Kidung Agung 8 - Eipomek

Wel kil arye, ‘El dopnamne,’ tenelamuknye biti, nyabuk Wel kil arye, nyabuk yupu

¹ Se, na dopnamnilamnye bira! Na kanye talima pum tam nirya arye, ‘Se aning winiptinimnyeʼ tenen, weik tonun patanilye ning ara, laka nyapnukine. Ara, anda na du koproba uptumopura, neika uptinimiba, yuk nang arye, malye yupu ap, minin yupu ara, kum nyapsitinge. Anda, na nin koproba aryuk, deiamkuturye, an din ning ton arebuka, pia kalikilamkutuba, anda akunum neptumopura, nun bitinye ara, tonok aik ubuka dopdatinimnye. Tonok aik ninye utinimnye toura, dan mutuku do nirya, epdanimnyopura, narye anti adiparyuk an katum deice mutupkitinye. Mutupkinyopura, yuk nang nirya eipsitingce, ‘Se, akil ara, akunum malye upmale,’ nyabuka, kum wenepnitinge. Nun bitinye ara, nun nang susuk koproba utinimnye toura, neika uptinimiba, yuk nang arye, malye yupu kum nyapsitinge.

² Aning kumopura, ance nati akunum dopnutumba, neika utinimnye toura, asum-asum nirya ara, narye an taruk talibuka, na deipnuk kil, na nin koproba, el aik pum tam bobikitinirye, na pia to nyalamle anggur duk mek ap, tonda, na delima yo duk mek ap, arepkitiniba, ance aning nirya talye mangkau diptume.

³ Se, ‘Neika maptinimirye, an kwanim taruk arye, na kisok ereptalipnutume! An sirik taruk arye na nong nirya talipnutumce, iripnutume,’ tenepnirye weik tonun patanulule.

⁴ Se, narye anggun Yerusalem mutuku noutam ululum wel kilapu nirya ati, ayupu nyapsine. Anggunda, nyalin yupu deice, mikip arye nyapnusine! Ara, na ap, na dopnamnilanye ap, neika unimirye, mapnamnam talak ara, anggun nirya ara, nun bitinye dam pia kum yanganamlume! Neika unimirye, mapmanimnya ani, akunum nun kanye lopsilyopura, beren tam talak akunum buknimnye talak ara, nun aik, yamunye babye telebe.

Yerusalem weik asik dolamikak ulamik wel kilapu arye, nyabik yupu. “Bico tenebuka, kanye delilan ning ara, mikip weik ulule,” nyabik yupu Wel kilapu arye nyabik yupu

^5a Yerusalem mutuku noutam ulamik kilapu arye nyabik. “Akilapuo, anggun amutuku ululum kilapu nirya ara, dipdelulume! Ninye kum sukum, pia pata mutuku noutam arye, yanganmal wel kil ara, yata kil do? Akil arye, elti, bico tenebuka moun dilamlyopura, akil ati, weik tonun bico tenebuka, kanye delilula ati, akil ara, anye dam baribuka weleyanganmala atia! Akil ara, yata kil do?” nyabuka asinmek.

Wel kil arye, el dopnamuknye biti, nyabuk yupu Wel kil arye, elti, moun dilamuknye biti, nyabuk

^5b Amio, anda teleb duk moulamle yo, el si ara Apel yo ara, ayo koa mapmalum buk, narye bukeipkise. Mapmalum mutuku ara, talye mutuku kuma. Ara, an nin koproba arye, mi bomuka ani, aminyan talak amutuku aryuk, deiamkuk mutuku noutamuk, mapmalumbuk, narye bukeiamkise.

⁶ Ance nati, weik tonun bico tenenimince, kanye akunum deipnuluma ati, wini talak babye, aminyan dounamle talak babye, ance talipniminba, an damuk neika pia unamname! Winipmanto ara, an kanye ara, na si sekeipniminyopura, apia unamle. Deiyok ara, ‘Yuk kilapu nirya ara, pia tenimince, kum patapnamkila ati nyapkine. Winipmanto ara, an taruk toupne deice, toupne dama wibuka dongopminyopura, pia aulula atonun, nati an kanye delinamnilame. Nun bitinye arye, weik tonun bico tenebuka, tuba-tuba kanye delilanauk unimnya ara, pia mikip weik ulule. Winipmanto ara, ninye dibina ara mikip weik ulye touk, nunce kanye delilanauk unimnye ning ara, pia mikip weik ulula ati, min kum winipmanto ulule. Tonda, ninye tukwak nang arye kam ulamikca ani, pia wisi dakcopura dibina uk unamake. ‘Aning ara kum winipsutue,’ teneptibya babye, dipkoprob aning winipnamsilca! Aning atonun, nun bitinye arye weik tonun bico tenenimirye, kanye delilana uk unimnya ara, pia aunamle. Min kum winiptue tenepne. Winipmanto ning ton, weik uku dinmalya ani, ninye arye auku kum tangalamak touk, weik tonun bico tenepnimince, kanye delilanauk uniminya ara, pia aunamle. Min kum winiptue tenepne. Aning ara, pia min kum winipnamle.

⁷ Aning atonun, weik balamle mek opturye, nun dam yatua babye, weik tonun bico teneniminye ning ara, pia aunamle. Weik mek optua babye, adeice ara, nunce, kanye delilanauk unimnya ara, min kume kum kipdeipsutue tenepne. Anggun moubuka teniplulume! Ninye tonoknye birye, el moun dilamlye kil ati, “Ka kilo, na talinun ning, yuk-yuk ning nirya ara, na aik pum tam ‘Naʼ tenen delilamse ning nirya ara, arepkitiniba, adeice arye ance nati, weik tonun bico teneptumce, kanye delinamnilam do?” nyabuka moroptua babye, akil arye, ‘Telebe, adeice arye, kanye delinamkine,’ nyabuka, pia kum nyapnamle.

Wel kil ap, el makal nang ap, yupu nyapdarika ati, nyabik yupu Awel kil, el makal nang ap arye, nyabik yupu

⁸ Ura, akil el du yapu arye nyabik. “Nun weit kil bira, winiryuk kil ulula ati, el moum yupu ara, min kum sakmale. Ati nun weit kil ara, ninye min kum doptinge, tenepmabe,” nyabik. Ati ara, tonoknye birye, ‘Akil doptinyeʼ tenen, pataptuba, moropsutopura, yata winiptibye do? Ara, anye birye, nun weit kil dopnulye sum ara, yata wiriptibirye, nun weit kil meliptibye do?

⁹ Winipmanto ara, nun weit kil bira, tembok keil poka uptopura, nunce dengna weik ning, el si perak dobuka, akeil poka deice arye, cang keil aik atonun ton doptibyeba, urasin pia teleb uptue. Aning kum opura, nun weit kil ara, anyaik bublan uptopura, nunce urasin pia teleb yo, el si ara aras yo dobuka, abublan deice taplakuka doptibiba, urasin teleb uptue.

Wel kil arye el makal nang ati, nyabuk yupu Wel kil arye nyabuk yupu

¹⁰ Kume na duyapu. Diba mince na moum yupu ara, min kum saknuka ati, tembok keil poka atonun, lu mutuku atonun upnuke. Bukni, wini talak ara, na moum ara, akunum nepsirye, weik upnuka ati, cang keil aik dobikiba, teleb ulamle atonun unulula ati, nati moun dinululnye bira, nara teleb upnutue. Ati ara, wini talak ara, nati pia weik tonun bico tenepnirye, moun dinululnye bira, nati, ‘Akil ara, urasin pia teleb kil ululeʼ tenen, akunum kanye deibuka ulule.

Wel kil arye, winipmanto yupu nyabuk

¹¹ Wini talak ara, winipmanto yupu ton nyapnusine. Amutuku taleamuk ninye deiyoknye, el si ara Raja Salomo, mutuku si Bahal-Hamon mutuku noutam ara, tonok anggur tapu duk wa taleamukce wilamuk. Awa taleamuk bukni, ‘Sikce melipnamniakʼ tenen, tia talak ati, elce, “Anggunce melipnululume!” nyabuka, yuk nang ati nyabukba, anang arye Salomo el wa wibuka kouamik. Tonda, anggur tapu ara, duk weik moulamuk talak nirya ara, sik apil melin nang arye, Salomo biti, dengna weik ning, el si perak dobuka, keil uang atonun ubuka, seribu (1.000) kibuka arelyangalamik.

Wel kil arye el dopnamuknye biti, nyabuk yupu Wel kil arye nyabuk yupu

¹² Bukni, na dipkoprob nyapne. Na anggur tapu wa ara, na ninguk unulula ati, awa arena ati ara, naryuk tenipnye touk, arepnamne. Se, anda nati moun dinilyamnye, anda Raja Salomo atonun ulyame. Ati ara, anda adengna weik ning, seribu (1.000) perak ara, ancuk doptume. Bukni, sik tia talak ati, anggur duk kalikina deiyok nang ara, dua ratus uk (200) doproptinge.

Sik bitinye awelnye ap, awel kil ap arye, nyapdarik yupu Welnye birye, nyabuk yupu

¹³ Se, anda na dopnamkin kil ulyame! Anda anggur wa win dam noutam atonun umince, yupu nyalnyam ning nirya ara, na kwitcapu arye kekekinyake. Bukni, se, na weik tonun patanilye ning ara, ance na damuk yanuka, yupu nyapnutumba, naryuk an nyalyam yupu nirya ara kekeptinye,’ tenenune. Utenenuna ati, narye akil anti moropkine!

Wel kil arye, el dopnamuknye biti, nyabuk yupu Wel kil arye, nyabuk yupu

¹⁴ Se, anti ara, weik tonun bico tenekinirye, kanye delikunune! Anda sik arye kum bukni, minopce na dam yanamlame! Winipmanto ara, bai tam kam ulamle ning, el si ara kijang basam, pia bikbik abuka balamle touk, an babye, minopce bikbik abuka, na dam adiparyuk yanulyame! Winipmanto ara, bai tam kam ulamle ning, el si ara rusa basam yim ara, ninye arye rempah-rempah dobuka koulamikba, aning palamuk mutuku dup deice, koulukuka bikbik abuka yangalamle touk, an babye na dam, adiparyuk minop bikbik abuka yanulyame.