Markus 2 - Eipomek

Yesus arye, “Ninye tukwak ninye malye wininyak ning nirya kum danadelina deiyoknye bira, na uka,” nyabuk yupu

¹ Sik nirya daulamika ani, Yesus arye Kapernaum asik domik mutuku tuba tamubuka biyukopura, amutuku noutam ulamik nang arye, ‘Yesus el mutuku kopropa tamubuka yanmale,’ nyabikura, atam nang kekebik.

² Yesus wekuka bulbiyuk aik ara, ninye pia weik bulubuka wekelbiyik. Winibikba, anyaik lo mitika ton pia kum ubuk. Aik buplan ara, buru tam babye, lo kum ubuk, nirya langdibuk. Winibukba, Yesus arye anang ati, Allah yupu peterenmok.

³ Peterenmok talak ara, dumbarye nang pala yo deice arye, nong nirya sisal sebuka darapdomuknye bira, binmanto kum ati baya wibuka boyayik.

⁴ Ninye weik wekmeka arye, buplan dam langdipmoka ati, Yesus dam kum bobinmanto ubuk. Winibuka ati, anyaik aruma deice welebikce, Yesus bukmok sukumuk, aruma dakdobikce, pala yo ap, anye ap, talibuka, aik aruma deice arye batakdongopnin banmeka ani, Yesus peterenmokak anyuk deipdongobik.

⁵ Sikda, ‘Yesus arye anye bira kweteptue’ tenen, wininmaka deice arye, Yesus ara, ‘Na ti dipkoprop diba tenepmaniake’ tenen bikukce, anye bira min kum kwetebuk talak arye, asisal sebuka darapdomuknye ati nyabuk. “Na mio, an malye teneminye ning ap, malye winiminye ning ap, namin kipmakince, an malye ning nirya akunum kum daneipmakine,” nyabuk.

⁶ Yesus arye ayupu nyanmok talak ara, Musa sekamuk yupu peterena deiyok nang ton abukuka kekenmekce, sik kanye noutam arye teninmek.

⁷ Anye bira ayupu nyanmala ara, yata ati do? El nyanmal yupu deice arye Allah si yanipmale. Allah elcuk nun malye wininyap ning kum danalisulul ati, yatanye tonap, apil doptu do? Pia kuma ati, Yesus ayupu nyanmala deice arye, Nada, Allah atonunye unune nyanmala ati, elda pia malinye tenebik.

⁸ Sik talima noutamak nirya tenebik ning ara, Yesus el kanye noutamak akunum bikukce kel kibuka ati, elce sikti, nyabuk. “Ayupu tenipmaluma ara, yata ati do?

⁹ Narye sisal sebuka darapdomuknye biti, ‘An malye winiminye ning nirya kum daneipkine,’ kanam arye talye nyaploptinye do? Akumopura, caknam aryuk anye biti, antikukapmince, an amsuna dobuka binulyame nyaploptinye do? Bukni, anggunda, ‘Apil, dipkoprop pil doptu do, kum doptu do?’ tenepnuluma ati, minopce anye kwetepnune. Narye, anye biti, ‘Tikukapmince an amsuna dobuka beo,’ nyapnyopura, anggun kel biknulume. Ara, anggunce nati, ‘Yesus ara, ninye tukwak unyak ninye malye wininyak ning ara, kum danalina deiyoknye, dipkoprop ulule, tenepnunuluma’ tenen, anye bira kwetepnune,” Yesus arye nyabuk.

¹⁰ Nyabukce, ayupu tonap, nyabuk. “Aning ati ara, nara Ninye Mi Koprop Atonunye, na mikip deice arye, ‘Tukwak ninye sik malye wininyak ning nirya kum daneipsitue,’ tenepnamanuluma ati, narye sisal sebuka darapdomuknye biti ayupu nyapnune,” nyabuk.

¹¹ Nyabukce, sisal sebuka darapdomuknye ati ayupu nyabuk. “Anda, tikukapmince an amsuna dobuka, an aik tamubuka bilyame nyapkine,” nyabuk.

¹² Nyabukopura, adiparyuk sisal sebuka darapdomuknye tikukabukce, el amsuna dobuka, awekmek nang nirya sik adinmek bukni, aik pum arye buru biyuk. Yesus winibuka deice arye awekmek nang nirya, se tenebuka ngalukunmekce, Allah el si erenmek. Tonda, “Awinipmal ning atonun ning ton kum elilamupe,” nyabuka malye nyabik.

Yesus arye, ‘Anye bira, na pil donamnil’ tenen, tonoknye, el si Lewi doprobuk yupu

¹³ Yesus Kapernaum mutuku batakukce, tuba tamubuka, Galilea mekwen dam banmok. Biyukbuk, ninye yupa weik arye bulubuka, el dam yayikura, Yesus arye anang ati peterebuk. Peterebukopura, tuba tamubuka banmoka ani, el banmok bisik damak, Alpeus el mi Lewi eibuk.

¹⁴ Roma mutuku nang arye amutuku nirya talilamika ati, amutuku nang arye sik yo bok Roma weik ninye deiyok nang ati arilamik. Lewi, Roma mutuku nang arena ati, ayo bok bulubuka deiamuka aik, anyaik pum bukmok bukni, Yesus yayukce eibuk. Eibukce, Lewi ati, “Anda na melibuka dobolyanilyame,” nyabukura, elce adiparyuk tikuka Yesus melibuka dobolbiyuk.

¹⁵ Banmarika ani, Lewi el aik koprop wekelbirikce, sik ap, Yesus elce wibuka doprobuk nang ap, amutuku talyamik nang, Roma mutuku nang ati, yo bok bulubuka areamik nang weik tonap, wekik. Tonda, amutuku ulamik nang arye, aning, malye-malye wininyake tenelamik nang ap, tabakuka wekikce, neika din dinmek. Awinilamik nang, atouk malye winilamik nang ara, ‘Yesus el yupu kekepnamap’ tenen, Yesus dobolbalamika ati, Lewi el aik wekuka neika din dinmek.

¹⁶ Dinmek bukni, Musa sekamuk yupu peterelamik nang, Farisi nang ara, yo bok bulubuka delin nang ap, malye-malye winilamik nang ap, Yesus ap, neika dinmekak eibikopura, Yesus el melina nang ati asipdeyik. “Yesus ara, yo bok bulubuka delin nang ap, malye-malye wininyak nang ap, neika din dinmaka ara, yata ati do?” nyabuka wenebik.

¹⁷ Nyabuka wenebikura, Yesus ayupu kekebukce, anang ati domon yupu nyabuk. “Uk dinmale bukni, aning tenena kumce, talye kanye bobuka unyak nang, ‘Dokter kwetenanye dan do?’ tenen, kum enyake. Akum bukni, uk dinmalibuk, aning tenebikirye, dokter kwetenanye ati patapliba, ‘Se, nunti melipsutunye bira dan do?’ tenen, aninye arye kwetenanye dokter enyake. Aning atonun, mitik funguk ulamice bukni, sik kanye talima noutamak malye ning aupmalye bukni, aning tenena kumce, ‘Nunda teleb nang unyabe,’ tenebikirye, unyak ninye ati ara, narye ‘Ato nang dobuka lyepnamne’ tenen, kum yase. Bukni, sik malye winilamikirye ‘Se, aning ara, malye wininyabe. Yatanye birye melipsutu do?’ tenebikirye, malye kanye bobuka unyak ninye ara, ‘Aninye dobuka, lyepnamne’ tenen, yase,” Yesus arye nyabuk.

Allah si erena ati, din dina kum arye, si tebuka Allah morolamik ning ati, nyabik yupu

¹⁸ Yohanes Pembaptis elce peterelamuk yupu kekelamikce melibuka balamik nang ap, sik Farisi nang ap, arye, sik malye winilamne ning ati, ‘Allah moropnuyap’ tenen, din dina kum arye, si tebuka Allah moronmek. Sik winibuka moronmeka ati, yuk nang ara, Yesus dam yayikce asipdeyik. “Yohanes el yupu kekenyakce melibuka banyak nang ap, sik Farisi nang, sik yupu nyapnabuk kekebuka banyak nang ap, anang nirya arye, Allah si erena ati, din dina kum arye, si tebuka Allah moronyake. Sik anang, wininyak bukni, an mapu, aunyak touk yata ati kum wininyak do?” nyabuka asipdeyikce wenebik.

¹⁹ Asipdeyikce wenebikopura, Yesus arye anang ati domona yupu tamubuka nyabuk. “Kil donanye dopnulye talak ara, el kayapu ap, el milina nang ap ara, kwalin ning kwalibuka neika kum dinyak do? Kume, sik kwit kil don talak, kanye deipmanyaka anya arye, kwalibuka neika dinyake. Aning atonun, nara kil donanye atonuna ati, na mapu ara, kanye imun uplibuk, dina si tebuka kum unyake.

²⁰ Bukni, yu nang arye na talibuka libuka binamniak talak ara, na mapu sik kanye ikin upliba, din dina kumce, din si tebuka unamake,” Yesus arye ayanuka asinmek nang ati nyabuk.

²¹ Ayupu nyabuk ning ara, Yesus arye, Allah yupu sekamik ning tuba talibuka ulul bukni, na peterenye ning ap, na unye ning ap, deice arye, ‘Kanye tenena winiryuk ning kel kipnamak’ tenen, ayupu nyabuk. Tonda, sik Farisi nang, sik apu yapu arye sik bidamang tuba tamubuka tenibik ning ap, Allah yupu ap, talye ansinibuka peterelamikbuk, kekelamikce, sik Farisi nang arye peterelamik yupu ara, ‘Malye tenepnamak’ tenen, Yesus arye awekmek nang nirya ati, winipmanto yupu bitinye nyabuk. Yesus arye nyabuk yupu ara, ani. “Ongon baju, minop ning kwiliklyopura, winiryuk ongon baju mek kum liliklamice arye, kwiliksakamlyeak ara, deibuka kum winyake. Minop ongon baju kwiliksakamlyakak ara, winiryuk ongon baju palibuka wilamting bukni, mek likuka keting ak deibikibuk, miklirye, awiniryuk ongon baju mitik uplyopura, awilamakak arye, weika arye tonap, kwilikinamle. Winiryuk ongon baju arye, minop ongon baju kwiliksakamlyak deibuka wina ara, malye,” Yesus arye nyabuk.

²² Ton ning ara, adomon yupu ton nyabuk. “Aning atouk ton, ninye domba bola dobuka, potong lyeklobikirye, dana-dana tam nirya wibikcopura, pum bisik ara, anggur mek kwebuka dikdongobuka deilinyake. Wininyaka ati, ninye arye purubuka, winiryuk kwelamak anggur mek ara, minop talak kintinipdeiyamice domba bola pum bisik kum dikdongobuka deilinyake. Winiryuk anggur mek kwebuka, minop domba bola pum bisik dikdongoptinge bukni, anggur mek mikip arye neplirye, domba bola kwilikliba, mek balule. Kwiliklirye, balyopura, anggur mek ap, domba bola ap, kum kibuka malye ulule. Aning ati ara, winiryuk anggur mek kwebuka, winiryuk domba bola pum bisikuk dikilongonyake,” Yesus arye nyabuk. Ayupu nyabuk ara, sik Farisi nang, sik apu yapu arye sik badamnye kanye arye tenepne ning ap, Allah yupu ap, talye ansinibuka peterelamikbuk, kekelamikce, ‘Sik Farisi nang arye peterelamik yupu ara, malye tenepnamak’ tenen, Yesus arye awekmek nang nirya ati, ayupu winipmanto yupu bitinye nyabuk.

Yesus arye, “Allah si erena ati, pil dona kumce, dikdik sena sum deice winin ning ara, ‘Aning telebe, aning malye,’ nyana deiyoknye bira, na uka,” nyabuk yupu

²³ Tonok sum ara, Yesus ap, el mapu ap, yuk nang yakong wa wiamikak noutamak banmek. Atalak ara, sik din patanmokura, el mapu arye yakong langabuka, imbik dipnin banmek. Sik wa win dam banmek sum ara, talye sum kum bukni, sik Yahudi yala ninye nirya, Allah el si erena ati, pil dona kum aryuk, dikdik sen sum arye, Yesus ap, el mapu ap, banmekce, yakong langabuka dinmek.

²⁴ Sik yakong dipnin banmek sum ara, Yahudi yala nang arye Allah si erena ati, dikdik selamik sum arye dipnin banmek. ‘Yakong langabuka dipnin banmekba, Farisi nang eibikce, wenepnuyap’ tenen, Yesus ati asipdeyik. “An mapu arye yakong langabuka dinmaka ara, yata ati do? Musa sekamuk yupu noutamak ara, ‘Allah si erena ati, dikdik sen sum, Sabat sum ara, wa win dam lilbana meme,’ nyabuka sekeiyamsuke. Musa arye nyabuka sekeiyamsuk bukni, an mapu arye yakong langabuka dinmaka ara, pil atouk ning wininmaka anya arye, wininmaka deice Allah yupu yaniplobake. Awininmak ning ara, yata ati do?” nyabuka, Farisi nang arye asipdebuka wenebik.

²⁵ Nyabuka wenebikura, Yesus arye tamubuka Farisi nang ati ayupu nyabuk. “Na mapu, sik awininmak ning atonun, Allah yupu buku Samuel noutamak uamuk ning ara, nyalamlum bukni, moubuka kum kel kiplum do? Minop talak ulamuknye Raja Daud ap, el melibuka neika balamik nang ap, din pia patanmokura, winibik ning ara, buku noutamak nyalamlum bukni, akunum luba kiplum do?

²⁶ Sik winibik ning ara, ani. Allah arena ati pil weik deiyoknye, Abiyatar ulamuk talak noutamak, Yahudi yala nang arye, ‘Nun pil dolamibya ani, dolonyap ning, dipkoprop Allah arye arisilibuk dolonyabe.’ ‘Aning ara, pia tenepnamap’ tenen, din ning roti 12 dabuka, Allah arena aik, cang kain bola dobuka tia aik noutamak delilamik. Aroti ara, Musa arye nyabuka sekamuk touk, Allah arena deiyok nang aryuk dilamik. Yuk nang arye ton kum dilamik. Aroti, mem ning ati ara, yuk talye nang ara, kum dilamik. Din ning roti ara, Allah arena aik pum bisik dabuka deipmekbuk, Daud din patanmokura, dobuka dibuk. Tonda, el ap, neika banmek nang ati, bokuka aribukura, sik ton dibik. Daud ap, el melina nang ap, roti dobuka dibik ning ara, Allah arye anang ati, ‘Malye winipmake,’ kum tenebuk. Aning ara, telebuka tenebuk.” Yesus arye Farisi nang ati nyabuk.

²⁷ Yesus arye Farisi nang ati, ayupu akunum nyabukopura, ayupu tonap, nyabuk. “Allah arye ninye dikdik sena ati, Sabat sum wipdeiamuk ning ara, ninye nirya sik dikdik sebikirye, sik kanye tenen ning ap, sik talima ap, sik nong ap, ‘Teleb upnamle’ tenen, Sabat sum wipdeiamuk. ‘Ninye ikin unamle’ tenen, Sabat sum kum wipdeiamuk. Ninye talima melina ati, Sabat sum wipdeiamuk.

²⁸ Aning ati ara, na Ninye Mi Koprop Atonunye ununa anya arye, Sabat sum deice winin ning ara, ‘Aning telebe, aning malye’ tenen, bokuka delina deiyoknye, na uka, narye nyapmasine,” Yesus arye nyabuk.