Markus 5 - Eipomek

Tonoknye, el talima pum tam wekamuk isa ara, Yesus arye yakuka, dopkwetebuk yupu

¹ Weik kumanya ap, liman ap, akunum tunim abukopura, mekwen deiceuk banmeka ani, Galilea mekwen otam Gerasa mutuku biyik.

² Biyikopura, Yesus ara, mek liya yo deice arye tukwak tikilbiyuk. Tikilbiyukbuk, isa talyamuknye, ninye weilamik keil deiya noutamak arye kubukabukce, Yesus dam yayuk.

³ Ninye weilamik keil deiya damakuk ulamuk talak ara, yuk nang arye tapu koulelamik bukni, atalak ara, mikip weik uamuka ati, anye bira tapu kum koupmanto ulamik. Ara kawat rantai tapu, besi ning babye, kum koupmanto ulamikbuk talye balamuk.

⁴ Yuk nang arye atalak-atalak nirya, el taruk ap, el yan ap, besi ning, el si kawat rantai tapu arye koupmanbuk, el mikip arye bulubuka sekeltakalamuk. Tonda, yuk besi ning arye, el yan koupdongamik ning, ara cebuka donoklamuk. Aning-aning nirya winipdemik bukni, sik mikip mitikuk uamuka ati, anye bira kum talipmanto ulamik.

⁵ Anye bira, lukunyan babye, keting noutam babye, ninye weilamik keil deiya dam ap, mutuku dam dana-dana ap, pia balamukce, weik yupu nyabuka ngaluklamukce, keil dobuka el nong sekelalamukce olalamuk.

⁶ Yesus mekwen kup-kup tikilbiyuk talak ara, isa talyamuknye yukak arye eibukopura, Yesus dam bik-bik abuka yayuk. Yayukce, Yesus el si erena ati, kutam tuku dipdongobukce kisok talipdongobuk.

⁷ Yesus arye anye talyamuk isa ati, “Isa anda anye el talimak talipluma, batakuka, kubuka bilyame,” nyabukce, ayupu nyanmok talak ara, anye el talimak talyamuk isa arye, weik yupu arye Yesus ati labasibuk.

⁸ “Anda yata wiripnamasilama ati, yanmasilam do? Allah el mikip weik ulirye, yuk mikip ning ap, si erenyak ning ap, nirya bisilul Allah ara, Yesus anda Allah el Mi Koprop ulyame. Allah el si deice arye, nati, ‘Weika arye kum opnamkine,’ nyapnunilyame,” nyabuka aisa weik yupu arye Yesus ati morobuk.

⁹ Nyabukopura, Yesus arye aisa ati asipdeyuk. “An si yatanye do?” nyabuka asipdeyuk.

¹⁰ Nyabuka asipdeyukbuk, isa arye tamubuka nyabuk. “Nunda yupa weika arye anye el talima ak wekuka ati, nun si kum nukmanto ulula anya arye, nun si ati Legion nyasinyake,” nyabuk. Tonda, ‘Aisa arye ninye weilamik keil deiya dam arye, buru tam donoksilyak’ tenen, ‘Nunti bataksilyame. Kum yakuka dopkwetepnamsilam,’ nyabuka, Yesus ati weika arye moronmek.

¹¹ Yesus ati moronmek talak ara, ninye arye weilamik basam, yupa pia weik amutuku taram tuku dinmek.

¹² Basam arye tuku dibuka aunmeka ati, aisa nirya arye Yesus ati moronmek. “Anye talima pum bisik arye yakuka dopkwetepsiminyeura, aunmak basam nong pum bisik wektibye,” nyabuka moronmek.

¹³ Moronmek bukni, Yesus arye, “Yo teleb urwekelbilulume,” nyabukopura, adiparyuk isa talyamuknye talima pum bisik arye kubukabikce, basam nong pum bisik wekelbiyik. Wekelbiyikopura, abasam yupa weik, 2.000 basam unmeka anya arye, amutuku taram arye koulukuka binarye, mekwen pum bisik wekelbamek. Wekelbanmekbuk, abasam nirya ara mekwen arye siklibuka dibuk.

¹⁴ Abasam weinmek ninye arye, awinipmok ning nirya eibika ati, ninye asik dobuka ulamikak ap, bisik ak ap, laka nyapra banmekbuk, ninye weik kekebikce, ‘Awinipmok ning eipnamap’ tenen, Yesus dam dilyayik.

¹⁵ Yesus dam dilyayikce, isa yupa weik talyamik bukni, Yesus arye kwetebuknye, kanye deibuka ongon baju ongobuka bukmokbuk eibik. ‘Eibikce, ilil ubukura, se’ tenen, ngalukunmek.

¹⁶ Min arye aunmekce eipmik nang arye, winiryuk yanganmek nang ati, anye bira isa talyamik bukni, Yesus arye kwetebuknye ap, basam nong pum bisik wekelbiyikbuk, mekwen pum bisik wekelbinmik ning ap, anirya dukdongobuka laka nyabik.

¹⁷ Laka nyabikura, anang nirya kekebikce, ilil weik ubuk ati, ‘Yesus, nun mutuku ara batakuka, yukak bitue’ tenen, Yesus ati moronmek.

¹⁸ Yesus ila tamubuka mek liya yo deice bulbinuyuk talak ara, isa talyamuk bukni, Yesus arye kwetebuknye birye, ‘Na ap, bitinimye’ tenen, Yesus ati morobuk.

¹⁹ Nyabuka morobuk bukni, Yesus arye anye biti nyabuk. “Kume, tuba tamubuka an mutuku nang ap, an asik nang ap, ati, Allah arye bico tenepmakilce, pil weik dopmakil ning ara, laka nyalbinulyame,” nyabuk.

²⁰ Yesus arye nyabukopura, anye birye Dekapolis mutuku, anyasik-anyasik dolamika, 10 kota dobuka ulamikak noutamak arye, ayupu laka nyapra balamukba, amutuku ninye nirya kekelamikce ngaluklamik.

Yesus arye, ining balamuk kil ap, dipmok kilmu ap, kwetebuk yupu

²¹ Yesus banmok bisikuk, mek liya yo deice tamubuka yayukce, Galilea mekwen atam yayuk. Yayukura, ninye yupa weika arye, Galilea mekwen lilun, el dam bulubuka unmek.

²² Sik nirya Yesus ap, aunmek bukni, tonoknye el si Yairus yayuk. Yairus ara, Yahudi yala nang Allah yupu peterelamik aik, anyaik sik deiyok nang weik ulamik bukni, el ton ulamuk. Yairus yayukce, Yesus eibukopura, ‘Yesus ati kipdopnun’ tenen, Yesus yan dam kutam tuku dipdongobukce, Yesus ati weik arye moronmok.

²³ “Naie, na kilmu akunum dipmanto unmanila ati, ance yanuka, el nong deice an taruk deiptumce kweteptume,” nyabuka moronmok.

²⁴ Moronmoka ati, Yesus ap, banmekbuk, abulubuka wekmek nang nirya ap, neika banmekce, Yesus dam dana-dana nirya langdipmekce banmek.

²⁵ Abanmek nang kan-kan noutam arye, uk dilamuka ak, keting tamun 12 deice arye, el ining balamuk kil ap, neika banmek.

²⁶ Akil ara, ‘Sik ninye kweten nang arye kwetepnetinge’ tenen, kweten nang dam weik balamuk bukni, sik kwetelamika deice arye, uk weik tonap, tabakuka dilamuk. Akwetelamik ning ati, akil el talilamuk ning nirya areamukba, kum dayuk bukni, kum kwetepmanto ubukura, ikin uk tonap, tabakuka tuba dilamuk.

^27-28 Akil, Yesus pil dolamuk ning kekebuka ati, elce utenebuk. ‘Yesus ara, mikip weiknye anya arye, el ongon baju talye bol piptinyetoura, kwetepnutue,’ tenebuk. Utenebuka ati, abanmek nang noutamak kil arye, Yesus el balye tam tikilyayukce, el deice ongopmok ongon baju ara, bol pibuk.

²⁹ Yesus el ongon cang baju bol pibukopura, adiparyuk, akil el ining pia balamuka ara, tunim abukura, akil arye, ‘Na ikin ulamnuk ning, akunum kum danile,’ tenebuka bikdayuk.

³⁰ Yesus ongon cang baju bol pipmok talak ara, bol pibuk ati, adiparyuk Yesus arye, ‘Na kwetelamne mikip, yuk ninye wekle,’ tenebukce bikdayuk. Utenebuk ati, Yesus arye tamubuka, ayangan mek ninye nirya dipra banmok. Dipra banmokce asipdeyuk. “Yata kil, yatanye birye, na ongon cang baju, juba pipmanil do?” nyabuka asipdeyuk.

³¹ Asipdeyukura, el yupu kekebuka, el ap, balamik nang arye tamubuka nyabik. “Ninye weik an dam langdipmakiyaka eipmalam bukni, ‘Yata kil, yatanye birye, na ongon cang baju, juba bol pipmanil do?’ nyabuka asipdenmasilama ara, yata ati do?” nyabik.

³² Nyabik bukni, Yesus arye, ‘Yatanye na ongon aling bol pipmanil do?’ tenen, tuba dipra banmok.

³³ Dipra banmokbuk, akil, Yesus kwetepmok ning akunum kel kipmoka ati, ‘Mambul pil dopmanile’ tenen, malye kanye bobuka, ilil ubukura, Yesus el si erena ati, el yan dam kutam yanuka tuku dipdongobukce, akil arye el winipmok ning nirya Yesus ati laka nyabuk.

³⁴ Akil arye aning nirya laka nyabukura, Yesus arye tamubuka akil ati nyabuk. “Na ka kilo, an diba tenepmanilama deice arye akunum kwetepmakine. An kanye imun wamkuk ning, akunum kwetepmakine ati, kanye deibuka telebuk binamlyame,” nyabuk.

³⁵ Yesus arye ayupu tuba nyanmok talak ara, Yairus el aik dam bukni, yuk nang arye, Allah yupu peterelamik aik deiyoknye, Yairus ati laka nyalyayik. Laka nyalyayikce, Yairus ati nyabik. “An kilmu akunum dipmakila anya arye, apeterenanye biti, yupu tonap, kum nyapnulyame. Dauplye,” nyabik.

³⁶ Anang arye ayupu nyabikura, Yesus kekebuk bukni, luba kibukce, anye Yairus ati nyabuk. “Ikin kanye bobuka teniltona meme. Nati, diba tenebuka talye kanye bobuka unulyame,” nyabuk.

³⁷ Nyabukce, ayangan mek nang nirya, ‘Sik ap, yacak’ tenen, yupu sekdongobukba, sik asukumuk unmekopura, Yesus ap, Peterus ap, Yakobus ap, Yakobus el weit Yohanes ap, sikuk Yairus aik biyik.

³⁸ Yairus el aik akunum biyikopura, anyasik dam unmek nang, sik weik arye engena ap, weik arye ngalukuka malye nyana ap, weik yupu nyabuka kwelana ap, wininmekura, Yesus arye eibuk.

³⁹ Eibukce, anyaik wekukura, malye nyanmekce, koulan mek nang ati nyabuk. “Anggun weik arye malye nyanmalumce, ngalukuka kwelanmaluma ara, yata ati do? Akilmu, kum dipmale. Talya mapmale,” nyabuk.

⁴⁰ Nyabuk bukni, awekmek nang arye Yesus ati akutunmek. Akutunmekbuk, awekuka engenmek nang nirya ati, Yesus arye buru tam akunum dopkwetebukura, akilmu el li ap, el lin ap, Yesus ap, winilye nang el melibuka balamik nang ap, sikuk akilmu dipmokbuk deipmek aik wekik.

⁴¹ Wekikbuk, Yesus arye akilmu taruk talibukce, amutuku yupu deice arye nyabuk. “Talita koum,” nyabuk. Anyabuk yupu deiyok ara, ani. “Akilmu otiklyame nyapmakine,” nyabuk.

⁴² Yesus arye nyabukba, adiparyuk akilmu tikukabukce, keting tamun 12 kilmu anya arye, el yuk banmok. Banmokopura, anyaik wekmek nang nirya arye, mambul kanye bobuka ngalukunmek.

⁴³ Anang arye yuk nang ati, ‘Laka nyalbicak’ tenen, “Awinipman ning, laka kum nyalbinamlulume,” nyabuka, Yesus arye yupu sekdongobuk. Tonda, ‘Akilmu din ning arepnunyak’ tenen, yupu nyapdeibukura, akilmu ati din arebik.