Matius 12 - Eipomek

Yesus arye, “Allah el si erena ati, pil dona kum diparyuk, didik sen sum, Sabat sum deiyoknye bira, na uka,” nyabuk yupu

¹ Yahudi yala nang sik Allah si erena ati, pil dona kumce, didik sen sum, tonok Sabat talak ara, Yesus ap, el mapu ap, yuk nang gandum wa wiyamika noutamak banmek. Abanmek talak ara, sik din patabukba, el mapu arye gandum duk dakuka, deice bama labuka batakikopura, gandum pinpinya labuka imbik dinmek.

² Sik gandum dinmek talak ara, Yahudi yala nang sikce Allah si erena ati, pil dona kum diparyuk, didik selamik sum arye dinmek. Gandum dakuka dinmekba, Farisi nang eibikce, ‘Anang wenepnuyap’ tenen, Yesus ati asipdeyik. “An mapu arye gandum dakuka dinmaka ara, yata ati do? Allah arye, ‘Wininamlulume, aning ara kum wininamlulume,’ nyapdeibukba, Musa arye sekeiyamsuk yupu noutamak ara, ‘Allah si erena ati, didik sen sum, Sabat sum ara, wa win dam lilbana meme,’ nyabuka sekeiyamsuke. Musa arye nyabuka sekeiyamsuk bukni, an mapu arye gandum dakuka dinmaka ara, wa lilbana atonun ning wininmaka anya arye, awininmak deice arye, Allah yupu yaninmake. Awininmak, ning ara, yata ati do?” nyabuka, Farisi nang arye Yesus ati wenebuka asipdeyik.

³ Nyabuka wenebikba, Yesus arye tamubuka sik Farisi nang ati ayupu nyabuk. Na mapu, sik awininmak ning atonun, Allah yupu buku Samuel noutamak uamuk ning ara, nyalulum bukni, kum kel kiplum do? Nun apu kopropa Daud ap, el melibuka neika balamik nang ap, din pia patabukba, din ning roti ara, Allah arena aik pum dabuka deipmeka ara, Daud arye dobuka dibuk. Tonda, el ap neika banmek nang ati, bokuka aribukba, dibik. Aning ara, moubuka kum kel kiyamlumce, ayupu nyanmanulum do?

⁴ Allah arena ati, din ning roti dabuka, el aik pum delilamika ara nyapnusine. Yahudi yala nang arye, din ning roti 12 dabuka, Allah arena aik noutamak delilamik. Aroti ara, Musa arye nyabuka sekeiamuk touk, Allah arena aik pil dona deiyok nanguk aroti dilamik. Aroti ara, mem roti ati, yuk talya nang ara kum dilamik. Talya nang ara kum dilamik bukni, atalak Daud arye winibuk ning ara nyapnune. Din ning roti ara, Allah arena aik pum dabuka deibik ning ara, Daud din patabukba, dobuka dibuk. Tonda, el ap neika banmek nang ati, bokuka aribukba, dibik. Dibik bukni, Daud ap, el melin nang ap, roti dobuka dibik ning ara, Allah arye anang ati, ‘Malye winipmake,’ tenebukce, kum wenebuk. ‘Aning ara telebe uka,’ tenebuk.

⁵ Musa sekamuk yupu noutamak ara, “Ninye didik sebikirye, Allah elti, si erebuka, si erenamak sum, Sabat sum deice arye pil kum donamlulume,” nyabuka sekamuk ning ara, anggun elilulume. Anggunce ayupu akunum elilulum bukni, moubuka kum kel kipmalumce walwal arye nyanmanulum do? Musa arye, “Sabat sum deice arye pil kum donamlulume,” nyabuka sekamuk bukni, malye ning dekna ati, Allah arena deiyok nang arye, Allah el arena ati, el si erena aik pum Sabat sum deice arye pil tuba donyake. Sabat sum deice arye pil donyak bukni, Allah el kanye ara, ‘Apil donyaka deice arye, na yupu kum yanininyake,’ tenelule. ‘Aning ara, telebuka,’ tenelule. Anggunda aning kum kel kiplumce, nyapmanulum do?

⁶ Allah el si erena ati keil aik weik ning domik asik ara, ‘Weik mambule,’ tenelulum bukni, na dipkoprop nyapsine. Anyaik ara, mitikto mambule. Nada, weik mambulnye akunum yanmane.

⁷ Allah yupu laka nyalamuknye nabi Hosea arye, sekuk yupu ara ani. ‘Allah el kanye ara, anggun malye winimunye ning dekna ati, ining ning obuka arinumunya ara, mitikto mambule. Weik mambul ning ara, ninye malye-malye winipmakibuk, wenebuka oltakna kumce, bico tenebuka kanye delina ara telebe, tenelule.’ Nabi Hosea arye sekamuk. (Hosea 6:6) Hosea sekamuk yupu bol deiceuk kum bukni, ‘Deiyok ani’ tenen, moubuka tenyamtumtoura, na mapu gandum dinmak ning ati ara, “Sik malye unamake,” kum nyaptume. Yesus arye sik Farisi nang ati nyabuk.

⁸ Yesus arye Farisi nang ati, ayupu akunum nyabukopura, ayupu tonap nyabuk. “Aning ati ara, na Ninye Mi Koprop Atonunye ununa anya arye, didik sen sum Sabat sum deice una ara, ‘Aning telebe, aning malye’ tenen, bokuka delina deiyoknye bira, na tonoka. Ati narye, ‘Aning telebe, aning malye,’ nyapmasine,” Yesus arye sik Farisi nang ati nyabuk.

Yesus arye, taruk kwanyamuknye kwetebuk yupu

⁹ Ayupu nyabukopura, anyaka batakuka, Yesus ap, el mapu ap, balamika ani, Yesus arye Yahudi yala nang, Allah yupu peterelamik aik binuka wekuk.

¹⁰ Wekuka Allah yupu peterena aik pum unmok talak ara, taruk kwanyamuknye ton anyaik pum unmok. Atalak ara, Farisi nang arye, ‘Yesus malye winiptuba, nunce, el malye winipmale nyaptibye’ tenen, Yesus ati pia dipnilibuka kalikinmek. Kalikinmeka ati, ‘Yesus arye malye nyapnul do?’ tenen, ayupu asipdeyik. “Nun Allah si erena ati, pil dona kumce didik sena sum, Sabat sum deice arye, uk dilamlye ninye kwetena ara teleb do, malye do?” nyabuka asipdeyik.

¹¹ Asipdeyikba, Yesus arye tamubuka nyabuk. “Yatanye do nirya, el weilamlye domba basam, Sabat sum deice tuku pum saklyopura, adiparyuk kum dopropnamle do?

¹² Aning kum tenepmalumce do? Domba basam ara, mitikto mambule bukni, ninye ara, weik mambule anya arye, Allah si erena ati, ninye didik sen sum deice arye, ninye melina pil dona ababye telebe uka. Winina deice arye Allah yupu kum yaniptibye.” Yesus arye nyabuk.

¹³ Yesus arye Farisi nang ati, ayupu nyabukopura, ila ton, taruk kwanyamuknye biti, ayupu nyabuk. “Anda taruk bibikuka arepnilyame,” nyabuk. Nyabukopura, taruk kwanyamuknye birye, el taruk bibikuka aribukura, adiparyuk el taruk teleb ubukba, taruk pung kipdeibuk. Yesus arye anye el taruk kwetebukopura, anye el dana tam taruk teleb uamuk touk ubuk.

¹⁴ Yesus arye anye kwetebuka ati, Farisi nang ara, yu ubukba, ‘Yesus yata ubuka opnamap do?’ tenen, anyaik batakuka yukak yupu sisikilbinmek.

¹⁵ Winipmekce, yupu sisikilbinmek ning ara, Yesus akunum bikmokce kel kipmoka ati, amutuku batakuka, yukak biyuk. El banmok talak ara, ninye weik arye, ‘El ap binuyap’ tenen, aminyan melibuka biyik. Sik ap biyikopura, sik uk dilamuk ninye nirya ara, Yesus dam boyanganmekba, Yesus arye aninye kwetebuk.

¹⁶ Kwetebukopura, aninye nirya ati ayupu mopreibuk. “Na Allah el Mi Koprop ununa ara, anggun kel kiplum bukni, yuk nang ati kum laka nyanamlulume,” nyabuka yupu sekuk.

¹⁷ Nyabukopura, Yesus arye, “Anggunce, ‘Yesus ara, Allah el Mi Koprop ulule,’ nyabuka kum nyanamlulume,” nyabuka, yupu sekuka winibuk ning nirya ara, Allah yupu laka nyalamuknye, ‘Nabi Yesaya arye sekamuk yupu ara, atonun winipnamle’ tenen, winibuk.

¹⁸ Allah arye ‘Ninye weike lyepnamle’ tenen, dopkwetebuknye Yesus ati, Yesaya arye ayupu nyabuka sekuk. Yesaya arye sekamuk yupu ara ani. ‘Anye bira, na amu tam ulirye, na piluk donamnil’ tenen, wibuka deipse. Narye elti, kanye deipsirye, kanye talima arepnuke. Na Kanye ap, na mikip ap, weik arye elti, arepnyopura, elce, ‘Diksukum una ara, wininamlulume,’ nyabuka laka nyalbinamle. Na Allah arye tenepse ning nirya ara, elce ninye mutuku-mutuku nirya ati, laka nyalbinamle.

¹⁹ Anye bira, kariyung bisik ninye weike balamakak noutamak tikuka, yupu weik arye kum nyanamle. Tonda, yuk nang arye elti, malye yupu nyabikiba, yu upliba, walana yupu kum nyanamle.

²⁰ Ninye arye kwalin pina malye ati, bataklamak touk, tonda, ninye arye upna ubikiba, ililim abuka tangalamle touk, anye birye mikip kum ninye ati kum bataknamle. Tonda, ‘Yata wiripnun do?’ tenen, kanye walwal upliba, teneipdebuka, mitang asa unyak ninye ara, elce kum bataknamle. Sik kanye talima melinauk unamle. Aning wininamla ara, pil dopra balamlya ani, ninye mutuku-mutuku nirya arye Allah nyasilye yupu ap, ‘Wininamake,’ tenesilya ning ap, akunum winibiceopura, el pil sirya daknamle.

²¹ Ninye mutuku-mutuku nirya arye, el nonge ap, el si ap deice arye, diba tenebikirye, ‘El dem aryuk lyepnamsile’ tenen, sik kanye talima el deiceuk delinamake.’ Allah arye nyapdeibukba, Yesaya arye sekuk. (Yesaya 42:1-4) Ayupu ara, Yesaya arye sekeiamuk. Yesus atalak arye nyabuk yupu nirya ara, ‘Yesaya nyalamuk yupu deice winipnamle’ tenen, nyabuk.

Musa sekamuk yupu peterena deiyok nang arye, “Belesebul arye Yesus talibuka, pil dolule,” nyabik yupu

²² Yesus binuka unmok mutuku noutamak arye, isa taliamuka deice arye, yupu luba kibuka, asing kuamuknye tonok, ‘Yesus arye kwetepnul’ tenen, yuk nang arye anye bobuka, Yesus dam boyayik. Boyayikba, Yesus arye anye talyamuk isa yakuka kwetebukopura, anye yupu nyabuka, aning-aning nirya teleb ubuka dinmok.

²³ Winibukopura, awekuka dinmek nang arye, Yesus ati ngalukunmekce ayupu nyabik. “Se, anye bira, Daud yalanye birye deibuknye anya arye, elda Allah arye Ninye Lyenanye, ‘Mesiasnye yanuka unamle’ tenen, wibuka deibukba, akunum yanmasil do, kum do?” nyabik. Nyabik ning ara, ‘Yesus ara, Ninye Lyenanye ulul do, kum do?’ tenena ati nyabik.

²⁴ Sik anang arye nyabikba, Farisi nang kekebikce ayupu nyabik. “Kume, aisok yakalula ara, isa mer nirya, sik deiyok isa, el si ‘Isa Mutuku Dongonye’ el si ton ‘Belesebul’ nyalamik. el mikip deice arye, Yesus arye isa mer yakuka dolkwetelule. Isa nirya sik deiyoknye Belesebul mikip deice arye, Yesus arye aisok nirya yakuka dolkwetelule,” nyanmek.

²⁵ Ayupu nyanmekopura, Yesus arye anang sik talimak noutamak tenepmek ning kel kipmoka ati, Yesus arye, anang ati adomon yupu deice arye nyabuk. Dan mutuku do nirya, tonok weik deiyoknye birye talilul ninye, noutamak bokukabikirye, olanmacopura, sirya dakdanamake. Aninye nirya arye olanmaceopura, tonoknye birye yata ubuka aninye nirya taliptu do? Neika kum upting bukni, yuk-yuk bindoptinge. Aning atonun, yata yala nang do nirya, sikce opdakcopura, sirya dakdanamake. Yata ubuka neika uptinge do? Akunum, bokuka yuk-yuk bindoptinge.

²⁶ Farisi nang arye nyapmak yupu atonun, Isa Mutuku Dongonye ap, el mapu koprop, isa mer ap, sik damanguk olatingce, Isa Mutuku Dongonye el mapu koprop ati, yakuka dopkweteptopura, sik mikip pia kum uptue. Isa Mutuku Dongonye el mikip kum uptuopura, ninye ton kum taliptue. Isa Mutuku Dongonye arye na talipnutuba, pil doptinyopura, el mapu koprop isa ara kum yakuka dopkweteptinye. Ati, anggun Farisi nang ara talya yupu nyanmaluma.

²⁷ Isa mer nirya yakuka dolkwetenya ara, ‘Isa Mutuku Dongonye el mikip deice arye dolkwetelule,’ tenepmanulum bukni, anggun Farisi nang, anggun melin nang ababye, isa yakuka dolkwetenyaka anya arye, aning ara, dan do? Anang ara, yatanye mikip deice arye isa yakuka dolkwetenyak do? Sik yupu kekebuka melinyak nang arye, isa mer yakuka dolkwetenyak deice arye, akunum laka kipmasile. “Ara Allah el mikip deice arye wininyake,” nyalulume. Ati narye isa dolkwetenuna ati na ning ababye, “Allah el mikip deice arye dolkwetelule,” nyaptume. Anggunce nati, “Isa talibuka deice pil dolule,” nyanulum yupu ati aning ara, anggun bidamang mapu arye pil donyaka deice arye, akunum lakak kipsila anya arye, anggunti yupu lipsisikuka bokolina deiyok nang atonun upnamsiyake. Anggun mapu babye, na babye, atonun pil donyapa ati, Allah el mikip deice aryuk isa yakuka dolkwetenyabe. Sik Farisi nang ara tilila yupu nyalulum nang ani.

²⁸ Kume, narye isa mer nirya yakuka dolkwetenuna ara, Isa Mutuku Dongonye mikip deice arye kum dolkwetenune. Allah El Dib Kanye el mikip deice arye yakuka dolkwetenune. Aning ati ara, Allah ninye weike lyeplirye, sik kanye talima talinamle talak akunum deiyok uple. Na wininye ning ap, isa mer bisibuka dolkwetenuna ap, aning deice arye laka akunum upmasile. Yesus arye nyabuk.

²⁹ “Anggun nyapmalum ning kum winipmanto. Yata nang do nirya, pum tonok ‘El aik wekuka el ning ubula dopropnuyap’ tenen, el aik wektinge bukni, anyaik deiyoknye, weik mikipnye anya arye, tapu kum kuptingopura, el ning ubula kum doproptinge. Anyaik weik mikipnye minopce tapu kouploptingtoura, el ning ubula dobuka betinge. Kumopura, kume. Aning nyapmasin touk, Isa Mutuku Dongonye ara, aik deiyoknye atonun bukni, nada weik mikipnye birye, el tapu koupmana anya arye, el mapu isa mer yakuka dolkwetenune.” Yesus arye aFarisi nang ati nyabuk.

³⁰ Nyabukopura, Yesus arye ayupu ton nyabuk. Na ap neika kum pil dolulnye bira, yupu sekuka malye kibuka, yaniptapra balamak nang atonun ulule. Tonda, winipmanto ara, kwaning yongopra tonok ak bulubuka deibice talak ara, el ap bulubuka kum delilulnye bira, yamupra donoklamak touk ulule. Na ap sik ap, neika kum pil dobibyopura, arup nyapmasin nang, aunyak nang atonun malye weik winilulume.

³¹ Aning ati ara, anggun moubuka kekeplulume. Ayupu pia mambul, dipkoprop nyapnusine. Ninye nirya, sik malye tenelamikce ning ap, malye winilamikce ning ap ara, Allah ati, yanibuka nyalamak yupu ap, anirya ara, sikce sik malye winin ning nirya batakikceba, Allah arye aning nirya kum daneiplirye, namin kipnamsile. Bukni, yata ninye do nirya ara, sikce Allah El Dib Kanye ati, yanibuka nyalamak yupu ara, Allah arye aning kum kum kipdeipnamle. Aning ara pia kum namin kipnamsile. Ayupu nirya awamlya deiceuk wenepnamsile.

³² Yata nang do nirya, sikce nada Ninye Mi Koprop Atonunye ati, malye yupu nyapnice ninye ara, sik malye nyapnice ning ara batakikceba, Allah arye sik malye nyanyak yupu kum daneiplirye, aninye ati namin kipnamle. Bukni, sik anang arye, Allah El Dib Kanye, el pil dolye ning ati, “Aning ara, Isa Mutuku Dongonye el mikip deice arye pil donyake,” nyabuka, malye yupu nyabikcopura, atalak noutamak ababye, aminyan doyanamle talak nirya ababye, Allah arye sik malye nyanyak yupu ara, kum daneiplirye, kum namin kipnamle. Aning pia tuba awamlyeba, aninye wenepnamle. Ayupu nyanyak ning ara, kum lyepmanto ning unyaka ati nyapsine. Yesus arye nyabuk. Yesus arye ayupu nyalamuk ara, Musa sekamuk yupu peterena deiyok nang arye, “Yesus ara, Isa Mutuku Dongonye talibuka mikip deice arye pil dolule nyanmeka ati,” nyabuk.

Yesus arye yo duk mouna ati, domona yupu nyabuk

³³ Yesus arye nyabuk. Duk moulamle yo nirya ara, ‘Yatato yo duk moubuk do?’ tenen, duk mouamlya eibibyeopura, urasin biknarye, adiparyuk, ‘Ayo el yala anye, ayo ara, el yala anye,’ tenen, kel kinyabe. Yo duk mouamlya deice arye, kel kinyaba anya arye, yo duk teleb ning mouplyopura, ‘Ayo ara teleb yo,’ tenenyabe. Duk malye ning mouplyopura, ‘Ayo ara malye yo uka,’ tenenyabe. Aning ati ara, na wininye ning teneipdenululume.

³⁴ Anggunda, kwatima duknupmalya ani, ninye olamle touk winilulum nang. Anggunda kanye talima pia malye winilulum nang anya arye, yata ubuka teleb yupu nyaptum do? Yata nang do nirya, sik talimak wamlye ning deice, si bam bol arye yupu nyanyake.

³⁵ Sik teleb nang ara, sik talimak teleb ning wamlya deice arye, teleb yupu uk nyanyakce, telebuk wininyake. Sik malye nang ara, sik talimak malye ning wamlya deice arye, malye yupu uk nyanyakce malyeuk wininyake.

³⁶ Aning ati ara, na dipkoprop nyapsine. Allah arye ninye nirya bokuka wenepnamle talak ara, malye nyalamak yupu ap, moubuka tenena kum diparyuk, talya nyaltakalamak yupu ap nirya ara, “Deiyok ara, ani,” nyabuka, adiparyuk Allah kekenak ati, ninye tonok-tonok arye, sik bidamnye aryuk, lakak laka nyanamake.

³⁷ Ati, anggun nyalulum yupu teleb uplyopura, Allah namin kilinamsie kum wenepnamsile. Bukni, anggun nyalulum yupu malye uplyopura, Allah kum namin kilinamsie, wenebuka dopnamsile. Anggun talimak upliba winilamlum touk Allah arye yupu lipsisikuka bokeipnamsile. Yesus arye nyabuk.

‘Yesus ara, dipkoprop Allah el Mi do?’ tenen, ninye kum winipmanto pil ap, sirya dakna ning winina ap ati, morobik yupu

³⁸ Nyabukopura, sik Farisi nang ap, Musa sekamuk yupu, mem yupu peteren deiyok nang ap, Yesus ati tamubuka nyabik. “Yesuso ance sirya dakna pil doptumba, eiptibye,” nyabuka nyaldena ati nyabik. Anyabik ning ara, ‘Yesus elda, Allah mikip deice arye pil kum dolule. Elda, talinye binya,’ tenebika ati, nyabik.

³⁹ Nyabikopura, Yesus arye anang ati nyabuk. Anggun wini talak ululum nang ara, Allah yupu yaniltanauk ululum nang anya arye, yuk ning ati kanye deibuka talilulum nang. Nati, diba kum tenenululum nang anya arye, anggun winilulum ning atonun ning nyapnusine. Ara, anggun malye nang arye, sik min domikce kilapu batakuka, talya kil yolamaka atonun winilulume. Anggunce na bataknuluma ati nyapsine. Ati, sirya dakna pil ap, ninye kum winipmanto pil tonap kum pil dopnusine. Allah yupu laka nyalamuknye Yunus ulamuk talak winibuk ning atonun ning ara, aminyan winipnamle ning ara eipnamlume. Yuk ning tonap kum arepnamsine.

⁴⁰ Weik mekin bal arye Yunus amkorokukba, mekin bal mun pum bisik ara, like winilye umoka ani, amekin bal arye Yunus el nong dukdonokuk. Winibuk touk, nada, Ninye Mi Koprop Atonunye tuku pum unmanya ani, like winilye akunum upyopura, kam buknamne.

⁴¹ Niniwe mutuku nang ara, ‘Yunus mitikto mambulnye,’ tenelamik bukni, Allah yupu peterebukba, kekebikce, sik malye ulamik ning batakik. Winibika anya arye, Allah arye ninye nirya bokuka wenepnamle talak ara, Niniwe mutuku nang arye tikuka, anggun wini talak umunye nang ati, “Anggunda, malye ulamlum nang atia,” nyabuka lak akarye nyapnamsiyake. Yunus mitikto mambulnye peterebuka deice arye, Niniwe mutuku ninye diba tenebik bukni, wini talak ara, weik mambulnye bira, na akunum yase bukni, tuba diba kum tenenululume.

⁴² Aning atonun ton, weik ninye deiyok kil, Seba mutuku talyamuk kil arye, ‘Raja Salomo weik kel arye nyalulul yupu ara, na ton kekeptinge’ tenen, pia karen mutuku bukni, el mutuku batakuka Salomo dam kekelbiyuk. Winibuka ati, Allah arye ninye nirya bokuka wenepnamle talak ara, akil tikukaplirye, anggun atalak winimunye ninye ati, “Anggunda pia malye ulamlum nang atia,” nyapnamsile. Na dipkoprop nyapsine. Akil arye karen mutuku arye, ‘Salomo yupu kekepnun’ tenen, biyuk. Dipkoprop ara Salomo mitikto kelnye bukni, nada, weik kelnye birye anggun kan-kan akunum yasi bukni, tuba nati diba kum tenenululume. Ati aning ara, Seba mutuku talyamuk deiyok kil arye, anggun wini talak winilulum nang ati, wenepnamsile. Yesus arye sik Farisi nang ap, Musa sekamuk yupu peteren nang ap ati, nyabuk.

⁴³ Nyabukopura, ayupu ton nyabuk. “Anggunda, kanye mouplulume. Isa mer nirya ninye talima noutam talyamsilya ani, kutukuka balirye, ‘Dana ak didik septinye do?’ tenen, mek pia kumak balamlya ani, teleb ak kum eiplyopura, ila tamubuka el min arye talyamuknye dam yangalule.

⁴⁴ Winipmanto ara, yanuka dinmaliba, el min arye ulamlye aik noutamak ara, amsuna ap, delin ning nirya ap, teleb wamlirye, ninye ton una kum ati, ‘E, anyaik ara lo tuba upmala ati, asukumuk unamne,’ tenebuka ulule.

⁴⁵ Utenebukce, elda mitikto yu bukni, weik yu isa tekbarye binuka doyaliba, anye el talima noutamak wekuka unamake. Anye el talima talyamuk ning ara, min arye mitikto malye ulamuk bukni, wini talak ara, pia weik malye unamle.” Yesus arye nyabuk. [Ara, Yesus arye, “Ayupu nyapmasin touk, anggun babye, min arye malye winilalum ning, mitikto akunum bataklum bukni, talima lo upmasil ning ara, Allah arye ninye nirya talinamle talak nyasinye yupu ara, kum talipmunyopura, ‘Aminyan ara, pia malye upmunyak’ tenen, nyabuk.]

Yesus arye, “Na nin yapu atonun kilapu ap, na weit yapu atonun nang ap, anggun uka,” nyabuk yupu

⁴⁶ Yesus anyaik bukmokce, awekmek nang ati tuba nyanmok talak ara, el lin koprop ap, el weit yapu koprop ap arye, ‘Yesus ap yupu taliptibye’ tenen, Yesus dam yayik. Aik yanuka tikikce, ‘Yuk nang arye Yesus binuka nyapdeipnunyaka’ tenen, nyabik.

⁴⁷ Anang arye, Yesus ati nyabik. “An nin ap, an weit yapu ap, asik dam tikilyanmakce enmakiyake,” nyabik.

⁴⁸ Nyabikopura, Yesus arye, ‘Na nyapne yupu ara sik moubuka tenepnamak’ tenen, anang ati asipdeyuk. “Na nin yapu ap, na weit yapu ap ara, yata ninye do?” nyabuka asipdeyuk.

⁴⁹ Nyabukopura, Yesus arye el yupu kekebuka el melibuka balamik nang ati, taruk dum bupukukce, ayupu nyabuk. “Na nin yapu ap, na weit yapu ap ara, anggun aunmalum ninye, anggun akunum aunmaluma.

⁵⁰ Yata ninye do nirya, Allah arye ‘Wininamake,’ tenelul touk pil dolamikce ninye ara, sikda, na weit yapu ap, na weit kilapu ap, na nin yapu ap, atonun unyake,” Yesus arye nyabuk.