Markus 3 - Eipomek

Yesus arye, taruk kwangnyamuknye kwetebuk yupu

¹ Yuk talak ara, Yesus arye Yahudi yala nang, Allah yupu peterelamik aik, wekuka unmok talak ara, taruk kwanyamuknye ton, anyaik pum unmok.

² Atalak ara, Farisi nang arye, ‘Yesus malye winiptopura, nunce, ‘El malye winipmale,’ nyaptibye,’ tenebikce, Yesus ati pia dipdongobuka kalikinmek. Kalikinmeka ati, Yesus arye nun Allah si erena ati, pil dona kumce dikdik sen sum, Sabat sum deice arye, ‘Taruk kwanyamuknye kwetepnul do?’ tenen, pia dinauk unmek.

³ Dinauk unmekba, Yesus arye taruk kwanyamuknye biti, nyabuk. “Abukmak nang dinmakiak ak arye, urasin dam tiklyame,” nyabuk.

⁴ Nyabukba, tikukopura, Yesus arye sik Farisi nang ati asipdeyuk. “Musa sekamuk yupu ara, Sabat sum deice arye yata ning winiptibye do? Nun winiptibye ning ara, malye winina do, teleb winina do? Tonda, ‘Ninye dibicak’ tenen, ninye lyena ara, teleb do, ninye ona ara, teleb do?” nyabuka asipdeyuk. Nyabuka asipdeyuk bukni, sik Farisi nang ara, talye tunim abuka bukmek.

⁵ Sik talye tunim abuka dabukmek bukni, yu kanye bobuka, sik talima pia kat weik ubuka ati, ‘Yesus arye, se’ tenen, pia malye kanye bobuka, yu arye asing aryuk dipra banmok. Winibukce, taruk kwanyamuknye biti, nyabuk. “Anda taruk lelekuka arepnilyame,” nyabuk. Nyabukopura, taruk kwanyamuknye birye, el taruk ninikuka aribukura, adiparyuk el taruk teleb kibukba, taruk ninikeibuk.

⁶ Sik Yahudi yala nang, sik Allah si erena ati, dikdik sen sum deice arye, Yesus arye anye bira kwetebuka ati, Farisi nang ara, yu ubukura, ‘Yesus yata wiribuka opnamap do?’ tenen, yupu talilbinmek. Yupu talilbinmeka ara, ninye weik deiyoknye Raja Herodes ati, kanye delilamik nang ap, Farisi nang ap, yupu sirikilbinmek.

Ninye yupa weika arye, ‘Yesus yata winipnul do?’ tenen, dobolbiyik yupu

⁷ Yesus arye taruk kwanyamuknye akunum kwetebukopura, Yesus ap, Yesus arye wibuka dopropmok nang ap, Galilea mekwen lilun biyik. Biyikopura, Galilea tam noutamak ulamik nang, yupa weika arye aminyan dilyayik.

⁸ Sikda, Yesus el pil dolamuk ning kekelamika ati, amutuku-amutuku dana-dana ninye nirya arye bulubuka yayik. Sik yayik mutuku si ara, Yerusalem asik dolamikak arye tonda, Yudea tam ap, Idumea tam ap, Yordan mek koubuka otam apura, Tirus mutuku ap, Sidon mutuku ap, amutuku-amutuku nirya noutamak arye yayik.

⁹ Yayikura, ‘Yesus arye ninye weik dekdacak’ tenen, el mapu ati, “Mitik mek liya yo kintinibuka mekwen deice deipnululume,” nyabuk.

¹⁰ Awinibuk ning ara, uk dilamuk ninye weika arye akunum kwetelamuka ati, atalak ara, uk dilamuk ninye arye, ‘Yesus el nong ton taliptibye ak, kwetepsutue’ tenen, wekelyayikce, ninye weik arye, mening deice yanilanmekce dekneldanmek.

¹¹ Atalak ara, ninye talyamne isa yanuka, Yesus eibikopura, isa arye sik talyamik ninye tuku deice dobuka pouklopnarye, weik arye ngalukunmekce, Yesus ati ayupu nyabik. “Anda Allah el Mi Koprop ulyame,” nyabik.

¹² Nyabik bukni, Yesus arye aisa mer nirya ati, “Na wininuna ara, yuk nang ati kum laka nyalbinamlulume,” nyabuka weik arye aisa nirya ati yupu sekdobuk.

Yesus arye, el mapu 12 nang ati, wipdeibuk yupu

¹³ Yesus arye tonok mutuku dup welebukce, Ananguk na pil donamniake tenyamuk nanguk yukubukura, welebik.

¹⁴ ‘Anang arye Allah yupu dobuka peterelbinamak’ tenen, awelebik nang kan-kan arye, 12 nang wipdeibuk. Wipdeibuk Rasul nang ara, ‘Na ap, sik ap, neika ulamibya ani, narye anang dobuka yuk mutuku dopkwetepnibuk, aRasul nang, na yupu dobuka dana-dana mutuku peterelbinamak’ tenen, wipdeibuk.

¹⁵ Tonda, ‘Ninye talima noutamak talyamik isa dobuka, yaknamak’ tenen, el mikip weik arye anang ati aribuk.

¹⁶ Yesus arye 12 nang wipdeibuk nang sik si ara, ani. Tonok ning, Simon nyalamik bukni, aminyan talak ara, Yesus arye anye biti si punubuka Peterus si dobuk.

¹⁷ Tonye bira, Zebedeus el mapu bitinye Yohanes ap, el weit Yakobus ap, bukni, Yesus arye anang ati, Yahudi yupu deice arye, ‘Boanerges,’ nyalamuk. Boanerges nyabuk ning deiyok ara, sik yupu deice ara, liman el mapu ati, nyabuk. Ara, liman weik arye bebea laklamla atonun, anang bitinye yupu weik arye nyalamrik ati, abitinye nang arye, tenilena kumce yupu mikip arye nyarurak ning ati nyalamuk.

¹⁸ Tonda yuk nang wibuk ning ara, Anderias ap, Pilipus ap, Bartolomeus ap, Matius ap, Tomas ap, Alpeus el mi Yakobus ap, Tadeus ap, Simon bukni, anye binyuk el si ton Patriot nyalamiknye ap, wipdeibuk.

¹⁹ Tonda, Yudas Iskariot ara, Yesus opnameka ati, yupu deililbiyuknye wipdeibuk. Obarye sekdongobuka utam nang 12 nirya ara, Yesus arye wipdeibuk.

Musa sekamuk yupu peteren deiyok nang arye, “Isa sik deiyoknye, el si Belesebul arye, Yesus talilule,” nyabik yupu

²⁰ Yesus arye adua belas (12) nang akunum wipdeibukopura, anang nirya bulubuka tonok aik wekelbiyik. Wekelbiyikba, ninye yupa weika arye bulubuka, sik dam yayikce, mening deice dekneldanmeka ati, Yesus ap, el mapu ap, pile weik donmeka ati, sik din kum dipmanto ubik.

²¹ Wininmek bukni, Yesus el li, el lin koprop ap, el weit yapu koprop ap, kekebikce, ‘Yesus ara, motonanye atouk unmala ati, el talipnamap’ tenen, yayik.

²² Tonda, Musa sekamuk yupu peterena deiyok nang, Yerusalem mutuku ulamik bukni, Galilea mutuku yayikce, yuk nang ati ayupu nyanmek. “Isa nirya sik weik deiyoknye el si Isa Mutuku Dongonye, el si ton Belesebul, elce Yesus talibuka pil dolule. Isa nirya sik deiyoknye Belesebul mikip deice arye, Yesus ara, isa mer nirya yakuka dolkwetelule,” nyanmek.

²³ Ayupu nyanmeka ati, Yesus arye anang ati yukubukura, yayikopura, Yesus domon yupu deice arye nyabuk. Isa Mutuku Dongonye el mapu koprop ati, yata wiribuka yakuka dopkweteptu do? Anggunda talye yupu nyanmalume. Isa mer yakuka dolkwetenuna ara, Allah El Dib Kanye el mikip deice aniryuk yakuka dolkwetenune. Yata pil do nirya, Isa Mutuku Dongonye el mikip deice arye kum pil donune. Ati winipmanto yupu ton nyapnusine.

²⁴ Tonok mutuku noutamak ulamice nang olanmakceopura, tonoknye birye yata wiribuka taliptu do? Tonok akuk kum winipdatinge, yuk-yuk bendoptinge.

²⁵ Aning ton atonun, tonok you aik ulamting nang olanmatingopura, yata wiribuka neika uptinge do? Akunum yuk-yuk bendoptinge.

²⁶ Anyapman ning atonun, Isa Mutuku Dongonye ap, el mapu koprop isa ap, olatingopura, sik mikip pia kum uptue. Tonda, Isa Mutuku Dongonye el mikip kum uptue. Aning ati ara, isa yakuka dolkwetenuna ara, Isa Mutuku Dongonye el mikip deice arye kum pil donune. Aning kum bukni, Allah El Dib Kanye el mikip deice aryuk isa yakuka dolkwetenune.

²⁷ Anggun nyapmanulum ning kum winipmanto. Yata nang do nirya ara, tonok el aik pum wekuka, ‘El ning ubula dopropnuyap’ tenen, el aik wektinge bukni, weik mikipnye tapu kum kouptingopura, el ning ubula kum doproptinge. Anyaik weik mikipnye minopce tapu kouploptingtoura, el ning ubula dobuka bitinge. Kumopura, kume. Aning atonun, Isa Mutuku Dongonye elda, weik mikipnye atonun ulula anya arye, mikip weiknye ton kum yaturye, tapu kum kouploptopura, Isa Mutuku Dongonye el mutan ning, aninye kum doproptue. Yesus arye anang ati nyabuk.

²⁸ Yesus arye ayupu tonap, nyabuk. “Anggunda moubuka kekeplulume. Ayupu pia mambul dipkoprop ning nyapnusine. Ninye nirya, sik malye tenelamak ning ap, malye winilamak ning ap, Allah ati, yanibuka nyalamak yupu ap, anirya ara, bataktingopura, Allah arye sik malye winin ning kum kibuka deiplirye, namin kipnamsile.

²⁹ Bukni, yata nang do nirya ara, sikce Allah El Dib Kanye ati, yanibuka nyalamak yupu ara, Allah arye aning kum kibuka kum deipnamle. Tonda, aning ara, pia kum namin kipnamsile. Ayupu nyanyak ning ara, kum lyepmanto ning unyake. Aning atonun, Nara, Allah El Dib Kanye mikip deiceuk pil donun bukni, anggunce nati, elda Isa Mutuku Dongonye mikip deice arye pil dolule nyanululuma ati, Allah arye aning kum namin kipnamsile. Aning pia tenenamsila anya arye, aminyan ara, anggun wenebuka oplopnamsile,” Yesus arye nyabuk.

³⁰ Yesus arye ayupu nyalamuka ara, Musa sekamuk yupu peteren deiyok nang arye, “Yesus ara, Isa Mutuku Dongonye talibuka mikip deice arye pil dolule,” nyanmeka ati, nyabuk.

Yesus arye, “Na nin atonun kilapu ap, na weit yapu atonun nang ap ara, anggun uka,” nyabuk yupu

³¹ Yesus el lin koprop ap, el weit yapu koprop ap, arye, ‘Yesus ara, motonanye atonun unmala ati, dobuka binamap’ tenen, Yesus bukmok aik yayik. Aik dam tikilyayikce, ‘Yuk nang arye Yesus binuka nyapdeipnunyaka’ tenen, nyapdeibik.

³² Yesus noutam bukmokbuk, yuk ninye nirya weik arye bukuka antanapmek nang arye, Yesus ati nyabik. “An nin ap, an weit yapu ap, aik dam tikelyanmakce enmakiake,” nyabik.

³³ Nyabikopura, ‘Yesus arye Na nyapne yupu ara, sik bita tenepnamak’ tenen, anang ati asipdeyuk. “Na nin yapu ap, na weit yapu ap, yata nang do?” nyabuka asipdeyuk.

³⁴ Nyabukopura, Yesus arye el dam bukuka antanapmek nang ati, asing dana-dana tamubuka dipdeyukce, ayupu nyabuk. “Na nin yapu ap, na weit yapu ap ara, anggun akunum aululume.

³⁵ Yata nang do nirya, Allah arye, ‘Wininamak,’ tenelul touk pil dololamak nang, sikda, na weit yapu ap, na weit kilapu ap, na nin yapu ap, atonun unyake,” Yesus arye nyabuk.