Markus 6 - Eipomek

Nasaret mutuku ulamik ninye arye, Yesus ati ‘Nun like’ tenen, batakik yupu

¹ Yesus Kapernaum mutuku arye batakuka, el yupu kekebuka, el ap, neika melibuka balamik nang ap, tuku bisik mapnin balamika ani, Yesus el mutuku koprop, Nasaret mutuku biyik.

² Binuka daulamika ani, Yahudi yala nang, sik pil dona kumce, dikdik sen sum, sabat sik Allah si erelamik sum akunum ubuka ati, Yahudi yala nang arye, Allah yupu peterelamik aik Yesus wekelbiyukce, Allah yupu peterenmok. Peterenmok talak ara, el yupu kekenmek nang arye, ngalukunmek. Ngalukunmekce nyanmek, “Anye bira, el peterenmasil yupu ara, dan mutuku arye kel bikuk do? Yata ning arye peterebik ak, weik kel arye peterenmasil do? Yata arye kel kibukba, ninye winipman kum pil dolul do?” nyabuka ngalukunmek.

³ Tonda ayupu ton nyabik. “Kume anye bira, nun mutukunye binye, yo cakuka marikna memelinye, eluk do? Diba de, Maria arye deibuk mi, el akunum atia. El weit yapu, Yakobus ap, Yoses ap, Yudas ap, Simon ap, sik aunyake. Tonda, el weit kilapu babye, nun ap, aunmabe,” nyanmek. Nyabikce, ‘Yesus ati yu weik ubuka ati ara, elda talinye binya’ tenen, elti, lik ubukura, ‘Nun like’ tenen, batakik.

⁴ Winibikopura, Yesus arye anyaik wekmek nang nirya ati nyabuk. “Allah el yupu ap, Allah arye aminyan winipnamle ning ap, ati laka nyanyak nang, nabi nang, yuk mutuku bikcopura, yuk nang arye sik yupu kekebuka, kanye deibuka kisal donyak bukni, sik mining yala nang ap, sik asik nang ap, sik mutuku nang kopropa ap ati, kisal kum dobikirye batakanyake,” nyabuk.

⁵ Yesus el mutuku koprop nang arye, elti, lik tenebika ati, amutuku noutamak nirya, ninye kum winipmanto pil ton kum dolamuk. Tonok ning, na kina talilamuk ninye mitik tonun dem Yesus eibukce, el taruk sik nong deice deibukce kwetebuk.

⁶ Winibuk bukni, Nasaret mutuku noutamak ulamik nang nirya, sik diba kum tenebika ati, Yesus arye anang ati, ikin kanye bobukce, ‘Se,’ tenebuk.

Yesus arye, ‘Na mapu 12 nang peterepra banamak’ tenen, dopdeibuk yupu

⁷ Ura, Yesus arye Nasaret batakuka, amutuku-amutuku nirya peterebuka balamuk. Apeterepra balamuk talak noutamak arye, elce wipdeiamuk nang, sik 12 nang ati, el dam yangana ati, yukubukce, bitinye-bitinye kibuka, ‘Na pil dolbinamak’ tenen, yuk-yuk dobuka dopdeibuk. Anang dopdeibuk ning, ‘Isa mer nirya bisibuka yakanamak’ tenen, el mikip sik nong deice deibuk.

⁸ Tonda winipnamika ati, laka nyabuk yupu, ani. “Amutuku-amutuku nirya banamunye talak, kama kopropuk bobenamlume. Anggun kwaning ap, aling ap, yo bok ap, libuka, kum bobanamlulume. ‘Aning-aning nirya, yata wiribuka doproptibye do?’ tenena deice arye, Allah yupu pil batakmunyak ati, aning tenena meme.

⁹ Anggun yan tatang yanibuka bana ning, sepatu ongopnamulum bukni, ongon cang baju bitinye libuka, kum banamlulume.” Yesus arye, nyabuk.

¹⁰ Nyabukopura, ayupu ton dukdongobuka nyabuk. “Tonok aik domicak bimunyopura, tonok aikuk wekuka manmamunya ani, yukak banamlume. Ei aik mapmana, oraik mapmana, ua aik mapmana kina meme.

¹¹ Yata mutuku do nirya, asik domicak bimunyopura, amutuku nang arye, ‘Telebe,’ nyabuka kina kum upsikirye, anggun yupu kum kekepsikcopura, winibuka atonun wininamlulume. Amutuku tuku anggun yan tatang palipmasilye ning, mening dam asukumuk kilibuka batakmunce, amutuku uk batakuka, yukak banamlulume. Wininamluma deiyok ara, ani. Sik amutuku nang arye, ‘Allah yupu batakmaba ati, sik yan tuku yanibuka, kiliplopmasiyak atonun, Allah arye nun nong wenebuka bataknamsile, tenepnamak’ tenen, winipnamlume,” Yesus arye nyabuk.

¹² Yesus arye ayupu nyabukba, kekebikopura, ‘Ninye nirya sik talima malye tenelamice ning ap, sik malye winilamice ning ap, batakikirye, balye tamupdobikirye, diba tenepnamak’ tenen, Allah yupu peterepra balamik.

¹³ Sik anang peterepra balamik talak, nirya ara, isa mer weik talilamuk ning yakalamik. Tonda, uk dilamuk ninye weik, ‘Allah el mikip deice aryuk kwetenamsiak, tenenamnyaka’ tenen, minyak zaitun dobuka, aninye sik nong deice likipnarye kwetelamik.

Raja Herodes arye, Yohanes Pembaptis ya ngang sekuk yupu

¹⁴ Yesus el mapu arye, peterepra balamika ati, ninye weika arye, Yesus el si kekelamik. Ninye weike kekelamika ati, amutuku weik ninye deiyoknye, Raja Herodes babye, kekebuk. Ton ninye, Yesus arye ninye winipman kum pil dolamukbuk, eibika ati, sikce nyabik. “Kume Yohanes Pembaptis akunum diamuk bukni, tuba tamubuka kam bukuke. Ati, ninye kum winipmanto pil dolulnye bira, Yohanes akunuma,” nyalamik.

¹⁵ Yuk nangopura, Yesus ati nyalamik. “Kume anye bira, Allah yupu laka nyalamuknye, nabi Elia ulule,” nyalamik. Ura yuk ninye ara, “Anye bira, Elia kum bukni, Allah arye aminyan talak winipnamuk ning laka nyalamik nang winilamik atonun, el babye nabinye atonun ulule,” nyalamik.

¹⁶ Anang nirya ayupu yuk-yuk nyalamikbuk, Yesus el pil dolamuk ning ara, weik ninye deiyoknye Raja Herodes kekebukce, nyabuk. “Se, narye nyapdeipsiba, Yohanes Pembaptis ngang ya sekamiknye bira, Allah arye tamubuka kam bukeibuke,” nyabuk.

¹⁷ Ara, Herodes elce nyapdeiamukba, el yin talin nang arye Yohanes Pembaptis tapu koubuka boyayikce wenen aik dongamik. Herodes arye winibuk ning ara, Herodes el weit Pilipus kam tuba ulamukbuk el kil Herodias ara, Raja Herodes birye ubula dopromuk.

¹⁸ Dopromuka ati, Yohanes arye Herodes biti wabukce wenyamuk. “Anda an weit el kil dopropluma deice arye, Allah arye, ‘Winina meme,’ nyabuk yupu ara akunum yanipmalume,” nyabuka wenelamuk.

¹⁹ Yohanes arye nyalamuka ati, akil Herodias birye, yu ubukura, ‘Yohanes opdeipnutue’ tenen, pia tuba tenelamukce, tenenauk ulamuk.

²⁰ Winilamuk bukni, Yohanes ara, Allah arye wepdeiyamuknye, telebnye binya arye, diksukumuk ulamuk ara, Raja Herodes kel bikamukce ilil ubukba, ‘Yuk nang arye, Yohanes obicak’ tenen, yupu seklamuk. Raja Herodes birye winilamuka ati, el kil Herodias birye, Yohanes min kum opmanto uamuk. Tonda, Yohanes birye, yupu nyalamukba, Raja Herodes kekelamuk talak nirya ara, kanye deibuka kekelamukbuk, ‘Winipnun do, winipnun do?’ tenelamukce, kanye teniltonauk ulamukba, diba kum tenyamuk. Winilamuk bukni, ilil ubuka ati, Yohanes kum obuk.

²¹ Sik nirya winilamika ani, Herodias arye, ‘Yohanes optibye,’ tenelamuk touk, Yohanes opmanto talak ubuk. Ara Raja Herodes el deiyamik sum akunum ubukura, el amu tam meliba pil dolamik nang ara, weik nang ap, el yin talin nang nirya ap, ura Galilea tam ulamik deiyok nang ap, anang nirya ati, weik kwalina kwalibuka deipmokba dilyanmek.

²² Sik akwalipmok ning dinmek talak ara, Herodias el kilmu mot yanuka senmokba, sik anang nirya arye kanye deipmekce dinmek. Herodes el kanye deipmoka ati, akilmu ati nyabuk. “Yata ning do an patapkilye ning nirya ara, nati moropniminyopura, dipkoprop arepnamkine,” nyabuk.

²³ Tonda, Herodes birye, “Talya kum nyapmakine, pia dipkoprop arepnamkine. Yata ning do, na talinun mutuku babye moropniminyopura, aning ababye noutam bokuka arepkitinye,” nyabuk.

²⁴ Nyabukopura, akilmu anyaik batakuka, el lin Herodias unmokak biyuk. Biyukce, el lin Herodias biti asipdeyuk. “Nongo, Herodes biti yata ning moropnaman do?” nyabuka asipdeyuk. Asipdeyukba, Herodias arye tamubuka nyabuk. “Yohanes Pembaptis, el ngang sekuka el kisok ara arepnutume, nyabuka moropnulyame,” nyabuk.

²⁵ El lin birye nyabukba, adiparyuk tamubuka Raja Herodes bukmokak, el kilmu arye binuka nyabuk. “Yohanes el ngang ya sekmince, kisok ara, pala ning arye yangabuka boyanilyame. ‘Yohanes el kisok ara, wini talakuk arepnutum’ tenen, patapmanile,” nyabuk.

²⁶ Nyabuka morobukopura, Raja Herodes arye, ‘Se aning, yata wiripnun do?’ tenen, malye kanye bobuk. Malye kanye bobuk bukni, elce nyanmok yupu ara, el kwalina dilyanmek nang nirya arye, akunum kekenmek ati, ‘Kum arepnamane, kum nyapnune,’ tenebuk.

²⁷ Utenebuka ati, Raja Herodes arye ninye olilamika deiyoknye ati, nyabuk. “Yohanes el ngang sekuka, el kisok boyanululume,” nyapdeibukba biyuk.

²⁸ Anye birye Yohanes wenena aik deiyamikak biyukce, Yohanes el ngang ya sekukabukce, pala ning deice, el kisok yangabuka deibukce, akilmu dam bobiyuk. Bobiyukce aribukura, akilmu arye aning dobuka, el lin Herodias dam binuka aribuk.

²⁹ Aning nirya akunum winibik ak, yuk nang arye laka nyabikura, Yohanes el yupu kekebuka melibuka dobolbalamik nang kekebikce yayikopura, Yohanes el nong dobukabikce, ninye weilamik keil deiya binuka weibik.

Yesus arye, din ning bokuka aribukura, ninye yupa weik, 5.000 ninye arye dibika ati, nyabuk yupu

³⁰ Yesus arye, wipdeibukura, el yupu dobuka peterepra balamik nang, sik Rasul nang, peterepra balamika ani, tamubuka Yesus dam yayikce, sik peterepra balamik ning ap, sik pil dolamik ning ap, Yesus ati yanuka laka nyanmek.

³¹ Amenyan, ninye danatam, dana tam arye sik dam, yanapna, binapna kilamikbuk, Yesus ap, el mapu 12 nang ap, arye, pil pia weik donmeka ati, atalak ara, dindin talak lo kum ati, din kum dinmek. Winininmeka ati, Yesus arye wipdeibuk mapu ati, “Sik anang daunmaki bukni, na ap, anggun ap, nunuk ninye una kumak dikdik selbinuyabe,” nyabuk.

³² Yesus arye nyabuka ati, sik yuk mek liya yo deice wekuka bukikce, ‘Ninye una kumak binuyap’ tenen, Galilea mekwen deice banmek.

³³ Sik banmek bukni, sik sakwetebuka, mekwen deice banmek talak eibik nang ara, min arye eipdanmek nang ati, kel bikmekce, ‘Epdanamap’ tenen, mekwen lilun bisik bik-bik abuka banmek. Abanmek nang ap, dana-dana mutuku arye, yanganmek nang ap, Yesus kum binabuk talak arye, minopce binuka wekmekbuk, Yesus aminyan yayuk.

³⁴ Mek liya yo lukuka delilbiyikce, Yesus tukwak sakukopura, yupa weik wekmek nang ara, eibuk. Eibukce, awekmek nang ara, ninye arye weilamak domba, sik apu yapu dam kum ukcopura, ‘Ortam binun do, atam binun do?’ tenen, kanye walwal uplibuk, teniltolamak touk, aninye babye, wininmek. Ura, aninye ara, ‘Yatanye birye teleb yupu peterepsutu ak, diksukumuk unamap do?’ tenen, teniltona ap, kwelana ap, unmeka ati, Yesus arye anang ati bico tenebukce, ayupu-ayupu yala nirya weik peterenmok.

³⁵ Peterenmok bukni, keting kumubukopura, Yesus el yupu kekebuka melibuka balamik nang arye, Yesus dam nyalyayik.

³⁶ “Naie, ninye kumak unmaba anya arye, keting akunum kumupmala ati, abulupmak nang dopkwetepminyeba, amutuku noutam yuk-yuk aik malbitingce, sik din ning dektinge,” nyalyayik.

³⁷ Nyabik bukni, Yesus arye el mapu 12 nang ati nyabuk. “Angguncuk anang sik din ning arepnamlume,” nyabuk. Nyabukopura, sikce tamubuka Yesus ati nyabik. “Kume naio, tonoknye pin barye wala deice arye, pil dolamtua ani, el dekna doproptu yo bok, weik aubtua babye, awekmak nang, sik din ati dekna deice arye, ayo bok, nirya kum uptue. Aning ara, yo bok pia weika ati, nunce sik tibuk, ‘Sik din ning roti, dekuka arepnamap’ tenen, nyapmasilam do?” nyabik.

³⁸ Nyabikbuk, Yesus arye tamubuka nyabuk. “Din ning roti aupmal ning nirya ara, ‘Yata barye do?’ tenen, dipdelulume,” nyabuk. Yesus nyabukura, dipra banmeka ani, akunum eibikopura, tamubuka Yesus dam yayikce, nyabik. “Roti din ning pamubarye (5) ap, mekin bal bitinye (2) ap, upmale,” nyabik.

³⁹ Nyabikbuk, Yesus arye nyapdeibukura, el mapu arye ayupa weik wekmek nang ati nyabik. “Anggun yupa yuk-yuk maning deice bokuka bulubuka buklulume,” nyabik.

⁴⁰ Nyabikbuk, awekmek nang arye bokuka bukik ning, ton tam yupa weik 50 nang bukik. Ton tam, yupa weik 100 nang bukik. Anang nirya atonun winibik.

⁴¹ Akunum bukikopura, Yesus el mapu arye, roti pamubarye ap, mekin bal bitinye ap, arepnamek ning, dobuka, im deice dipdeyukce, Allah ati “Telebe,” nyabukce, aroti, tobukabukce, el mapu 12 nang arye, ‘Abukmek nang arepnamnyaka’ tenen, aribuk. Tonda, amekin bal bitinye sekuka, el mapu aribukura, abukmek nang ati, aroti ap, amekin bal ap, bokuka arinmek.

⁴² El mapu arye abukmek nang ati, aning bokuka arinmek bukni, doprobikce dinmekbuk, akunum boubukopura, kwal batakik ning, dobuka deibikce, tonokak bulubuka deibik.

⁴³ Yesus el mapu 12 nang arye bulubuka libuka deipmek ning, weik aling atouk ning, el si, bakul aling weik ning, 12 deiamika arye libuka deibik.

⁴⁴ Aroti ap, mekin bal ap, dipmek nang, kilapu ap, mapu ap, kum nukik bukni, yupa weik 5.000 ninye dipmekce unmek. Abukmek nang ara, sal demuk nukik.

Yesus elce yan yanibuka mekwen deice biyuk yupu

⁴⁵ Aninye weik 5.000 nang, sik din ning arebikbuk dibikopura, adiparyuk Yesus arye el mapu 12 nang ati nyabuk. “Anggunda minopce mek liya yo arye, mekwen deice banmamunya ani, otam mutuku Betsaida mutuku binamalulume. Narye, awekmak nang ati, ‘Teleb dabilulume,’ nyapnune,” nyabuk.

⁴⁶ Nyabukura, el mapu mekwen deice akunum bayikura, awekmek nang ati, telebe nyabuka, amutuku batakuka, el yuk, ‘Allah moropnun’ tenen, mutuku dup biyuk.

⁴⁷ Yesus Allah moronauk unmoka ani, akunum inipnin banmokopura, Yesus el yuk tukwak unmoka ani, el mapu, mekwen noutamak banmek. ‘Sikda, ortam mutuku binamap’ tenen, urasin deibuka banmek bukni, urasin deibuka banmek tam arye, weik kumanya yayukura, yo lakase mikip arye bukunmekbuk, asukum anirye binmanto kum ubik.

⁴⁸ Sik amekwen deice tuba banmek bukni, Yesus mutuku deice arye sik ikin ubuk ning, eibukce, bereknamalya ati, tulik bisik yalamle talak ubuk talak ara, Yesus mekwen deice yanibuka sik unmekak biyuk.

⁴⁹ Banmoka ani, sik dam bisibuka binmanto ubuk talak ara, sikce Yesus el mekwen deice banmoka eibik.

⁵⁰ Eibikce, ‘Isa banmal do?’ tenen, sik lukdayikce ilil weik ubukura, weik arye ngalukunmek. Ngalukunmekopura, adiparyuk Yesus arye, “Na aunmana ati, anggun ilil batak unalulume,” nyabukce, “Ilil kumce, mangkau asa banululume,” nyabuk.

⁵¹ Nyabukopura, Yesus mek liya yo welebuka bulbiyuk. Mek liya yo welebuka, sik anang ap, bulbiyukopura, weik kumanya donmoka, tunim abuk. Tunimabukopura, Yesus el mapu 12 nang arye, ‘Se’ tenen, ikin kanye bobik.

⁵² Sik lik ati, talye kanye bobuka kum kel kipmeka arye, Yesus arye mekin bal ap, roti ap, bokuka, ninye arepmok ning ara, moubuka kum tenebik, ‘Yesus ara, mikip pia weiknye anya arye, aning-aning nirya caknam aryuk pil dolule’ tenen, bita kum tenebik. Aning ati, Yesus mekwen deice yanibuka yanmok ning ap, kumanya tunimapmok ning ap, ati, sik ikin kanye bopmekce ngalukunmek.

⁵³ Mek liya yo arye mekwen deice banmeka ani, mekwen lilun otam Genesaret mutuku biyikopura, ‘Mek mikip arye mek liya yo yukak bilyak’ tenen, ikin ning tapu kirikdongobuka, mekwen pum bisik dongobik.

⁵⁴ Dongobikce, mek liya yo deice arye tukwak sakik talak, adiparyuk sik min arye eipdanmek nang aunmeka arye, Yesus el nong kel kibikce, ‘Yesus atia,’ tenebik.

⁵⁵ Utenebikopura, mambul kanye bobuka, amutuku-amutuku noutamak nirya bik-bik abuka laka nyalbanmekbuk, amutuku noutamak ulamik ninye nirya, “Yesus abanmale,” nyapnibuk kekelamikce, uk dilamuk ninye, pala yo arye baya wibuka el banmanak anyuk yanuka deipnin balamik.

⁵⁶ Atouk ton, Yesus balamukak nirya, asik dolamikak babye, dolin aik babye, wa win dam babye, ninye bulubuka yupu talilamikak babye, nirya ara, uk dilamne ninye nirya bobuka deililbalamik. Delilbalamikce, Yesus ati, “An ongon baju kup-kup ak, bolpipkitibye do?” nyabuka morolamik. Morolamikce, el ongon baju kup-kup ak, bolfilamik ninye nirya ara, uk kwetelilamuk.