Markus 8 - Eipomek

Yesus arye, din ning bokuka, ninye yupa weik, 4.000 nang aribuk yupu

¹ Amul kunukna ap, yupu luba una ap, uamuknye kwetebukce, daulamuka ani, Dekapolis tam noutamak ninye yupa weik, Yesus dam bulubuka wekelyayik. Wekelyaikce, Yesus dam daunmeka ani, anang sik dina kum ati, Yesus arye el yupu kekebuka neika dobolbalamik nang ati, “Yalulume,” nyabuk ati, yayikopura, ayupu nyabuk.

² “Aunmak nang ara, din mitik anun boyanamik bukni, like winilye sum mabupa ati, akunum dibikce, din bulung unmake.

³ Din patanmalibuk, ‘Anggun mutuku tamubuka bilulume,’ nyapnyopura, ton nang yuk mutuku arye yayika ati, din kum dibikirye bisik ak bukbuk bicak ati, ‘Anggun mutuku kopropa tamubuka dabilulume,’ kum nyapnune,” nyabuk.

⁴ Yesus arye nyabukura, elce wipdeibuk nang, el mapu sik 12 nang arye tamubuka nyabik. “Nunda pia buru mutuku noutamak unmaba ati, sik din roti ara, dan mutuku dekelbitibye do?” nyabuka asipdeyik.

⁵ Nyabikbuk, Yesus arye tamubuka nyabuk. “Anggun lipmalum din ning roti, yata barye lipmalum do?” nyabuka asipdeyuk. Asipdeyukura, sikce, “Tekbarye lipmabe,” nyabik.

⁶ Nyabikbuk, Yesus arye abulubuka wekmek nang nirya ati nyabuk. “Anggun tuku deice buklulume,” nyabukopura, sik alipmek din ning, roti tekbarye doprobukce, Allah ati, “Telebe,” nyabuka morobukura, roti tobuka, el mapu aribukura, sikce bokuka, awekmek nang nirya ati, arebik.

⁷ Tonda mekin bal bitinyeto winilyeto kibuka lipmek ning ton dobuka, Allah ati “Telebe,” nyabuka morobukopura, amekin bal sekuka, el mapu aribukura, awekmek nang bokuka arebik.

⁸ Aribikura, dinmekbuk, akunum boubukopura, kwal batakik. Dinmeka ani, boubukura, batakik ning, Yesus el mapu arye bulubuka, weik aling atouk ning, el si bakul aling arye, tekbarye libikce, akunum langdikbuka deibik.

⁹ Kilapu ap, mapu ap, kum nukik bukni, Saluk nukukap, yupa weik 4.000 nang dinmek.

¹⁰ Sik anang arye akunum dibikopura, Yesus arye anang ati, “Telebe anggun mutuku tamubuka bilulume,” nyabukce, tamubuka mek liya yo deice wekuka bukukura, Yesus ap, el mapu 12 nang ap, mekwen deice banmeka ani, Dalmanuta mutuku biyik.

¹¹ Dalmanuta mutuku binuka daunmeka ani, Farisi nang ton Yesus dam yayik. Yesus dam yayikce, ‘Yesus ara, Allah el mikip deice arye dipkoprop apil dolul do, kum do?’ tenen, Yesus asibikce winipdeyik. Sikce nyabik. “Allah arye dopkwetepkuk ak, ‘Allah el mikip deice arye pil dolule,’ tenepnukiyaba ati, ninye kum winipmanto ning, winipman kum pil dopsilyame,” nyabuka asipdeyikce piripdeyik.

¹² Piripdeyikbuk, Yesus el lik kanye bobukce, “Ae, atalak unamlum nang ara, ‘Allah el mikip deice arye dipkoprop pil dolul do?’ tenemunce, yata ati, ‘Ninye winipman kum pil un pil dopsutue’ tenen, asipdenulum do? Dipkoprop nyapsine, atalak umunye nang ati, ‘El Allah arye Yesus dopdeubuke, tenepnunulam’ tenen ati, na winipman kum pil dopnirye, pitin kin ning kum kipdeipnusine,” nyabuk.

¹³ Nyabukce adiparyuk anang abatakuka, el mapu ap, mek liya yo wekuka bukikce, mekwen deice banmeka ani, mekwen lilun otam biyik.

¹⁴ Sikce, ‘Galilea mekwen atam arye, otam binuyap’ tenen, Yesus el mapu sik binuyik talak ara, sik din ning roti luba kibuka, weik kum libik. Luba kina ati, roti tonokuk libukabikce, talye kanye bobuka luba kibuka mek liya yo wekik.

¹⁵ Mek liya yo deice bukuka banmek talak ara, Yesus arye el mapu 12 nang ati nyabuk. “Farisi nang ap, Raja Herodes ap, sik malye wininyak ning ara, roti nena deiyok ning atonun ulula ati, pia kalekuka dinamlulume. Anggun moubuka kalekuka dinamlulume,” nyabuk. Sik Farisi nang ap, Raja Herodes ap, arye, kanye talima malye tenebuka winilamak nang ara, ‘Na mapu kekebikirye, sik babye, malye winibikcak’ tenen, Yesus arye el mapu ati ayupu nyabuk. “Ninye arye roti dana ati, roti nena deiyok ning mitik anun aryuk dobuka, roti bun noutam dongopmacebuk, weika arye banmalya ani, roti weik arye nelamle touk, sik Farisi nang ap, Raja Herodes ap, kanye talima malye tenelamak yupu kekepmunce, anggun kanye tenen ning babye, ‘Malye updeipsilyak’ tenen, moubuka umunce, sik yupu kum kekenamlulume,” nyabuk. Ara, sik Farisi nang ap, Raja Herodes ap arye, Yesus el ulamuk ning ap, yupu peterelamuk ning ap, ‘Allah el Mi Koprop ulirye, apil dolule’ tenen, ‘Diba kum tenepnamap,’ tenelamikce, Yesus ati, “Ninye kum winipmanto pil dakna pil dopsutumopura, diba tenepkitibye,” nyalamik. Utenebuka nyalamika anya arye, Yesus arye el mapu ati, Farisi nang ap, Raja Herodes ap, sik tenebuka winilamice ning, roti nena deiyok ning weika arye balamle touk ulul ning ati, “Moubuka unamlulume,” nyabuk.

¹⁶ Yesus arye roti nena ning yupu nyabuka ati, Yesus el mapu kekebikce, bita moubuka kum tenebika ati, ‘Deiyok dan do?’ tenen, yupu talilanmek. Yupu talilanmekce, “Nun roti din ning kum lipmaba ati, nyanmasile,” tenebikce nyabik.

¹⁷ Sik yupu talipmek ning ara, Yesus kekebukce, sikti, nyabuk. “Anggunce, ‘Roti din ning kum lipmaba ati, nyanmasile’ tenen, nyanmalum ara, yata ati do? Anggun asing dina ap, amul kekena ap, moubuka kum tenepmalumce unmalum do? Anggun talima kat upmasila deice arye, kum kekepmanto nang unmalum do?

¹⁸ Asing ap, amul ap, aupmasil bukni, moubuka kum dimunce kum kekelulum do? Na winipmasi ning, bita kum teneplum arye do?

¹⁹ Yupa weik 5.000 nang wekmek bukni, roti din ning pamubarye topsirye, arepsopura, anggunce weik bakul aling arye, din kaplobik ning bulubukaplumce, yata barye aling arye libuka deiplum do?” Yesus arye el mapu ati asipdeyuk. Asipdeyukura, sikce tamubuka, “Amul arye utam, 12 weik aling, el si ara, bakul aling arye bulubuka libuka deipmapue,” nyabik.

²⁰ Nyabikbuk, Yesus arye tamubuka ila tonap, asipdeyuk. “Yupa weik 4.000 ninye wekmekbuk roti din ning tekbarye tobuka arepsiura, dibikce batakik ning, weik aling atonun ning, bakul aling arye yata ubuka libuka deiplum do?” nyabuka asipdeyuk. Asipdeyukura, sikce tamubuka, “Tekbarye bakul aling arye bulubuka libuka deipmapue,” nyabik.

²¹ Nyabikbukura, Yesus arye nyabuk, “Aning ati, ‘Allah el mikip deice aryuk apil nirya dolule’ tenen, tuba kum tenepmanulumce, moubuka kum kel kipmalum do?” Yesus arye nyabuk.

Betsaida mutuku arye, asing kunanye kwetebuk yupu

²² Ayupu ara, mekwen deice yupu nyapra banmeka ani, Betsaida mutuku biyik. Biyikopura, amutuku nang arye asing kuamuknye bira, ‘Yesus el taruk talipturye kweteptue’ tenen, Yesus dam boyayikce morobik.

²³ Morobikbuk, Yesus arye anye binyuk taruk talipdongobuka, asik domikak batakuka, bai tam biyuk. Biyukopura, Yesus arye asing kuamuknye, asing bam bol deice Yesus si maka tuleibuk. Tuleibukopura, Yesus arye anye bira nong deice taruk talibukopura, asipdeyuk. “Aning-aning nirya eipmalam do?” nyabuka asipdeyuk.

²⁴ Asipdeyukura, asing kuamuknye birye, el asing labuka dipdeyukce nyabuk. “Ninye nong eipman bukni, kumanya yalirye, yo bok luluklamle touk wininmakak eipmane,” nyabuk.

²⁵ Nyabukopura, Yesus ila tamubuka tonap, anye asing deice taruk bitinye arye bol pibuk. Bol pibukba, adiparyuk anye bira el asing minop labukce, teleb ubukura, aning-aning babye, ninye babye, teleb ubuka dinmok.

²⁶ Yesus anye kwetebukopura, ayupu nyabuk. “Ila tamubuka an aik kopropa binulam bukni, weik asik donyak mutuku, ninye weik unyakak, laka kum nyalbinulyame,” nyabuk.

Peterus arye Yesus ati, moubuka bikukce, laka nyabuk yupu

²⁷ Amutuku batakuka welebikce, bisik mapranin balamika ani, mutuku si Kaisarea Pilipi mutuku biyik. Biyikopura, Yesus ap, el mapu 12 nang ap, arye, amutuku noutamak asik dolamikak nirya peterepra balamik. Amutuku bisik mapnin balamik talak ara, Yesus arye el mapu ati asipdeyuk. “Yuk nang arye nati yatanye tenebuka nyaninyak do?” nyabuk.

²⁸ Nyabukura, sik nirya arye tamubuka nyabik. “Ton nang, ‘Yohanes Pembaptis ulule,’ nyakinyake, ton nang arye, ‘Allah yupu laka nyalamuknye, nabi Elia,’ nyakinyake, ton nang arye, ‘Allah elce dotalak winipnamle ning ati, laka nyana deiyoknye nabi ulule,’ nyakinyake,” nyabik.

²⁹ Nyabikbuk, Yesus arye sikti, tamubuka asipdeyuk. “Anggunda, nati, ‘Yatanye ulul,’ tenenululumce, nyanululum do?” nyabuka asipdeyuk. Asipdeyukura, Peterus arye tamubuka nyabuk. “Kume naio, ‘Ninye mutuk sirya im sirya nirya noutamak ninye weik lyeplirye, ninye talima talinamlanye’ tenen, Allah arye wibuka deiamkuknye, Mesiasnye, anda Kristus ulyame,” nyabuk.

³⁰ Peterus nyabukura, Yesus arye sik nirya ati nyabuk. “Aning, yuk nang ati lakak min kum lak nyalbinulyame,” nyabuka yupu moupdeibuk.

Yesus arye, el aminyan opnamik ning ati, laka nyabuk yupu

³¹ Yesus arye anyapmok yupu moupdeibukce, el nong deice ikin ning deipnamik ning ap, kanye imun ning upnamuk ning ap, el mapu 12 nang ati, deiya koubuka peterenmokce nyabuk. “Na, Ninye Mi Koprop Atonunye unune. Sik Yahudi yala nang sik deiyok nang ap, Allah arena ati deiyok nang ap, Musa sekamuk yupu peterena deiyok nang ap, anang nirya arye nati bataknikirye, opnamniake. Opnikceura, dipmanya ani, weipniceura, mana like winilye sum mapnamni bukni, ila tamubuka, Allah arye kam bukeipnamnile,” Yesus arye nyabuk.

³² Ayupu nyabuk ning, lak akarye nyanmok bukni, Peterus arye Yesus talibuka yukak bobiyukce, anyanmok yupu ati, wenebukce yupu sekdobuk.

³³ Peterus ap, Yesus ap, yukak birikce, Peterus arye yupu sekrobuk ak, Yesus tamubuka, el yupu kekebuka dobolbalamik nang batakuka binaprik ati, sik dam diyukce, Peterus ati wenebuka nyabuk. “Peterus anda na balye tam kiproplyame. Na kum dinukine. Anda Isa Mutuku Dongonye atonun unmalame. Allah arye pataplibuk, tenelul ning kum bukni, talye nang arye patapliba tenelamak touk, tenepmalamce nyanmalame,” Yesus arye Peterus ati wenebuka nyabuk.

³⁴ Nyabukce, el yupu kekebuka dobolbalamik nang ap, abulubuka wekmek nang nirya ap, “Na dam yalulume,” nyabuka ayupu ton nyanmok. “Yata kil do, yatanye do nirya, na dobolyanganamniak nang ara, sik bidamang ning atibuk, ‘Aning mambule,’ kum tenenamake. Sik opnamikce nang arye, wanwanun yo dobuka balamak touk, sik badamnye kam un ninguk kum tenenamake. Yesus diba tenebikca deice arye yuk nang arye obikcopura, ‘Mambule,’ kum tenenamake. Na yupu uk kekebuka dobolyanganamniake.

³⁵ Aning ati ara, yata kil do, yatanye do, sikda, ‘Nun kam una ara pia mambule,’ tenebuka ulamice ninye, aminyan dipnamake. Bukni, nati diba tenebikca deice arye, dipnamak ninye ap, na yupu dobuka peterenyaka deice arye, opnamak ninye ap, Allah arye sikti, ila tamubuka kam pia bukeipnamle ati kam unamake.”

³⁶ “Tonoknye birye, aning-aning yala weik talyamtubuk dipturye, uku din mutuku bitopura, atalyamtu ning nirya arye lyeptu do? Aning nirya arye teleb kum kipdeiptue.

³⁷ Anggun kam Una deiyok ning, yatato ning deice arye dekuka doproptum do? Kume, kum dekmanto ning atia.

³⁸ Wini talak unyak nang ara, wininyake. ‘Ninye arye el bidamnye kil batakuka, yuk kil ubula neika malamak touk, nati diba’ tenena kumce, na batakuka yuk ning eibuka, dobolbanyakce, pia malye-malye wininyake. Wininyaka ati, anggun babye, sik anang kan-kan umunce, na nong ap, na yupu ap, ati, ‘Nun opsicak’ tenen, anggun ilil ati alye upsile bukni, bataknumunyopura, na Ninye Mi Koprop Atonunye birye aminyan sirya talak, anggun babye, bataknamsine. Ara, na ni el urasin pia teleb ulirye, dirina weik ulya atonun, na babye atonun unyopura, Allah arye dirina kipdeibukura, im deice unyak nang, malaikat ap, ansiniprobibyopura, tukwak yanamap, talak ati nyapsine.” Yesus arye awekmek nang ati nyabuk.