Markus 10 - Eipomek

Kil batakna ati, nyabuk yupu

¹ Kapernaum mutuku batakuka bisik pia mapnin balamika ani, Yordan mek koubuka bisik mapnin balamika ani, Yudea tam biyik. Biyikopura, Yesus arye atalak-atalak nirya ulamuk touk, ninye weik Yesus dam yangalamikbuk, aninye ati peterelamuk.

² Tonok talak, Farisi nang arye Yesus dam yayikce, ‘Yesus ara, malye yupu nyaptue’ tenen, ayupu tenebuka, arye asipdeyikce Yesus ati winipdeyik. Farisi nang arye nyabik. “Musa sekeiyamsuk yupu deice, tonoknye birye el kil bataktue nyabuk do, kum do?” nyabuka asipdeyik.

³ Asipdeyikbuk, Yesus arye tamubuka aFarisi nang ati asipdeyuk. “Musa arye anggunti, ‘Wininamlulume,’ nyapdeiamsuk yupu ara, yata yupu sekeiyamsuk do?” nyabuka asipdeyuk.

⁴ Asipdeyukura, sikce tamubuka nyabik. “Tonoknye birye, ‘Na kil bataknun’ tenen, kil batakna laka nyan surat sekuka el kil aribtuopura, akil bataktue. Musa arye nyabuka sekeiyamsuke,” nyabik.

⁵ Nyabikopura, Yesus arye tamubuka Farisi nang ati nyabuk. “Minop talak ulamik ninye sik talima malye uamukba, Allah yupu kum kekelamika ati, Musa arye ayupu nyabuka sekiamuk. Sik anang winilamik touk, anggun wini talak ululum nang babye, atouk winilulume.

⁶ Allah arye aning-aning nirya kwepdeiamuk talak ara, ninye ap, kilapu ap, kweipdeibuk.

⁷ Aning ati ara, tonoknye birye el li ap, el lin ap, batakuka, el kil doplye talak ara, el kil ap, uk neika ururake.

⁸ Sikuk neika ururakce, kanye dukdongobuka nong tonok atouk ururake. Winirikca ati, sik yuk-yuk kum ururake. Sik kanye ap, nong ap, kanye ap, nirya dukdongobuka tonok atonun ururake.

⁹ Aning ati ara, Allah arye sik nong tonok kibuk ning, ninye arye wilibuka yuk-yuk kilina, pia meme. Winin ning ara pia malye ninge,” Yesus arye sik Farisi nang ati nyabuk.

¹⁰ Nyabukura, Farisi nang bindobikopura, Yesus ap, el mapu ap, aik pum wekikce, Yesus el nyapmok ning ati asinmek.

¹¹ Asinmekbuk, Yesus arye ayupu laka nyanmok. “Yatanye do nirya, el kil batakuka, yuk kil doplyopura, el min arye domlye kil ati, malye ulilule. Yuk kilapu ubula yolamak touk ulule.

¹² Atouk, el kil ton, el akanye batakuka yuknye doplyopura, el min arye domlinye biti malye ulilule. Akil babye, yuk nang ap, ubula yolalamak touk ulule.” Yesus arye nyabuk.

Yesus arye, ‘Mitik mapu teleb updeipnamle’ tenen, Allah moronmok yupu

¹³ Yuk talak ara, ‘Yesus el taruk sik nong deice deiplirye, teleb updeipnamle’ tenen, sik ni yapu ap, sik nin yapu ap, mitik mapu weik arye dobuka, Yesus unmokak boyanganmikba, Yesus wipdeiamuk nang arye Yesus dam yanganmek ninye ati, ‘Anggun mapu boyangana ara, bataklulume,’ nyabuka yupu sekenmek.

¹⁴ Yupu sekenmekba, Yesus eibukce, el mapu ati derebuk. Derebukce, ayupu nyabuk, “Mitik mapu arye na dam yanganmaka ara, telebe. Sik amapu ati yupu sekenmaluma ara, meme. Allah lyeplirye, talipliba Allah el mapu unamak nang ara, amitik mapu kanye atouk, namin unyak nanguk unyaka anya arye, Allah el mapu unamake.

¹⁵ Na pia dipkoprop yupu nyapsine. Mitik mapu ara, sik kanye talima namin arye unyakce, du nang yupu kekebuka winilamak touk kum winipmunyopura, Allah lyeplirye, kum talinamsile. Amapu unyak touk kum unyak nang ara, diba kum teneptingce, Allah arye ninye weik sik talima talibuka unamakak ara, kum wektinge,” Yesus arye nyabuk.

¹⁶ Yesus arye aunmek nang nirya ati nyabukce, awekmek mapu ati irinmokce, ‘Allah arye amapu ati teleb updeipnamle’ tenen, Yesus el taruk sik nong deice deibukce, Allah moronmok.

Bona weik talinanye tonok, Yesus dam yayukura, nyabuk yupu

¹⁷ Yesus arye amapu nirya ati Allah akunum morobukura, sakwetebuka bayuk bukni, bona weik talinanye tonok bik-bik abuka Yesus dam biyukce, Yesus el si erena ati, kutam tuku dibuka Yesus ati asipdeyuk. “Anda peterenanye, telebnye ulyame. Bol koplobuka pia kam Una deiyok ning, narye yata wiribuka doproptinye do?” nyabuka asipdeyuk.

¹⁸ Asipdeyukura, Yesus arye tamubuka nyabuk. “Ance nati, ‘Telebnye,’ nyapmanilama ara, deiyok yata ati ayupu nyapmanilam do? Tukwak ninye nirya teleb nang ton kum unyake. Teleb ululnye bira, Allah el tonok ulule,” Yesus arye nyabuk.

¹⁹ Tonda, Yesus arye abona weik talinanye biti ayupu nyabuk. “Allah arye, ‘Winamlulume, aning ton kum wininamlulume,’ nyapdeibukura, Musa arye mem yupu sekeiamuk ara, an akunum kel kiplume. Ayupu ara, ani. ‘Ninye ona ap, yuk kilapu talye ubula yona ap, yuk nang ning ubula dolona ap, yuk nang ati minina yupu nyana ap, talye tilila yupu nyana ap, tenebuka, arye talye yupu nyaplobuka dolona ap, anirya ara, pia meme. Tonda anggun ni yapu ap, anggun nin yapu ap, si erebuka melinamlume.’ Ayupu nirya ara, Musa sekiamuk yupu noutamak aupmal ati, nyapmakine,” Yesus arye nyabuk.

²⁰ Nyabukura, bona weik talinanye birye tamubuka nyabuk. “Naio, an nyapmanilam yupu ara, na mitik talak arye kekelamsirye talibuka winilamse,” nyabuk.

²¹ Nyabukura, Yesus arye anye biti eibukce bico ubukura, ayupu nyabuk. “Mambul ning tonok batakluma ara, an taliplum ning nirya dobuka yuk nang dam binuka yo bok dekmince, talye kankan ninye nirya ati, arepminyopura, na yupu kekebuka dobolyanamnilyame. Talyamlum ning dekuka kankan ninye arepminyopura, Allah arye teleb dekna ning im deice deiamkilibuk dopropnamlame,” Yesus arye nyabuk.

²² Yesus arye ayupu nyabukopura, bona weik talinanye birye yuprobukce, malye kanye bobuka, kanupdongobuka biyuk. Anye bira aning-aning weika arye talyamukce, bona weik talinanye ulamuka anya arye, ‘Anyapnil ning ara, kum winiptinye’ tenen, malye kanye bobuka kanupdongobuka biyuk.

²³ Biyukopura, Yesus arye el urasin tamubuka, el mapu ati diyukce ayupu nyabuk. “Allah arye ninye weik sik kanye talima taliplirye, nyaplibuk, el amuak bukuka wininamak ning nirya ara, bona weik talin ninye ara, ikin uplibuk, kanye imun kanye bobuka unyak cuk kekenyake,” Yesus arye nyabuk.

²⁴ Yesus arye ayupu nyabukura, el mapu arye se tenebikce lukdayik. Se tenebik bukni, Yesus arye ayupu ton nyabuk. “Amapo, bona weik talin nang bukni, Allah arye sik kanye talima taliplirye, nyaplibuk, el amu tam bukuka unamak nang nirya ara, diba tenena ara, ikin deice aryuk diba tenepnamake. Deiyok ara sikce, ‘Bona weik talinyaba ati, nun teleb akunum unyabe,’ tenekirye nati diba kum teneninyak ati nyapsine. Allah arye ninye talima talibuka unamlak ara, kanam aryuk kum wekenamake.

²⁵ Winipmanto ning ara, unta basam ara, nong weik basam bukni, ongon baju wilamak yumce pum wekena ara, kaname. Bukni, Allah arye sik kanye ap, talima ap, taliplirye, nyapdeiplibuk, el amu tam unamak nang nirya ara, bona weik talin nang arye kekebuka kum dobolbitinge. Ikin deice aryuk diba tenebuka im deice binamake,” Yesus arye nyabuk.

²⁶ Nyabukopura, Yesus el mapu arye se tenebuka ngalukik. Ngalukikce sik mamunuk asilanmek. “Aning ati ara, Allah arye yatato ninye lyepnamle do?” nyabuka asilanmek.

²⁷ Asilanmekbuk Yesus anang dipdeyukce tamubuka nyabuk. “Ninye mikip deice arye kum winipmanto ning ati kum winiptinge. Bukni, Allah elcuk malye nang babye, teleb nang babye, kanam aryuk lyelule. Aning-aning nirya ara, Allah el mikip weik ulya deice aryuk kanamuk ulule. Elda, ikin kum uptue,” Yesus arye nyabuk.

²⁸ Nyabukura, Peterus arye tamubuka nyabuk. “Naio, an melina ati, nun talyamubu ning nirya batakuburye an yupu kekebuka dobolyanganyabe,” nyabuk.

^29-30 Nyabukura, Yesus arye el mapu ati tamubuka nyabuk. “Yatanye do, yata kil do? Na nong ap, na yupu peterena ap, ati, sik talilamake ning batakuka, na aminyan tam dobolyangalamice ninye ara, sik batakik ning atonun ning yupa weik, atalak noutamakuk dolonamake. Ara, sik ulamikce mutuku ap, sik weit yapu ap, sik du yapu ap, sik weit kilapu ap, sik du kilapu ap, sik nin sik ni yapu ap, sik bidamang mapu ap, sik wa bun ap, anirya bataklamaka ati ara, atalak noutamakuk aning atouk ning arepnibuk, yupa weik dolonamake. Tonda, yuk nang arye sik nong deice ikin ning deibikibuk kanye imun upnamle ning babye, dolonamake. Tonda, aminyan yanamle talak ara, kam pia una deiyok ning babye, dopropnamake.

³¹ Wini talak ninye deiyok nang kibuka ulamikce nang ara, aminyan ara, amu kipdeipnamle. Atouk, wini talak amuak unyak nang ara, erebuka ninye deiyok nang kipdeipnamle,” Yesus arye el mapu ati nyabuk.

Sik yu nang arye, Yesus el opnamik ati, nyapdayuk yupu

³² Amenyan ara, Yerusalem mutuku binamika ati, bisik banmek talak ara, Yesus el menekuka banmokbuk, el mapu 12 nang arye aminyan banmek. Yesus ara, ilil kumce talye kanye bobuka banmoka ati, el mapu arye mambul kanye bobuka, se tenenmek. Wininmek talak ara, yuk nang ton aminyan yanganmekce, ‘Yesus opnuyak touk nun babye, opsicak’ tenen, ilil upmok. Wininmekbuk, Yesus arye el mapu 12 nang demuk “Na dam yalulume,” nyabuk. Nyabuk ati, yayikopura, aminyan talak yu nang el opnamik ning ati, laka nyabuk.

³³ “Nun nirya Yerusalem mutuku welepmapyopura, Ninye Mi Koprop Atonunye iniprakuka binicopura, Allah arena ati deiyok nang ap, Musa sekamuk yupu peterena deiyok nang ap, arye, ‘Opdeipsululume,’ nyabuka, Yahudi yala kum nang ati arepnamniake.

³⁴ Aripnicopura, nati nalina ap, na nong bol deice si maka tuluna ap, kama nong deice ona ap, winipnikirye na nong ap, opnamniake. Opnicopura, dipmanya ani, like winilye sum akunum uplyopura, kam buknamne,” Yesus arye nyabuk.

Yohanes ap, Yakobus ap arye, Yesus ati, moroprik yupu

³⁵ Ayupu nyabukura, Zebedeus el mapu bitinye Yakobus ap, Yohanes ap, Yesus dam yarikce, ayupu nyabuka moroprik. “Naio, nun patapmasil ati, moropnukinam ning ara, ance winipnamsilame,” nyabuka moroprik.

³⁶ Moroprikbuk Yesus arye tamubuka nyabuk. “Yata ning patapsil ati moropnurumunyopura, narye yata wiripnamsin do?” nyabuk.

³⁷ Nyabukura, sikce tamubuka nyaprik. “Aning-aning nirya talibuka ulyamce, weik ninye deiyoknye unamlamak ara, nun bitinye dobuka, tonye bira an kwanim tam, tonye bira an sirik tam deipsiminyeura, buknanam do?” nyabuka moroprik.

³⁸ Moroprikba Yesus arye tamubuka nyabuk. “Anggun asipdenmanurum ning ara, deiyok kum tenepmarume. Na nong deice ikin ning weik deipnikcebuk, na donamne touk, anggun babye atouk dopturum do? Tonda, na nong opniceura, dipnamne touk, anggun babye, atouk dipturum do?” nyabuk.

³⁹ Nyabukura, sikce tamubuka nyaprik. “An donmaminya dipnalam touk, nun babye, atouk winiptinimnye,” nyaprik.

⁴⁰ Nyaprikbuk, Yesus arye tamubuka nyabuk. “Na dona ap, dipna ap, winipnamna ara, anggun babye, atonun winamdum bukni, na kwanim tam ap, sirik tam ap, buna ati ara, narye dobuka kum deipsitinye. Na dana-dana tam bulyanamak nang ara, na ni tenyamukce wipdeiamuk nanguk bulyanamake,” nyabuk.

⁴¹ Yakobus ap, Yohanes ap, sik moroprik ning, Yesus el mapu 10 nang kekebikce, abitinye nang anyaprik yupu ati, yu ubukura, derebik.

⁴² Derebikba, Yesus arye el mapu 12 nang nirya ati bulupdeibukce ayupu nyabuk. “Yahudi yala kum nang arye, ‘Nun weik ninye deiyok nang anye,’ tenenyak nang ara, adeiyok nang arye sik amu tam unyak nang ati, yu uplibuk anang yanibikirye, ikin pil arukunyake. Tonda, sik sisinanye arye talima erebikirye, sik amu tam unyak nang ati, kanye imun ning sik nong deice deibikirye, talye yupu nyaplobuka ubula dolonyake.

⁴³ Sik anang ara, wininyak bukni, anggun na mapu ara, aning atouk kum wininamlulume. Anggun na mapu ara, wininamlulume. Anggun awekmalum nang noutamak arye, yatanye do, ‘Na telebnye unamne,’ teneplinye bira, talima lamapdongobuka uplirye, el kayapu nang, sik amuak buklirye, sik kanye imun uplye ning ati melinamle.

⁴⁴ Tonda, yatanye do, ‘Nara, ninye deiyoknye atonun unamne,’ teneplinye bira, yuk nang nirya ati, sik amu tam talye melinanye atonun unamle.

⁴⁵ Aning nyapmasina ara, urtalya ati kum nyapsine. Deiyok ara, na babye, Ninye Mi Koprop Atonunye birye, ‘Na babye, ati patapnilye ning ninye nirya melinamniak’ tenen, kum yase. Aning kum bukni, narye, ‘Ninye nirya, sik pataplye ning melinamne’ tenen, yase. Na ninye nirya sik talimak arye, malye tenelamak ning ap, malye ulamak ning ap, ati, ‘Allah arye anang wenebuka oplyak’ tenen, na opniceura, dipnirye, ninye kisok arena atonun sekdongopnamne. Ara anggun dipna ati, na dipnirye pununamsine,” Yesus arye nyabuk.

Yesus arye, Bartimeus asing kuamuknye biti, kwetebuk yupu

⁴⁶ Yesus nyabukura, sik nirya amutuku batakuka, bisik mapnin balamika ani, Yeriko mutuku bisibuka asik dolamikak batakuka, Yesus ap, yuk ninye yupa weik ap, banmeka ani, asing kuamuknye, Timeus el mi, el si ara, Bartimeus bisik akuk bulyangalamuka anya arye, ‘Yuk nang arye yo bok arepnuniyak’ tenen, moronmok.

⁴⁷ Moronmok talak ara, yuk nang arye, “Nasaret ululnye, Yesus yanganmale,” nyabikura, kekebukce weik yupu arye nyanmok. “Yesuso, anda Daud yala nang arye deipkiknye anya arye, bico tenebuka na melipnilyame,” nyabuka moronmok.

⁴⁸ Nyabuka moronmok bukni, awekmek nang weika arye, “Nyana bataklyame,” nyabuka yupu sekik. Yupu sekik bukni, Bartimeus arye, ‘Yesus kekepnunil’ tenen, weik arye tonap, “Anda Daud yala nang arye deipkiknye ulyama anya arye, bico tenebuka na melipnilyame,” nyabuka weik arye moronmok.

⁴⁹ Moronmokbuk, Yesus banmoka ani, ayupu kekebukopura, abinuka tikukce, awekmek nang ati, “Yukupmunyeura, el yalule,” nyabuk. Nyabukura, anang arye asing kuamuknye biti nyabik. “Kanye deiplyame. Akunum yukupmakila anya arye, tikuka yayo,” nyabik.

⁵⁰ Nyabikbuk, el nong deice ongopmok ongon cang baju, kwiriplobuka kanye deibuka im sukukce, minopce Yesus dam yayuk.

⁵¹ Yayukura, Yesus arye anye biti nyabuk. “Anda, ‘Yata wiripdeipnutu’ tenen, patapkilba, moropmanilam do?” nyabuk. Nyabukura, asing kuamuknye Bartimeus arye tamubuka nyabuk. “Naio, na asing arye aning-aning elina ati patanulule,” nyabuk.

⁵² Nyabukura, Yesus arye tamubuka nyabuk. “Aning ati ara, dabilyame. Anda, nati diba tenepmanilama deice arye, an asing akunum kwetepmakine,” nyabuk. Yesus arye nyabukba, atalak aryuk, anye bira el asing teleb ubukura, aning-aning nirya eibukce, Yesus bisik banmokbuk, Bartimeus aminyan dobolbiyuk.