Markus 14 - Eipomek

Tonok kil arye, nintong teleb mek dobuka, Yesus kisok deice dikeibuk yupu

¹ Yahudi yala nang Allah ati arena deiyok nang ap, Musa sekamuk yupu dobuka peteren deiyok nang ap, anang nirya arye, ‘Yesus tapu koubuka, yata wiribuka optibyeba, yuk nang kum kel biksitinge,’ tenebuka yupu sisikinmek. Utenenmek bukni, Yahudi yala nang Kaplina ati Kwalina sum ap, Nena Kum Roti Kwalina sum ap, liki bitinye kum upmok talak ati, anang kan-kan yuk nang arye nyabik.

² “Kume, daupmale,” nyabik. Ara, ‘Kwalina talak noutamak arye yuk ninye nirya eipsikcak ati, lak akarye kum opnuyabe. Ninye pia weik wekmeka ati, Yesus obibyopura, eipsikirye yu upliba, derepsicak,’ tenebik. Utenebik ati ara, “Daupmale,” nyabik. Nyapmeka anya arye, atalak ara, Yesus ton kum opdeyik.

³ Yesus ap, el mapu ap, Yerusalem mutuku batakuka, Betania mutuku binuka unmek. Yesus ara, tonoknye el si Simon, el aik bina bukmokce, din dinmok. Simon ara, min arye barye suse atouk suse, el nong nirya dilamuka ati, el si ara, ‘Simon Barye Suse Talinanye,’ nyalamik. Yesus ara, Simon aik bukmokce, din dinmok talak ara, tonok kil arye bola kat-kat makau dobuka boyayuk. Amakau pum bisik ara, nintong teleb mek, dekna pia weik mek uamuka ati, amakau kukunak arye coplobukabukce, Yesus si erena ati, el kisok deice dikeibuk.

⁴ Amek dikeibukopura, abukmek nang kan-kan, ton nang arye yu ubukura, malye kanye bobikce, ayupu nyapdayik. “Anintong teleb mek, yata ati talye diklople do?

⁵ Anintong teleb mek dobuka, yuk nang ati dekmatipyopura, yo bok weik dopropmatibye. Ara, ninye tonoknye keting tamun tonok deice arye pil dolamlya ani, dekna dololamak touk, dopropmatibirye, bona talina kum ninye ati arepmatibye,” nyabuka nyapdayik. Nyapdayikce, akil ati, yu arye wenebik.

⁶ Wenebikba, Yesus kekebukce anang ati nyabuk. “Anggunce elti, nyana bataklulume. Nati, winipmanil ning ara, malye tenepmalumce wenepmaluma ara, yata ati do? Akil arye nati winipmanila ara, pia telebe anya arye, na kanye deipne.

⁷ Talya bona talina kum ninye ara, anggun ap, neika ulamlumce, tenepmunye talakuk meliptume. Bukni, nara, anggun ap, pia kum unamabe.

⁸ Akil arye ‘E, Yesus si erebuka kipnun’ tenen, el pil dopmanto ning, pil doptu ning ara, akunum winipmanile. El winipmanil ning ara, laka nyapnusine. Aminyan na opniceura, dipnamne talak ara, na nong weipnamniyak ati, akil arye na nong kintinipdeipmanile.

⁹ Aning ati ara, dipkoprop nyapsine. Na laka teleb yupu dobuka peterelbinamak mutuku nirya ara, akil arye na nong deice nintong teleb mek dikipmanil ning ara, ‘Akil ati pia tenenamak’ tenen, pia peterelbinamake,” Yesus arye nyabuk.

¹⁰ Nyabukopura, Yesus wipdeiamuk nanguk bukni, tonoknye Yudas Iskariot, ‘Anang arye Yesus olyanamak’ tenen, Allah arena ati deiyok nang, sik dam ninye yupu nyalilbiyuk.

¹¹ Binuka nyabukopura, sik anang arye kanye deibikce, pin-pin ubuk ati, “Yesus arepsiminyopura, yo bok weika arye arepnamkiabe,” nyabik. Nyabika ati, Yudas arye ‘Yata teleb lo uplye talak arye, Yesus anang areptinye do?’ tenelamukce, dinauk ulamuk.

Yesus opnamek talak arye, el mapu ati, kwaning aribuka peterebuk yupu

¹² Sik Yahudi yala nang arye Nena Kum Roti deiya koubuka yuna sum arye, sik apu yapu Mesir mutuku batakuka binuyik talak ara, domba obuka buplan sirya dana-dana ining likeiamik ning ara, ‘Tuba tenepnamap’ tenen, asum arye domba tonok obuka, Allah ati arilamik. Winilamika ati, Nena Kum Roti Kwalina sum deice arye, ansinibuka Yesus el mapu arye Yesus ati asipdeyik. “Anda, Kaplina ati Kwalina ning dipnamlam ning ara, dan aik kintinililbinuyap do?” nyabuka asipdeyik.

¹³ Asipdeyikura, Yesus arye el mapu bitinye nang ati, ayupu nyabuk. “Sik Yerusalem asik dolamik noutamak binurum talak, ninye tonok mekwena weik makau takunye yok deice deibuka bobalibuk, eipnurume.

¹⁴ Eipdamunyopura, el aminyan tam birumunce, el weknulye aik wekuka birumunce, anyaik deiyoknye biti asipdenururume. ‘Nun Peterena Deiyoknye birye asipdenmakile. Na ap, na mapu ap, Kaplina ati Kwalina ning dipnamap ati, an ninye asik nang wekelamak aik wekuka aning diptibye tenen, anyaik ara, dan do?’ nyabuka asipdenamrurume.

¹⁵ Asipderumunyeura, anye birye el aik aruma deice, lu merekuka dobuk aik, alip aik ara, nun buknamap sukum ap, din ning deipnamap sukum ap, mitik aik kintineipmak ning ara, anggunce eipnamarurume. Anyaik pum nun Kaplina ati Kwalina dipnamap ning ara, kintinibuka deipnamarurume.” Yesus arye el mapu bitinye nang ati nyabuk.

¹⁶ Nyabukura, abitinye nang arye Betania mutuku batakuka, Yerusalem mutuku birikce, Yesus nyapmok ning atonun ubukura, eiprikopura, Kaplina ati dipnamek ning kintinibuka deiprik. Kintinibuka deiprikopura, asukumuk unmarik.

¹⁷ Aunmarik talak ara, Yesus ap, el mapu 10 nang ap, ‘Yerusalem mutuku binuyap’ tenen, bayik talak ara, inibukce keting kumupdongobukopura, Yerusalem mutuku yayik.

¹⁸ Yayikce, sik kintinipmarik alip aik bukuka, din dinmek talak ara, Yesus arye ayupu nyabuk. “Na dipkoprop nyapsine. Na ap, bukmapce din dinmalum nang kan-kanuk bukni, tonoknye birye, na opnamaniaka ati, ninye yupu nyalilbinule,” Yesus arye nyabuk.

¹⁹ Nyabukura, sik pia bico ubuk ati, sik talima ikin kanye bobuka, Yesus ati tonok-tonok arye ayupu nyanmek. “Naio, narye yukubkiniba opnamkiyak do?” nyabuka tonok-tonok arye Yesus ati asilanmek.

²⁰ Asilenmekba, Yesus arye anang ati, tamubuka nyabuk. “Narye roti dobuka yangalin makau pum bisik likuka dinmap nang kan-kan, na mapu ululum bukni, tonoknye birye, na opnamaniaka ati, ninye yupu nyalbinamanile.

²¹ Allah yupu laka nyalamik nang arye, nati sekamnik touk, nara Ninye Mi Koprop Atonunye opniceura, dipnamne. Sik Allah yupu laka nyan nang, nabi nang arye nyalamnik touk, aninguk winipnamniak bukni, nara Ninye Mi Koprop Atonunye yukupnamnilnye bira, kum deiamtiringtoura, teleb bukni, elin, el li birye anye bira deiamrika anya arye, yukupnilibuk opnicopura, Allah arye anye bira weik arye wenebuka opnamle,” Yesus arye nyabuk.

²² Yesus ap, el mapu 12 nang ap, din dinmek bukni, nena kum roti dipnuyik talak ara, Yesus arye aroti dobuka, Allah ati, “Telebe,” nyabukopura, roti tobuka el mapu ati bokuka arinmokce, ayupu nyanmok. “Winipmanto ning ara, aroti ara, na nong atonun ulula ati dobuka diplulume,” nyanmok.

²³ Amenyan ara, Yesus arye anggur mek makau kwebuka, tonok kintinipdeipmek ning dobuka, Allah ati, “Telebe,” nyabukopura, el mapu nirya ati aribukura, amakau tonok arye dipra banmek.

²⁴ Anggur mek dinmek talak ara, Yesus arye ayupu nyabuk. “Winipmanto ning ara, amek ara, na ining atonun ulula ati, dobuka diplulume. Amek ara, na ining atonun nyapmasina ara, lak nyapnusine. Ara, Allah min arye nyalilamsuk touk, ninye mutuku-mutuku nirya noutam arye ninye weik arye lyepnirye talinamne. Aning ara, ‘Diba tenepnamniak’ tenen, na opniceura, na ining binamle. Na ining banamla ara, talye ati kume. Ara, ninye mutuku-mutuku nirya, sik malye wininyak ning ap, malye tenenyak ning ap, ati, kum daneipnirye, na ining arye lyepnamna ati, lak bikilina ati aning arepsine,” Yesus arye nyabuk.

²⁵ Nyabukopura, ayupu ton nyabuk. “Na dipkoprop nyapsine, wini talak arye deiyok koubuka, noutam talak ap, doryanamle talak ap, kanye wangalamle anggur mek tonap, pia kum dinamne. Bukni, Allah arye ninye weika arye lyeplirye, sik talima talinamle talak, sirya daknamle talakuk, ila tonap, amek dinamne,” Yesus arye nyabuk.

²⁶ Yesus arye nyabukopura, el ap, el mapu ap, sik nirya Allah mot nyabikce, Yerusalem mutuku noutam bukni, sik alip aik bukmek aik batakuka, banmeka ani, Zaitun mutuku deice welebuka biyik.

Yesus arye Peterus ati, “Anye bira na walwale nyabuka, pilipnamanilame,” nyabuk yupu

²⁷ Zaitun mutuku deice unmek talak ara, Yesus arye el mapu 12 nang ati nyabuk. “Anggunce nati diba tenepmanulum bukni, ninye weika arye lyebuka, anggun talima talinamlanye, Mesiasnye bira, ‘Yesus ara, anye ulul do, kum do?’ tenen, kanye boktopsilyopura, ilil ati, na batakuka bik-bik abuka bindopnamlume. Allah yupu laka nyalamuknye, nabi Zakaria arye sekamuk domon yupu ani. ‘Na Allah arye domba weina deiyoknye opnamne. Opnyopura, el batakuka el domba nirya bai sakuka bindopnamak.’ (Zakaria 13:7) Ati, nabi Zakaria arye nyalilamuk touk, anggunce nati winipnamnulume.

²⁸ Bukni, na dipmanya ani, kam bukyopura, na minpola Galilea tam binmaniba, anggun aminyan yanamlume,” Yesus arye el mapu ati nyabuk.

²⁹ Nyabukura, Peterus kekebukce mikip yupu arye tamubuka nyabuk. “Anang nirya ara, an batakuka bindopkiting bukni, na tonok ara, kum batakuka bikitinye,” nyabuk.

³⁰ Nyabukopura, Yesus arye Peterus ati tamubuka nyabuk. “Amio, dipkoprop nyapkine. Alukunyan ara, yim ayam like bitinye min kum kamupmalye talak ara, an babye, like winilye deice arye, ‘Anye bira Yesus ara, na walwale,’ nyabuka kunusa dopnamanilame,” nyabuk.

³¹ Yesus arye nyabukura, Peterus arye tamubuka mikip arye nyabuk. “Naio kume. An opkikirye, na opnitinga babye, nara pia kum bataknamkine,” Peterus arye nyabuk. Peterus nyabuk touk, Yesus el mapu nirya babye, atouk nyanmek.

Yesus arye Getsemani mutuku binuka, Allah morobuk yupu

³² Zaitun mutuku bukni, mitik yukak Getsemani mutuku biyikce, Yesus el mapu 12 nang ati nyabuk. “Anggun abuknamalum talak ara, na yukak mitikto orbinuka Allah morolbinune,” nyabuk.

³³ Nyabukce, Peterus ap, Yakobus ap, Yohanes ap, dobuka biyukce, ikin kanye bobukce, pia mambul ubukura, anang ati ayupu nyabuk.

³⁴ “Na talima ikin ubuka, pia mambul kanye bopmana ati, na dipmanto upmane. Na talima uk pia dinmanila anya arye, na talima barina ati, mening dam asukumuk, mana kum, buna uk upnamalulume,” nyabuk.

³⁵ Nyabukopura, el mitik yukak kanupdongobuka biyukce, tuku deice kanupdongobuka poulbiyuk. Kanupdongobuka poulbiyukura, ‘Opniceba dipnaman ning ara, Allah arye lyepnutu ura, kum diptinye’ tenen, ikin ubukura, Allah moronmok.

³⁶ Moronmok talak ara, ayupu nyanmok. “Naio, aning-aning nirya anda kanamuk ulyamnye binya arye, na opnamaniyak talak ikin upnilibuk, donmanya dipnaman ara, ‘Ance lyepnutum’ tenen, moronmakine. Bukni, na patanmanil ati tenenman ninguk kume. An min arye tenelamnuluma atouk winipmilyame,” Yesus arye nyabuka moronmok.

³⁷ Morobukopura, el mapu winilye nang unmekak tamubuka biyukce, manauk unmekba eibuk. Eibukce, Simon Peterus ati ayupu nyabuk. “Simono anda mapmalam do? Anda kum winipmanto ati, tonok keting mana kumce, na talima barina ati kum melipmanilam do?

³⁸ Winilen ning deice arye, anti, ‘Elda malye uptue’ tenen, piripdenamakile anya arye, kanye moubuka dilamince, Allah moronauk unamlyame. An kanye talima noutamak ara, ‘Winiptinye,’ tenelyam bukni, an nong mikip kumanya arye, dipkoprop kum uptume.” Yesus arye Peterus ati nyabuk.

³⁹ Nyabukce, ila tamubuka mitik yukak biyukce, asum talak Allah moronmok touk, ila tamubuka tonap, moronmok.

⁴⁰ Morobukopura, tamubuka el mapu winilye nang mapmekak yayuk. Wi pia weik unmok ati, sik manauk unmek. Winininmeka ati ara, sikce, ‘Yesus el nyapmok ning ati ara, yata yupu tamubuka nyaptibye do?’ tenen, kanye walwal ubukura, tunimanauk unmek.

⁴¹ Yesus ara, like winilye ning binabuka ani, tamubuka yayukce, el mapu mapmeka eibuk. Eibukopura, el mapu ati nyabuk. “Anggun tuba manauk unmalum do? Akunuma. Na ona ati dobuka bobinuniyak talak akunum uple. Dipdelulume, nara Ninye Mi Koprop Atonunye bira, na ona ati, ninye yupu akunum nyamuka anya arye, malye wininyak nang arepnunile.

⁴² Aning ati ara, anggun buklulume, binuyabe. Na laka nyalbananye akunum yanganmale,” nyabuk.

Yesus ona ati, el nong dobuka, bobiyik yupu

⁴³ Yesus ayupu tuba nyanmok talak ara, Yesus el mapu kan-kan ulamuk bukni, yuknye tonok, el si ara, Yudas Iskariot, elce Yesus dam tikilyayuk. El menekuka yangayukbuk, el balye tam ninye weik ap, yin talin nang ap, bulubuka yayik. Ayayik nang ara, Yahudi yala nang sik deiyok nang, wisi nang ap, Allah arena ati deiyok nang ap, Musa sekamuk yupu peterena deiyok nang ap, arye, ‘Yesus tomobuka boyanamsulume,’ nyabuka yupu nyanmeka ati, parang ya ap, ninye on yo kama ap, dobuka yayik.

⁴⁴ Yesus laka nyalbananye birye, Yahudi yala deiyok nang ati nyabuk yupu ara, ani. Yudas Iskariot arye nyabuk. “Na tenepce arye talye mutupnamnanye bira, Yesus el uka. ‘Anye bilyak’ tenen, taruk talipmunce, el noutam deibuka ninye weik arye melibuka bobilulume,” nyabuk.

⁴⁵ Yudas arye ayupu nyapdeibuk ati, adiparyuk Yesus dam yayukce, “Na naie,” nyabuka Yesus ati mutubuk.

⁴⁶ Mutubukopura, ayanmek nang mikip arye Yesus talibik.

⁴⁷ Talipdobikba, amining dam anyuk tikmoknye tonok arye, el ya lin ning pum bisik danerye, ya dobukabukce, Allah arena ati weik deiyoknye, el amu tam apil donanye tonok, el amul takwetebuk.

⁴⁸ Atalak ara, Yesus arye ayanmek nang ati nyabuk. “Anggunce nati, ‘Amutuku talinyak nang obuka sirya daknamal’ tenen, ‘El deiyok koubuka el mapu bobinmale,’ tenepmanulumce, parang ya ap, ninye on yo kama ap, dobuka tomolyanmalum do?

⁴⁹ Atalak-atalak nirya, Allah ati arinyap aik dam peterelamsi bukni, kum tomonululume. Bukni, Allah arye nyalilamukbuk, Allah yupu sekamik nang sekeiyamik touk upnula ati, winipnulume.” Yesus arye el tomolyanmek nang ati nyabuk.

⁵⁰ Nyabukopura, Yesus el mapu nirya, ilil ubukura, sik nirya arye batakuka, bai tam sakuka biyik.

^51-52 Yesus bobanmek talak ara, Yesus aminyan tam yanganmoknye, namin baju, cang ning ongopmok ara, aongon baju talibikura, ilil ati, ongon baju kwiriplobuka, nong dem bik-bik abuka biyuk.

Yahudi yala nang, sik yupu lipsisikuka bokolilamik nang dam, Yesus dobuka bobiyik yupu

⁵³ Yesus talibuka tomobik nang arye, Allah arena ati, weik deiyoknye, ‘El aik dobinuyap’ tenen, Getsemani mutuku arye el aik bobiyik. Bobiyik talak ara, Yahudi yala nang, sik deiyok nang, wisi nang ap, Allah arena ati deiyok nang ap, Musa sekamuk yupu peterena deiyok nang ap, ‘Yesus ati yupu lipsisikuka bokeipnamap’ tenen, bulubuka yayik.

⁵⁴ Yesus minopce bobanmekopura, Peterus ara, aminyan yayuk. Ara, Allah arena ati weik deiyoknye, el aik dam yayukce, yin talin nang uku sekuka peikinmekak yanuka bukuk. Bukukce, el babye, uku peikinmok.

⁵⁵ Allah arena ati deiyok nang nirya ap, yupu bokolina deiyok nang ati, Sandeheren nyalamik nang ap, anang nirya arye, min arye ‘Yesus opnamabe,’ tenelamika ati, atalak babye, utenenmek. Sikda, yuk nang arye, “Yesus el malye ulul ning ara, ani-ani,” nyaptingbuk, kekeptibyopura, ‘Ayupu deice arye, Yesus optibye’ tenen, tenenmek. Utenenmikba, yuk talye wekmek nang arye, ayupu nyanmekbuk, ‘El opmanto deiyok ning ara, dan do?’ tenen, kekelenmek. Kekelenmek bukni, ninye wenena ati, deiyok kum upmokba, kum kekebik.

⁵⁶ Ninye yuk-yuk weik arye, talye yupu uk nyanmek bukni, yupu neiktoto atonun kum nyanmeka ati, ‘Ninye wenena ati deiyok aupmalba, optibye,’ tenepmanto yupu kum nyanmeka ati, kum kekebik.

⁵⁷ Kum kekebikba aminyan ara, yuk nang arye tikuka, el Yesus ati minina yupu nyabik. “Yesus arye ayupu nyabukura, kekebupu ara, ani.

⁵⁸ Yesus arye nyapsuk. ‘Allah arena ati, ninye taruk arye domikbuk Yahudi yala nang arye arilbalulum aik ara, narye uluplobuka, like winilye sum akunum uplyopura, yuk ning ton punubuka dopnamne. Yuk ning punubuka dopnamne,’ Yesus arye ayupu nyabukura, kekebupe,” nyabik. (Ayupu nyabik nang ara, Yesus arye “Anyaik uluplopnamle,” nyabuk ning ara, ‘Domon yupu deice arye nyabuk,’ ning ara bita moubuka kum tenebika ati, ayupu nyabik.)

⁵⁹ Ayupu nyanmek talak ara, asum nyanmek nang sik yupu yuk-yuk nyanmeka atouk, sik anang babye, yupu yuk-yuk nyanmek.

⁶⁰ Yuk-yuk nyanmekbuk, Allah arena ati, weik deiyok nang, awekmek nang sik urasin dam tikukabukce, Yesus ati ayupu nyabuka asipdeyuk. “Anang arye malye yupu nyapmakiyak yupu ara, dan do? Ance tamubuka yupu ton kum nyapnalam do?” nyabuka asipdeyuk.

⁶¹ Asipdeyuk bukni, Yesus ara, yupu tonap, tamubuka kum nyabukce, tunimanauk ubuk. Winibukba, ila tonap, Allah arena ati, aweik deiyoknye birye, Yesus ati asipdeyuk. “Ninye weik lyeplirye, sik talima talinamle deiyoknye, Mesias nyanyapnye bira, an aulyam do?” Tonda, “Si erekinyapnye malye winin ning pia kum winilulnye, Pia Etekdopnye Allah ara, anuk el Mi Koprop ulyam do?” nyabuka asipdeyuk.

⁶² Asipdeyukopura, Yesus arye tamubuka nyabuk. “Anyapmanilamnye bira, natia. Na Ninye Mi Koprop Atonunye, Allah el Pia Mikipnye, el sirik tam bukniba eipnamnulume. Eipnamnulum talak ara, im deice arye dua kan-kan koulukuka yanganye talak eipnamnulume.” Yesus arye nyabuk.

⁶³ Yesus arye ayupu nyabukopura, Allah arena ati, aweik deiyoknye birye, Yesus nyapmok yupu kekebukce, ayupu ati yu weik ubukura, el ongon cang baju, juba kwiliklobukce, ayupu nyabuk.

⁶⁴ “Yuk nang arye tonap, nyanuyak yupu ara, nun patana kume. El ayupu nyapmal deice arye, ‘Nara, Allah atonunye unune,’ akunum nyapmasile. Ayupu nyapmale deice arye Allah ati akunum yanipmal anya arye, anyapmal ning wenena ati ara, yatato wiripnamap do? Anggun abulupmalum nang babye, yata tenepmalum do?” nyabuk. Nyabukura, ayupu bokolina deiyok nang, sik Sandeheren nang nirya arye, “Akunuma, anye birye, ‘Nada Allah el Ninye Lyena Deiyoknye bira, natia. Na aunune,’ nyapmal deice arye, ‘Nada Allah atonunye,’ nyapmasile. Ayupu nyapmal ara, pia malye yupu nyapmale ati, adeice arye elti, talye lup parabuka optibye,” nyabik.

⁶⁵ Nyabikopura, ton nang arye Yesus nong deice si maka tululinmek. Ton nang arye Yesus el asing, cang kain arye kitibuka lelipdongopmekce, anang nirya arye, taruk pinibuka, Yesus el nong deice, taruk arye bupra onmek talak arye, ayupu nyanmek. “Aminyan upnamle ning laka nyananye, nabinye ulyama anya arye, yatanye birye opmakil do? Ance laka nyapsilyame,” nyabuka, Yesus ati nalinmek. Nalinmekopura, anyaik yin talibuka kalikna nang arye, Yesus dobuka banmekce taruk arye, bokuka opobanmek.

Peterus arye Yesus ati, “Anye bira na walwale,” nyabuka kunusa dobuk yupu

⁶⁶ Yahudi yala nang Allah arena ati, sik weik deiyoknye, el aik dam Peterus unmok talak ara, aweik deiyoknye, el pil don kil tonok Peterus unmokak yayuk.

⁶⁷ Yayukopura, Peterus uku peikinmokbuk, akil arye Peterus dinmokce, el urasin ati bita maka meilenmok. Bita maka meilenmokce, ‘Anye bira, Nasaret mutuku nang arye deiamiknye, Yesus ara, el melinanye, akunuma,’ tenebukce ayupu nyabuk. “An ap, aNasaretnye ap, neika ulamrurume,” nyabuk.

⁶⁸ Nyabukura, Peterus arye tamubuka akil ati nyabuk. “Anyapmanilam yupu ara, deiyok yata ati nyapmanilam do? Na kum tenepmane. Anyapmanilamnye bira, na walwale,” nyabuka kunusa dobukce, anyaik ongobuka wiyamik poka buplan dam tikilbiyuk.

⁶⁹ Abinuka tikabukba, anyanmok kil ila tonap, eibukce, awekmek nang ati ayupu nyabuk. “Anye bira, Nasaretnye ap, melibuka ulamik nang ara, tonoknye ton atikmale,” nyabuk.

⁷⁰ Nyabukura, Peterus ayupu kekebukce, “Anye bira, na walwale,” nyabuka kunusa dobuk. Kunusa dobukura, sik nirya daunmeka ani, Peterus ap, tikmek nang arye, Peterus ati, ila tonap, nyabik. “Anda, Galilea tam ulyamnye biti, anye bira el melibuka balamlum nang ara, an akunuma,” nyabik.

⁷¹ Nyabikopura, Peterus yupu mikip arye tonap, pilibukce nyabuk. “Anyapmanulumnye bira, dipkoprop pia na walwale. Na nyapmasin yupu ara, tilila nyapsitinyetoura, Allah arye opnutue,” nyabuka ayupu atonun yupu ton weika arye nyanmok.

⁷² Peterus el ayupu deiya koubuka nyanmok talak ara, adiparyuk yim ayam arye, like bitinye ning kamubuk. Ayam yupu nyabukopura, adiparyuk, Yesus arye Peterus ati nyapmok yupu ara, Peterus ila tonap, tenebuk. Se, Yesus arye, “Yim ayam like bitinye min kum kamupmalye talak ara, ‘Anye bira na walwale,’ nyabuka, like winilye deice arye kunusa dopnamanilame,” nyapmok touk, ‘Akunum winipmane,’ tenebukce, el kanye talima pia ikin ubukura, weik arye engenmok.