Markus 16 - EipomekYesus dibuk bukni, Allah arye, Yesus kam bukeibuk yupu ( Matius 28:1-8 ; Lukas 24:1-10 ) 1 Sik nirya damabuka unmeka ani, Sabat sum akunum ubukopura, Maria Magdalena ap, Yakobus el lin Maria ap, Salome ap, awinilye kilapu nintong teleb ning, ‘Yesus el nong deice dikuka likeipnuyap’ tenen, dobuka bobiyik. 2 Minggu sum beren tam berekel taknop arye, awinilye kilapu Yesus weipmokak binuka, ‘El nong deice nintong teleb ning dikuka likeipnuyap’ tenen, bisik banmek talak ara, asipdanin banmek. 3 “Yatanye birye Yesus wein dam buplan tirikmok keil bongobuka dopkwetepsutu ak, Yesus el nong eiptibye do?” nyabuka asilelanmek. 4 Asipdandeyikce kanipdongobuka banmek bukni, erebuka dildeyikbuk, weik pala keil ara, akunum bongopmokak eibik. 5 Eibikce, keil deiya pum bisik yanuka wekik. Wekikce, dileyikbuk, sirik tam ara, kamnye tonok, pia kurun baju ongobuka bukmokbuk eibikce, lukdanuka ilil ubuk. 6 Lukdana ilil ubukura, anye birye akilapu ati nyabuk. “Anggun lukdanuka ilil una meme. El asukum kum unmale. El akunum kam bukmale. El nong deipmanguak ara, dipdelulume. Anggunce enmalumnye bira, pia asukum kum ulule. 7 Asukum kum unmale ati, elce wipdeiamuk nang, sik 11 nang ap, tonda Peterus ap, ati, ayupu laka nyalbinululume. ‘Yesus arye, ‘Wininamne,’ nyapdeipsuk touk, el minopce Galilea tam binmalibuk, anggun aminyan bimunyeba, el ap, ansinibuka epdanamalum,’ ati ayupu nyabuka laka nyalbilulume,” nyabuk. 8 Anye bira ayupu nyabukopura, awinilye kilapu arye kanye bokdayukba, ilil weik ubuka ati yok sirim talibuk. Keil deiya pum bisik kubukabikce, buru tam bik-bik abuka biyik. El nyabuk yupu nirya kekebuka tenebikce, ilil weik ubuka ati, sikce yuk nang ati kum laka nyabik. 9 Ura, Minggu sum beren tam berekel takne talak ara, Yesus talye karin arye, tonok kil el si ara, Maria Magdalena, akil damak panabuka tikilyayuk. Yesus kam bukmokbuk, yuk nang nirya arye min kum eipmek talak ara, minopce Maria Magdalena dam, Yesus talye karin arye tikilyayukura, eibuk. Akil Maria ara, minop talak tekbarye isa arye, el talima noutam talyamikba, atalak kum bukni, Yesus min arye aisa akunum yakuka dopkwecamuk. 10 Yesus arye Maria dam tikilyayukak eibukopura, Yesus ap, melibuka balamik nang unmekak biyuk. Anang ara, Yesus dibuka ati, kanye imun kanye bobuka, malye nyabuka engenmek. Sik engenmekak Maria binuka, elce Yesus eipmok ning ati laka nyabuk. 11 Maria arye, “Yesus akunum kam bukmalbuk narye eipmane,” nyabuk bukni, sikce anyapmok yupu kekebuka diba kum tenebik. 12 Yuk talak Yesus el urasin ara, mitik yuk kibukabukce, el wipdeiamuk nang, bitinye nang bisik banmarika noutamak, Yesus talye karin arye panabuka tikilyayuk. 13 Tikilyayukura, sik akunum eiprikce, tamubuka sik kayapu, sik 9 toupne barye nang ati, binuka laka nyaprik ak, kekebik bukni, sik bitinye nang nyaprik babye, diba kum tenebik. 14 Daunmeka ani, yuk talak ara, Yesus arye 11 wipdeiamuk nang din dibuka wekmek aik noutamak, Yesus talye karin arye panabuka tikilyayuk. Tikilyayukce asebelas nang ati wenebuk. Ura, Yesus min kum obik talak, kam ulamuk talak arye, ‘Na dipmanya tamubuka kam buknamne,’ nyalamukbuk sik mitik touk diba tenelamika anya arye, el akunum dibukopura, sikce, ‘Kume, akunum dipmale,’ tenebika ati wenebuk. Ton ning ara, Yesus akunum kam bukukbuk, eibik nang, weika arye laka nyanmekbuk, malye kibuka, mankau kanye bobukabikce, diba kum tenepmek ning ati wenebuk. 15 Atalak ara, Yesus elce wipdeiamuk nang, awekmek nang, sik 11 tuba unmek nang ati ayupu nyabuk. Anggunda mutuku sirya im sirya nirya ap, mutuku-mutuku nirya ap, na laka teleb yupu, ninye lyena yupu dobuka peterepra balamunyebuk, ‘Mutuku sirya im sirya unyak ninye nirya ayupu kekenamak’ tenen, peterelbilulume. 16 Peterelbimunyebuk, yata kil do, yatanye do nirya, na yupu diba tenebikceura, mek dongopmunyopura, Allah arye aninye lyenamle. Bukni, yata nang do nirya, na yupu diba kum tenebikceopura, Allah arye aninye ati, el dam kum dobuka deipnamle. Pia weneplirye, yukak dopkweteplibuk, sik ap, el ap, neika pia kum unamake. 17 Nati, diba tenepniak nang ara, yuk nang arye, ‘Allah el mikip deice aryuk pil donyake, tenepnamak’ tenen, na mikip arepnibuk, ninye kum winipmanto ning wininamak ning ara, ani. Ninye talyamlye isa ara, na si deice aryuk yakuka dolkwetenamake. Tonda, sik kum kel bikamice yupu bukni, Allah El Dib Kanye arye el mikip areplibuk, yuk mutuku yupu deice arye nyanamake. 18 Tonda, ninye on kwatima sik taruk deice talinamak bukni, kum dipnamake. Tonda, ninye dinmek, el si racun dibicopura, uk kum dibuka kum dipnamake. Tonda, uk din ninye, sik nong deice taruk deibuka, Allah morobikceba, Allah arye aninye kweteplyopura, aninye kam unamake. Yesus arye el mapu 11 nang ati nyabuk. 19 Nun ni Yesus arye ayupu nyabukopura, el mapu adinmek bukni, Allah arye Yesus el nong dobuka bobiyukura, im deice welebuk. Yesus welebukopura, ‘Allah ap, aning-aning nirya pia talinamnam’ tenen, Allah el taruk sirik tam bukukce im deice tuba ei ulule. 20 Yesus im deice akunum welebukopura, el yupu kekebuka dobolbalamik nang arye, amutuku-amutuku nirya el laka teleb yupu dobuka peterepda balamik. Yuk nang arye, ‘Ara, Allah yupu dipkoprop tenepnamak’ tenen, sik peterepda balamik talak nirya ara, Allah el mikip weik areamukbuk, ninye kum winipmanto ning, weik mambul pil dolamikura, elilamik nang arye, ‘Sik nyasikce yupu ara, dipkoprop Allah yupu nyasinyake,’ tenelamik. Telebe, na Markus arye asukumuk deipsine. |
© 2023, Wycliffe Bible Translators, Inc. All rights reserved.
Wycliffe Bible Translators, Inc.