Matius 11 - Eipomek

Yesus arye Yohanes ati, dopdeibuk yupu

¹ Yesus arye el yupu bobuka, ‘Peterepra banamak’ tenen, wibuka deiyamuk nang, sik 12 nang ati, ayupu nirya nyabukce, akunum peterebukopura, amutuku batakuka, Galilea tam noutamak asik dolamikak nirya, el yupu peterepra balamuk.

² Yesus arye peterelamuk ning ap, winilamuk ning ap ara, yuk nang laka nyabikba, Yohanes arye kekebuk. Ara, diba tenena ninye mek dongolamuknye, Roma mutuku deiyoknye birye wenena aik pum dongobuknye, Yohanes Pembaptis arye, Yesus winilamuk ning kekebukce, el melin nang ati ayupu nyabuk. “Anggunda, Yesus dam bimunce, ayupu ara asipdelulume. ‘Nabi nang arye, ‘Ninye mutuku-mutuku nirya noutamak arye, ninye weik lyeplirye, sik kanye talima talinamlanye yanamle,’ nyalamsiknye bira, an akunum do? Yuknye ton aminyan talak yanamsil do?’ nyabuka, Yesus ati asildelbilulume,” Yohanes arye nyabuk.

³ Nyabukura, el melin nang arye Yesus dam binuka asipdeyikba, Yesus arye tamubuka anang ati nyabuk.

⁴ “Anggun amul arye kekelulum ning ap, asing arye eililulum ning ap, Yohanes dam lakak laka nyalbilulume.

⁵ Ara, nyapnululume. ‘Asing kuamlye ninye perekeipliba, elinyake. Aik bukamikce nang kwetelilulba, banyake. Barye suse atonun suse dilamlye nang kwetelilulba korokolsakalule. Amol kunukamlye nang kukeipliba kekenyake. Akunum dipmakce nang kam bulilule. Tonda ninye lyena ati, Allah el lak teleb yupu talya kankan ninye kekena ati peterepliba, kekenyake,’

⁶ Yatanye do nirya, na wininye ning eiplirye, tonda kekeplye deice arye, kanye kum boktoplirye, teniltona kum diparyuk batakna kum upnilyopura, telebuk unamle. Ati na nyapmasin yupu bobuka, Yohanes dam nyalbilyame,” Yesus arye, Yohanes el melin nang ati nyabuk.

⁷ Nyabukura, Yohanes el melin nang kekebikce biyikopura, Yesus arye el dam wekmek nang ati, ayupu nyabuk. Yohanes ara, mek kum ati ninye kum unyak noutamak arye Yohanes peterelamukba, kekelbaluma ara, yata ning ‘Eipnamap’ tenen, dilbalamlum do? ‘Yenya dolirye, utotoa lulukunmaliba, eipnuyap’ tenen, dilbalamlum do?

⁸ Akumopura, yata ning ‘Eipnuyap’ tenen, dilbalamlum do? ‘Tonoknye pia teleb baju ongobuka unmalyak eipnuyap’ tenen, dilbalamlum do? Kume, weik teleb baju ongonyak nang ara, weik ninye deiyok nang, Raja nang sik asik unyake.

⁹ Akumopura anggunce, ‘Allah yupu laka nyananye, nabi eipnuyap’ tenen, dilbalamlum do? Unyopura, dipkoprop nyapsine. Allah yupu laka nyananye nabi dilamlume. Bukni, anye Yohanes ara, yuk Allah yupu laka nyana nang atonun kum ulule. Anggunda mitik mambul bukni, Yohanes ara, weik mambulnye ulule.

¹⁰ Minop arye Allah yupu laka nyalamuknye, nabi Maleaki arye anye Yohanes ati, nyabuk. ‘Yupu lak nyalinanye yanamle’ tenen, ayupu sekamuk. Allah arye nyapdeibukba, nabi Maleaki sekamuk yupu ara ani. ‘Allah arye nyabuk. Na yupu lak nyalinanye minopce dopdeipniba, yupu lak nyalbalamle buk, an aminyan binamlyame. Na yupu laka nyalinanye birye, an binamlam bisik ara, kintinipdeipnamkile,’ Allah arye nyabuk. (Maleaki 3:1) Maleaki sekamuk yupu dobuka akunum, nyapsine. Yesus arye nyabuk.

¹¹ Yesus arye nyabukopura, ayupu ton dukdongobuka nyabuk. “Aning ati ara, na dipkoprop nyapsine. Minop danerye dipdongobuka wini talak nirya, kilapu nirya arye delilamik mapu nirya ara, mitik mambul ulamik bukni, diba tenenyak ninye mek dongolululnye Yohanesuk ara, weik mambulnye ulule. Yuk nang nirya ara, el atonun, mambul kum unyake. Bukni, ninye mek dongolamuknye Yohanes ati ara, Allah el kanye ara, ‘Elda, mitik mambule,’ tenelule. Ara, nara Ninye Lyena Deiyoknye tukwak mutuku min kum yase talak bukni, na yangana ati, Yohanes arye na lak nyalinanye ulula ati, elda weik mambulnye ulule. Anyapmasin bukni, wini talak arye dipdongobuka dounamle talak nirya ara, Allah arye ninye weik lyeplirye, sik talima talinamle talak wekenamak nang noutamak ara, yuk nang arye aninye nirya ati, ‘Weik mambule,’ pia kum tenenyake. ‘Anang ara, weik mambule,’ kum tenenyak bukni, na dipkoprop nyapsine. Allah el kanye ara, ‘Im deice welepnamak nang nirya ara, weik mambule unyake. Yohanes ara mitik mambul uka,’ tenelule. ‘Yohanes ara, teleb pil dolul bukni, elda mitik mambule,’ tenelule. Deiyok ara, tukwak pil donyak nang ara, mitik mambul bukni, im deice welebana ara, weik mambul ati nyapsine.” Yesus arye nyabuk.

¹² Yohanes Pembaptis Allah yupu deiyok koubuka peterelamuk talak arye dipdongobuka, wini talak nirya ara, Allah diba tenena kum nang arye, Allah diba tenena nang ati, sik nong deice ikin ning weik delinyake. Wininyaka ara, ‘Allah arye ninye weik lyeplirye, sik talima talinamle talak kum winipnamle’ tenen, wininyake. Bukni, winibikca babye, Allah ati diba tenenyak nang tuba weik upnin banmake. Tonda weik tonap upnin banamake.

¹³ Musa sekamuk yupu ap, Allah yupu laka kibuka, laka nyalamik nang arye nyalilamik yupu nirya ap deice arye, ‘Allah arye aminyan talak wininamle, wininamle,’ nyabuka nyalilamik. Sikce ayupu nyalilamik bukni, sirya ara, Yohanes yayuk.

¹⁴ ‘Sik Allah yupu laka nyalamik nang arye nyalilamik yupu kekebuka, diba teneptibye,’ tenemunyopura, anyapnusin yupu ton diba tenepnululume. Ara, nabi nang arye, ‘Aminyan talak Elia atonunye yanamle,’ nyalilamiknye bira, ara ninye mek dongolamuknye, el Yohanes ati, ayupu nyalilamik. Elia atonunye bira, Yohanes atia.

¹⁵ Anggun amul aupmasilyeura, na nyapmasin yupu kekepmanto ninye ara, ‘Ayupu nong, deiyok ani’ tenen, moubuka kekepnululume.

¹⁶ Anggun tenipdelulume. Wini talak umunye nang ara, anggun winimunye atonun ning ati, winipmanto yupu nyapnusine. Sikda, ninye din ning bulubuka deibikirye, deklamakak ara, mapu bulubuka bukikirye, arikal dolamak touk ululume. Ton mapu arye yuk mapu ati, nyanyake.

¹⁷ “Se, ‘Kanye deibuka mot sepnamap’ tenen, bung-bung ana atonun ning nyabibi bukni, anggun lik ati, batakmasulumba, nun ap mot kum sepmabe. Atonun ton, mot weibuka sena ati, ‘Ninye dibikiba, mot nyabuka engelamak touk, engepnamabe’ tenen, mot nyabuka engenmaupuba, anggun lik ati, batakmasulumba, nun ap kum engepmabe. ‘Nunce winipnuyabe,’ tenebibye ning nirya ara, anggun lik ati, batakasululume.” Amapu arye, sik kayapu ati, nyanyake.

¹⁸ Amapu lik upliba, bataklamak touk, anggun babye atonun winilulume. Ara, Yohanes ara, dina teleb ning roti ap, anggur mek kanye wangalamak mek ap, kum dilamuk bukni, sik diba tenena kum nang arye el Yohanes biti, “Anye bira, isa arye el talima talibuka ulule,” nyanyake.

¹⁹ Bukni, Yohanes aning winilamuk touk, na Yesus arye kum wininune. Nada, Ninye Mi Koprop Atonunye birye dina teleb ning ap, anggur mek kanye wangalamak mek ap, dipra unun bukni, nati anggun diba kum tenenyak nang arye, “Anye Yesus ara, din pia dilulnye ulule. Elda, kanye wangalamak mek pia dilulnye ulule. Ati, elda malinye ulule. Tonda, ‘Amutuku talina deiyok nang, Roma mutuku nang arye dopropnamak’ tenen, pajak yo bok bulubuka delilamak nang ap, malye-malye unyak nang ap, anye bira Yesus ara anang ap, neika ulule. Aning nirya ulula ati ara, pia malye winilule,” nyaninyake. Nati, diba tenena kum nang arye ayupu nyanyake bukni, na dipkoprop nyapsine. Weik kel nang arye teleb wininyak ning ati, yuk walwal nang arye, “Aning ara talye,” nyanyak bukni, aminyan talak ara sik weik kel nang arye wininyak ning nong akunum upliba lakak uplyopura, ninye nirya arye, ‘E sikce teleb winilamik’ tenen, kel biknamake. Aning atonun, diba tenena kum nang arye nati, “Elda malyeuk ulule,” nyabuka malye yupu nyaninyak bukni, na ap, amalye un ninye ap, neika unmabya ani, aminyan talak ara, na yupu diba tenebikirye, sik malye un ning batakuka, diksukumuk unmakce bukni, eipmunyopura, kel biknamlume. Na pil donye ning nong uplye talak aryuk kel biknamlume. Narye aninye ap neika umunya ara, telebe uka. Yesus arye nyabuk.

Yesus arye elti, diba tenena kum nang ati, wenebuk yupu

²⁰ Yesus arye amutuku-amutuku nirya peterepra balamuk talak ara, ninye kum winipmanto pil ap, sirya dana pil ap weik arye dololamuk bukni, amutuku ninye ara, sik malye un ning batakna kumce, elti, diba kum tenelamik. Aning ati ara, el mambul pil dolamukba elilamik ninye ati deiyok koubuka wenelamuk. Wenebukce, ayupu nyabuk.

²¹ Anggun Korasin mutuku umunye nang ap, Betsaida mutuku umunye nang ap, Allah arye wenebuka opnamsila ati, anggun bico. Anggunce, ‘Se,’ tenebuka mambul kanye bonamlulume. Anggun dilamlumba, anggun mutuku noutamak sirya dana pil ap, ninye kum winipmanto ning pil ap dolamsa ara, Tirus mutuku ap, Sidon mutuku ap noutamak pil dolamtinyetoura, sik amutuku bitinye unyak nang nirya arye, mambul kanye bolamtingce, sik malye ning batakuka balye tamubuka, nati akunum diba tenelamnitinge. Bukni, amutuku bitinye noutamak ara, apil kum dolamsiba, aning nirya kum elilamika ati, diba kum tenepnike.

²² Bukni, na dipkoprop nyapsine, anggunda amutuku ululum ninye ara, mambul pil dopniba, aning-aning nirya elilulum nang anya arye, Allah arye ninye nirya ati bokuka deiplirye, sirya talak ninye nirya wenepnamle talak ara, Tirus mutuku nang ap, Sidon mutuku nang ap, mitikto kanam arye wenepnamle. Bukni, wini talak umunye ninye ara, anggunce nati, ‘Anye bira nun like’ tenen, batakanululum nanguk ara, pia ikin arye wenepnamsile.

²³ Anggun Kapernaum mutuku ninye ara, ‘Nun teleb nang anya arye, Allah arye erebuka im deice deipnamsile,’ tenelalulum do? Kume, Allah arye wenebuka uku din mutuku donoksiliba, uku arye dibuka sirya daknamsile. Anggun Kapernaum mutuku nang ara, anggun dilamlumba, anggun mutuku noutamak narye ninye kum winipmanto ning, mambul pil dolamse bukni, diba kum tenenululume. Bukni, amambul pil ara, Sodom mutuku noutamak apiluk dolamtinyeba, eipmanitingopura, Sodom mutuku ulamik ninye arye, “Se, nun dipkoprop malye unyabe,” nyabuka, sik malye ning bataktingce, nati diba tenelamnitingopura, kam tuba unamtinge.

²⁴ Aning ati ara, na dipkoprop nyapsine. Allah arye ninye bokuka sik malye winilamik ning ati wenepnamle talak ara, Sodom mutuku winilamik ninye ara, malye weik winilamik bukni, Allah arye aninye ati mitikto kanam arye wenepnamle. Bukni, anggun wini talak ululum ninyeuk ara, narye ninye kum winipmanto ning, mambul pil weik arye dolamsiba, elilamlum bukni, tuba diba kum teneluluma ati, Allah arye weik ikin arye wenebuka oplopnamsile. Yesus arye sik Kapernaum mutuku ninye ati nyabuk.

Yesus arye, “Na wininye ning ara, kel biknululume,” nyabuk yupu

²⁵ Yesus arye, ayupu nirya nyabukopura, el li Allah ati moronmaka deice arye ayupu nyabuk. “Naie, anda im deice ap, tukwak mutuku nirya ap, talyamlumce, aning nirya deice tam weik deiyoknye ulyama ati, narye anti, ‘Telebe,’ nyabuka an si erepkine. Tonda, an nyasiminye yupu noutamak ning ara, kel bikna kanam nang ap, weik kel nang ap ati, deiyok dunulul bukni, mitik mapu atonun unyakce, talima mitang arye unyak nang ati, deiyok noutamak ning ara laka kibuka laka nyasilyame.

²⁶ Diba na ni, winiminye ning ara, ance, ‘Wininamne,’ tenyamuk touk wininmala ati, aning arye an talima kanye deilikulule. Ati telebe nyapkine.” Yesus Allah morona deice arye ayupu nyabuk.

²⁷ Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.

²⁸ Anggun kanye imun kanye bobuka ululum ninye ap, nong ap didik usilye ninye ap, ikin ululum ninye ap, anggunce anggun kanye imun usulul ning na nong deice deipnumunce, moropnumunyopura, narye melisiniba, ikin kanye bona kumce, teleb kanyeuk bobuka unamlulume.

²⁹ Nada kanye talima erena kum, mitang arye ununye binya arye, na nyasinye yupu ap, na wininye ning ap, kekebuka kel bikmunyopura, na unye touk unamlulume. Winipmunyopura, anggun kanye imun usilye ning ara kum dasiliba, teleb kanyeuk bobuka unamlulume.

³⁰ Narye ‘Wininamak’ tenen, nyasinye yupu ap, narye nyapsiniba, winibuka pil donamlum ning ap, anirya ara kanamuk anya arye, nati diba tenebuka dobolyanganamnulume. Yesus arye nyabuk.