak arye, na melin nang ak nyapnamne, ‘Anggunda talye palamle ning kwinimunce, koubuka uku dongopnamlume. Winipmunyopura, teleb ning nirya bulubuka, na din ning delin aik delilyanamnulume,’ nyapnamne.” Wa deiyoknye birye nyabuk. Yesus arye Galilea mekwen dam bukmokce, ninye weik bulubuka wekmek nang ati adomon yupu nyabuk.

Yesus arye, “Pia mitik yo duk bukni, paplirye, weik yo nelule,” nyabuk yupu

³¹ Yesus arye winipmanto yupu nyabukopura, awekuka kekenmek nang ati, ayupu ton, winipmanto ning tonap nyabuk. “Allah arye ninye weike lyeplirye, sik talima talinamle ara, ‘Anggun tenebuka kel biknamlum’ tenen, winipmanto yupu ton nyapnusine. Kabalye yo duk mitik bukni, weik nelamle touk, Allah arye ninye weike lyeplirye, sik talima talinamle nang ara, weik kipnin banamle.

³² Kabalye yo duk, mitik duk arye dokamiki bukni, beteklirye, nepnin balamlya ani, neplyopura, taruk weik arye leklyopura, ataruk deice ara, yuk-yuk maka nirya, sik yo koak ati, bulyakirye manyake. Ayo duk ara mitikto duk ulul bukni, aduk paplirye, ayo ara weik arye nelule. Aning atonun, Allah arye ninye weike lyeplirye, sik talima talinamle ara, deiyok bikna talak ara, mitik anun ulul bukni, pia weik kipnin banamle,” Yesus arye nyabuk.

³³ Ayupu nyabuknye ara, ‘Allah arye ninye weik lyeplirye, sik talima talinamle ara, weik upnamle ning ara, kel kipnamak’ tenen, winipmanto yupu ton nyabuk. “Roti nena deiyok ning ara, el si ara ragi, pia mitik ninguk ulul bukni, aning roti bun deice deibiceura, weik arye nelamle touk, Allah arye ninye weik lyeplirye, sik talima talinamle ning ara, deiyok kouplye talak ara, mitik anun ulul bukni, aminyan talak ara pia weik upnin banamle. Danatam, dana tam nirya weik kipnin banamlarya. Tonok kil arye, ‘Roti dapnun’ tenen, roti telen ning deipmok kan-kan arye, roti nena deiyok ning dobuka, roti bun noutamak dongobukura, akan-kan dabanmoka ani, roti ara weik arye nebuk. Awinibuk touk, Allah arye ninye weik lyeplirye, sik talima talilya ara, atonun weik upnin banamle,” Yesus arye nyabuk.

³⁴ Winipmanto yupu aning winibuka nyabuk touk, Yesus arye peterenmok talak ara, ‘Ayupu kekepnuyap’ tenen, abulubuka talye wekmek nang, sik kekena ati, domon yupu ap, winipmanto yupu ap, weik tonap peterenmok. ‘Ayupu deiyok anye,’ nyana kumce, domon yupu deice aryuk peterenmok. Laka arye kum peterelamuk.

³⁵ Domon yupu deice aryuk peterenmok ning ara, Allah yupu laka nyananye, nabinye nyalamuk touk upnamuka ati, peterelamuk. Nabi Asap arye nyalamuk yupu ara, ani. ‘Allah arye, “Na peterenamne talak ara, domon yupu ap, winipmanto yupu ap adeice aryuk peterenamne. Allah arye aning-aning nirya kintinipdeibuk talak, aniryuk dipdongobuka anoutam talak nirya, Allah arye duknyamuk ning nirya ara, wini talak ara, laka kibuka nyanamne,” nyabuk.’ (Mazmur 78:2) Ayupu ara, Mazmur yupu noutamak, nabi Asap arye, nyalamuk.

Yesus arye, “Teleb ning ap, talye palamle ning ap, pabuke,” nyabuka domobuk yupu ara, Yesus arye ayupu nong ati laka nyabuk yupu

³⁶ Yesus arye atalye bulubuka wekmek nang ati, adomon yupu nyabukopura, anang asukumuk batakukce, el yuk aik wekelbiyuk. Aik akunum wekukopura, elce wipdeiyamuk nang, sik 12 nang el dam yanuka asipdeyik. “Naie, tonok wa noutamak, teleb ning ap, malye ning ap, ansinibuka pabuk nyapmom ning ara, yupu nong laka nyapsilyame,” nyabuka morobik.

³⁷ Asipdeyikopura, Yesus arye el mapu 12 nang ati laka nyabuk. Teleb yo duk pabuk ning deiyoknye bira, na Ninye Mi Koprop Atonunye, natia.

³⁸ Wa nyapmanua ara, tukwak mutuku im sirya, mutuku sirya nirya ati nyapmanue. Teleb yo duk ara, Allah akunum lyebukce sik talima talilul ninye ati nyapmanue. Malye yo duk pabukce, palamuk ning ara, Malye winin ning Deiyoknye, Isa Mutuku Dongonye el yupu kekebuka pia malye winin nang ati nyapmanue.

³⁹ Wa deiyoknye lik tenebukce, malye yo duk dokuknye bira, ara, Isa Mutuku Dongonye eltia. Wa noutamak dokamik ning wisibukura, kwinibikce, bulubuka tonok ak deibik talak ara, sirya daknamle talak winipnamle ning ati nyapmanue. Koun ning wisibuk ning bulubuka tonok ak deibik ning ara, na im deice pil don nang, sik malaikat arye winipnamak ati nyapmanue.

⁴⁰ Sik wa win nang arye, talye palamuk ning malye ning kwinibukabikce, koubuka uku dongobik touk, na Yesus arye ninye mutuku-mutuku nirya ati yupu lipsisikuka bokolin talak, ninye nirya bokukabnirye, yuk-yuk deipnamne talak ati nyapmanue. Diba tenena kumce, malyeuk wininyak ninye ara, bokukabnirye, wenebuka uku din mutuku dongopnamne ati nyapne.

⁴¹ Ara na Ninye Mi Koprop Atonunye birye, na im deice pil don nang malaikat dopdeipniba, Allah arye taliliba, mutuku-mutuku nirya unamak nang kan-kan arye, malye unyak ninye ap, malye una deiyok ning ap, wibuka dopropnamake.

⁴² Doprobikirye, amalye unyak nang ap, malye ning nirya ap dobuka, uku din mutuku dopkwetepnamake. Dopkwetebikiba, uku dilye talak ara, aninye arye kanye imun kanye bobuka, weik arye engenamake.

⁴³ Aning akunum winibikcopura, Allah arye talyamukba, diksukumuk wininyak ninye ara, Allah ap, im deice unamake. Keting deiplirye, dirina weik ulamle touk, diksukumuk wininyak ninye ara, im deice unamak talak ara, Allah arye aninye taliplirye, im deice unamle mutuku noutamak ara, sikda weik mambul ninye anya arye, pia teleb ubuka unamake. Ati, anggun amul aupsilyopura, ayupu kekepmanto ululum nang ara, na nyapmasin yupu moubuka kekepnululume. Yesus arye nyabuk.

Domon yupu arye, tonoknye talye winiplobukce, dekna weik ning eibukce doprobuk ati, nyabuk yupu

⁴⁴ Ayupu nyabukopura, domon yupu tonap nyabuk. “Allah arye ninye weike lyeplirye, anggun talima talisilye atonun ning ara, nyapnusine. Yuk nang ara, ‘Malye nang arye nun dekna weik ning ubula dopropsikcak’ tenen, tuku palibuka duknyamik bukni, tonoknye talye mangkau asa banmokce, aduknyamik ning eibuk. Eibukce, ‘Yuk nang arye, adekna weik ning doprobikcak’ tenen, elce aning dobuka ila tonap moubuka duknubuk. Dunubukce, utenebuk. ‘Awa tuku deknyopura, adekna weik ning awa noutamak, tuku palibuka duknubuka deiamuk ning ababye doproptinye,’ tenebukce el min arye talyamuk ning nirya dekukabukce libuka, awa talyamika deiyok nang dam biyukce, ayo bok deice arye awa tuku dekuk.” Yesus arye nyabuk. Tonda, ayupu nyabukopura, ayupu atonun ning ton nyabuk.

⁴⁵ “Tonok dekna deiyoknye birye, dekna weik ning bace atonun ning, el si ara mutiara ati, ‘Mutiara deknun’ tenen, pia epnin banmok.

⁴⁶ Epnin banmoka ani, pia weik teleb ning eibuk. Eibukce aning pia patabukba, ‘Adekna weik ning mutiara deknun’ tenen, el min arye talyamuk ning nirya dobuka, yuk nang dam dekukabukce, elce eipmok ning, dekna weik mutiara dekuk.” Yesus arye adomon yupu nyabuk.

Domon yupu arye, mekin bal dona ati, nyabuk yupu

⁴⁷ Yesus arye, adomon yupu nyabuk. Allah arye ninye weik lyeplirye, sik talima talinamle ning, atonun ning ara, adomon yupu nyapnusine. Tonok talak ara, ninye arye, ‘Mekin bal dopropnuyap’ tenen, mekin bal yangan ning mekwen noutamak dongobikba, mekin bal aning-aning nirya weik arye wekik.

⁴⁸ Wekikce, akunum langdibukura, amekin bal donmeka deiyok nang arye, mekin bal yangan ning erebuka dobukabukce, mekwen lilkwa binuka deibik. Deibikce, mekin bal nirya dipdeyikce, mekin bal wibukabikce, mekin bal teleb ning dobuka, mekin bal lin ning pum bisik dongobik. Bukni, malye mekin bal ara, talyak buru tamuk donokik.

⁴⁹ Anang arye mekin bal wibuka dipdeyikce, ton ning ara dokola deibuka, ton ning ara buru donokik touk, Allah arye sirya daknamle talak atonun winipnamle. Ara, el im deice pil don nang malaikat arye, ninye mutuku-mutuku nirya bokuka deibikirye, “Malyeuk unyak ninye ara, ani. Telebuk unyak ninye ara, ani,” nyabikirye, bokuka yuk-yuk deipnamake.

⁵⁰ Nyabikirye, malye un ninye ara, uku din mutuku donokiceura, uku arye dinmaliba, aninye ara, kanye imun kanye bobuka weik arye engenamake.

⁵¹ Ati, Allah arye ninye weik lyeplirye, anggun talima talinamsil ara, aning atonun ulule nyapmasin yupu ara, kekepmalum do? Yesus arye wipdeiyamuk nang, el mapu 12 nang, ati nyabuk. Nyabukura, sikce, “Nun kekepmabe,” nyabik.

⁵² Nyabikopura, Yesus arye nyabuk. “Aning ati ara, winipmanto ara, tonok aik deiyoknye birye, el dokola ning delilu ak, anyaik pum arye, minop talak deiyamuk ning babye, winiryuk deipmalye ning babye dobuka lakak deiplirye, pil dolamle touk, sikda, Musa sekamuk yupu peterena deiyok nang ababye, atonun unamake. Ara, ‘Allah talisilirye, winilye ning anye,’ nyabuka, nyasinye yupu kel kiplumce, na mapu upmunyopura, minop nyalamik yupu ap, na winiryuk nyasinye yupu ap dukdongobuka peterenamlulume,” Yesus arye nyabuk.

Yesus arye, “Allah yupu laka nyananye, nabinye bira, el mutuku kopropa nang arye elti, si kum erenyake,” nyabuk yupu

⁵³ Yesus arye adomon yupu nirya akunum nyabukopura, amutuku batakuka, tuku bisik arye yukak mapnin balamuk.

⁵⁴ Sik mapnin balamika ani, Yesus el mutuku koprop, Nasaret mutuku koulukik. Koulukuka biyikce, Nasaret mutuku noutamak daulamik bukni, Yahudi yala nang arye Allah yupu peteren aik, Yesus wekukabukce, Allah yupu peterenmok. Peterenmok talak ara, pia teleb ubuka peterenmoka ati, el yupu kekenmek nang arye ngalukunmek. Ngalukunmekce nyanmek, “Anye bira, el peterenmal yupu ara, dan mutuku arye kel kibuk do? Yata weik kel bikna nang arye peterebikba, weik kele kibukce teleb ubuka peterenmasil do? Yata mutuku arye ninye kum winipmanto ning, mambul pil dona ati, mikip deiyok ning arebikba apil donmal do?” nyabuka ngalukunmek.

⁵⁵ “Anye bira, ara nun mutukunye birye, Yusuf elce deibuk mi do? Anye bira yo cakuka marikna memebuka dolinye koprop ulule. Diba de, nun makal kil Maria arye deibuk mi ara, el akunum atia. El weit kopropa capu ara, Yakobus ap, Yoses ap, Yudas ap, Simon ap, sik amutuku unyake.

⁵⁶ Tonda, el weit kilapu ababye, nun ap aunmabe. Anye bira, nun akunum kel kibupa anya arye, dan mutuku kel kibukce yanuka peterenmasil do?” nyanmek.

⁵⁷ Nyabikce, Yesus ati yu ubukba, ‘Anye bira nun lik’ tenen, Yesus ati batakik. Winibikopura, Yesus arye anyaik wekmek nang nirya ati nyabuk. “Allah arye aminyan winipnamle ning laka nyanyak nang, nabi nang arye sik mutuku kopropa batakuka yuk mutuku bikcopura, yuk nang arye sik yupu kekebuka, kanye deibuka kinyake. Bukni, nabi nang arye, sik yala nang ap, sik asik nang ap, sik mutuku nang ap arye, kum kibikirye batakanyake,” Yesus arye nyabuk.

⁵⁸ Yesus el mutuku koprop nang arye, elti, lik ubuk ning ati ara, amutuku noutamak nirya ara, ninye sirya dakna pil ap, ninye kum winipmanto ning ap, weik arye pil kum dobuk. Mitik anunuk pil dololamuk. Winibuk ning ara, Nasaret mutuku noutamak ulamik ninye nirya, sik dib kum tenebik ati, Yesus arye el mutuku kopropa noutamak ara, ninye kum winipmanto pil weik arye kum dololamuk.