Kidung Agung 6 - Eipomek

Yerusalem mutuku ulamik wel kilapu arye, anye elamikce, nyalamik yupu Yerusalem mutuku wel kilapu arye nyabik yupu

¹ Se, nun ka kilo! Amutuku noutam ara, wel kilapu yupa pia weik aunyak bukni, sikda sik urasin ap, sik unyak ning ap ara, mitik teleb unyake. Sikda mitik teleb unyak bukni, an tonok ara, an uminye ning ap, an urasin ap ara, pia telebuk ukulule! Bukni, ance pia kanye deiplumce, moun dilyamnye bira, dan mutuku pia bindobuk do? Talye ati kum asipkiyabe. Deiyok ara, nun ap, an ap, ‘Anye dan mutuku binuka ulul do?’ tenen, ‘Neika elbinamapʼ tenen, asipkiyabe.

Wel kil arye, Yerusalem mutuku ulamik wel kilapu ati, tamubuka nyabuk yupu Wel kil arye, nyabuk yupu

² Kume, na weik tonun bico tenenirye, elti, pia kanye delinunye bira, na dam akunum yanmale. Winipmanto ara, el mutuku akunum yanmale. Ara, ‘Na wa noutam ara, pia to teleb nyalamle ning, el si ara rempah-rempah kouamse ning eipnamneʼ tenebukce, dilyanmale. Tonda, elce, ‘Na domba basam boyanuka, na wa win dam deipnyopura, sikce awa windam palamuk ning dinamakʼ tenen, yanmale. Tonda, elce, ‘Urasin pia teleb kita, el si ara, bunga bakung ning ara, dakuka lipnamneʼ tenen, yanmale.

³ Na weik tonun bico tenenirye, pia moun dinun nye bira, dipkoprob nara el kil unune. Aning atonun, na dopnamnilanye bira, elce nati kanye delinulula ati, nara el kil koproba atonun unune. Nun bitinye ara, pia kanye deipdanumurye unyame. Ati ara, na dopnamnilanye bira, na dam yalirye, el domba basam boyanuka, amutuku palamle kita, el si ara bunga bakung, koubikba palul noutam deipliba, dinyake.

Welnye birye, el dopnamuk kil ati, kanye deibuka, teleb yupu nyabuk ning Welnye birye el dopnamuk kil ati, nyabuk yupu

⁴ Se na kilo! Weik asik el si ara, Tizra mutuku, urasin pia teleb ulamle touk, an babye, urasin pia teleb kil ulyame. Aning atonun ton, weik asik, el si ara, Yerusalem mutuku domik ning ara, urasin pia teleb ulamle touk, an babye, urasin pia teleb kil ulyame. Aninguk kum bukni, yin talin nang, yupa weik tonun bulubikirye, ‘Ninye olbinamapʼ tenen, lak bikilin ning ati, cang baju erelilamikiba, yuk nang arye aning eibikcopura, ‘Seʼ tenen, kanye lukuldalamak touk, narye anti eipkinyopura, na kanye lopniliba, ‘Se, elda pia teleb ulule,’ tenekunune.

⁵ Se, na kilo! Ance nati diniminba, na kanye talima noutam ara, ‘Seʼ tenepnirye, weik tonun patapniliba, moun dem dikunune. Atalak ara, moubuka tenipmanto kum unulule! Ati ara, aning atonun ton, ance na dam tuba kum dinamnilame. Yukak aryuk, ‘Se, na kil anda dinamnilame! Winipmanto ara, kambing ap, domba yupa pia weik bulubikirye, Gilead mutuku kon deice arye, koulukuka yanganyak touk, an baminye talak ara, an kisok potong babye, welepmana, koulukmana kiltolule. Aning ara pia telebe.

⁶ Winipmanto ning ton, ninye arye sik weinyak domba basam dobuka, mek dam teleb kibuka ubikirye, sik nong potong kobikcopura, adomba basam nong pia kurun upliba, tamubuka yangalamak touk, an si duk ara, pia kurukulule. An si duk tuba teleb kurukilirye, tonok babye, ton kum kuruksakuke. An si duk nirya ara, diksukum tuba tikikulule. Winilula ati, aning ara pia telebe.

⁷ ‘Talye nang arye eipnikcakʼ tenen, an urasin ap, kisok ap ara, cang baju arye ongolyam bukni, na kele, an katum ara, bukam ubuka, ining bi bol delikulule. Winipmanto ara, to nyalamle yo duk, el si delima, urasin ulamle touk ukulule. Aulye ning nirya ara, pia teleb tenepne.

⁸ Winipmanto ara, tonok ninye deiyoknye birye, kilapu enam puluh (60) ap, tonda el neika melina ati, kilapu delapan puluh (80) ap, tonda wel kilapu ton yupa pia weik, nukman kumto doptua babye, aning ara mitik telebuk tenenune.

⁹ Deiyok ara, ani. Aninye deiyoknye birye, kilapu nukman kumto doptua babye, sik kan-kan arye, tonok kil babye, anda pia teleb ulyam touk, pia kum uptue. An tonok ara, pia teleb kil ulyame. An nin koproba deipkuk kil arye tenelamuke. ‘Yuk kilmapu ton deiamse bukni, sik akilapu ara, mitik teleb uka. Bukni, akilmu ara, pia telebuk ulule. El nong noutam ap, el ulye ning ap, tonok ning babye, malye pia kum ulule,” nyabuka, anti kanye deibuka kilamkuke. An mutuku wel kilapu nirya ara, ninye deiyok nang, Raja nang arye domik kilapu ap, ninye deiyoknye neika ulamikce, melilamik kilapu ap, sik nirya arye, an elilamkikce, “Kume, akil tonok ara, pia teleb ulule. Dipkoprob akil ara, kanye deibuka ulule,” nyabuka, anti si erebuka kilamkike.

¹⁰ Akil yanamla ara, yata mutuku kil ulul do? Akil el si ara yata si nyanyak do? Kume, winipmanto ara, lukunyan mapmapya, bereklyopura, beren tam talak keting dirina eibibirye, pia teleb kanye delilamap touk, ayanamal kil babye eibiyopura, kanye delinyabe. Akil ara, lukunyan talak im noutam arye wala urasin pia teleb ulamle touk, tonda, sintam ara, keting dirina ara, ‘Weik tonun meldang-dang alamle touk, akil babye, urasin pia teleb kil ulule,’ tenenune.

¹¹ Tonok talak ara, ‘Na kouamse yo kan-kan ara, yo duk akunum moubuk do?’ tenen, binirye, dilbinamne. Tonda, ‘Weik tonun luak ara, kita weik tonun palulak binuka dilbinamanʼ tenen, binmase. Tonda, na anggur tapu kouamse ning ara, akunum el kita pobuk do, kabul do?’ tenen, ‘Dilbinamne,’ tenepse. Tonda, ‘To nyalamle yo duk, el si ara delima yo ara, aminyan moupnamleʼ tenen, ‘Lak bikina ati, el kita ara, akunum pobuk do?’ tenen, ‘Na wa windam dilbinaman,’ tenepse.

¹² Utenebuka, na wa wiamsak binmanu bukni, talye kanye bobuka unmasa ani, talye karin arye, na kil anti, tenepkisirye, ‘Se, na kil ap neika uptinimnyeʼ tenen, anti weik tonun patapnuke. Winipmanto ara, ninye deiyoknye, el kereta perang deice bukuka, na dam yaturye, “An ap, na ap, asukumuk neika buktinimirye, banamname,” nyabuka moropnutuba, pia kanye deibuka ulamtinye touk, anti tenipsirye, kanye deipse. Anti weik tonun patapnila atia.

Yerusalem wel kilapu arye, nyabik yupu

¹³ Yerusalem wel kilapu arye nyabik ning ara ani. “Se, anda Sulam mutuku nang arye deiamkik wel kilo! Nun mutuku noutam tamubuka yatumba, eipkitibye! Ara, talye ati kum bukni, ‘Ara, nun nirya arye, Sulam mutuku kil, anda urasin pia teleb kil ara, tonap eipkitibyeʼ tenen, moropnukiabe! Ati, nun mutuku tamubuka yalyame, nun ka kilo!” nyabik. “Kume, anggun Yerusalem mutuku ululum wel kilapu arye, nara Sulam mutuku nang arye deipnik kil, yata ati nati eiptibye tenepnulum do? Winipmanto ara, anggunce nati tenepmanulum ning ara, ‘El Sulam mutuku wel kil ara, ninye olan talak ara, ton yin nang otam, ton yin nang atam tikuka dinmakiba, anoutam ara, tonok urasin teleb kil, mot nyapturye septuba, ‘Kanye deiptingʼ tenen, delinyak kil, ‘Aning atonun kil ulula ati, nunce tonap akil dinamabe,’ tenepnulumce, ayupu nyabuka moropmanulum do?” nyabuk.