Matius 10 - Eipomek

Yesus arye, ‘Na yupu dobuka, peterelbinamak’ tenen, 12 nang wipdeiyamuk yupu

¹ Yesus arye, ‘Anang ara, na pil donamak’ tenen, el yupu kekebuka, el melibuka dobolamik nang noutamak bukni, el mapu, sik 12 nang ati yukubukba, anang el dam yayik. Yayikopura, Yesus arye ninye kanye talima noutamak talyamuk isa dobuka dolkwetenamaka ap, uk aning-aning nirya kwetenamak ning ap, ‘Apil donamak’ tenen, el mikip weik arye aning 12 nang ati aribuk.

² Yesus arye 12 nang wipdeiyamuk nang, sik Rasul nang ara, sik si ani. Tonoknye bira, Simon nyalamik bukni, aminyan ara anye biti, Yesus arye ‘An si Peterus,’ nyabuka si nyapdeibuknye ap, tonda anye el weit kopropa Anderias ap, Zebedeus el mapu bitinye Yohanes ap, el weit Yakobus ap, ara,

³ Pilipus ap, Bartolomeus ap, Tomas ap, ton amutuku talyamik nang, Roma nang pajak yo bok arena ati bulubuka delilamuknye, Matius ap wibuka deiyamuk. Tonye bira, Alpeus el mi Yakobus ap, Tadeus ap,

⁴ Simon Patriot ap ara, Yudas Iskariot, ara, Yesus opnamika ati, yukubuka biyuknye ap, Yesus arye wibuka deiyamuk.

⁵ Anang 12 nang wibuka deibukce, ‘Na pil donamak’ tenen, nyapdeibuk yupu ara, ani. Yesus arye nyabuk. “Anggunda, Yahudi yala kum ninye aik dobuka ulamakak ap, Samaria mutuku nang ulamak ak ap, kum peterelbinamlulume.

⁶ Yahudi yala ninye ara, sik dam kum binamlum bukni, domba basam wein ninye kum unyakba, domba, ‘Na apu kopropa ara anye,’ tenena kumce, talya yukak balamak touk, Israel tam ninye, aning atonun wininyak ninye ati, ‘Nun deiyoknye, dan do?’ tenen, talye-talyeuk unyaka anya arye, Israel yala ninye sik damuk peterepra banamlulume.

⁷ Anggun peterelbinamlum talak ara, ayupu peterenamlume. “Allah ninye weik lyeplirye, anggun kanye talima melinamsil talak, ara Kerajaan Allah ara, akunum dam upmasile,” nyapnamlulume.

⁸ Amutuku nirya banamunye talak ara, uk din ninye kwetelinamlulume; dipmakce ninye kam bulinamlulume; weik barye suse atonun suse dilamlye ninye kwetelinamlulume. Ninye kanye talima talyamlye isa yakuka dolkwetenamlume. ‘Apil nirya donamlum’ tenen, na mikip urdemuk anggun nong deice deipmasina ati, anggunce, uk dilamlye ninye kwetepnamlum ning ap, apil-apil nirya donamlum ning ap ati, yo bok morona kume. Yo bok morona kum diparyuk, urdem aryuk ninye kwetelamunce, apil nirya donamlulume.

⁹ Na pil dolbanamlum talak ara, yata ning do nirya, dekna weik ning emas ap, perak ap, tembaga ap, nirya libuka bobana kume.

¹⁰ Weik baju arye, aning nirya libuka kum bobinamlume. Tonda, ‘Cang baju weik ‘na’ tenen, libuka boban ning ap, sepatu ap, kama ap, kum libuka bobinamlume. Anggunce na pil teleb ubuka pil dopmunye bukni, anggun binuka pil dopnamunye mutuku ninye arye, anggun patapsilye ning ara, arenamsiyake.

¹¹ Weik asik dobuka ninye weike ulamakak babye, mitik asik babye bimunyeba, ‘Ninye tonoknye birye, yuk nang melilamlirye, diksukum ulamlenye, amutuku aulul do?’ tenen, anggunce dipdebuka enamlulume. Telebnye eipmunyopura, anye el asikuk wekuka daulamunya ani, amutuku unlamunye talak akunum uplyopura, yuk mutuku banamlume. ‘Pia teleb asik dan do?’ tenen, anyasik-anyasik sakaldana kume.

¹² Diksukum ulamlinye birye, ‘Na aik weklulume,’ yukubuka dopropsilyopura, ‘Sik anyaik nang sik un ning nirya, Allah arye teleb kipdeipnamle’ tenen, anyaik nang ati Allah moronamlulume.

¹³ Anyaik nang arye anggunti, nong kanye deibuka melipsikcopura, akunuma. Bukni, anyaik nang arye anggunti, nong kanye deibuka kum melipsikirye, bataksikcopura, ‘Allah arye teleb updeipnamsile,’ nyapmamunye yupu ara, ila tamubuka dopropnamlulume.

¹⁴ Yata asik nang do, yata mutuku nang do nirya, anggunti nong kanye deibuka kum melipsikirye, tonda anggun yupu kum kekepsikirye bataksikcopura, ‘Amutuku batakuka yuk mutuku binuyap’ tenen, tenepmunce binumunye talak ara, amutuku dupmasilye tuku ara, kilibuka batakmunce, yuk mutuku banamlume. Wininamlum ara, amutuku ninye arye, ‘Allah yupu batakmaba ati, nun yan tuku yanibuka, batakmasika atonun, ayupu nyalyanmasiak nang akunum batakmasiake. Se, sikce batakmasiak touk, Allah arye nun tibuk wenebuka bataknamsile,’ tenepnamake. ‘Aning tenepnamak’ tenen, narye nyapdeipmasin touk winibuka wininamlulume.” Yesus arye nyabuk.

¹⁵ Nyabuka ayupu ton nyabuk. Na dipkoprop nyapsine. Allah arye ninye mutuku-mutuku nirya bokuka deiplirye, wenepnamle talak ara, Sodom mutuku ninye ap, Gomora mutuku ninye ap ara, pia malye-malye weik winilamik bukni, aninye ati, mitikto kanam arye wenepnamle. Ara sikda minop talak na yupu kum kekelamika deice arye malye winilamika atia. Bukni, wini talak na yupu peterepra bamunyeba, anggun yupu kum kekepnamak ninye ara, aminyan talak Allah arye pia mikip arye, wenepnamle. Weneplyopura, sikda pia ikin weik unamake.

¹⁶ Domba basam tonok bai kam weik ulamice kan-kan ulyopura, bai kam arye domba basam opmanto ulye touk, narye dopdeipsiniba, na yupu bobuka peterelbimunyopura, kanye talima malye kanye bobikirye, yu ulul nang arye, na mapu anggun nong deice ikin ning deibuka, opmanto unamsiake. Aning ati ara, ninye ton kwatima arye, kanye wisibuka ulamle touk, anggunce aning-aning nirya ati weik kel kipmunce, kanye pia moubuka unamlulume. Tonda, yu upsiliba, yu asa una kum bukni, yalma maka talima namin asa ulirye, ninye kum opmanto ulamle touk, anggunce talima namin asa ubuka telebuk unamlulume.

¹⁷ Aning ati ara, ninye arye aning-aning winipnamak ning ara, moubuka dimunce, moubuka tenenamlulume. Anggunda, ‘Yupu talina deiyok nang arye wenebuka opnamak’ tenen, tapu koubuka arilbanamsiyake. Tonda, Allah yupu peterena aik noutamak bobisikceopura, kama weik arye kulabuka onamsiyake. Aning ati ara, ‘Winipsicak’ tenen, kanye moubuka unamlulume.

¹⁸ Nati, diba tenepnulumce, na yupu peterelbinamluma ati, yuk nang arye, anggunti tapu koupsikirye, ‘Nun mutuku talibuka deiyok usinyak nang arye, Yesus el mapu opnamak’ tenen, weik ninye deiyok nang, Gubernur nang ap, sisinanye weik ninye deiyok nang, Raja nang ap, sik dam bobinamsiyake. Bobisikceba, anang ap ara, ton yuk Yahudi yala kum nang ap, ‘Sik kekenamak’ tenen, na si deice arye pil domunye ning nirya ara, laka kibuka laka nyapnamlulume.

¹⁹ Yata talak do nirya, anggun tapu koubukapsikirye, yupu talina deiyok nang sik dam bobisikcopura, yupu kum nyapnumunyop talak ara, ‘Se, yata winibuka nyapnuyap do?’ tenen, mambul kanye kum bonamlulume. Allah El Dib Kanye arye anggun talima noutamak wini talak nyapsilye ninguk, kekepmunce nyapnamlulume.

²⁰ Ara, anggun ni Allah, El Dib Kanye mikip arepsiliba, amikip deice arye anggun talima noutamak pil dosilyeba, ayupu nyanamluma ati nyapsin.

²¹ Sik tonok du weit bukni, yukubuka tapu koubikirye, ‘Ninye deiyok nang arye opnamak’ tenen, bobinamake. Atonun ton, sik ni yapu arye, sik mapu kopropa yukubuka, tapu koubikirye, ‘Ninye deiyok nang arye opnamak’ tenen, bobinamake. Aning atonun, sik mapu kopropa nirya arye, sik nin yapu ap, sik ni yapu ap ati, “Sik yupu ara nun kum kekenamap,” nyabuka, yuk nang ati, “Nun ni yapu ap, nun nin yapu ap opdeipsululume,” nyabikcopura, onamake.

²² Nati, diba tenenululumce, na yupu nyalbinamluma ati, ninye nirya arye, anggunti pia lik tenebuka, mal pinamsiyake. Bukni, yatanye do nirya, na batakna kumce, pia tunim abuka ulamlenye obice ning ababye, Allah arye anye lyepnamle.

²³ Na diba tenemunce, na yupu peterelbanamluma ati, na yupu peterepmunyeba, yuk ninye arye malye yupu nyabukapsikirye, anggun nong deice ikin ning deipsikcopura, amutuku batakuka, omutuku peterelamunyebuk, amutuku babye bataksikcopura, ila yuk mutuku ton binuka peterepra banamlulume. Atonun ton binuka, Israel ninye sik asik dobuka ulamak ak ap, unamakak ap, amutuku nirya min kum binuka peterepmanunye talak ara, aminyan ara na Ninye Mi Koprop Atonunye yanamne. Yesus arye ayupu nirya nyabuk.

²⁴ Nyabukopura, ayupu ton nyabuk. “Peterebiceba, kel kibice nang ara, mitikto mambule bukni, sik peterena deiyoknye bira weik mambule. Tonda, ‘Pil doplulume,’ nyabikiba, talya pil donyak nang ara, mitikto mambule bukni, sik pil deiyoknye bira, weik mambule.

²⁵ Peterena deiyoknye, guru arye el yupu nyabuka, el ulamle touk, el amu tam ninye kekebikirye, el ulye touk winibikcopura, aning ara teleb uka. Aning atonun, sik pil donyak nang arye, sik pil deiyoknye ulamle touk, aninguk unamake. Aning ara telebe. Aning ati ara, peterena deiyoknye birye nyaplye yupu, yuk nang arye, kum kekebikcopura, el mapu arye nyanyak yupu babye, kum kekepnamake. Yuk nang arye peterena deiyoknye biti, el nong deice ikin ning deibikirye, malye winibikce touk, anang arye el mapu babye ati, atonun winipnamak. Peterenanye birye nyapliba, yuk nang kekebikcopura, el mapu babye nyabikiba kekepnamake. Nada tonok aik deiyoknye atonun ununa ati, yuk nang arye nati, ‘Anye bira, pia malinye, elda isa nirya, sik deiyok isa Belesebul ulule,’ tenebikirye akunum nyapnikcopura, na aik unyak nang, ara na amu unyak ninye nirya ati, atonun ton tuba-tuba nyanamake,” Yesus arye el wipdeiyamuk nang, sik 12 nang ati nyabuk.

²⁶ Nyabukopura, ayupu ton nyabuk. “Aning ati ara, malye yupu nyabuka, anggun nong deice ikin ning deipnamsiyak nang ati, ilil kum unamlulume. Ilil una kume. Ninye mutuku-mutuku nirya sik duknubuka wininyak ning ap, duknubuka nyanyak yupu ap, aminyan talak Allah arye laka kipdeipnamle. Tonda, Allah arye minop talak duknyamuk ning nirya ara, laka kipdeipnamle. Aning nirya lakakuk danamle.

²⁷ Narye anggunti, teleb yupu bukni, nunuk bulubuka sisikinyap yupu ara, ‘Ninye mutuku-mutuku nirya kekepnamak’ tenen, laka kibuka, laka nyalbinamlulume. Tonda, narye murmur abuka nyasunun yupu ara, ninye nirya kekenamakak lakak nyabuka, laka nyanamlulume.

²⁸ Ninye kanya kum opsitinge bukni, nong ara opnamsiyak nang ati, ilil una kume. Bukni, ninye malye-malye weik unyakba, weneplirye, uku din mutuku dongoplirye, ninye nong ap, kanya ap, obuka sirya daknamsilanye, elti, ilil unamsile. Ara urdem ati, kum nyapsine, ‘Allah arye wenebuka opsilyak’ tenen, elti, ilil unamsile.

²⁹ Kukalima maka ara, pia mitik keil uang deice arye uamuk deice dekenyak bukni, amaka babye, Allah arye, ‘Amaka diptue,’ kum teneplyopura, tonok maka babye, dipturye tukwak kum saktue. Mitik maka babye anggun Ni Kopropa Allah arye kum luba kilule.

^30-31 Winibuka kalikuka dilul bukni, kukalima maka ara, weike uptuopura, ‘Ara pia mambule,’ kum tenepnamle. Maka ara, mambule kum atia. Bukni, anggun ninye nirya ara, weik mambule anya arye, Allah bico tenesilirye, kalikuka melisulule. Allah arye, ‘Aninye ara, na’ tenen, anggun kisok potong nirya babye, akunum nukuka kel biksuke. Allah arye mambul kum maka ati, kalikilirye moubuka tenelul touk, anggunda weik mambule anya arye, pia moubuka tenesilirye, kalikisulule. Ati ara, ilil una kume. Ati, anggun patasilye ning nirya ara, Allah arye kum lubakinamsil bukni, melibuka arenamsile.” Yesus arye el mapu ati nyabuk.

³² Nyabukce, ayupu ton nyabuk. Yata ninye do nirya, ninye yuk nang dam bikirye, “Yesus ara, dipkoprop na ni unulule. Nada, el yupu kekebuka unune,” nyanyak ninye ara, na Yesus arye, na ni Allah im deice ulinye biti, “Aninye ara dipkoprop na mapu unyake,” nyapnamne.

³³ Bukni, yata ninye do nirya, ‘Yuk nang arye opsikcak’ tenen, “Nada, Yesus el mi kume,” nyabuka batakikce ninye ara, narye na ni dam, “Aninye ara, nati diba kum tenenyaka ati, na mapu kum unyake,” nyapnamne.

³⁴ Sikce nati, ‘E, Yesus ara, ninye mutuku-mutuku nirya, tonok kanyeuk bobuka, talya tunim abuka, ‘Talye-talye kanye bobuka unamake’ tenen, yayuke,’ kum tenenamlulume. Na yupu bobuka, yuk nang ati, peterepra bamunyopura, sik kanye yuk tenenyak nang arye ayupu ati, yu ubuka nyana ap, oldana ap, unamake.

³⁵ Kume na unirye nyanye yupu deice arye, Allah yupu laka nyalamuknye, nabi Mika arye nyalamuk touk unamle. Mika arye nyalamuk yupu ara ani. ‘Tonoknye birye el li koprop ati mal pinamle. Tonda, tonok kilmu arye, el lin biti mal pinamle. Tonda, tonoknye el mi arye dobuk kil, akil arye el yamal kil ati mal pinamle.

³⁶ Aning atonun, tonoknye bira, el mining aik nang arye, elti, mal pinamake.’ (Mika 7:6) Mika arye nyalamuk yupu dobuka nyapsine. Ara, na nyasinye yupu ati, ninye arye, yu upliba, oldanamake. Yesus arye nyabuk.

³⁷ Nyabukopura, ayupu ton nyabuk. “Ura nada, ‘Mika arye nyalilamuk atonun unamle’ tenen, yasa ati, yata nang do nirya, anggun ni yapu ap, anggun nin yapu ap ati, weik arye kanye delilulum bukni, na ati ara, kanye mitik anun aryuk kanye delilulum nang ara, na mapu kum uptinge. Atonun ton, anggun mapu ap, anggun kil mapu ap ati, weik arye kanye talima dukuldongolulum bukni, na ati ara, kanye talima mitik anun aryuk dukuldongolulum nang ara, na mapu kum uptinge.

³⁸ Tonda, yata kil do, yatanye do, nati diba tenepnikirye, na dobolyanganamniyak nang ara, sik bidamang ning atibuk, ‘Aning mambule,’ kum tenenamake. Sik wenebikiba opnamak nang arye, wanwanun yo dobuka, talya mangkau asa balamak touk, na mapu koprop ara, ‘Anggun opsikca babye, telebe uka, ara mambule kume,’ tenebuka, na mapu babye, ‘Opnamak do?’ kum tenenamake. Aning tenena kumce, sik babye kam un ning ap, sik babye patalye ning ap atibuk, kum tenenamake. Sik yuk nang ara, sik bidamang ninguk tenebikirye, tonda, ‘Yesus melibuka bipye bukni, yuk nang arye opsikcak’ tenen, duknubuka lyepdakirye, na yupu kekebuka kum dobolyanganamniyak nang ara, na mapu kum uptinge.” Yesus arye nyabuk.

³⁹ Nyabukce ayupu ton nyabuk. “Yata nang do nirya, sik yuk nang arye, ‘Yesus el mapu unyaka anya arye, opnamabe,’ tenebikibuk bukni, lyepdanuka duknubice nang ara, aminyan sirya talak ara, Allah arye wenepliba, dibikcopura, ila tamubuka tonap, na ap neika kam pia kum unamake. Dibikcopura, na ap neika kum unamabe. Bukni, ‘Nun opsikcak’ tenen, ilil una kum diparyuk, na yupu uk kekebuka dobolyanganinyak ninye ara, yuk nang arye, ‘Yesus el mapu unyak’ tenen, obikcopura, sik nong dipnamak bukni, sik kanye ara, na ap neika pia kam unamabe.

⁴⁰ Yata nang do nirya, anggunti, ‘Yesus el mapu unyak’ tenen, kanye talima arepliba, kanye deipsikirye melipsicopura, ara dipkoprop nati kanye talima delinulule. Nati, kanye talima arepnilyopura, dipkoprop ning ara, na ni Allah dopdeipnuknye biti kanye talima arenulule.” Yesus arye nyabuk.

⁴¹ Nyabukce ayupu ton nyabuk. “Yata nang do nirya, ‘Allah yupu laka nyanyak nang unyak’ tenen, kanye talima arepliba, nong lyam-lyam nyapsikirye, melipsikcop ur, Allah arye el yupu laka nyanyak nang dekna ning arepnamle touk, sik melibikce nang babye aning atonun ninguk arepnamle. Aning atonun ton, ‘Allah yupu kekebuka diksukumuk unyak nang unyak’ tenen, kanye talima arepliba, kanye deibuka kipsikirye melipsikcopura, Allah arye, adiksukum unyak nang dekna ning arepnamle touk, sik melibikce nang babye, aning atonun, dekna ning arepnamle.

⁴² Tonda, na dipkoprop nyapsine. Yata nang do nirya, anggunda na mapu ati, ‘Anang ara, Yesus el mapu unyaka anya arye, melipnuyabe,’ tenebikirye, talya ikip mek sirika kwebuka arelamaka ababye, Allah arye dekna doplirye, dekna talya arepliba, dopropnamake.” Yesus arye el mapu ati, ayupu nirya nyabuk.