Kidung Agung 5 - Eipomek

Welnye ap, wel kil ap arye, yupu nyapdarika ati, nyabuk yupu Welnye birye nyabuk yupu

¹ Se narye dopnamkin kilo! Anda na wa win dam atonun unilyama ati, an dam yanmane. Narye na weit kil ati, bico tenenun touk, narye antibuk, pia weik tonun bico tenekunune. Tonda, anda narye akunum dopkise kil atonun ulyame. Ati, anda na wa win dam atonun unilyama ati, awa win dam binyopura, nintong pia teleb nyalamle ning, el si ara mur ap, tonda, to nyalamle ning el si ara rempah-rempah ap, tonda, mong mek ap, anggur duk mek ap, sapi moum yung, el si ara susu ap, aning nirya dobuka dinmance, pia kanye deibuka unmane. Winipmanto ara, din ning ap, teleb anggur duk mek ap, talye mangkau dadinmarumunya ani, kanye walwal upsiliba, akunum boupsilyopura, kanye deipdanuka, telebuk unamdume. Deiyok noutam ara, nun kayapu anggun bitinye asukumuk unmarumce, anggun patapsilye touk, neika mapmarumunya ani, aminyan akunum boupsilyopura, pia kanye deibuka unamrume.

Yerusalem mutuku wel kilapu arye, nyabik yupu Wel kil lengdar mabuka deice eibuk ning ati, laka nyabuk yupu Wel kil arye, nyabuk yupu

² Na mapmase talak ara, na kanye talima noutam arye, tuba teninauk unmase. Anggun ton kekeplulume! Nara, pia weik tonun bico tenenirye, moun dinun nye bira, ‘An man aik yatinyeʼ tenen, narye aik bublan deice lorum-lorum anmanye ning ara, anggun ton kekeplulume! Kil dopnamuknye birye, nyabuk yupu ara, ani. “Se na kilo! An bublan kukdeipniminba, an aik yanune. Na kilo! Narye na weit kil ati, bico tenenun touk, narye anti, weik tonun bico tenekunune. Anda, yalma maka el kanye ara, pia namin ulye touk, ulyame. An urasin ap, nong ap, ance winilyam ning nirya ara, pia telebuk ulula ati, narye anti, weik tonun bico tenekinirye, antibuk kanye delikunune. Na kisok potong nirya ara, ance akunum elinilyame. Lukunyan talak nirya ara, ‘Na kil, el dam binuka uptinyeʼ tenen, bisik yanganmanuba, mok purye akunum tupmanilba, na kisok potong ara, palipmanilce, moul upnile. Diba, mok purye bol pipmanilba, na kisok akunum moul upnile.” Na akanye birye nyapmanu.

Welnye birye, el dopnamuk kil ati, nyabuk yupu Welnye birye, nyabuk yupu Wel kil arye, nyabuk yupu

³ Nara, “Kume, ‘Wini talak ara, mapnunʼ tenen, na nong deice ongonun baju nirya ara, akunum kwiripdeipmanu. Ati, ‘Yata ati, aning nirya tuba tonap dobuka ongopnaman do?' Tonda, na yan ara atalak akunum mek likmanua ati, yata deiyok ati, malye ning deice tuba yanipnirye, tonap, na yan mek liknaman do?” nyapmase.

⁴ Nyapmasiba, na kanye deipsirye, pia moun dinun nye birye, ‘Na kil taliptinyeʼ tenen, na aik bublan noutam botopdeiamse kin-kin bisik ara, el taruk dongobuk. Taruk dongobuk ura dinmaseba, ‘Se, na akanye domnuknye bira, yangana akunum dam upmale. Nara dipkoprob anye, pia patapnilʼ tenen, na kanye talima noutam nirya arye, weik tonun patapnukura, na nong sirim talipnuke.

⁵ Winipmanuk talak ara, ‘Na kanye delinunye dam unmalʼ tenen, ‘Na aik bublan kukeipnamanʼ tenen, bukmanu. Tonda, ‘Na nong nirya nintong teleb nyapnunilʼ tenen, nintong pia teleb nyalamle mek, el si ara mur, dobuka na nong bol deice likmanu. Diba, ‘Buplan kukeipnunʼ tenen, abublan kukuna ati, talin ning talipmanu talak ara, na taruk ara, mur mek deice moul upmanuk. Ara na taruk duk nirya ara, mur mek kwepmanua deice arye, moul weik tuba upmanukba, abublan kukuna ati talipmanu.

⁶ ‘Na kanye pia delinunye, na aik yanulʼ tenen, na aik bublan kukeipmanu. Kukeipmanu bukni, na lengdar mapmasa deice arye, na pia kanye delinunye bira, akunum bindopmauba, kum eipmanu. Bublan min kum kukeipmanu talak ara, elce yupu nyapmanuba, ‘Se anye pia patapnilʼ tenen, na kanye pum tam ara mun tulupmanu. Bublan kukeipmanurye, na kanye delinunye kum danmoba, ‘Dan unmal do?’ tenen, epmanu bukni, pia kum eipmanu. Tonda, na yupu kekepnutuba, tamubuka na dam yatuʼ tenen, yukupmase bukni, elce na yupu kum kekepmanuce, yupu ton tamubuka kum nyapmanu.

⁷ ‘Na kanye delinunye bira, dan mutuku binmal do?’ tenen, aik batakuka binmasirye, anyaik dolamika nirya ara, banmasirye dinmasiba, amutuku kalikna deiyok nang arye, eipnik. Eipnikce, ‘El akil ara, yata ati, lukunyan noutam arye, yanuka nun mutuku kalikinmalce banmal do?’ tenen, yu upmoka ati, sikce na nong deice onmanike. Diba, nun mutuku dana-dana tam aknapdongobuka domik keil poka, deice tam banmekce, kalikna deiyok nang arye talipnikce, na nong deice kulabuka, opmanikce, na kisok kaluna ati, kwatipmase cang baju kwiribuka doprobik.

⁸ Se, anggun Yerusalem mutuku noutam ululum wel kilapu nirya ara, na kanye deipsirye, pia moun tuba dinun nye bira, anggunce ton anye eipmunyopura, elti, nyapnamlume! ‘Anti pia moun dilamle kil ara, anti tuba tenikilirye, el talima uk diplyeba, kanye birbir apliba, tuku deice sakuka, poulbinmanto ulule.

Yerusalem mutuku, wel kilapu arye tamubuka akil ati, nyabik yupu Yerusalem mutuku wel kilapu arye, nyabik yupu ara, ani.

⁹ Se, amutuku noutam ara, yuk wel kilapu ton, yupa pia weik unyak bukni, akilapu nirya ara, sik urasin ap, nong ap ara, mitik teleb unyak bukni, anda an urasin ap, ance winilyam ning ap ara, pia telebuk ulyame. Aning atonun, ance, ‘Akil dopnamneʼ tenen, moun dibuka, weik tonun bico tenelyamnye bira, yata wiribuka el tonok ara, pia teleb ning winipto do? Amutuku noutam ara, yuk kilapu ton, sikce kanye delinyak nang ara, weik aunyak bukni, sik anang nirya ara, mitik telebuk unyak do? Anda weik tonun bico tenelyamnye, el tonok ara, pia teleb ulul do?’ tenen, aning nirya ara, laka nyapsutume. Yata deiyok ati, ance nun amutuku wel kilapu nirya ati, “Anggunda, na kanye deipsinye eipmunyopura, elti, ‘An kil arye, pia ekulule, nyapnamlume,’ nyabuka, moronmasilam do?” Nyapnik.

Awel kil arye, sik Yerusalem mutuku ulamik kilapu nirya ati, nyabuk yupu Wel kil arye, tamubuka nyabuk yupu

¹⁰ “Kume, na kanye deipsirye, pia moun dinun nye bira, dipkoprob elda pia telebuk ulule! Amutuku noutam ara, yuk ninye ara, yupa pia weik 10.000 (sepuluh ribu) nang ton, aulamtinga babye, na dopnuknye bira, pia teleb ulul bukni, sik yuk nang nirya ara, mitik tonun uka! Na kanye delinunye bira, urasin ara pia telebuk ulule. Elda, pia mikip weiknye ulula ati, elda ilil pia kum tenelule!

¹¹ Na kanye ara, dengna weik ning, el si ara emas, pia teleb ulamle touk, na kanye deipsinye, el kisok ap, urasin nirya ara, pia telebuk ulule. El kisok potong ara, pia mirilule. Ara, maka el si ara, asak maka mirilamle atonun mirilule. Tonda, el kisok potong ara, mek kait ara welepmana, koulukmana kilamle touk ulule.

¹² El asing ara, yalma maka, el asing pia namin ulamle atonun ulule. El asing ara, mirin ulul bukni, dana-dana tam nirya ara, pia kurunuk ulule. Ara, sapi basam moum yung kurulamle touk, pia kurunuk, ulule. Ara, yalma maka bai tam mek wia dam buklirye, kanye deibuka pia mitang ulamle touk, na kanye deipsinye babye, aning atonun ulirye, dinulule.

¹³ Na akanye dopsinye bira, el katum ara, ninye arye wa wibikirye, anoutam ara, to nyalamle ning, el si ara rempah-rempah (berbaris) lelebuka koubikiba, aning el bok ara, nintong pia teleb nyalamle touk, ulule. Winipmanto ning ton, urasin pia teleb kita, el si ara bunga bakung ara, pum tam arye, pia teleb mek, el si ara mur mek balirye saklyopura, nintong pia teleb nyalamle touk, na dopsinye, el si bam bol babye, pia telebuk ulule.

¹⁴ Tonda, na akanye, na dopsinye bira, el taruk ap, nong nirya ap ara, urasin pia telebuk ulule. Winipmanto ara, el taruk ara, besi beton bukni, dengna weik ning emas ongolongon ning, kisok bukuka bisik botolilamikce, kintinilamikba ulamle touk, ulule. Tonda, emas deice dengna weik keil taplak deiptingiba, urasin pia teleb ulamle touk, el taruk babye atonun, pia teleb ulule. Tonda, el taram ap, mun ap ara, urasin pia teleb ulule. Winipmanto ara, weik bai basam, el si ara gaja basam, el cang weik yang lukikirye, aning deice ara, urasin pia teleb ning puturupdeibikirye, aning deice dengna weik keil, el urasin im mirin atonun ning taplakikiba pia teleb ulamle touk, na akanye el nong nirya babye, aning atonun ubuka, urasin pia telebuk ulule.

¹⁵ Winipmanto ning ton, urasin pia teleb kurun keil, el si ara marmer ara, ninye arye aning doprobica deice arye, weik aik ayukumna yo kintibikirye, emas deice ikdeiptingce, urasin teleb ap, kat ap ulamle atonun, na akanye dopnuknye, el yan bitinye ara, aning atonun ubuka, pia urasin teleb una ap, mikip una ap, ulule. Winipmanto ning ton, Libanon noutam, weik mutuku dup nirya aupmaliba eibibirye, ‘Se, aning ara pia teleb,’ tenen, kanye pia lolamsil touk, kilapu arye na dopsinye, el nong nirya eibikcopura, kanye pia deibikirye, ‘Se, anye bira, urasin pia telebnye ulule,’ tenenyake. Tonda, Libanon mutuku noutam, kat weik una ap, cang una ap, urasin teleb una ap, ulye yo, el si aras yo, tiklamle touk, na dopsinye babye, aning atonun, urasin pia telebnye ulule.

¹⁶ Tonda, na akanye dopsinye birye nyalul yupu ara, kekena pia teleb yupu dem nyaplyeba, kekebibyopura, kanye pia deibuka unyabe. Ati ara, kilapu nirya arye na akanye dopsinye eibikcopura, ‘Se, elda pia telebnye ulule,’ tenekirye, kanye deibuka unyake. Ati, anggun Yerusalem mutuku noutam ululum wel kilapu nirya ati nyapsine. Akunum laka nyapmasin yupu nirya, na akanye dopsinye dipkoprob aning atonun ulula ati, elda na tamnye ulule. Ati ara, narye elti, bico weik tenepnirye, elti, kanye deipnirye, pin-pin kanye bobuka unune.