Kidung Agung 4 - Eipomek

Welnye birye, el dopnamuk wel kil ati, ‘Se, anda urasin ap, nong ap, pia teleb kil ulyame,’ nyabuka, kanye kil-kil una ati, yupu ton nyabuk Welnye birye, nyabuk yupu

¹ Se narye dopnamkin kilo! Anda dipkoprob urasin pia teleb kil ulyame! Narye anti weik tonun, bico tenekununa ati, narye anti kanye deilikunune. Winipmanto ara, yalma maka el asing ara, pia teleb ulamle touk, an asing babye, pia telebuk ukulule. Anda, ‘Talye nang arye eipnikcakʼ tenen, an urasin ap, kisok ap ara, teleb baju arye lelipdongopmince, balyam bukni, an asing lak tuba ulula ati, an pia teleb asing eipnyopura, kanye delikunune. Tonda, an cang kisok potong ara, miriplirye, pia teleb ulula ati, ance banminye talak ara, an kisok potong ara welepmana, koulukmana kilalule. Winipmanto ara, kambing basam yupa arye, weik mutuku kon el si Gilead mutuku deice tam arye, koulukuka yanukce talak ara, kanye deibuka, im kuruknin yangalamak touk, ance banminye talak ara, an kisok potong ara, welepmana, koulukmana kikulule. Aning babye, pia teleb tenepne.

² Na dopnamnamkin kilo, an si duk ara, kwalina kum, punguk pia lipsisikuka tikuke. Tonda, an si duk nirya ara, pia kurun ukilirye, kurunuk upkuke. Winipmanto ara, ninye arye sik weinyak kil domba basam dobuka, teleb balamle mek dam bobikirye, adomba basam nong ap, bol ap ara, pia teleb kibuka mek kekikcopura, adomba basam ara, mekin arye tuba tamubuka ninye aik yangace talak ara, pia teleb uplirye, moulamle touk, an si duk babye, pia kuruplirye, kurun diamuk ukulule. Tonda, domba basam arye mi weik deibikiba, tonok babye kum diplyopura, domba basam mi weik ulamak touk, an si duk nirya babye, tuba teleb ukulula ati, tonok babye, ton kum kuruksakukce, kum kum dayuke. An si duk nirya, tuba telebuk ukulule.

³ An si bam bol ara, ining bi ulula ati, pia telebuk ukulule. Winipmanto ara, baju win tapu, pia ining bi ulamle touk ukulula ati, aning ara, pia telebe. Anda, ‘Talye nang arye eipnikcakʼ tenen, an urasin ap, kisok ap ara, teleb baju arye lelibuka balyam bukni, abaju pum tam arye, an ngang ara, urasin pia teleb ukulule. Ara, yo duk, el si ara, delima yo duk moulamlirye, urasin bumang atonun, an ngang babye atonunuk ulule. Aning babye, pia teleb tenenune.

⁴ Tonda, an ngang dam ara, pia cang ap, bukam ap ara, teleb ukulula ati, an urasin ara, pia teleb ukulule. Tonda, an ngang dam ara, Raja Daud birye, urasin teleb keil dobukce, taplak deiamukce, cang weik keil aik ara, ninye on yin delina ati domokba, urasin teleb ulul touk, an ngang babye, urasin pia teleb ukulule. Tonda, an ngang dam ara, kweirya emas karakna ning karakikiba, urasin pia teleb ulye touk, an urasin babye, pia teleb ukulule. Aning ara, yin talen nang arye, ninye olan talak ara, ‘Ninye arye mal dobikiba, nun nong deice mal dobikiba, bikilyasilyakʼ tenen, sik nong lelin ning, el si perisai, yupa pia weik seribu (1.000) dobikirye, lelebuka diksukumuk deibikirye, urasin pia teleb ulamle touk, an ngang dam karakalyam kweirya, emas arye memepdeiamik ning ara, aning atonunuk ulule.

⁵ Tonda, an taram ara, urasin teleb ukulule. Winipmanto ara, an taram bitinye ara, rusa basam bitinye do, kijang basam bitinye do, sik urasin ara, pia teleb ururaka atonun, an taram bitinye babye, atonun urasin telebuk ukulule. Tonda, rusa basam mi bitinye ara, urasin teleb kita, el si ara, bunga bakung noutam barikirye, sik din dinmarikce talak ara, urasin pia teleb ulye touk, an taram bitinye babye, urasin pia telebuk ukulule.

⁶ An taram bitinye ara, mapmanya ani, nintong teleb nyakulula ati, nara asukumuk mapmanirye, tuba unamne. Winipmanto ara, mutuku kon bitinye bukamuka deice ara, nintong pia teleb nyalamle ning bitinye ara, mur ap, kemenyan ap, liktingba, nintong teleb nyalamtuba kekeptibye touk, an nong bol deice ara, nintong telebuk nyakulula ati, ‘An taram bitinye ara, asukumuk maptinye,’ tenenune. Ati ara, alukunyan talak nirya ara, asukumuk neika mapmanimnya ani, ambusum bereknulye talak ara, moul kumanya arye pu aplyeba, dua ap, kunukna ap, min kum bobinaplye talak ara, na binamane.

⁷ Se, na dopnamkin kilo! Dipkoprob ance pia teleb ulyama ap, urasin pia teleb ukilye ning ara, pia telebuk ukulule. Na kanye ara, an nong nirya ara, pia telebuk ukulule. Tonok ning babye, malye ton pia kum ukulule. Ati ara, narye anti, weik tonun bico tenekinirye, anti pia teleb kanye deibuka unune.

⁸ Se, na ka kilo! Anda amutuku ulyam bukni, an dam yanmanto kum ununa ati, na kanye ara, anda pia pera mutuku noutam atonun ulyame. Ati ara, nara an dam yanmanto kum unune. Winipmanto ara, iknapye tam, Libanon mutuku noutam, weik mutuku deice utumba, nara an dam yanmanto kum uptinye. Ati, an ap, na ap, cang weik bukuk mutuku dup arye batakuka, lu mutuku neika kouluka yatinimnye! Se, na dopnamkin kilo, Libanon mutuku pia pera sukum ulye touk, an dam ara, yanmanto kum unmana ati, koulukmince, na damuk yanulyame! Winipmanto ning ton, pia pera mutuku dup deice atonun ulyame. Ara, Amana mutuku dup arye do, tonda, Hermon mutuku dup arye do, koulukmince, na dam yatumce, neika utinimnye toura, na kanye deiptinye. Aning atonun, bai tam talye kam ulye ning, yu weik pus, el si ara Singa kus ululak arye do, tonda, yu ulamle kam ning, el si ara Macan Tutul ululak arye do, amutuku batakuka, na dam kouluka yatumba, neika utinimnye toura, kanye deiptinye.

⁹ Se, na dopnamkin kilo! Ance na kanye talima nirya, akunum dopropmanilama ati, antibuk pia patanilyeba, antibuk pia kanye deibuka, tuba-tuba tenikunune. Narye moun dikunun kilo, like tonok talak ara, ance nati enmanilamba, winipmanilama deice arye, adiparyuk, na kanye talima nirya libuka dopropnulumba, narye anti pia kanye deipkise. Ati ara, na kanye ara, anda, na weit kil atonun ulyame. Tonda, na kanye talima noutam ara, anda na dopnamne kil ulule tenenune. Aning atonun ton, an ngang dam karakalyam kweirya, urasin teleb ulula ati, tonok babye eipnyopura, adeice arye nara anti, weik tonun bico tenekinirye, anti kanye delikunune.

¹⁰ Se narye dopnamkin kilo! Na kanye talima noutam ara, anda na weit kil do, na dopnamne kil do, atonun tenikinirye, pia bico tenekunune. Ninye arye kanye walwalan anggur mek dibikirye, kanye delinyak bukni, aning ara mitik tonun uka. Pia teleb ning ara, ance nati bico tenepnimince, nati pia kanye deibuka teninilyame. Tonda, ance nintong pia teleb minyak mek dobuka, an nong bol deice likminba, adeice arye nintong pia teleb ninguk nyapkiliba, kekenune. Aning ara, pia teleb bukni, yuk nintong teleb ning el si ara rempah-rempah yuk-yuk ning nirya ara, nintong mitik telebuk ulule.

¹¹ Na kanye delikunun kil ati, anda na dopnamkinca! Talye kum nyapnukin bukni, an si bam bol arye, mutupniminba, to weik nyaniliba, pia kanye delinune. Aning ara, pia teleb mong mek ap, sapi basam moum yung ap, tabakuka dibipyopura, weik tonun to nyalamsil touk unulule. Tonda, ance ongolyam baju nirya ara, Libanon mutuku noutam palamle cemara yo arye, nintong pia teleb nyalamle touk, nyaliba kekenune. ‘Aning babye, pia telebe,’ tenenune.

¹² Se, narye dopnamkin kilo, anda na weit kil atonun ulyame. Tonda, narye anti, ‘Akil dopnamneʼ tenen, anti moun dikunun bukni, wini talak ara, narye anda min kum dopkitinye. Ati neika min kum uptinimnye. Ati ara, winipmanto ning ara, ninye arye pia teleb wa akunum wibikirye, yala akunum koubikcopura, ‘Talye nang wekelbikirye, awa noutam akunum koupmap ning ara, ubula dopropsicakʼ tenen, awa dana-dana tam nirya ara, cang keil poka ton, dobuka antanalongonyake. Aning atonun ton, ninye arye mek pu pia teleb ning, pu dobuka balamukak ara, ‘Malye nang arye yanuka, ateleb mek nirya talye luparabuka kwebikirye, dipsikcakʼ tenen, amek puak nirya kalikna ati, poka dobikirye, amek pu deice tam ara, keil arye bisik bublan botobuka tirikilongonyake.

¹³ Se, narye dopnamkin kilo, anda yo duk moulamle yo kan-kan atonun ulyame. Ara pia to nyalamle yo duk, el si ara delima yo duk atonun ulyame. Tonda, weik wa noutam, ninye arye, pia teleb duk moulamle yo yuk-yuk ning nirya koubikirye, tonda nintong teleb nyalamle ning, el si ara henna ap, tonda, narwastu ap, kounyaka atonun ulyame.

¹⁴ Tonda, awa noutam ara, pia teleb to nyalamle ning ap, teleb din ning ap, nintong pia teleb nyalamle ning ap, yuk-yuk ning nirya ton kounyake. Sikce kounyak ning si ara, narwastu ap, kunyit ap, tebu kwei ap, kayu manis, ara min-min pia teleb nyalamle yo ap, kemenyan ap, mur ap, gaharu yo ap, rempah-rempah ap, ayala-yala nirya pia weik tonun kounyake. Anda awa pia teleb ulamle atonun, an babye pia teleb kil ulyame.

¹⁵ Se, dipkoprob na kilo, ninye arye wa wibikirye, awa noutam ara, pia teleb mek pu panalulak ap, iknapye tam Libanon mutuku deice arye, pia teleb mek balamle mek ulamle touk, pia teleb kil ulyame. Ara, anda pia teleb ulyama ati nyapkine, narye anti kanye delikunun kilo!

Wel kil arye, el moun dilamuknye biti, “Anda adiparyuk, bikbik abuka, na dam yalyame,” nyabuk yupu Wel kil arye, nyabuk yupu

¹⁶ Se, anda iknapye tam arye dolul kumanya ap, dabu tam arye dolul kumanya ap ara, adiparyuk deiyok koubuka, donamnilyame! Ara talye ati kum bukni, deiyok ara, na wa win dam deice tam donmaminya ani, na wa noutam nintong pia teleb ning, wamnilye ning ara, akumanya arye, anintong teleb nyalamle ning dobuka, dana-dana tam balamle. Balyopura, nara weik tonun bico tenenunye dipkoprob kekenamne. Na kanye deipsinye, na nintong teleb ning kekeplyopura, adiparyuk na wa win dam yanuka, weklirye, na wa noutam pia teleb ulye yo duk ap, yuk teleb ning ap, nirya dobuka dilirye, kanye deibuka unamle! Ara, ‘El ap, na ap neika unamnam,’ tenen ati nyapne.