Markus 7 - Eipomek

Yesus arye, “Ninye kanye talima pum tam malye ning tuba ubuk deice arye, malye unyake,” nyabuk yupu

¹ Ura, Farisi nang ap, Musa sekeiyamsuk yupu peterena deiyok nang ap, yuk Yahudi yala nang nirya ap arye, sik dina talye luba kibuka kum dilamik. Sikda, sik apu yapu arye, sik kanye aryuk tabakuka peterelamik touk, ‘Taruk mek likna, mem ning atouk,’ tenelamika ati, ‘Aning pia kum bataktibye,’ tenelamik. Ara, ‘Allah derepsilyak’ tenen, taruk mek liknaryuk din dilamik. Sik apu yapu Yahudi yala nang bukni, sik deiyok nang tabakuka peterelamikce, winilamik touk, sik babye, ayupu talibuka winilamik.

² Tonda, din ning deibuka deklamikak binuka unmana ani, sik aik tamubuka yan talak ara, sik apu yapu arye, peterelamikce nyalilamik touk, ‘Allah derepsilyak’ tenen, taruk mek likna aryuk din dilamik. Aning atouk ton, mek makau ap, yun makau ap, mek kwebuka dikne makau, cerek ap, amakau mek likna ati, Pil weik dolamikce, sik apu yapu winilamik ning mem ning atouk ning weika arye tonap, talibuka ulamik.

³ Aning-aning nirya tenelamika ati, yuk talak, Farisi nang ap, Allah arye ‘Winamlulume, aning ton kum winamlulume,’ nyabukaura, Musa arye sekeiamuk yupu peterena deiyok nang ap, Yerusalem mutuku arye Yesus unmokak bulubuka dilyayik.

⁴ Dinmekbuk, Yesus el yupu kekebuka dobolbalamik nang arye dina dinmek. Sik din dinmek talak ara, Farisi nang arye, ‘Kanye talima malye kipsilyak’ tenen, taruk mek liklami touk, Yesus el mapu babye, taruk mek kum likmek cuk, talye luba kibuka dinmeka ati, Farisi nang arye Yesus ati nyabik.

⁵ “An yupu kekebuka dobolbanyak nang ara, nun apu yapu nyapdeiamsik atonun, kum wininyakce taruk mek likna kumce, talye luba kibuka dinmaka ara, yata ati do?” nyabuka wenebik.

⁶ Nyabikopura, Yesus arye tamubuka nyabuk. “Minop talak Yesaya arye anggunti nyapdeiamsuk ning, dipkoprop nyapsuke. Anggunda talima malye tuba awabsilibuk, nong bol deice teleb yupu nyaltakalulum bukni, dipkoprop anggun malye ululum nang ati, Yesaya arye sekuka deiamuk yupu, nyapnusine.” ‘Aning ara, sik talye nyan yupu deice arye, nati si ereninyak bukni, sik kanye talima noutamak ara, dipkoprop nati kanye deibuka kum talininyake.

⁷ Na si ereninyak nang, talyeuk unyake. Sik peterenyak ning, ninye kanye aryuk tenenyak yupu uk peterenyake Yesaya arye sekamuk.’ (Yesaya 29:13) Yesus arye Yesaya nyamuk yupu dobuka, anang ati nyabuk. Nyabukce ayupu tonap, nyabuk.

⁸ Anggun Farisi nang ara, Allah elce “Wininamlulume,” nyalilamuk yupu, akunum bataklumce, ninye arye peterenyak ninguk talibuka ululume.

⁹ Anggunda Allah elce, “Wininamlulume, aning ton kum wininamlulume,” nyabuka nyalilamuk yupu, mem yupu yanilulumce, anggun apu yapu peterelamik ninguk ‘Aninguk talibuka unuyabe,’ tenemunce umunye ning, laka nyapnusine.

¹⁰ Musa arye, ‘Anggun ni yapu ap, anggun nin yapu ap, si erebuka pin-pin arye melinamlume. Yata kil do, yatanye do, sik ni yapu ap, sik nin yapu ap, malye yupu nyabiceura, wenebuka onamlulume.’ Musa arye nyapdeiamuk. (Keluaran 20:12; 21:17)

¹¹ Musa arye ayupu nyapdeiamsuk bukni, anggunce tabakuka peteremunya deice arye, yuk nang kekebiceura, sik malye wininyak ning, nyapnusine. Ara, tonoknye birye el li ap, el lin ap, ati, “Aning-aning nirya melibuka arepkitinye bukni, aning, Allah si erena ati arepnamne ati, aning nirya, kum arepnusine,” nyapturye, el li el lin kum arilamtuopura, anggun Farisi nang arye, “Aning, telebe, anggun ni, anggun nin tonap, kum melinamlume,” nyalulume. “Allah si erena ati arina, weik mambul anya arye, anggun ni yapu ap, anggun nin yapu ap, melibuka arena ara, dauplye,” nyabuka peterelulume.

¹² Ayupu nyalulum deice arye, Allah yupu yaniptabuka malye kilulume. Aning atouk ning ton weika arye winilulume.

¹³ Anggun apu yapu peterelamik ning kekelamlumce, ‘Ayupu, akunuma’ tenen, aninguk peteremunya deice arye, Allah elce nyalilamuk yupu nirya yaniptabuka, malye-malye winilulume. Yesus arye Farisi nang ati nyabuk.

¹⁴ Yesus arye nyabukopura, awekmek nang nirya ati, “Na dam bulubuka yalulume,” nyabukura, bulubuka yayikopura, ayupu nyabuk. Anggun nirya na yupu kekepmunce, kel kiplulume. Anggun Farisi nang peteremunya deice arye, “Taruk mek kum likikcopura, Allah el yupu yaniptabibyopura, Allah ati malye unyabe,” nyabuka, peterelulum bukni, anyalulum ning, meme, nyapsine.

^15-16 Yata ning do nirya, ninye bola deice ulul ning ap, buru tam ulul ning nirya ap, dilulumbuk, sibabol bisik arye anggun mun pum bisik wekelul bukni, adeice arye anggun talima malye kum ulisulule. Aning kum bukni, anggun kanye talima noutamak malye tenelulum ning ara, talima noutam tenemunce, winilamlum ning deice arye malye ulisulule. Yesus arye awekuka kekenmek nang ati nyabuk.

¹⁷ Ayupu nyabukce, sik awekmek nang, asukumuk batakuka banmoka ani, yuk mutuku biyukopura, aik wekdobuk. Aik wekukopura, el mapu 12 nang arye, yuk mutuku arye nyapmok yupu ara, ‘Deiyok aning’ tenen, bita kum bikmek arye tonap, asipdeyik.

¹⁸ Asipdeyikbuk, Yesus arye tamubuka nyabuk. “Anggunda tuba walwal upmasil ati asipdenmanulum do? Na nyapman ning, moubuka kum kel kiplum do? Yata ning do nirya, nun nong buru tam ulul ning, nun dibibye ak, mun weksilyopura, aning deice arye, nun talima malye kum ulisulule.

¹⁹ Nun dilamap ning, talima pum bisik kum wekesulul bukni, mun pum bisikuk mapmasilya, deiuk yaltakanyabe,” Yesus arye nyabuk. (Yesus ayupu nyabuka deice arye, “Din ning yala-yala nirya dilamibya deice arye, talima malye kum ulisulule. Tonda, din ning yala-yala nirya babye, dibibyopura, adeice arye Allah el yupu kum yaniltanyabe. Aning kum bukni, nun talima noutamak malye tenenyap ning ap, dipkoprop malye wininyap ning ap, adeice arye, Allah el yupu yaniltanyabe. Anyuk, yuk ton kume,” nyabuka laka nyapsuke.)

^20-21 Yesus nyabuk yupu ara, tonap, dukdongobuka nyabuk. “Bura tam ulamle ning arye nun nong pum bisik weksilyebuk, malye kum ulisulule. Aning kum bukni, ninye talima noutamak malye tenenyak ning, kanye talima tenebikirye, malye wininyak ning deice arye, talima malye ulisulule. Ninye talima noutam arye welelamle ning ara, ani. Ara malye tenena ap, ubula dona ap, ninye ona ap, sik bidamang domice kil batakuka, yuk kil dolona ap, kil talye-talye yona ap,

²² ‘Bona weik doproptinirye bona weik talinye uptinye’ tenena ap, yuk nang ati malye-malye nyalina ap, tilila yupu nyana ap, dubulana ap, teleb nang kum nyapmanto yupu ap, yuk nang ati, ton nang arye sik wininyak ning ‘Na ton winiptinye’ tenena ap, minina yupu nyana ap, ‘Na telebnye tenepnamniak’ tenen, dilana ap, ‘Allah ap, el ning nirya ap, pia’ tenena kumce, talye kanye bobuka, tukwak ninguk tenena ap, aning-aning nirya ara, pia malye.

²³ Amalye wininyak ning nirya, talima noutamak welebuka, malye ubicopura, Allah yupu yanibikirye, talima malye ulisulule,” nyabuka, Yesus arye el mapu 12 nang ati laka nyabuk.

Fenisia kil arye, diba tenebuk yupu

²⁴ Yesus, Genesaret mutuku batakuka welebalamuka ani, Tirus mutuku dam biyuk. Biyukopura, amutuku noutam unyak nang arye, ‘Na eipnikirye kel biknicak’ tenen, duknubuka aik wekuk. Utenen duknubuka aik wekdobuk bukni, amutuku yayuka ara, kum duknupmanto ubuka ati, sik amutuku nang arye kel kibik.

²⁵ Kel kibikce, “Yesus winira ayale,” nyabuka laka nyalbiyik ak, tonok kil kekebukce, Yesus dam yayuk.

²⁶ Akil ara, Yahudi yala kum kil ulamuk. Elda Siria tam noutam bukni, Fenisia mutuku nang arye deiamuk kil ulamuk. El kilmu talima noutam isa arye talyamuka ati, ‘Na kilmu talilul isa, Yesus arye dobuka yakweteptue’ tenen, Yesus ati morolyayuk.

²⁷ Morolyayukopura, Yesus arye akil ati domona yupu deice arye nyabuk. “Anda Yahudi yala kum kil ati, ayupu nyapnukine. Allah arye dobuka deipnuka ara, ‘Yahudi yala nang peterepnibuk, minopce kekepnamak’ tenen, yase. Ati, an kilmu kweteipkinyopura, mapu din ning dalubuka, talye kam arilamak touk winina ati, aning kum winipnun do? Mapu kwaning kum dipmakik bukni, sik kwaning dalubuka talye kam dam donokna ara malye weika atia. Teleb ning ara, minopce mapu dibikibuk, akunum bouplyeba, bun pupsaklyak batakice ning ara, kam arena telebe,” nyabuka Yesus arye domon yupu nyabuk.

²⁸ Yesus arye nyabuk bukni, adiparyuk tamubuka, akil arye Yesus ati nyabuk. “Naie, dib nyapmanilam bukni, na kilmu kweteipnutumaura, mapu dinmaca dam banmalye kam arye, bun pupsaklyopura, batakice ning, dilamle atouk tenepne,” nyabuk.

²⁹ Akil arye nyabukopura, Yesus arye tamubuka nyabuk. “An akunum teneipmalamce teleb ubuka nyapmanilama ati, an kilmu talibuk isa, akunum bindople. Wini talak an aik tamubuka kanye deibuka binamlyame,” Yesus arye nyabuk.

³⁰ Akil arye ila tamubuka banmoka ani, el aik biyukopura, el kilmu talyamuk isa, akunum bindobuka ati, el kilmu ara, tunim abuka, amsuna akuk mapmokak eibuk.

Yesus arye, amul kunukamuknye ap, yupu luba danamuknye ap ati, kwetebukce, teleb kipdeibuk yupu

³¹ Yesus, amutuku aunmoka ani, Tirus mutuku batakuka, Sidon mutuku welebukce, asik dolamikak biyuk. Sidon mutuku mapmoka ani, bisik damapdanin balamuka ani, Dekapolis tam tamubuka koluku biyuk. (Dekapolis tam asik dolamika ara, taku barye (10) kota dolamik.)

³² Atam noutamak, tonok talak arye, amul kunukamuknye ap, yupu luba danamuknye ap, Yesus dam bobuka delilyayik. Dobuka delilyayikce, ‘Anye bira Yesus el taruk anye nong deice deiplirye, kwetepnul’ tenen, weika arye moronmek.

³³ Yesus arye anang abatakuka, anye el tonok dobuka, yukak bobiyuk. Bobiyukce, Yesus el taruk arye, anye amul pum bisik dana-dana kunukdongobuk. Kunukamuk buk, Yesus el taruk duk deice, si maka tulubuka deibukce, anye el sitang deice taruk duk deibuk.

³⁴ Winibukopura, im deice erebuka dipdeyukce, isina welebukura, isin pu abuk. Isina ubukopura, Yesus el mutuku yupu deice arye anye biti nyabuk. “Epata” nyabuk. (Ayupu nyabuka deiyok ara, ani. “Amul pakyo,” nyabuk. Ara, ‘Anye el amul paklibuk yupu kekena ap, yupu tana ap, kipnule’ tenen, nyabuk.)

³⁵ Yesus ayupu nyabukura, adiparyuk anye bira el amul kukukce, sitang teleb ubukba, yupu teleb ubuka deiya kibukce nyanmok.

³⁶ Yupu teleb ubuka nyanmokak, Yesus arye awekmek nang nirya ati, “Awinimok ning nirya ara, kum laka nyalbinulyame,” nyabuka yupu sekdobuk. Nyabuka yupu sekdobuk bukni, awekmek nang arye, yuk nang dam laka nyalbanauk unmekura, Yesus arye, “Tuba-tuba laka nyalbana meme,” nyabuka yupu sekenmok.

³⁷ Yupu sekmok bukni, sik anang weika arye tonap, laka nyalbanmek. Ayupu nyalbanmek, “Se, amul kunukamlye nang babye, amul pakalilule. Yupu luba wamlye nang babye, teleb updeiplibuk yupu nyanyake. El pil dolulul ning nirya ara, telebuk ulule,” nyabuka laka nyalbiyik.