Markus 4 - Eipomek

Yesus winipmanto yupu deice arye, tonoknye yala ning doknin banmoka ati, nyabuk yupu

¹ Yuk talak ara, Yesus arye Galilea mekwen lilun peterenmok. Peterenmok bukni, el dam yanuka wekmek nang ara, yupa pia weik bulubuka yanmeka ati, Yesus ara mekwen deice kup-kup ak, mek liya yo deice bukmokce, amekwen lilun koprop wekmek ninye ati, el yupu peterenmok.

² Ayupu-ayupu nirya weik arye peterenmok. Apeterenmok yupu noutam arye, ‘Mambul ning kel kipnamak’ tenen, winipmanto yupu deice arye nyabuk.

³ Yesus arye awekmek nang ati nyabuk. Anggun kekeplulume, tonok sum tonoknye birye wa wibuka, yala ning doknin banmok.

⁴ El yala ning dobuka doknin banmokak, ton yala ning ara, el doknin banmok bisik yok sakmok. Yok sakmokbuk, talye maka yayikce bulubuka dodibik.

⁵ Ton yala ning ara, doknin banmokak, keil deice arye mirin tuku kat uamukak sakuk. Sakukce dawamuka ani, mirin tuku mitik tonun uamuk sukum ara, minopce pabuk.

⁶ Pabuk bukni, yating tukwak teleb ubuka kum biyuka ati ara, keting eibuka bupu arye, kel-kel abuka koulubuk.

⁷ Atalakuk bukni, ton yala ning ara, doknin banmokak, tirmangka weiyang-weiyanga kan-kan noutam arye sakuka bongopmok bukni, tirmangka weiyang-weiyanga erepdobikce, apabuk ning koupdongobukce, angkalung kipdongobukura, wen-wen alamuk. Wen-wen alamuka anya arye, duk kum moulamuk.

⁸ Aning ara, kum moulamuk bukni, yala ning ton doknin banmok ning ara, mirin tuku teleb ak sakuk. Mirin tuku deice sakuk ning ara, pabukce nebukopura, duk moulamuk. Yala ning tonok-tonok sakuk bukni, duk moulamuka ara, ton ning, 30 moubuk, ton ning, 60 moubuk, ton ning, 100 moubuk.

⁹ Yesus arye winipmanto yupu nyabukopura, ayupu ton dukdongobuka nyabuk. “Amul aupmasilyeura, ayupu nong noutamak ning kekepmanto nang ara, kekenululume,” nyabuk.

¹⁰ Ayupu akunum nyabukopura, aminyan talak Yesus el yuk unmok bukni, Yesus arye wibuka doprobuk nang, sik 12 nang arye, el domon yupu nyapmo ara, ‘Ayupu nong dan do?’ tenen, asipdeyik.

¹¹ Asipdeyikbuk, Yesus arye anang ati, winipmanto yupu nyabuk ning nong ara, lake nyabuk. Yesus arye nyabuk. “Allah arye ninye nirya talibuka unamle ning ara, minop talak kum laka nyalamuk bukni, wini talak ara, anggunda na yupu kekebuka talilulum nang ululuma anya arye, ayupu kel kina deiyok ning akunum arepsine. Allah yupu laka nyalamuknye, nabi Yesaya nyabuk touk ani.

¹² ‘Sikda, pia moubuka asing arye elinamak bukni, deiyok ning, teleb ubuka kum biknamake. Tonda, amul deice arye pia kekenamak bukni, deiyok ara, teleb arye kum kekepnamake. Allah yupu kekebuka kum dobolbanyak bukni, kekeptingopura, sik talima malye tenelamak ap, sik malye winilamice ning ap, batakuka, balye tam kiptingopura, Allah arye sik malye ning kum daneipturye, namin kibuka lyeptue.’ (Yesaya 8:16) Yesaya arye sekamuk. Yesaya arye nyalamok touk, anang ara, ‘Nun song’ tenen, Allah yupu moubuka kum kekenyaka ati, sik kekenyakak, domon yupu deiceuk nyanune. Anang ati lakak ubuka kum nyanune. Ati, Yesaya el sekamuk yupu nyapmasine,” Yesus arye nyabuk.

¹³ Ayupu nyabukopura, Yesus arye el mapu 12 nang ati nyabuk. “Narye winipmanto yupu deice, yala ning doknin banmok yupu nyapmanu ning, nong noutamak ning kum kekepmalum do? Winipmanto yupu nyapmanua kum kekepmaluma ati, aminyan talak domon yupu nyapnamne ning babye, yata ubuka kekepnamlum do? Ati ara, na domon yupu nyapmanua ara, nong laka nyapnusine,” nyabuk.

¹⁴ Yesus arye nyabuk, “Ura, yala ning dokda banmoka ani, nyanmanu ara, Allah yupu peterelamak ning ati, nyapmanue.

¹⁵ Yala ning doknin banmokak, bisik yok sakmok ning ara, Allah yupu peterebikibuk, kekenyak nang ati, nyapmanue. Aninye, Allah yupu peterebikibuk, kekenyak talak ara, adiparyuk Isa Mutuku Dongonye yanuka, sik kekelamak yupu dalubuka dololule.

¹⁶ Ton ninye ara, yala ning keil deice sakmok touk, Allah yupu peterebikibuk, kekebikirye kanye deibuka, adiparyuk dolonyake.

¹⁷ Dolonyak bukni, yala ning yating tukwak teleb ubuka kum banmokbuk, koulubuka atonun, anang ara, Allah yupu moubuka kekena kumce, kum dolonyakce, minopce batakalongonyake. Diba tenebikca ati, yuk nang arye yu uplibuk, ikin ning sik nong deice deibicopura, anang arye minopce batakalongonyake.

¹⁸ Ton ninye, Allah yupu kekebuka dolonyak bukni, yala ning tirmangka weiyang-weiyanga kan-kan sakmok ning atonun unyake.

¹⁹ Tukwak mutuku noutamak arye, ‘Aning arye, teleb uptinye do, aning arye teleb uptinye do?’ tenen, talima bintinilaliba tenildana deice arye batakanyake. Tonda, ‘Bona weik doproptinirye, telebuk uptinye,’ nyabuka, sikce sik badamnye ati, talye nyalanyake. Tonda, aning-aning nirya, yala-yala weik patalya deice arye Allah yupu batakanyake. Wininyaka ara, tirmangka weiyang-weiyanga arye apabuk ning koupdongobukce, angkalung kipdongobukura, wen-wen alamok touk, aning-aning nirya pia pataplibuk, tenelamaka deice arye, Allah yupu kekelamak ning ara, duk teleb ubuka kum moulule. Allah el yupu teleb ubuka kum kekebikirye, pia talibuka kum dobolbanyake.

²⁰ Anang ara, wininyak bukni, yuk ninye, yala ning doknin banmokak, mirin tukwak sakmokbuk duk weika arye moubukce ton 30, ton 60, ton 100 moubuk touk, sikda, Allah yupu moubuka kekebikirye, diba tenebuka, kanye deibuka pia dololamak ninye ara, duk weika arye moubuk ning atouk, diksukumuk unyakce, Allah el pil weika arye tuba donyake,” Yesus arye nyabuk

Yesus arye, “Na yupu duknuna kumce, laka peterenamlulume,” nyabuk yupu

²¹ Yesus arye el mapu 12 nang ati nyabuk. Anggunda weisa ubukapmunce aik pum boyangalulum ning, ara, ‘Kau pum bisik singipdongopnamabe, tonda amsuna dangabuka, weisa singnipdongopnamabe’ tenen, ubuka yangalulum do? Aning ara, meme. Weisa updopmunce abilinga taram ak delilulume.

²² Dirin weik uplibuk, aik pum wamlye ning ‘Laka eipnamak’ tenen, ninye arye upna delilamak touk, na babye atonun pil donune. Allah arye ninye weik arye lyeplirye, talinamle ning, minop talak lakak kina kumce duknyamuk ati, ninye nirya moubuka kum kel kilamik bukni, wini talak, narye laka kibuka peterenune. Tonda, ninye talima ak duknukce ning, na peterenuna deice arye, laka upnamlarya. Bukni, Allah arye aning duknyamukbuk, ninye bita tenebuka kum kel kinyak ning nirya, laka uplibuk ninye nirya kel kipnamake. Ara upna dirinarye aik pum wamlye ning lakak uplibuk, elilamak atonun, na peterenye ning ap, wininye ning ap, deice arye, Allah arye duknyamukbuk ninye kum tenelamik ning, lakak unamle.

²³ Aning ati ara, na peterepsinye yupu ara, talye amul deiceuk kum kekeltakanamlulume. Yata nang do nirya, na nyasinye yupu ‘Moubuka kel kiptinye’ tenen, pataplinye bira, pia na nyapmasin yupu, moubuka kekenululume.

²⁴ Na yupu peteresinibuk kekemunce, ‘Deiyok ani’ tenen, moupmunce talibuka wininamlulume. Talye ati kume. Anggunda, ‘Ayupu dipkoprop kel kipnuyap’ tenen, pi dobuka kel kibuka peteremunye touk, Allah arye kel kina deiyok ning arisilibuk, kel kinamlulume. Bukni, lik tenemunce, anggun Mitika aryuk kel kimunyopura, Allah arye kel kina deiyok ning mitik anun aryuk arisilibuk, Mitika aryuk kel kinamlume. Ton ning ara, ‘Pia kel kipnuyap’ tenen, anggun weika arye pi dobuka, kel kipmunyopura, Allah arye kel kina deiyok ning weika arye melibuka arisilibuk, nong noutamak ning weika arye kel kinamlume.

²⁵ Allah yupu kekena ati, Allah arye kel kina deiyok ning arisilibuk, moubuka kekenyakce aninguk batakna kumce, talibuka wininyak nang, ara, Allah arye kel kina deiyok ning tonap, weika arye tabakuka arisilibuk, weika arye kel kipnin banamake. Bukni, yata nang do nirya, like ati, amul deice kekeltakanyakce, Allah yupu moubuka kum talibuka wininyak nang ara, sik min arye mitik anunuk kel bikamice babye, kum danamle. Yesus arye nyabuk.

Yesus domon yupu deice arye, yala ning pabuka nebuk ning ati, nyabuk yupu

²⁶ Yesus arye el mapu ati, “Anggunda, Allah arye ninye weik, sik talima taliplirye, unamle, ‘E, winibuka ulule, tenepnulum’ tenen, domon yupu tonap, nyapnusine,” nyabuk. Yesus arye nyabuk yupu ara, ani.

²⁷ “Yala ning akunum tukwak deice saklamlirye, lukunyan babye, keting duduk babye, tuku pum bisik dawamlyea ani, ayala ning, el yuk pabuka nelule. Yala ning doklamlinye bira, mapmalye talak babye, bukmalye talak babye, pil ton kum dolilya babye, yala ning, el yuk pabuka nelule. Yala ning dokna deiyoknye birye, yala ning pabuka nepmalya, ‘Deiyok ani’ tenen, kum elilul bukni, yala ning el yuk pabuka welelule.

²⁸ Teleb tuku deice arye yala ning weika arye duk moulamle. Minyuma ara, duk beteklirye, nong nepnin balamnya ani, yakong kitiplirye, mouplyopura, duk kintinilamle.

²⁹ Duk kintiniplirye, akunum wisiplyopura, ekelule. Eklyopura, wa deiyoknye birye ya sekuka dakalule. Ara, eklamlye ning nirya dakuka delin talak akunum uplyopura, elce ya sekuka dakalule,” Yesus arye nyabuk.

Yesus domon yupu deice arye, pia mitik yo duk bukni, weik arye nebuk ning ati, nyabuk yupu

³⁰ “Allah arye ninye weik, sik talima taliplirye, wininamle ara, ‘Moubuka tenepnulum’ tenen, winipmanto yupu ton nyapnusine,” Yesus arye nyabuk.

³¹ “Kabalye yo duk mitik bukni, ayo weik nelamle touk, Allah arye ninye weik, sik talima talipnamla ara, weik upnin banamle.

³² Kabalye yo, mitik duk arye dokikibuk, beteklirye, nepnin balamnya ani, neplyopura, kwa weik arye leklyopura, ataruk deice ara, maka yala nirya, sik miknak ati, bulyakirye manyake. Yuk yo ara, mitik bukni, ayo ara, weik yo nelule. Aning atonun, sikce na yupu dobuka peteremunyebuk, yuk nang ton mitik anun diba tenepnamak bukni, anang arye ton, mutuk sirya im sirya nirya dapeterepra balamicebuk, ninye weik tonap, diba tenebikirye, weik upnin banamake,” Yesus arye nyabuk.

³³ Ayupu winipmanto yupu nyabuk touk, Yesus arye peterelamuk talak ara, domon yupu weik tonap, peterepnin balamuk. Sikce ayupu kekepmanto ulamik touk, ayupu uk peterelbalamuk.

³⁴ Ninye nirya ati ara, Yesus arye peterelamuk talak nirya ara, domona yupu deice ton peterelamuk bukni, elce wipdeibuk mapu 12 nang ap, sik yuk ulamik talak ara, peterelamuk ning nirya, lak deice arye laka nyabuka nong noutamak ning babye, peterelamuk.

Mok ap, liman ap, kumanya ap, ubukura, Yesus el mapu ilil ubuk yupu

³⁵ Yesus arye atalak, Galilea mekwen lilun pia peterenmok bukni, keting kumubukopura, Yesus arye wipdeibuk nang, el mapu 12 nang ati nyabuk. “Nunda mek liya yo deice bukuka, mekwen deice bibirye, otam wekelbinuyabe,” nyabuk.

³⁶ Nyabukce, el apeterenmok mek liya yo deiceuk bukmok bukni, el mapu 12 nang babye, el damakuk wekelbiyikopura, amekwen lilun wekmek nang abatakuka, Yesus ap, el mapu ap, sikuk mekwen deice banmek. Tonda, yuk mek liya yo tonap, neika mekwen deice banmek.

³⁷ Sik banmeka ani, pia banmekba, weik kumanya ap, liman ap, mok ap, ubukce, mekwen weik arye lonting-lonting anmokbuk, mek liya yo pum bisik wekukce, ikin arye mek liya dobuka, mekwen pum bisik wekmanto unmok.

³⁸ Aning nirya wininmok talak, Yesus, el mapu bukmekak balye tam, mana namin ning, kisok erelina deice mapmok. Yesus mapmoka ati, el mapu 12 nang arye nyabik. “Naie buklyame,” nyabuka bukeibik. Winibikce, sikce Yesus ati nyabik. “Naio, nun mekwen dipmanto unmasil ning, mambul kum tenepmasilam do?” nyabik.

³⁹ Nyabikbuk, Yesus bukuka tikukce, weik kumanya donmoka ati, “Weik kumanya tunim ablyame,” nyabukce mekwen lonting-lonting anmok ning babye, “Mekwen tunim ablyame,” nyabukopura, adiparyuk pia tunim abuk.

⁴⁰ Anirya tunim abukopura, Yesus arye el mapu 12 nang ati nyabuk. “Anggun ilil weik unmasil ara, yata ati do? Anggun min nati diba kum tenepmanuluma arye do?” nyabuk.

⁴¹ Sik ilil weik ubukura, asildanmek. “Yesus ara, yatatonye do? Yenya babye, mekwen babye, el yupu nyaplyopura, el nyalye touk kekebuka tunimalule,” nyabik.