Kolose 1 - Eipomek

Paulus arye, ‘Telebe’ nyana ati, nyabuk yupu

¹ Na Paulus ap, nun weit atonye Timotius ap, nun bitinye nang arye asurat sekeipsiname. Na Paulus ara, Yesus Kristus arye, ‘Na yupu dobuka peterepra banamle. Rasulnye unamle’ tenen, wipdeipnukba, el piluk pia donune. Wininuna ara Allah arye, ‘Paulus na piluk donamnil,’ tenyamnukce, wipdeiyamnuk ati, aninguk wininune. Ati, batakna pia kumce, el piluk talibuka ululuma anya arye, nun du weit atonun ninye ululume.

² Asekeipsinam surat ara, anggun Kolose mutuku umunye ninye ati sekeipsiname. Anggun Kolose mutuku ninye ara, Allah diba tenyamlum ati, el mapu kipdeipsuke. Winipsuk ati, anggunda malye una kum aryuk, diksukumuk ululume. Anggunda, Yesus Kristus ati diba tenebuka, el ap kanye talima dukdongobuka ululume. Nun Ni Kopropa Allah arye, anggun Kolose mutuku dib tenelulum kili sal ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba weik arye tabakuka arenamsil’ tenen, anggun Kolose mutuku ululum kili sal ati Allah morosunune.

Paulus arye Kolose ninye ati, “Telebe,” nyabuk yupu

^3-4 Yuk ninye arye nyasinyake. “Kume, sik Kolose mutuku unyak ninye ara, Yesus Kristus diba tenenyakce, yuk ninye Allah ati diba tenyamik ninye nirya ati, bico tenebuka, sik kanye talima dukdongobuka unyake,” nyasinyake. Winibuka nyalamsikba kekenyama ati, anggun Kolose mutuku ninye ati Allah morosinyam talak nirya ara, Allah ati, telebe nyanyame. Allah ara, nun Deiyoknye Yesus Kristus el li koprop ulule.

⁵ Yesus Kristus diba tenemunce, yuk diba tenen ninye ati, bico tenebuka kanye arisilibuk, umunya ara, talye ati kume. Winiluluma deiyok ara, Allah arye, ‘Aninye ati teleb ning ap, pia kam una deiyok ning ap, arenamne’ tenen, kintinibuka im deice moubuka deiamsuk ning ara, anggunce, ‘Pia kam una deiyok ning ara, nun dipkoprop dolonamabe’ tenen, kanye teniltona kum aniryuk, pia kintinibuka dinauk ululume. Winiluluma ati, Yesus diba tenebuka, yuk ninye ati bico tenelulume. Allah arye kintinibuka deiamsukce, aminyan arenamsil ning yupu ara, asurat noutamak arye nyapmasin ning nirya ara, Allah el pia dipkoprop yupu, ninye lyen yupu, el laka teleb yupu peterelamsik noutamak arye, akunum kekelamlume.

⁶ Yata mutuku do nirya, Allah el dipkoprop lak teleb yupu, ninye lyen yupu ara, dib tenen nang arye peterenyakba, ninye mutuku-mutuku nirya kekebikirye, diba tenebikcopura, dib tenen ninye weik upnin banyake. Winipmanto ara, duk moulamle yo, duk weik moulamle touk, ninye arye Allah el laka teleb yupu, diba tenebikca deice arye, diksukum winin ninguk talibuka unyakce, sik teleb winin ning weik upnin balule. Mutuku-mutuku nirya noutamak arye, ninye weik diba tenebikirye, teleb-teleb kibuka ulamak touk, anggun Kolose mutuku ninye babye, atouk ululume. Ara, ayupu kekelamlum talak arye diprongobukap, aminyan talak nirya ara, anggun kan-kan arye, Allah el laka teleb yupu kekelulumce, duk weik moupnin balyeura, weik nelamle. Winisilye ning deiyok koubuk talak ara, Allah arye nun nirya ati, bico tenesilirye, lyesilyopura, el kanye aryuk, urdem talye pia melisilye yupu, dipkoprop deiyok koubuka dololalum talak arye, deiyok kipsukce, tuba-tuba usulule.

⁷ Ayupu nirya ara, nun kwit Epafras arye peterelamsukba, kel kiyamlume. Epafras ap, nun ap, ‘Kristus el amutamuk ubirye, el piluk donamap’ tenen, neika pil donyabe. Epafras ati, nunce pia bico tenenyame. Nunda, anggun dam kum yatinimnye bukni, nun kwit Epafras bira, batakna pia kum arye, ‘Kolose ninye peterebuka pia melinamne’ tenen, Kristus el yupu uk talibuka pil dolule. Winilya ara, Kristus ati apil dolule.

⁸ Epafras arye, nunti, nyapsuke. “Allah El Dib Kanye arye, el mikip arisilya deice arye, anggun Kolose ninye arye, sik bitinye apura, ‘Allah elti, dib tenenyak’ nang nirya ap, ati, pia bico tenebuka kanye arisulule,” nyabuka laka nyapsukura, kekepnume.

Paulus arye Kolose ninye ati, Allah morobuk yupu

⁹ Aning nirya laka nyapsuk ning ati ara, Epafras arye, anggunti ayupu nyapsuk talak arye dipdongobuka, atalak ap, aminyan unamsil talak ap, atalak-atalak nirya babye, batakna kum arye, anggun Kolose nang ati, Allah pia morosinyame. ‘Allah arye anggun Kolose ninye ati wininamle’ tenen, morosinyam ning ara, nyapnusiname. Ara, Allah arye anggunti, ‘Wininamake, aning ton kum wininamake,’ tenyamsuk ning nirya ara, ‘Dipkoprop moubuka kel kibikirye, aninguk wininamak’ tenen, morosinyame. Ara, ‘Weik kel kina deiyok ning doprobikirye, kel ninye unamak’ tenen, morosinyame. Tonda, Allah El Dib Kanye arye, el mikip arisilya deice arye, nong bol deice ninguk kum bukni, ‘Pia noutamak deiyok kel ning ton moubuka tenenamak’ tenen, Allah morosinyame.

¹⁰ Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.

¹¹ Tonda, Allah el weik mikip weik ulamle touk, elce anggun Kolose ninye ati, mikip weik arisilibuk, kanye imun ning weik upsilya babye, ‘Batakana pia kum arye, pia pi dobuka pil domunce, kanye teniltona kum arye, telebuk unamlume. Tonda, ikin upsilya babye, yuk nang ati, minpola arye yu uplibuk, pil kum batakanamlum bukni, nimalye aryuk unamak’ tenen, nunce anggunti Allah morosinyame.

¹² Tonda, weik arye kanye pia deibuka, pin-pin asa arye, nun ni Allah ati, ‘Teleb, nyanamak’ tenen, Allah morosinyame. Nun ni Allah ati, tuba-tuba, ‘Telebe,’ nyanamlulume. Nyanamluma deiyok ara, ani. Ara, Allah arye, ‘Na mapu nirya akunum teleb kipdeipnirye, im deice dekna weik ning arenamne’ tenen, kintiniamsuk ning ara, ‘Sik Kolose ninye im deice ukirye, sik babye teleb ning dopropnamak’ tenen, akunum teleb kipdeipsuke. ‘Im deice dekna ning dopropnamak’ tenen, teleb keipdeipsuka ati, nun ni Allah ati, ‘Telebe’ nyabuka, weik arye kanye delinamlulume. Nun ni Allah arye, aning-aning nirya talilirye, im deice weik dirina noutamak pia unamlak ara, nun ap, anggun ap, dib tenen ninye nirya ap, neika unamabe. Anggun Kolose ninye ap, ‘Im deice unamlum’ tenen, Allah arye akunum teleb kipdeipsuke.

¹³ “Im deice weik dirina noutamak umunce, mininga dekna weik ning dolonamlume,” nyapmanama ara, urtalya ati kum nyapname. Isa Mutuku Dongonye arye, nun kanye talyamsukba, pia kunuknak atonun ulamubu noutamak arye, Allah arye akunum lobuka lyepsuke. Lyepsukce, el kanye deiamuknye, el Mi Koprop Yesus arye, aning-aning nirya talibuka, weik deiyoknye kibuka ulya noutamak, akunum dobuka deipsukura, aunyabe. Winira, el Yesus elcuk talisulule.

¹⁴ Allah el mi Yesus pil dopsuka deice arye, nun ni Allah arye lyepsukce, akunum teleb kipdeipsuke. Ara, nun malye winilamubu ning ap, malye tenelamubu ning ap ati, adiparyuk oplopsutu bukni, bico tenelamsukce, nun malye ning namin kipsukce kum danipsuk ati, kam pia unamabe nyapsiname.

“Yesus ara, aning-aning nirya deice tam ulirye, weik mambulnye ulule,” nyabuk yupu

¹⁵ Allah el ulye touk, el Mi Koprop Yesus babye, pia dipkoprop atouk ulule. Allah ara, ninye asing arye kum eipmantonye ulule. Allah arye aning-aning nirya kintinibuka, deiamuk. Bukni, winipmanto ning ara, ninye arye winiryuk mi deibikceura, ami arye anggun ning nirya talibuka ulamle touk, Allah el Mi Koprop Yesus ara, deiyok kouna deiyoknye pia weik mambulnye ulule. Ulirye, aning-aning nirya talibuka, deice tam ulule.

¹⁶ Aning-aning deice tam ulirye, pia weik mambulnye ulula ati ara, lilibuka nyapnusiname. Yata ulye ning do yuk-yuk yala nirya ara, elcuk kwepdeiyamuk. Im deice ulul ning nirya ap, tukak mutuku noutamak ulul ning ap, ninye asing arye elinyak ning nirya ap, aupmal bukni, ninye asing arye kum eipmanto ning ap, aning-aning nirya ara, elcuk kwepdeiyamuk. Tonda yata mikip ulye ning do nirya, ninye weik nang deiyok nang, Sisinanye Raja nang nirya ap, deice tam weik nang unyak nang ap, sik amutamukirye, mitik pil talibuka donyak nang ap, talye nang bukni, yuk nang arye anang ati, ‘Nun ni yapu,’ tenebuka, deiyok yupu nyanyak nang ap, anang-anang nirya babye, Allah el Mi Koprop arye kwepdeiyamuk. Yata ulye ning do, yuk-yuk yala nirya ara, elcuk aning nirya kwepdeiamukce, ‘Aning talipnibuk, aning ap, aninye nirya ap, sikce na si erebuka kinamniyak’ tenen, kwepdeiyamuk.

¹⁷ Allah el Mi Koprop Yesus ara, aning-aning deice tam ulirye, weik mambulnye ulya ara, deiyok ton nyapnusine. Ton ning ara, Allah arye aning-aning nirya, min kum kwepdeiamuk talak ara, Yesus elda, akunum minop arye aulamuk. Tonda, Allah arye nyalyeba, Yesus el pil dobuka el ulya deice arye, aning-aning nirya ara, kum danipnin balule. Yesus el ulula deice arye, aning-aning nirya, teleb ubuka kamuk ulule. Yesus el ulye ning ap, mikip weik ulye ning ap, el nyale yupu ap, adeice arye im deice tam ulye ning ap, tuku tam mutuku ak ulye ning nirya ap, teleb kibuka kamuk ulule. Elce aning nirya kum taliptuopura, aning yala-yala nirya kum datue.

¹⁸ Tonda, Allah arye el mapu kwepdeipsuk ninye nirya ara, Yesus talisilirye, nun Weik Deiyoknye usulule. Ara, winipmanto ara, nun kisok upsuk ning nirya deice arye, aning-aning nirya tenebuka unyap touk, Yesus el babye, Allah el mapu nirya ati, Weik Deiyoknye usilirye, talisulule. Tonda, Allah arye, ‘Yesus ara, aubuk ning nirya deice tam kibuka, weik mambulnye unamle,’ tenebuka ati, Allah arye tenyamuk touk, Yesus dibuk bukni, Allah arye Yesus tamubuka kam bukeibuk. Wini talak ara, yuk ninye ton deiamik bukni, Allah arye aninye kam bulilamle bukni, minop kam bukibuknye bira, el Mi Koprop Yesus el uka. Allah arye Yesus minpola kam bukdeibuka deiyok ara, ‘Yesus ara, aning-aning nirya deice tam ulirye, weik mambulnye unamle’ tenen, winibuke. Yuk ning nirya ara, Yesus el amutamuk ulule. Elda deice tam ululnye uka.

¹⁹ Ara, urdem ati kum nyanyabe. Ara, Allah arye Yesus ati kanye deiamuka ati, Allah el bidamnye ulul ning ap, el mikip ap, pel weik mambul ulul ning nirya ap ara, Yesus el deice deibukura, el kanye talima noutamak wekamukba, Yesus ara, tukwak mutuku yanuka ulamuk.

²⁰ Allah ara, pia telebnye ulula anya arye, yata ning do nirya, tukwak mutuku ubuk ning do, im deice tam ubuk ning do, aning nirya ap, Allah ap, neika kum upmanto ulamuk bukni, Allah arye, ‘Aning-aning nirya teleb kipnirye, na ap, dukdongopnyopura, teleb kibuka neika unamabe,’ tenyamuk. Utenyamuk ati, Allah arye Yesus wipdeibukura, Yesus el pil wanwanun yo deice pil dopsuka deice arye, aubuk ning nirya ap, nun ap, Allah ap, akubuka dukdongopdeipsuke. Minop talak ara, im deice ubuk ning ap, tukwak mutuku unyap ninye ap, Allah ap, neika kum upmanto ulamubu bukni, Allah arye Yesus wipdeibukura, el pil dopsuk deice arye, akunum akubuka dukdongopdeipsuk ati, wini talak ara, Allah ap, neika uptibye. Yesus arye nun malye ning lyebuka, teleb kipdeipsukce, Allah ap kanye talima dukdongopsuk ara, wanwanun yo deice dibukba, el ining biyuka deice arye, teleb kipdeipsuke. Aning ati ara, Allah arye nyapdeibukura, Yesus lyepsukce wini talak ara, nun Weik Deiyoknye ulirye, talisulule. Tonda, Yesus ara, aning nirya deice tam ulirye, weik mambulnye ulule. Yuk ning nirya ara, el amutamuk ulule.

²¹ Ara, minop talak anggunda, anggun kanye talima noutamak arye, ‘Allah ara, nun like,’ tenelamlumce, pia malye-malye winilaluma ati, Allah el tam ninye atonun pia kum ulalume. Aning kum bukni, elti, yanibuka pia yuk malye weik ulalume.

²² Winibuka pia yuk ulalum bukni, wini talak ara, nun ni Allah arye, anggun malye ulalum ning kilibuka lyepdeipsukce, el ap, neika una ati, kanye dukdongopsuke. Teleb kipdeipsukce, el ap, dukdongobuka ansinibdeipsuk ara, el Mi Koprop Kristus ara, ninye nong dayukce, tukwak mutuku yanuka daulamuka ani, nunti dibuk deice arye teleb kipdeipsuke. Winipsuka ara, talye ati kume. Deiyok ara, ‘Na Allah arye sik dobuka, na dam deipnamsin talak ara, sik malye wini ning tonok babye, kum uptu ura, pia diksukumuk unamak’ tenen, teleb kipsukce, el ap, kanye dukdongopsuke. Akunum teleb kipdeipsuk ning ati ara, yata nang arye do nirya, ‘Aning ara, malye ning,’ nyabuka malye yupu kum nyapsitinge.

²³ ‘Nun ni Allah, kum bataksilirye, el teleb kibuka el dam boyanamsil’ tenen, patapsilyopura, unamlulume. Anggun adiparyuk, Allah el laka teleb yupu, ninye lyena yupu kekemunce, pia tuba-tuba diba tenebuka, batakana kumce, ayupu uk talibuka, pia kanye lamabuka unamlulume. Winipmunyopura, Allah arye pia teleb kipdeipsilirye, el dam boyanamsile. Tonda, Allah el laka teleb yupu, ninye lyena yupu noutamak ubuk ning nirya, peterelamsikbuk, akunum kekelamlum ning nirya ara, kanye bokoltona kum arye, ‘Dipkoprop winipnamsil’ tenen, anggun adiparyuk kintinibuka dinauk unamlulume. Ura, peterelamsikba, kekelalum yupu, Allah el laka teleb yupu ara, yuk mutuku nang babye, dolonyakce, ninye mutuk sirya nirya akunum peterepra banyake. Tonda, na Paulus arye Allah el laka teleb yupu, ninye lyena yupu ara, peterepra bana ati, apiluk pia donune.

Paulus arye, Allah el diba tenena ninye ati, melibuka pil dolamuk ning ati nyabuk yupu

²⁴ Wini talak ara, na nong deice ikin ning deilinikibuk, ikin weik unulul bukni, tuba kanye deibuka unune. Ara, anggun kele, anggun ap, yuk mutuku ninye ap melina ati, Allah el laka teleb yupu peterenye ati, yuk nang arye, ‘Apil dolulnye ara, nun like’ tenen, ikin ning na nong deice delininyake. Yesus Kristus arye nati, ‘Na dib tenena ninye melina ati, Paulus ara, pil dolibuk, yuk nang arye ikin ning el nong deice delinamake,’ tenelamnukce, wipdeipnuka anya arye, apiluk do nirye sirya dakdibanamne. Kristus el nong deice ikin ning delilamikba, ikin ulamuk ning atonun, na nong deice delinamniyak ning ara, tuba aupmanila ati, sirya dakaldongonamne. Yesus diba tenebibya ati, Allah el mapu kipdeipsilye ninye ara, nunda Yesus Kristus el nong atouk unyabe. Ara, el tam ninye, el amu tam unyaba ati nyapne.

²⁵ Yesus diba tenebuka, Allah el mapu kipdeipsilye ninye melina ati, apiluk talibuka donanye unune. Wininuna deiyok ara, ani. Ara, Allah arye nati, ‘Paulus arye na yupu nirya dobuka, Yahudi yala kum ninye kekena ati, Allah yupu nirya pia moubuka peterepra banamle’ tenen, apil deiyok arepnukce, wibuka deipnuke. Wibuka deipnuka ati, Allah yupu bola deice ning babye, nong pumak ning babye, tonok ning batakna kumce, pia lilibuka Allah yupu pia peterenamsine.

²⁶ Allah arye nati, “Na yupu petereplyame,” nyapdeipnuk yupu ara, pia mambul yupu bukni, duknuna atonun yupu ara, ‘Deiyok anye’ tenen, kel kum kipmanto yupu nyapdeipnuke. Ara, Allah arye minop talak ulamik ninye nirya ati, ‘Moubuka kel kum kipnamak’ tenen, ayupu nong noutam ning duknupdeiamukba, ‘Deiyok anye,’ kum tenelamik. Bukni wini talak ara, Allah arye, ‘Aninye ara, na tenen ninye unamak’ tenen, wibuka deiyamsukba, elti, dib tenenyap ninye, el mapu ati, ayupu nong noutamak ara, akunum lakak nyalyopura, ‘Deiyok anye’ tenen, moubuka kekenyabe.

²⁷ Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.

²⁸ Yatato ninye do, yata yala ninye do nirya, nunce anang-anang nirya ati, Kristus el yupu, ninye lyena yupu peterenyabe. Ara, ‘Mankau arye malye ubicak’ tenen, “Anggun kanye mouplulume,” nyabuka wenenyabe. Tonda, anang-anang nirya ati, weik kel arye Kristus el yupu pia moubuka peterenyabe. Wininyaba ara, urtalya ati kume. Deiyok ara, Kristus ap, kanye dukdongobuka unyak ninye nirya, Allah el dam welepnamak talak ara, ‘Sik kanye wisipliba, pia diksukum ninyeuk unamak’ tenen, el yupu moubuka peterenyabe.

²⁹ ‘Yesus ati dib tenenyak nang nirya, diksukumuk unamak’ tenen, na pia pil donune. Ara, Yesus Kristus arye, el mikip arepnilyopura, na talima noutam weik mikip unilya deice arye, pia pi dobuka, piripdebuka pil donune.