Kidung Agung 7 - Eipomek

Welnye birye, el dopnamuk kil ati, nyabuk yupu

¹ Se, narye dopnamkin kilo! Anda, ninye deiyoknye Raja dobuk wel kil atonun ulyame. An yan ara, yan ongon ning, el si ara sendal, ongopminba, urasin pia telebuk ukulule. Tonda, an keil ap, bomok ap, nong bol nirya ara, teleb ukulule. An nong nirya ara, kel weik bikamuknye birye, dopmanto ning atonun ulyame. Anda, urasin pia teleb kil ulyama atia.

² Narye dopnamkin kilo! An mun deiyok ara, mek din makau, el si ara cawan atonunuk ulule. Ara, ninye arye mek din makau dobuka, anggur duk mek kwebikirye, amakau dikdongobikiba, pia langdibuka balamle touk ukulule. Winipmanto ning ton, gandum duk bulubuka deibikirye, mitik tonun mutuku kon atonun upliba, anang arye, kita dobuka, agandum duk dana-dana tam antanap dongobuka deibikiba, urasin pia teleb ulye touk, an mun nirya ara, atonunuk ulule.

³ An moum bitinye ara, rusa basam mi bitinye, urasin pia teleb ulamdak touk ukulule. Atonun, bai tam ulamle kuda basam, el si ara kembar kijang, kwa bitinye mapu deipliba, urasin teleb ulamdaka atonun, an moum bitinye ara, aning atonunuk ulule.

⁴ Winipmanto ning ton, an ngang cang ap, bol kurun ap ulye touk, bai tam kam weik ulye ning, el si ara gaja basam, el yang doproptinga deice arye, cang kurun aik doptingopura, aning atonun, an ngang ara atonunuk ulule. Tonda, Hesbon mutuku noutam ara, amutuku wekelbana ati bisik bublan dam, mekwen deibukak ara, keting deipliba, amekwen deice dirina weik tonun, mildang-dang alamle touk, an asing babye, pia teleb ubuka, mildang-dang akulule. Tonda, Libanon mutuku noutam, pia cang arye, dobuka deiamik keil aik ara, amutuku deiyokak kota, el si ara Damsyik mutuku, urasin tam pia teleb ulamle touk, an u babye, urasin pia teleb ukulule.

⁵ Winipmanto ara ton, nun unamap mutuku noutam, pia weik mutuku bukukak ara, amutuku aning-aning nirya ara, deice tamuk lak ulule. Amutuku si ara, Karmel mutuku tuba nyanyake. Aning atonun, an nong deice tam ara, an kisok deice ukulule. An kisok erebuka baminba, amutuku nang nirya, eipkikirye, ‘Se, akil ara, mambul weik kile,’ tenenamkiake.’ Aning babye, urasin pia teleb ukulul ati nyapne. Anda, dana-dana tam balamlumba, an kisok deice uamuk cang potong ara, welepmana, koulukmana kiltolule. ‘Apotong ara, pia teleb, mirin weik ulirye, mildang-dang alul bukni, cang weik ulula ati, ninye deiyoknye Raja babye, apotong noutam tomopkutua babye, pia lopdaturye, kum bitue,’ tenepne.

⁶ Se, narye dopnamkin kilo! Anda dipkoprob, urasin pia teleb una ap, talima darapdongobuka namin arye, amu tam un kil ulyame! Ninye arye, kilapu weik tonun bico tenekirye, kanye delinyak bukni, akilapu kan-kan ara, anda, pia teleb kil ulyame. An ulyam touk, yuk kilapu tonok babye, anto kil pia ton kum unyake. Ati, narye anti, pia weik tonun bico tenekinirye, kanye delikunune.

⁷ Winipmanto ning ton, cang weik yo, el si ara korma yo, cang arye paplirye tiklamlirye, el moulul duk ara, pia urasin teleb ulamle touk, anda, nong cang kil umince, an moum bitinye babye, urasin pia teleb, moum bitinye atonunuk ulule.

⁸ Ati ara, nara an akanye birye nyapkine. Acang korma yo ara, welepnirye, el taruk talipnamnarya! Tonda, akorma yo welepnyopura, el moulamle duk dakuka dipnyopura, anggur duk pia to nyalamle touk, an moum babye, pia telebuk upnamle, tenepne. Tonda, yo duk el si ara Apel, dibibiba, to pia teleb nyalamsil touk, an si bam bol deice mutupkinyopura, an isin babye kekepniba, nintong pia teleb nyapnamnil, tenepne.

^9a Tonda, anggur tapu duk mek, pia to nyalamle ning dibibiba, to weik nyalamsil touk, na kanye ara, anti mutupkinyopura, an si bam bol babye, pia to weik nyapnamnile.

Wel kil arye, tamubuka nyabuk yupu Wel kil arye, el kanye deiamuknye biti, nyabuk yupu

^9b Se, na dopnamnilamnye bira! Ance, “Anggur duk mek pia teleb ning dipnamne,” nyapmanilam ning ara, ‘Aning ara, batakna kumce, pia balirye, an si pum tam ap, an si deice ap, an si bam bol deice ap ara, pia balamtuba, kanye pia delinamkinʼ tenen, patanulula ati, aning ara pia tenenune.

¹⁰ Nara, na kanye deibuka, pia moun dinun nye bira, na akanye dipkoprob dopsinye ulule. Aning atonun, elce nati, weik tonun bico tenenilirye, pia patanulula ati, nara el kil koproba unune. Nun bitinye ara, akunum kanye delilana uk unyam touk, tuba unyame.

¹¹ Ati ara, ‘Na akunum dopnamnilʼ tenen, weik tonun bico tenekununa ati, an ap, na ap, neika bai tam mutuku banimirye, pia teleb kita palulak ara, neika mapnamaname. Ara, akita el si ara, bunga bakung ati nyapkine.

¹² Tonda, ance akunum dopnutumba, nun bitinye neika mapmanimnya ani, bereklyopura, beren tam talak koprop arye, an ap, na ap anggur tapu duk wa windam neika bitinimirye, ‘Nun anggur tapu duk, akunum wisipmal do, kabul do?’ tenen, anggur tapu nirya dipdetinimnye. Tonda, aning atonun, nun bitinye neika ansinibuka bitinimirye, ‘Nun anggur tapu kita ara, akunum popmal do, kabul do?’ tenen, dipdetinimnye. Tonda, aning atonun, nun bitinye neika ansinibuka batinimirye, ‘Nun delima yo ara, duk moupnamla ati, el kita ara, akunum polamle do, kabul do?’ tenen, dipdetinimnye. Aning nirya akunum dipdetinimnyopura, narye anti, ‘Telebe, wini talak neika maptinimnye,’ nyabuka, moropkitinyopura, neika maptinimirye, na pia kanye deipkitinye!

¹³ Tonda, na dopnamnilamnye bira! Nun aik wekelbana ati bublan deice tam, akunum deipnamnam yo duk ap, kita ap ara, el si ara mandrak, nintong pia teleb nyapnamsile. Aning ara, ‘Neika maptinimnyeʼ tenen, narye ominggu noutam ton aning dakuka, nun bublan deice tam akunum deipmatinyopura, nintong teleb nyaptue. Tonda, aning atonun bukni, wini talak, winiryuk ning ton dakuka deipmatingce ton, el nintong teleb nyapsutuba, neika kekepnamtinimnye. Aning nirya ara, narye anti dobuka deipnamkinca. Narye anda na dopnamnilamnye biti, nyapkine. Wel kil arye, el dopnamuknye biti nyabuk.