Markus 12 - Eipomek

Wa win pil don nang ati, Yesus arye domon yupu nyabuka peterebuk yupu

¹ Yahudi yala nang arye Allah ati arilbalamik aik dam, Yesus tikmokce, abulubuka wekmek nang ati, domon yupu deice arye peterenmok. Yesus arye ayupu nyabuk. Tonok talak ara, anggur duk mouamuk tapu talyamuknye ulamuk. Anggur tapu kouamukce, awa dana-dana tam nirya keil poka wibuka denepdongamuk. Winibukce, anggur duk teiknak ati, keil kum ubuka kintinipdeiyamuk. Tonda, awa kalekuka dina ati, awa dam weik cang yo ikukce, adeice arye kalikna aik dobuk. Aning nirya akunum kintinibuka deibukce, ‘Yuk nang arye awa ara, tia talak talibuka pil donamak’ tenen, yuk nang ati aribukura, anang arye awa ning pununa ati yo bok arebik. Winibikopura, awa deiyoknye birye, yuk pera mutuku ninye asik uruna ati biyuk.

² Atapu duk ekna talak akunum ubukura, awa tuku deiyoknye birye utenebuk. ‘Atapu duk dakuka na arepnamniak’ tenen, el pil donanye dopdeibukura, biyuk.

³ Biyukura, awa tuku tia talak ati talyamik nang eibikce, ayanmoknye el nong talibuka weik arye obik. Obikce aning arena kumcuk, “Tamubuka bilyame,” nyabikura, biyuk.

⁴ Winibikopura, awa tuku deiyoknye, ila tamubuka, el pil donanye, yuknye ton anang dam dopkwetebuk. Dopkwetebukba, awa tuku tia talak ati talyamik nang arye tonap, dopkwetebuknye, kisok cobuka obikce, el nong deice ikin ning weik deibikopura, el obiknye alye ubukura, biyuk.

⁵ Winibikopura, ila tonap, anggur tapu wa deiyoknye birye, yuknye dopdeibukura, anye bira dipkoprop pia obikopura, dibuk. Atouk ton, awa tuku deiyoknye birye, el pil don nang yuk nang ton weik arye dolilalamuk bukni, awa tuku pil dolamik nang arye, ton nang, talye kama arye olamik. Ton nang ara, dipkoprop pia olamikbuk diplamik.

⁶ Winilamik bukni, sirya ara, tonok dopreipmantonye ubuk. Wa tuku deiyoknye, el mi koprop anya arye, pia bico tenelamuknye ulamuk. Adeiyoknye birye, ‘Na mi koprop anya arye, na wa tuku tia talinyak nang arye kibuka dopnamake,’ tenebukce dopreibuk.

⁷ Dopreibukba, awa tuku pil dolamik nang dam yanganmokbuk, eibikce nyabik. “Awa tuku deiyoknye diplibuk, el punupnamlanye bira, ayanmal ani. Aning ati ara, nunce el opmabye. Obibyopura, awa tuku nun bidamang kipdopnamabe,” nyabik.

⁸ Nyabika ati, anye obuka, el nong ara, awa tuku poka bai tam donokik.

⁹ Winilamika ati, awa tuku deiyoknye birye yata wiripnamle do? Kume, awa tuku tia wilamik nang dam yalirye, anang nirya oplyopura, anggur tapu duk wa dobuka, yuk nang ati arenamle. Yesus arye adomon yupu nyabuk.

¹⁰ Nyabukce, ayupu tonap, nyabuk. “Daud arye sekamuk buku noutamak sekamukbuk nyapnusin yupu ara, anggun ton kum nyamlum do? Daud domon yupu deice sekamuk yupu ara, ani. ‘Keil aik dolamik nang arye ‘Akeil ara, malye keil’ tenen, batakik keil ara, abilinga dukulongonak delilamak keil, pia mambul ning ara, akunum uple.

¹¹ Pia teleb winiplye ning ara, Allah arye teleb ubuka deibuka anya arye, nunce ‘Aning pia teleb,’ tenenyabe.’ (Mazmur 118:22-23) Daud arye sekamuk yupu akunum nyapsine,” Yesus arye Yahudi yala deiyok nang awekmeka ati nyabuk.

¹² Yesus nyabukura, Allah el si erena aik pum bisik pil dona deiyok nang ap, Allah arye, ‘Aning wininamlulume, aning ara, kum winamlulume,’ nyabukba, Musa arye sekamuk yupu, mem yupu peterena deiyok nang ap, aYahudi yala sik deiyok nang ap, sik nirya arye utenebik. ‘E, Yesus arye domon yupu deice anyapmasila ara, nun wenena ati nyapmasile,’ tenebikce yu ubuk. Yu ubukura, ‘Yesus yata wiribuka opnamap do?’ tenen, yupu nyapra balamik. Bukni, atalak ara, Allah el si erelamik aik dam wekmek nang arye, ‘Yesus ara, teleb,’ tenelamikce elti, sik kanye deipmek. Sik kanye deipmek ati ara, sik Yahudi yala deiyok nang arye, ‘Yesus lak akarye obibipyebuk awekmek nang arye opsicak’ tenen, adeiyok nang arye Yesus asukumuk batakuka yukak biyik.

“Roma mutuku Pemerintah weik ninye deiyoknye Kaisar ati, yo bok arenyaba ara, teleb do?” nyabuka tenebuka arye, talye yupu asipdeyik yupu

¹³ Ura, yuk talak ara, Yahudi yala deiyok nang arye, ‘Yesus el yupu nyaptua deice arye malye uptue’ tenen, sik nyapdeibikba, Farisi nang ap, Raja Herodes el yupu kekelamik nang ap, tenebuka, ‘Yesus talye asipdenuyap’ tenen, Yesus dam yayik. Yayikce, Yesus ati ayupu asipdeyik.

¹⁴ “Anda peterenanye umince, yupu diksukumuk nyalyame. Tonda, an petereminye talak ara, ‘Peterepniba kekepnikirye, derepnuniyak do? Kanye deipnamniak do?’ kum tenelyame. An petereminye talak ara, ‘Anang ara, bona weik talin nang do? Anang ara, ninye deiyok nang do? Anang ara, sisin nang do?’ tenena kumce, Allah yupu deice arye, ‘Wininamlulume,’ nyasilye touk, diksukumuk peteremince, tonok ning babye, kum bataklyame. Ati ara, asipdenukiyabe. Nun mutuku nirya talibuka weik ninye deiyoknye Kaisar arye, ‘Pemerintah ati, yo bok arenamlulume,’ nyasilya ara, arena teleb do, kum do? Ayo bok arena ara, ikin usulule anya arye, Pemerintah ati tuba arenamap do, aning bataknamap do?” nyabuka, tenepce arye asipdeyik.

¹⁵ Anang arye, ‘Yesus malye nyaptue’ tenen, nyabuka tenepce arye asipdeyikopura, Yesus arye anang sik talima ak duknublobuka nyapmek ning bikukce, ayupu nyabuk. “Anggunda, ‘El yupu nyaptua deice arye malye uptue’ tenen, tenebuka asipdenmanulum ning ara, yata ati do? Anggun keil uang dobuka bebdenumunba, dipdenune,” nyabuk.

¹⁶ Nyabukura, sikce akeil uang lake kipdeyikopura, Yesus arye asipdeyuk. “Anggun ton akeil uang dipdelulume. Akeil uang deice el ninye urasin atouk puturubuka deibik ning ara, yatanye urasin do? Tonda, ninye si sekuka deibik ning ara, yatanye si do?” nyabuka Yesus arye asipdeyuk. Asipdeyukura, sikce tamubuka, “Ara, weik ninye deiyoknye Kaisar el ning,” nyabik.

¹⁷ Nyabikbuk, Yesus arye anang ati nyabuk. “Yo bok ara, yala tonokuk ulula ati, Kaisar arye, ‘Aning arepnululume,’ nyasulul ning ara, adiparyuk Kaisar ati arenamlume. Tonda aning atouk, anggunce, ‘Allah ati arenamabe,’ teneplum ning ara, adiparyuk Allah ati arenamlume. Aning atouk, ‘Tonye bira, kekenamabe, tonye biti, nun lik tenen, bataknamabe,’ tenena kume. Kaisar arye nyasulul yupu babye, Allah elce nyasulul yupu babye, kekebuka wininamlulume.” Yesus arye nyabuk. Yesus ayupu nyabuka deice arye, Farisi nang ap, Raja Herodes el yupu kekelamik nang ap, arye, ‘El yupu nyaptua deice arye malye uptue, tenepmap bukni, aning kum winipmanto uple,’ tenebikce, “Se,” nyabuka mambul kirik.

Saduki nang arye, ‘Yesus malye nyaptue’ tenen, kil dona ati, tenebuka arye talye asipdeyik yupu

¹⁸ Yuk talak ara, Saduki nang arye, Yesus dam asilyayik. Sikce, ‘Ninye dibikirye tamubuka kam kum buknamak,’ tenelamik nang anya arye, sikda Yesus ati ikin yupu asipdepyeba, tamubuka kum nyaplyopura, yuk nang nirya arye, ‘E, ninye dibikirye, tamubuka kam kum buknamake,’ nyasinyak yupu ara, ‘Diba nyasinyake, tenepnamak’ tenen, tenepce asilyayik. Yayikce Yesus ati ayupu nyabik.

¹⁹ “Musa sekeiyamsuk yupu ara, ani. ‘Tonoknye birye kil dopmalye bukni, anye diplyopura, akil arye mi delina kumopura, anye el weit koprop arye, el kisok pununa ati, el du kil youwak daknamle,’ nyabuka Musa arye sekeiyamsuke. Nyabuka sekamsuke ati, winipmanto ning asipdenukiyabe.

²⁰ Tonok talak ara, sik weitcapu silip uk, tekbarye nang ulamik. Sik du minopce kil domuk bukni, mi kum deibuk cuk dibuk.

²¹ Minye bira dibukopura, akil youwak el weit bitinanye youwak dakuk. Dakukce dobuka daulamrika ani, el babye, mi delina kum aniryuk dibuk. Atouk ton winilinye babye, akil youwak dakuk bukni, mi delina kum aniryuk dibuk.

²² Daupnin balamika ani, aweitcapu silip tekbarye nang nirya arye, atonok kiluk tonok-tonok arye dopnin balamik bukni, mi delina kum aniryuk dibik. Sirya ara, akil babye, dibuk.

²³ Ati, anda, ‘Aminyan ara, Allah arye ninye weik kam bukdeipnamle,’ tenelyama ati, atekbarye nang nirya arye, akiluk dolamika anya arye, sirya talak ara, yatanye birye, ‘Akil ara, na kil,’ nyabuka dopropnamle do? Allah arye, ninye weik kam bukdeiplyopura, yata ati ayupu nyaptinge do? Sik tekbarye nang arye, akiluk dolamika anya arye, aning ara, kum winipmanto. Ati, ‘Allah arye ninye weik kam bukdeipnamle,’ nyabuka peteresilyame ning ara, nunce diba kum tenenyabe.” Sik Saduki nang tenepce arye, Yesus ati nyabik.

²⁴ Ayupu talye asipdeyikopura, Yesus arye tamubuka nyabuk. “Allah arye nyapdeibukura, seklamik yupu ap, Allah el pia mikip weik ulye ning ap, kum kel kiyamluma ati, anggun walwal arye asipdenmanulume.

²⁵ Allah arye ninye weik kam bukuka deipnamle talak ara, kil ap, sal ap, kum dopdanamake. Allah el im deice pil don nang, malaikat, im deice wininyak touk, Allah arye kam bukeipnamle ninye babye, kil dolana kum aniryuk unamake.” Yesus arye nyabuk.

²⁶ Yesus ayupu nyabuk ning ara, yupu tonap, nyabuk. “Winira, ‘Diamikce ninye kam kum buknamake,’ tenelulum ning ara, laka nyapnusine. Musa sekamuk yupu noutamak ara, tatca bok ning kan-kan uku buk dinmokak, Allah arye Musa nyabuk yupu ara, kum nyalamlumce aning kel kum kiplum do? Tatca bok ning kan-kan uku buk dinmokak, Allah arye Musa ati nyabuk. ‘Abraham ap, Isak ap, Yakup ap, si ereninyak Allah ara, na unune,’ nyabuk.

²⁷ Nun kele. Allah arye ayupu nyabuk talak ara, Abraham ap, Isak ap, Yakup ap, nirya ara, sik nong akunum diamik. Sik nong akunum diamik bukni, sik kanye ara, tuba kam ulamik. Tonda wini talak babye tuba kam unyake. Dipmakce ninye ara, kam kum buktingtoura, Allah si kum erepting bukni, Allah arye, ‘Awinilye nang, na si ereninyake,’ nyabuka anya arye, adeice arye, ‘Aning ara, tuba kam unyak’ tenen, kel kinyabe. Aning ati ara, anggun kel kiplulume. Siria talak ara, Allah arye ninye weik kam bukdeipnamle. Ati sikda, ‘Diamikce ninye tamubuka kam kum buknamake,’ tenelulum ning ara, anggun pia malye tenelulume. Walwal aryuk tenemunce nyalulume.” Yesus arye sik Saduki yala nang ati nyabuk.

“Allah arye, ‘Wininamlulume,’ nyabuk yupu pia mambul ning ara, ani,” Yesus arye nyabuk yupu

²⁸ Farisi nang ap, Raja Herodes el yupu kekelamik nang ap, arye, ‘Asipdepya deice arye Yesus malye yupu nyaptue’ tenen, tenebuka asinmek talak ara, tonoknye ton sik yupu talipmekak yayuk. Anye bira, Allah arye, ‘Aning wininamlulume, aning ara, kum winamlulume,’ nyapdeibukura, Musa arye sekamuk yupu peterena deiyoknye ulamuk. Anye yayukura, Yesus arye sik Saduki nang ati, tamubuka nyanmok yupu kekebukce, utenebuk. ‘Se, Yesus ara, weik bikukce teleb yupu tamubuka nyanmalye,’ tenebuk. Anye utenebukce, Yesus ati asipdeyuk. “Allah arye ‘Aning wininamlulume, aning ara, kum wininamlulume,’ nyapdeiamsuk yupu ara, weik aupmal bukni, pia mambul ning ara, dan ning do?” nyabuka asipdeyuk.

²⁹ Asipdeyukura, Yesus arye tamubuka nyabuk. “Pia mambul ning ara, ani.

³⁰ Anggun Israel ninye nirya kekeplulume. Nun ni Allah ara, el tonok ulule. Anggun kanye bokoltona kum aryuk, anggun kanye talima Allah el nong deice delinamlulume. Tonda anggun nong nirya ap, anggun kanye ap, anggun kanye tenen ning ap, anggun nong mikip ap, anirya ara, Allah el deiceuk delinamlulume.

³¹ Weik mambul bitinye ning ara, ani. ‘Anggun bidamnye, ati patapsilye ning mambule tenelulum touk, anggunce yuk nang ati, sik pataplye ning ati, bico tenebuka melinamlulume.’ (Imamat 19:18) Allah arye abitinye yupu, ‘Wininamlulume,’ nyabuk yupu ara, pia mambule. Yuk ning nirya ara, mitik mambul uka. Yesus arye anye biti nyabuk.

³² Nyabukura, elti, asipdeyuknye birye, tamubuka Yesus ati nyabuk. “Naio, ‘Allah ara, el tonok ulule. Allah yuk ton kum ulule,’ nyapmalama ara, pia telebe.

³³ Nun malye wininyap ning ara, ‘Allah arye kum daneipnamsil’ tenen, kam ulul ning obuka, nong nirya uku dongonyap ning ap, aning-aning nirya Allah ati arinyap ning nirya ap, aning ara, mitik mambule. Bukni, ‘Anggun kanye talima ap, anggun kanye tenen ning ap, anggun nong mikip ap, aning nirya, Allah el nong deiceuk delinamlulume,’ nyapmalam ning ap ura, ‘Anggun bidamnye ati, patapsilye ning mambule,’ tenelulum touk, anggunce yuk nang ati, ‘Sik pataplye ning ati bico tenebuka, melinamlulume,’ nyapmalam ning ap ara, dipkoprop pia ilil ning,” nyabuk.

³⁴ Musa sekamuk yupu peterenanye birye ayupu nyabukura, Yesus arye tenebuk. ‘Anye bira, el kele arye tamubuka nyapmanile,’ tenebukce, anye biti nyabuk. “Ninye nirya arye Allah ati diba tenebikcebuk, ‘Allah el mikip deice sik kanye talima ap, sik kanye’ tenen ning ap, taliplibuk, el yupu kekebuka dobolbalamak touk, an babye, diba tenepmantonye ulyame,” Yesus arye nyabuk. Nyabukopura, atalak arye deiyok koubuka, aminyan talak nirya ara, ayala-ayala nang nirya arye, ‘Yesus tamubuka nyasulul yupu ara, teleb ubuka nyasulule,’ tenelamikce, sikce Yesus nyalamuk yupu ati yanina kumce, ilil ubukura, tenebuka arye tonap, kum asildelamik.

Yesus arye, Musa sekamuk yupu peterena deiyok nang, sik malye winilamik ning ati nyabuk yupu

³⁵ Yuk talak ara, Yahudi yala nang Allah ati arilbalamik aik dam bukni, Yahudi yala kum nang Allah morolyangalamikak tikmokce, peterenmok talak ara, Yesus arye ayupu nyabuk. Musa sekamuk yupu peterena deiyok nang arye, ayupu peterenyake. Ara, ‘Ninye mutuku nirya kan-kan arye lyeplirye, talinamlanye, Mesiasnye bira, nun apu kopropa Daud, el mi ulule,’ nyabuka peterenyaka deiyok ara, yata ati do? Ayupu ara, nong noutamak ning ton moubuka tenelulum do, kum do?

³⁶ Allah El Dib Kanye arye, Raja Daud el talima ak talibuka deice arye, Daud elcuk Mesias yanamuknye ati, ayupu nyabuk. ‘Allah arye na ni kopropa Mesiasnye ati nyabuk. Nun bitinye nang arye ninye nirya talibuka unamnama ati, na sirik tam buknamlyame. Abulaminyebuk, aminyan, an yupu yanikinyak ninye ara, narye dobuka an amu tam deipnibuk, ance aninye nirya pia talinamlyame.’ (Mazmur 110:1) Daud arye sekamuk yupu dobuka nyapmasine,” Yesus arye nyabuk. Nyabuk ning, ayupu tonap, nyabuk.

³⁷ “Daud ayupu nyabuka deice arye, tukwak ninye lyenanye Mesias yanamuknye ati, ‘Mesiasnye bira, na ni kopropa ulule,’ nyabuk. Nyabuka ati, Mesiasnye bira, Daud el mi koprop kum ulule. Daud elce deibukura, dadeipdanin, yangalamuka ani, el yalanye birye deibuk mi ulul bukni, elda dipkoprop im deice yalanye, weiknye ulule. Ninye lyena Mesiasnye bira, talye tukwaknye kum ulule.” Yesus arye anyaik dam wekmek nang nirya ati nyabuk. Weika arye abulubuka wekmek nang nirya, Yesus arye kanye lon yupu nyanmokbuk, kekenmekce, kanye pia deibuka pin-pin ubuk.

³⁸ Yesus ayupu peterenmok talak ara, ayupu tonap, nyabuk. Allah arye, ‘Aning wininamlulume, aning ara, kum wininamlulume,’ nyapdeibukura, Musa arye sekamuk yupu peterena deiyok nang, sik wininyak ning ati, moubuka unamlulume. Sik malye wininyak touk, ‘Nun babye, malye winibibyak’ tenen, kanye moubuka unamlulume. Sik malye wininyak ning nyapnusine. Sikda, ‘Yuk ninye arye, nunti sisinanye tenepnamsiak’ tenen, deice tam ongoce ongon cang weik baju, juba ara, cang weik ning ongobikirye, banyake talak ara, langtupnin banyake. Tonda, ninye bona ning dekna ati, yupa weik arye bulubuka weklamak noutamak arye, ‘Ninye weik dinyak ak banmabibuk, kipdopsikirye, “Telebe,” nyapsiceopura, yuk nang nirya eibuka kekebikirye, “Se, anang ara, weik mambul nang,” nyanamsiak’ tenen, pia patalule.

³⁹ Tonda, Allah yupu peterena aik pum, ‘Ninye nirya sik urasin din tamuk bukibyebuk, disikirye, weik mambul nang tenenamsiyak’ tenen, maknye kintinipdane bulbanyake. Tonda, weik kwalina kwalin talak nirya ara, weik nang bulamicak uk, ‘Weik mambul nang tenepnamsiak’ tenen, pia patapliba, maknya kintinipdakuka, weik nang bunakuk bulbanyake.

⁴⁰ Ton malye wininyak ning ara, ani. Sikce youwak kilapu ati, ‘Dipmunyopura, anggun talilulum aik ap, yuk ning nirya ap, Allah ati arenamlulume,’ nyaltakanyak bukni, youwak kilapu aning akunum arebikcopura, Musa yupu peterena deiyok nang sik bidamnanguk bokdakirye, weik arye ubula dolonyake. Tonda, anang ara, utenenyake. Yuk nang arye, ‘Aning ara, Allah morona weik kel nange, nyanamsiak’ tenen, Allah moroce talak ara, yupu canga arye moronyake. Awininyak ning nirya ati ara, Allah arye awininyak nang atonun nang nirya ati, pia weik arye wenebuka opnamle. Yesus arye nyabuk. Ara, sik Yahudi yala nang, sik Allah arilbalamik aik dam wekmek nang nirya ati, Yesus arye ayupu nyabuk.

Youwak kil arye Allah ati, pia mitik keil uang aribuk yupu

⁴¹ Yahudi yala nang, sik Allah ati arilbalamik aik pum bisik, ‘Allah arena ati yo bok dongopnamak’ tenen, marikna atouk ning moubuka deiamik. Ayo bok dongolyanganmek ning dam, Yesus ap, el mapu ap, bukmekce, ayo bok dongolyanganmek nang ati urasin dinmek. Bona weik talin nang weika arye, weik dekna yo bok dongonmek talak ara, anang nirya ara, maknya kintinipdakuka dongolyanganmik.

⁴² Bukni, youwak ulamuk kil, pia bona utotoa talina kum kil tonokuk, elce dekna mitik keil uang bitinye uk, pia mitik ning, yanuka dongobuk.

⁴³ Dongobukopura, Yesus arye el mapu mening dam abukmeka ati, nyabuk. “Anggun dipdelulume. Na dipkoprop yupu nyapsine. Abona talin nang nirya arye, dekna weik yo bok weik dongopmak bukni, weik yo bok dongopmaka ara, Allah el kanye ara, ‘Ayo bok nirya tabakuka nukuna ara, mitikuk ulule,’ tenelule. Bukni, ayouwak ulirye, bona utotoa kum talilul kil el dongopmok ara, keil uang dekna mitik ninguk dongopmo bukni, Allah el kanye ara, ‘Akil dongopmok ning ara, pia weik ulule,’ tenelule. Winibuka tenelula deiyok ara, ani.

⁴⁴ Sik bona weik talin nang arye, sik aning-aning weik tailibika noutamak arye, ‘Na’ tenen ning weik aupmalbuk, weik yo bok dongopmak bukni, ayouwak kil ara, pia bona talina kum kil anya arye, el talibuk ning nirya anyuk akunum dongopmale. Wini talak ara, el yo bok pia kum upmala ati, el din ning babye, kum dektue. Ati, Allah el kanye ara, ‘Akil aniryuk, weik arepmanile,’ tenelule,” Yesus arye el mapu ati nyabuk.