Kolose 4 - Eipomek

¹ Sik pil deiyok nang ara, anggun amu tam ubuka, urdemuk pil melibuka donyak ninye ati, sik pil donyak touk, sik pil punubuka dona ati, dekna ning arenamlulume. Tonda sik pataplye touk, teleb ubuka arenamlume. Wininamluma deiyok ara, anggun akunum kel kiyamlumce, tuba tenelulume. Ara, anggun babye, anggun Deiyoknye im deice ulya arye asipsilyeura, anggun winin ning laka nyapdanamlum ati nyapsine.

² Anggun Kolose ninye nirya ara, batakna kumce, pia pi dobuka, Allah moronauk unamlulume. Wininamlum talak nirya ara, ‘Mankau arye malye winibibyak’ tenen, pia kanye moubuka kalikildanamlulume. Tonda, Allah ati, pia “Telebe,” nyanamlulume.

³ Aning atouk, anggunce nati, pia Allah moronamnululume. Ara, ‘Allah min arye duknupdeiamuk bukni, wini talak lakak nyasilye yupu, Allah arye lo areplibuk, Paulus arye Kristus el ninye lyena yupu, mambul yupu peterenamle’ tenen, ‘Allah moronamnulume’ tenen, nyapsine. Kristus el yupu peterelamsa ati, tapu koubuka wenena aik dongopnikba, aunune.

⁴ Tonda, ‘Allah arye tenyamuk touk, Paulus adiparyuk teleb ubuka, Kristus el mambul yupu peterlirye, talak nirya, lakak kibuka pia lilibuka peterenamle’ tenen, Allah moronamnululume. Allah arye, ‘Wininamle’ tenen, tenepnuk touk, Kristus el yupu lakak kibuka petereptinyopura, teleb winiptinye.

⁵ Anggun nirya arye, Yesus ati diba min kum tenenyak ninye nirya ati, ‘Nun wininyap ning ap, nyanyap yupu ap, eibuka kekebikirye, diba tenepnamak’ tenen, weik kel arye diksukumuk wininamlulume. Lo awapsilye talak nirya ara, lik-lik asa una kumce, Yesus el yupu laka nyapmunce, pia teleb ubuka unamlulume.

⁶ ‘Anggun ap, diba’ tenena kum ninye nirya ap, yupu talinamlum talak nirya ara, yupu pia teleb-teleb ubuka nyanamlulume. Winipmanto ning ara, din ning dinyap talak ara, garam ua ap tabakibyopura, pia telebto ulye touk, anggun yupu talulum talak ara, Allah arye bico tenepsilirye, el kanye aryuk melisilye ning ton laka nyamunyopura, yuk nang kekebikirye, ‘Se aning ara, telebe’ tenen, kanye deipnamake. Ara, anang arye, ‘Se, ayupu ara, mambule, ati diba teneptibye, tenenamak’ tenen, anggunce nyanamlum yupu nirya ara, teleb-telebuk nyanamlulume. Winipmunyopura, adeice arye sik diba tenena kum nang arye, anggun Kolose ninye diba tenelulum ning ati, “Anggun diba teneplum ning ara, laka nyapsiabe,” nyabuka, yuk-yuk asipdenamsiake. Asipsikcopura, anggun moubuka tenipdemunce, ‘Anye bira el kekepmanto yupu ara, winibuka nyapnamne. Tonda anye bira, el kekepmanto yupu ara, winibuka nyapnamne,’ tenebuka kel kipmunce, teleb ubuka laka nyanamlulume.

⁷ Na winilamnuk ning ap, wini talak wininilye ning ap, na wininun ning ap, nirya ati, na kwit koprop Tikikus arye, anggun Kolose nang ati laka nyalyanamsile. Tikikus ara, Yesus diba tenenanye ulula anya arye, na weit atonye ulula arye, batakna kumce, Yesus el yupu peterelule. Tonda, nati pia pi dobuka, teleb kibuka melinulule. El ap, na ap, nun Deiyoknye Yesus el pil neika pil donyame.

⁸ Narye Tikikus dobuka, anggun dam dopkwetepnamsin ara, deiyok laka nyapnusine. Ara, ‘Nun winisilye ning, elce anggunti laka nyapsilyeura, kel kipnamlume. Tonda, elce anggun ikin umunye noutamak arye, talima kwa dipnamsile’ tenen, Tikikus dobuka anggun dam dopdeipnamsine.

⁹ Tikikus anggun dam yanamle talak ara, na bico tenenun nye, anggun mutuku Kolose mutukunye tonok, el si ara, Onesimus ap, sik bitinye yanamrake. Onesimus birye, Yesus diba tenebuk anya arye, na weit atonun ulirye, elce, “Winipnamne,” nyalye touk batakna kumce, dipkoprop winilule. Sik bitinye arye, na amutuku wininilye ning nirya ati, laka nyalyanamsirake.

¹⁰ Tapu koubuka wenena aik dongopsikbuk, na ap neika aunyamnye, Aristarkus arye anggun Kolose mutuku ululum nang ati, “Telebe,” nyapmasile. Tonda Barnabas, el neice Markus arye anggunti, “Telebe,” Nyapmasile. Ara, Markus ati, yupu akunum nyapsa anya arye, dipkoprop elce anggun dam yalyopura, anggunce elti, taruk talibuka, “Telebe,” nyabuka melinamlulume.

¹¹ Tonda, nun Deiyoknye Yesus kum bukni, na ka el si Yesus, tonda anye binyuk bukni, el si bitinye ning ton Yustus nyalamaknye, elce anggun Kolose nang ati, “Telebe,” nyapmasile. Na ap, neika pil donyap ninye ara, tonap aunmak bukni, anang winilye si kipman nang ara, Yahudi yala nang unyake. Yuk ninye Allah dib teneptingura, Allah arye sik kanye talima ak talibuka utuba, ‘El mapu uptinge’ tenen, pil neika donyap nang ara, yuk yala nang tonap aunmak bukni, sik awinilye nanguk ara, Yahudi yala nang unyake. Winibuka unyakce, na kanye talima kwa dibuka melininyake.

¹² Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.

¹³ Epafras arye anggunti pia pi dobuka, Allah morosulula ara, talye ati kum nyapsine. Na asing arye elinune anya arye, dipkoprop nyapsine. Ara, anggun Kolose mutuku nang ap, Laodikia mutuku nang ap, Hierapolis mutuku nang ap, ati, pil dolirye, ‘Sik nirya ara, telebuk unamak’ tenen, mambul kanye bobuka, Allah morosulule.

¹⁴ Tonda, nun kwit koprop, ninye kwetenanye dokter Lukas ap, tonda nun kwit Demas ap arye, anggun Kolose mutuku nang ati, “Telebe,” nyapsirake.

¹⁵ Laodikia mutuku unyakce, Yesus yupu dib tenena ninye ap, amutuku ulul kil tonok, el si ara, Nimfa ap, Yesus diba tenen nang, Nimfa el aik pum bulubikirye, Allah yupu kekenyak ninye ap, anggun nirya ati, “Paulus arye telebe nyapmasile,” nyapnamlulume. Na Paulus arye, anggun Kolose mutuku ninye ati nyapsine.

¹⁶ Asurat sekeipmasin ara, anggun Kolose mutuku ululum nang akunum eibuka yinibmunyopura, ‘Sik Yesus diba tenebuka Laodikia mutuku unyak ninye nirya bulubikirye, kekepnamak’ tenen, asurat dobuka, sik dam bobanamlulume. Aning atouk, narye Laodikia mutuku ninye ati sekeipse surat ara, anggun Kolose nang ton dopropmunce, anggun babye kekena ati, lakak yinipmunyeura, Kolose mutuku Yesus dib tenelulum ninye nirya arye kekenamlulume.

¹⁷ Ayupu sekuka dopdeipnusin ara, nun kwit Arkipus el kekena ati, ayupu dobuka el dam nyalbinulyame. Ayupu ara, ani. “Arkipus anda, ‘Apil dopnamle’ tenen, Allah arye wibuka deipkuk ning ara, ‘Dipkoprop pil donmanya ani, sirya daknamne’ tenen, kanye moubuka pil donamlame. An ap, Yesus ap, kanye dukdongobuka ururuma anya arye, Paulus arye anti, ‘Wininamlyame,’ nyabuka nyapmakile.” Ayupu ara, asurat dopropnamlum nang arye, na kwit Arkipus ati nyapnamlulume. Na Paulus arye nyapsine.

¹⁸ Ara, telebe, Na Paulus arye, anggun nirya ati, “Telebe,” nyapsine. Anggun nirya arye, ‘Dipkoprop Paulus el taruk arye, asurat sekuka dopdeipsuke, tenepnamlum’ tenen, na taruk aryuk asurat sekeipsene. Tapu koubuka wenena aik dongopnikba, tuba aununa ati, anggunda luba kina kumce, Allah pia moronamnululume. ‘Nun Deiyoknye Yesus Kristus arye anggun nirya ati, el kanye aryuk bico tenepsilirye, pia melinamsil’ tenen, narye anggun Kolose mutuku ninye nirya ati Allah morosunune. Telebe, na Paulus arye akunum nyapsine. Asukum anyuk deipne.