Markus 11 - Eipomek

Yesus arye, Yerusalem asik wekelbiyuka ati, nyabuk yupu

¹ Yeriko mutuku batakuka, ‘Yerusalem mutuku binamap’ tenen, Yesus ap, el mapu ap, bisik mapnin balamika ani, asik dolamik si ara, Betania ap, Betfage ap, bisibukabikce, banmeka, Yerusalem dam uawamuk mutuku ara, Zaitun mutuku dup welebik.

² Welebikopura, Yesus arye el mapu bitinye nang ati nyabuk. “Otam mutuku birumunce, asik dolamakak winiryuk wekdumunye talak, keledai basam mitik ning kirikeipmaca eiprumunyopura, tapu kirikdongopmakca lobuka boyanururume. Amitik keledai basam ara, ninye bukuka kum balamik, tonda wini babye ton kum bukuka banyake.

³ Winiprumunbuk, yuk nang eipsikirye, ‘Yata ati winiprum do?’ nyabuka asipsicopura, ila tamubuka nyapnamrurume. ‘Nun ni Yesus patapmala ati, bobinimnyeba, akeledai basam balye deice arye bukuka bilyopura, anggun bidamnang tamubuka dopkwetepnamsile,’ nyapnamrurume,” Yesus arye abitinye nang ati nyabuk.

⁴ Nyabukura, asik domikak noutam birikce, aik buplan dam mitik keledai basam kirikmeka eiprik. Eiprikce binuka lolorikbuk, asukum tikmek nang arye nyabik.

⁵ “Amitik keledai basam lolonmaruma ara, yata ati do?” nyabuka asipdeyik.

⁶ Asipdeyikbuk, Yesus arye nyapnamrurume nyapmok touk nyaprik. Nyaprika ati, atikmek nang arye mankau kibikopura, sikce lobuka birik.

^7-8 Lobuka bobanmarika ani, Yesus dam birikbuk, sik deice ongamik cang baju, juba kwiribuka keledai basam balye deice yangabuka deibikbuk, Yesus adeice bukukura, bobiyuk. Yesus ara, Yerusalem mutuku bisik keledai deice bukuka banmokak, ton nang ara, sik deice ongamik cang baju, juba kwiribuka, Yesus yanibuka yanamokak, yangapreipnin bayik. Ton nang ara, wa win dam arye, yo bata cebuka, bisik yaninak yangapreipnin banmek. Aning nirya wininmeka ara, ‘Yesus ara, weik mambulnye yanamale’ tenen, si erenmek.

⁹ Yesus banmokak menekuka banmek nang ap, aminyan yanganmek nang ap, ‘Yesus ara, nun weik ninye deiyoknye upnamsil’ tenen, Allah yupu laka nyalamik nang minop arye sekamik yupu dobuka, ayupu weik arye nyapnin banmek. Nyapnin banmek yupu ara, ani. ‘Allah elda pia telebe. El si erebuka kibabe. Allah el mikip deice arye yanmalanye bira, Allah weik arye meliplibuk, telebuk ulule.’ (Mazmur 118:25) Tonda, ayupu ton nyanmek.

¹⁰ “Nun apu kopropa Daud ati, Allah arye, ‘Amutuku nirya talibuka unalame,’ nyabuka deiamuk ning ara, wini talak akunum deiyok kipnula ati, Allah arye melipliba, aning nirya telebuk unamle. Aning ati ara, Allah anda, im deice ulyamce, weik mikip ulyamnye bira, nunce an si erepmabe,” nyabuka Allah ati weik yupu arye si erenmek.

¹¹ Yesus arye Yerusalem mutuku bisik banmoka ani, Yerusalem asik dolamikak wekukce, sik Yahudi yala nang Allah ati arilbalamik aik, el si erena aik binuka wekuk. Wekukce, aning-aning dipra banmok bukni, akunum ipnin banmoka ati, tamubuka Betania mutuku biyuk.

Yesus arye, malye nang ati, Yerusalem mutuku noutamak Allah si erena aik pum bisik arye, bai tam dopkwetebuk yupu

¹² Biyukura, Yesus ap, el mapu ap, neika mapmeka berekukopura, Betania mutuku batakuka, bayik talak ara, Yesus din patabuk.

¹³ Patabuka ati, kwarang yo duk moulamle touk Ara, yo tikamukak yukak arye binuka eibukce, bok weik uamuka ati, ‘Duk moubuk do?’ tenen, dilbiyuk. Dilbiyukce, ayo duk mouna kum li ati, bok demuk uamuk.

¹⁴ Bok demuk uamuk anya arye, Yesus arye ayo ati nyabuk. “Akiting tamun, aketing tamun nirya, duk kum moupmenya ati, ninye arye kum dakuka dinamkiyake,” nyabuk. Ayo ati nyabuk yupu ara, el mapu kekebik.

¹⁵ Kekebikce, sik nirya banmeka ani, Yerusalem mutuku wekikopura, Yesus ara, Yahudi yala nang arye Allah el si erena ati arilbalamik aik dam bai tam tikilbiyuk. Tikilbiyukce, Yahudi yala nang, ‘Nun malye wininyap ning ara, Allah kum kipdeipsilirye, lyepnamsil’ tenen, kam ning obuka, Allah ati arilamik ning, ining ning dekenmek nang ati, Yesus derebukce buru yakwetebuk. Tonda, yuk pera mutuku nang arye, sik bidamang mutuku yo bok dobuka deibuka, Yerusalem mutuku nang yo bok arye dekelanmek nang nirya ati, sik yo lakase tomoptalibuka yamuplopra biyuk. Tonda, ‘Allah ati arepnamak’ tenen, yalma maka atouk maka dekenmek nang, sik bukmek ning yamuplopra biyuk.

¹⁶ Tonda, wininmoka ani, yu weik ubuk ati, Yahudi yala nang arye Allah ati morolamik aik bukni, Yahudi yala kum nang ara, anyaik binmanto kum ulamika anya arye, Allah morolamik aik dam, ‘Deken ning, deiyok nang arye talye deken ning bobuka, anyaik dam bikcak’ tenen, Yesus arye abisik seklamuk.

¹⁷ Wininmok talak ara, aunmek nang ati, ayupu nirya peterenmok. “Allah arye nyapdeibukura, nabi Yesaya arye sekiamuk yupu ara, tuba kum teneplum do? Ayupu ara, ani.” ‘Allah arye, “Na si erena aik ati, ninye mutuku-mutuku nirya arye, Anyaik ara, Allah el si moronyak aik atia nyanamake,” nyabuk.’ (Yesaya 56:7) Tonda, Yesus arye ayupu nyabuk. “Allah arye nyapdeibukura, nabi Yesaya arye anyapmasin yupu sekamuk bukni, anggun wini talak ululum nang ara, ubula nang arye ubula dobuka dungnulamak aik ulamle touk, anyaik babye, akunum malye updeipmalume,” Yesus arye nyabuk.

¹⁸ Nyanmokopura, Allah si erena aik pum bisik pil dona deiyok nang ap, Musa arye mem yupu sekamuk yupu peteren deiyok nang ap, kekenmekce, yu ubukura, ‘Anye bira opnuyabe,’ tenebikce, ‘Yata ubuka optibye do?’ tenen, yupu talilbiyik. Yesus el yupu nyanmok talak ara, talye nang nirya awekmeka kekenmekce, ‘Se, Yesus arye peterlirye, yupu ara, pia teleb’ tenen, mambul kanye bopmekce, Yesus ati kanye deipmeka ara, adeiyok nang nirya arye eipmeka anya arye, Yesus ati sik ilil ubuk.

¹⁹ Yesus aunmokura, aunmeka ani, akunum inibukopura, Yesus ap, el wipdeiamuk nang, sik 12 nang ap, Yerusalem mutuku asik dolamikak batakuka, buru tam biyik.

Ara yo koulupmokak eibik yupu

²⁰ Buru tam binuka mapmeka berekukopura, ‘Yerusalem mutuku tamubuka binuyap’ tenen, bisik banmekce, ambusum bisik banmekce eipmek Ara yo ara, tonap, eibik. Eibikce ayo dam bina dipdeyikce, ayo bok ap, nong ap, yating ap, nirya, Yesus arye ayo wenepmok deice arye akunum koulupmok ning ara, eibik.

²¹ Eibikce, Yesus nyapmok yupu kekepmoka anya arye, Peterus tenebukce Yesus ati nyabuk. “Naie, ayo dipdelyame. ‘Duk kum moupmenyeba ninye arye kum dakuka dinamkiyake,’ nyapmom yo ara, akunum kolupmale,” nyabuk.

²² Nyabukura, Yesus arye tamubuka nyabuk. Anggunda Allah ati pia diba tenenamlulume.

²³ Anggun moubuka kekeplulume. Yatanye do nirya, kanye talima bokoltona kumce, “Narye elti, moropnye ning ara, Allah arye dipkoprop winipnamnile,” nyabuka, Allah ati pia diba tenebukce, omutuku ati, “An bidamnang erebuka, laut mekwen noutamak delilbilyame,” nyapnutopura, amutuku el bidamnang erebuka, laut mekwen noutamak dopkwetepdatue.

²⁴ Aning ati ara, na nyapsine. Allah morolulum talak arye, aning-aning morolulum ning nirya ara, ‘Aning dipkoprop akunum arepmanile’ tenen, diba tenepmunyopura, Allah arye dipkoprop arenamsile.

²⁵ Tonda, Allah ati moronamlum talak nirya ara, anggunti malye winipdeipsice nang ara, anggun malye winipdeipsice ning atibuk, malye kanye tuba tenepmunyopura, adiparyuk teniltona kumce, anggun malye winisice nang ati namin kilongonamlulume. Namin kipmunyopura, anggun ni Allah im deice ululnye birye, anggun babye, malye winilamlum ning nirya babye, namin kipnamsile.

²⁶ Bukni, yuk nang arye anggunti malye winisice ning ati, kum namin kipmunce tuba tenepmunyopura, ‘Allah el babye, anggun malye winimunye ning atibuk fia’ tenenauk ulirye, kum namin kipnamsile. Yesus arye nyabuk.

Yahudi yala deiyok nang arye, Yesus ati, “Yata deiyok arye pil dolulum do?” nyabuka, wenebik yupu

²⁷ Yesus ap, el mapu sik 12 nang ap, bisik yanganmeka ani, Yerusalem mutuku asik dolamikak wekikce, Yahudi yala nang arye Allah el si erena ati, kam ning obuka arilbalamik aik dam biyik. Allah ati arilbalamik aik dam bukni, Yahudi yala kum nang arye wekmanto akuk, Allah ati morolamikak biyik. Biyikba, Allah arena ati, el si erena aik pum bisik pil dona deiyok nang ap, Musa sekamuk yupu, mem yupu peterena deiyok nang ap, Yahudi yala deiyok nang yuk nang ap, Yesus dam yayikce, ‘Wenepnamap’ tenen, asipdeyik.

²⁸ “Yatanye birye yupu deiyok arepkukbuk, ambusum ining ning dekenmangu ning yakuka bai tam dopkwetepmalam do?” nyabuka asipdeyikce wenebik.

²⁹ Asipdeyikce wenebikura, Yesus arye tamubuka anang ati asipdeyuk. “Anggunti tonok ning asipdenusine. Asipdesinibuk, tamubuka nyapnumunyopura, na pil donye ning yupu deiyok arepnuknye bira, ‘El si ani,’ nyabuka laka nyapnusine. Anggunce tamubuka kum nyapnumunyopura, nati anggunce asipdenmanulum ning ara, kum laka nyapnusine.

³⁰ Yohanes arye ‘Diba’ tenen, ninye mek dongolamuk ning ara, Allah arye nyapdeiamukba winilamuk do? Talya ninye arye nyapdeiamikbuk, ninye dobuka mek dongolamuk do? Anggunce tamubuka laka nyapnululume,” Yesus arye nyabuk.

³¹ Nyabukura, aYahudi yala deiyok nang arye, ‘Yata yupu nyapnuyap do?’ tenen, yupu talipdayik. Yupu talipdayikce nyapdayik. “Yohanes arye ninye dobuka mek dongolamuk ning ara, ‘Allah arye nyapdeiamukba winilamuk,’ nyabibyopura, Yesus arye nunti, ‘Aning ati ara, Yohanes nyalamuk yupu ati, diba kum tenelamlum ning, deiyok yata ati do?’ nyabuka wenepsilyake.

³² Bukni, ‘Yohanes arye pil dolamuk ning deiyok ara, ninye arye,’ nyabibyopura, awekmak nang nirya kekepsikirye, yu upliba weik arye derepsicake,” nyapdayik. (Ayupu nyapdayik ning ara, amutuku noutamak ulamik nang nirya arye, ‘Yohanes ara, dipkoprop Allah yupu lakak nyananye, nabinye ulamuk,’ tenelamika ati, Yahudi yala deiyok nang arye ilil unmok.)

³³ Ilil ubuka ati, adeiyok nang arye, ‘Duknupnuyap’ tenen, Yesus ati tamubuka talye yupu nyaplobik. Sikce nyabik. “Yohanes arye ninye mek dongolamuknye deiyok ara, nun walwale,” nyabuka tilila nyabik. Nyabikbuk, Yesus arye tamubuka anang ati nyabuk. “Anggunce nati, ‘Nun walwale,’ nyapmanuluma ati, na pil donye ning deiyok yupu nyapnuknye bira, el si laka kum nyapnamsine,” nyabuk.