Kolose 3 - Eipomek

“Anggun ap, Yesus ap, kanye dukdongobuka ululuma anya arye, diksukumuk unamlulume” nyabuk yupu

¹ Ara, Allah arye Kristus kam bukeibuk talak ara, anggun ap, neika kam bukeipsuke. Ara, diba teneplum ati, Allah arye bol kobuka pia kam una deiyok ning akunum areamsuk ning ati nyapsine. Anggun ap, Kristus ap, akunum arepsuka anya arye, im deice ulul ninguk tenebuka, aning deiceuk anggun kanye talima delinamlulume. Im deice ara, Kristus arye Allah el sirik taruk tam bukukce, aning-aning nirya talibuka, im deice tam Deiyoknye ulule.

² Tukwak mutuku ulul ning ap, talye tukwak ninye unyak ning ap nirya, patapsilya ati, malye ning deice anggun kanye talima kum delinamlulume. Aning ara, pia kum bukni, im deice ulul ninguk tenebuka patapsilibuk, aning deice anggun kanye talima delinamlulume.

³ Anyapmasina ara, urdem ati kum nyapsine. Deiyok ara, akunum diamik ninye atonun, anggun minop talak winilalum ning nirya ara, akunum bataklumce, wini talak tamubuka tuba kum winilulume. Anggunda, Kristus ap, talima dukdongobuka neika akunum ululume. Yesus ap, Allah ap, neika ururake. Ati anggun kam unamlum talak nirya, Yesus arye kalekuka melisilirye, Allah dam ulule. Anggun ap, Yesus ap, talima dukdongobuka umunyeura, ‘Allah disulul akarye, talibuka usulul anya arye, im deice ulul ninguk patapsiliba’ tenenauk unamlulume.

⁴ Winimunyopura, aminyan ara, Kristus arye, bol kobuka pia kam kilisululnye bira, Kristus tamubuka lakak nyasilyopura, Allah arye anggun ap, Yesus ap, lakak erepdeipsilirye, pia teleb kibuka, weik mambul kipdeipnamsile. Winipsilyopura, Yesus ap, weik dirina noutamak neika unamabe.

⁵ Winipnamsil ning ati ara, anggun talye tukwak ninye malye upsilye ning nirya ara, pia batakanamlulume. Akunum diamik ninye arye, aning-aning nirya kum pataplirye, pia talye wininamak atonun, malye winin ning nirya ara, batakanamlulume. Ara, yuk kilapu talye dalubuka yolana ap, pia yuk talye kanye bobuka ninye kum winipmanto ning, pia malye-malye yolalamak ning ap, malye winin ning ati weik patana ap, aning nirya batakuka, diksukumuk wininamlulume. Amalye winin ning yala nirya ara, pia kum wininamlulume. Tonda, ‘Aning-aning nirya bona weika arye doproptinye’ tenen, weik arye patapsilyopura, ara pia malye winina ati, aning babye, kum wininamlulume. ‘Bona weik doproptinye’ tenen, kanye talima engelul nang ara, Allah batakuka yuk talye ning si erenyak atonun wininyak anya arye, aning babye kum wininamlulume.

⁶ Anyapmasin ning nirya ati ara, Allah yu weik uplyopura, amalye winin ning wininyak ninye ati, weik arye wenebuka opnamle. Ati, winina meme.

^7-8 Minop talak ara, anggun Kolose mutuku ninye babye, anyapmasin ning atouk winibuka ulalum bukni, wini talak ara, amalye winin ning nirya ara, batakuka pia kum wininamlulume. Pia bataknamlum ning ara, nyapnusine. Ara, yuk ninye ati derelana ap, tulum upsiliba, yuk anye bobuka weik yu arye malye winina ap, ‘Aning ara, sik nong deice ikin ning uptue’ tenen, malye winina ap, yuk ninye ati lululana ap, ninye kum nyapmanto kum ning bukni, pia malye-malye nyanyak yupu nyana ap, aning nirya batakuka, diksukumuk wininamlulume. Amalye winin ning ara, kum wininamlulume.

⁹ Tonda, anggunce anggun kayapu ati, tilila yupu talye nyaplobuka kum nyalanamlulume. Amalye winin ning nirya kum wininamluma deiyok ara, nyapnusine. Tonok ning ara ani. Ninye arye sik minop baju pun deiplyopura, kwiriltaklamak touk, minop talak anggun kanye talima pia malye ulamsukba, malye-malye ulalum ning akunum bataklume.

¹⁰ Bitinye ning ara, malye baju batakikirye, winiryuk ning ongolamak atonun, Allah arye anggunti, kanye talima winiryuk ning atonun kibuka, teleb kipdeipsukce, arepsukura, akunum dobuka ululume. Winibuka winiryuk kanye talima kintinibuka arepsuk deiyoknye Allah ara, el babye ulye touk, anggun kanye talima teleb ubribasulule. ‘Sik kanye talima teleb kipnin banamle’ tenen, el winilul ning weik kel kina deiyok ning ati, melibuka arisilya deice arye, el ulye touk, anggun kanye talima teleb kipra basulule. Ara, Allah ap, dukdongobuka umunya noutamak ara, Allah arye, ‘Na unye touk ubribanamak’ tenen, winiryuk kanye talima akunum arepsuke. Aning ati ara, malye winin ning nirya ara, pia bataknamlulume.

¹¹ Winibuka akunum teleb kipdeipsuk ak, ululuma ati, ‘Weik mambule,’ tenebuka wininamlum ning ara, Yesus Kristus el uka. ‘Anggun bidamnye ati’ tenena, do yuk ninye ati tenena do, ‘Se aning ara, mambule’ tenen, kum asilanamlum ning ara, nyapnusine. Ara, “E aninye ara, Yahudi yala ninye do, kum do? Sikda den bam bola mouse ning akunum sekik nang unyak do, kum do? Anye bira nun mutukunye do, yuk pera mutukunye do? Anang ara, kel nang do, yuk mutuku walwal nang do? Anye bira, elce el bidamnye ati, pil dobuka yo bok dololul do? Yuk nang ati talye pil melinanye ulirye, urdemuk ulul do?” nyabuka, kum asilanamlume. ‘Aning-aning nirya ara, mambul ning,’ pia kum tenenamlulume. Bukni, ‘Weik mambule,’ tenenamlum ning ara, Kristus atia. Elda aning-aning nirya deice eitam weik mambule Deiyoknye ulule. Nun dib tenenyap ninye nirya ara, nun kanye talima noutamak usulule anya arye, nun nirya ara, talima dukdongobuka ansinibuka unyabe. Aninguk tenebuka unamlulume.

¹² Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.

¹³ Tonda yuk nang arye, anggun ikin kipdeipsikce ati, anggunce tamubuka anang ati minpola wenena kum arye, mangkau kilongonamlulume. Nun Deiyoknye Yesus Kristus arye, anggun malye winilalum ning ati, el kanye aryuk urdem talye namin kipsukce, anggun malye ning kum kipdeipsuka atonun, anggun babye atonun, yuk ninye arye, malye winipsikce ning nirya ati, ‘Dawaplye’ tenen, talye namin kilanamlulume.

¹⁴ Ateleb winin ning nirya ara, mitik mambul ulul bukni, weik mambul wininamlum ning ara, nyapnusine. Ara, aning nirya teleb-teleb winimunye talak nirya ara, anggunce yuk ninye ati, pia bico tenebuka, talima arepdamunce, melilanauk wininamlulume. Ateleb winin ning nirya aupsilyopura, bico tenebuka melilanauk winimunyopura, anggun talima teleb ubuka dukdongopsilirye, nong tonok atonun kilisiliba, teleb ubuka neika unamlulume.

¹⁵ Ara, anggun yuk-yuk ululum bukni, Allah arye, ‘Sikda walana ap, oldana ap, kum aryuk, nong tonok atouk kibuka, talima dukdongobuka, namin arye neika unamake’ tenen, wibuka deiamsuke. Winibuka wipdeiamsuka anya arye, Kristus arye talima dukdongopsukba, nong tonok atonun, kibuka ululuma ati, teleb ubuka neika unamlume. Tonda, anggunce Allah ati tuba-tuba, “Telebe,” nyanamlulume.

¹⁶ Tonda, Allah el laka teleb yupu, Kristus yupu ati, ‘Dipkoprop moubuka kel kinamabe’ tenen, pia piribuka kel kipra banamlulume. ‘Kristus el yupu pia teleb,’ tenenauk umunye talak nirya ara, weik kele arye peterelana ap, ‘Mankau arye malye winibibyak’ tenen, “Kanye mouplulume,” nyabuka wenelana ap, pia melipdanuka unamlulume. Tonda, winibuka wininamlum talak noutamak nirya ara, minop seklamik yupu, buku Mazmur Allah yupu mot ap, anggunce sekuka nyalulum Allah yupu mot ap, Allah el si erena ati, arisilye mot nirya ap, nyanamlulume. Amot-amot nyanamlum talak ara, anggun kanye talima noutamak arye Allah ati, “Telebe,” nyabuka tenenamlulume.

¹⁷ Ara, yata ning do nirya, anggun pil donamlum ning nirya ap, yupu nyanamlum ning nirya ap, nun Deiyoknye Yesus Kristus, el amu tam ubuka, el si deiceuk pil donamlulume. Ara, elce tenesilye touk, diksukumuk wininamlulume. Winibuka wininamlum talak nirya ara, Yesus arye melisilyebuk, el ap, talima dukdongobuka umunya deice arye, nun ni Allah ati fia, “Telebe,” nyanamlulume.

“Yesus diba tenen ninye wininamlum ning ara, ani,” nyabuk yupu

¹⁸ Anggun kilapu arye, anggun akanye yapu ati, talima darabuka sik amu tam nimalye arye umunce, sik yupu moubuka kekenamlulume. Anggun ap, nun Deiyoknye Yesus ap, talima dukdongobuka ululuma anya arye, adiparyuk tuba wininamlume. Tonda winina ara, teleb winina ati, nyapsine.

¹⁹ Anggun sal ara, min arye akunum doplum kilapu ati, bico tenepmunce, kanye talima aribuka melinauk wininamlume. Yu una ap, derelana ap, kum arye, talima dukdongobuka namin arye, teleb ubuka neika unamlulume.

²⁰ Anggun mapu nirya ara, anggun ni yapu ap, anggun nin yapu ap nirya ati, sik amu tam umunce, yata winin ning ati do nirya, atalak-atalak nirya sik yupu moubuka kekepmunce, melibuka dobolbamunyopura, Allah arye kanye delisulula anya arye, adiparyuk wininamlume.

²¹ Anggun ninye wisi arye anggun mapu nirya ati, yu upsilyaura, weika arye wenebuka kum onamlulume. Ara, anggunce anggun mapu ati, weik arye tuba-tuba wenepmunyopura, anggun mapu arye ikin kanye dobuka, sik bouku sukulule ati nyapsine.

²² Sik yuk nang ati, talye pil dobuka melin ninye ululum nang ara, yata winin ning ati do nirya, anggun deiyok nang arye nyapsikce yupu nirya moubuka kekepmunce, aninguk wininamlulume. Ara, pil lik kanye bobuka donyak nang arye, ‘Nun deiyok nang arye, teleb pil don nang, tenepnamsiak’ tenen, ‘Nun damak uceura, eipsikce talakuk, pil teleb kibuka donamape,’ tenenyake. Aning tenelamak atouk kum wininamlulume. Aning ara, kum bukni, anggunda, ‘Nun ni Allah weik mambule’ tenen, el si erenauk ululum ninye anya arye, duknubuka winina kum arye, dipkoprop lak akuk pil teleb kibuka donamlulume. Ati anggun deiyok nang arye aruklamsiak talak babye, kum aruklamsiak talak babye, teleb ubuka pil donamlulume. Ara, Allah el si erena ati wininamlulume.

²³ Yata pil do, yata winin ning do nirya ara, ‘Na ni Allah el piluk donune’ tenen, teniltona kumce, anggun kanye talima ap, anggun mikip ap, anirya deice arye pi dobuka pil donamlulume. Ara, yuk nang arye, ‘Talye nang ati, sik piluk donyabe,’ tenebuka lik-lik asa arye, pil malye dolamak touk kum wininamlulume.

²⁴ Pil teleb ubuka donamluma ara, talye ati kume. Ara, anggun akunum kele, Allah arye, “Na mapu ati, aning arenamsine,” nyabuka akunum nyalilamsuk touk, pil teleb ubuka dolamunyopura, aminyan ara, dekna ning dipkoprop im deice aryuk arenamsile. Aning ara, akunum bikiluluma anya arye, pia pi dobuka pil donamlulume. Anggun Weik Deiyoknye Yesus Kristus el pil doluluma ati nyapsine.

²⁵ Yata nang do nirya, sik tuba malye wininyakba, sik malye wininyak ning ati, Allah arye yupu bokeipsilirye, wenepnamsile. Elce, ‘Aning ani, anang ani,’ tenen, talima wililina kum aryuk, dipkoprop malye wininyaka atouk, wenepnamsile.