Kidung Agung 3 - Eipomek

Wel kil arye, el pia patalamuk ning ati, nyabuk yupu Wel kil arye, nyabuk yupu

¹ Se, lukunyan talak nirya ara, na talima noutam arye, weik tonun bico tenenunye bira, ‘Na dam yatueʼ tenen, patanulule. Patalamnukba, ‘Dan sukum ulul do?’ tenen, balamsirye, elamse bukni, kum eipse. “Se, anango Dan mutuku binuka ulyam do?” nyabuka, elti, yukupse bukni, elce tamubuka yupu tonok babye kum nyapnuk.

² Ati ara, wini talak ara, na buknirye, weik asik unyap noutam ara, na talima noutam arye, pia kanye delinunye biti, ‘Dan sukum unmal do?’ tenen, pia elbinamne. Ara, nun mutuku nang nirya banyap bisik nirya ara, ‘Yupu talipnuyapʼ tenen, bulumak sukum nirya ap amutuku noutam bukni, dana-dana tam nirya ap, ‘Dan sukum unmal do?’ tenen, pia epra binamne. Dipkoprob ning ara, narye na weik tonun bico tenenunye biti, akunum ouku weik tonun dipra balamse bukni, elti, pia kum eipse.

³ Na dopnamnilanye kum eipse bukni, amutuku weik asik noutam dipra balamse talak ara, amutuku nirya kalikna deiyok nang arye, na dam yanmek ati narye, ‘Amapo, nara weik tonun bico tenenunye bira, anggun ton eipmalum do, kum do?’ nyabuka, asipdese.

⁴ Asipdesirye, tuba tamubuka bisik banmase, talak aryuk, na weik tonun bico tenenunye bira, epdanumu. Winipnumurye, na dopnamnilanye bira eipsirye kanye deipse. Kanye deipsirye, narye moun dinun nye biti pia nurubuka talipsirye, ‘Na akanyeo, anda pia kum bataknamkine. Pia talibuka irinamkine. Pia talibuka irilamsa ani, ‘Na nin koproba, el aik bobinamanʼ tenen, anye talibuka bobanmasa ani, binumu. Na deipnuk kil, el aik pum tam ara, narye moun dinun nye bira, bobinuka deipmasa ati, asukumuk neika unmanumu.

⁵ Ati ara, anggun Yerusalem weik asik noutam ululum wel kilapu nirya ara, moubuka kekepnamnulume. Ara, anggunce nati, nyalin yupu deice arye nyapnamnulume. Ara, talye nyaltakna kum bukni, bai tam kam ulye ning, sik si ara rusa basam ap, kijang basam ap, sik si deice arye, nyalin yupu deice arye nyapnamlulume. Ara, anggunce nyapnamnulume, “Kume, an ap, ance moun dilyamnye ap, neika unamrum talak nirya ara, nunce anggun dam talye karin arye, pia kum yanamabe. Neika unmarumunya ani, akunum buknamrum talak ara, anggun dam yanamabe,” nyabuka nyalin yupu deice arye nyapnululume, nyapsine.

Bico tenelana ati, mot winilye ning, nyabuk yupu

⁶ Bukni wini talak ara, anggun nirya otam bisik dipdelulume! Pala pia weik mutuku, ninye pia kum unyak mutuku noutam, pata mutuku noutam arye yanamalnye bira, yatanye do? Elda, minopce bikbik abuka yanamal atia. Winipmanto ara, ninye arye weik uku ibikiba, tulum ara talye karin arye pia weik tonun welelamle touk ubuka, el babye, nun dam minop bikbik abuka yanganmale! Bukni, sik nintong pia teleb ning, dengna deiyok nang arye, nintong teleb ning yuk-yuk ning nirya dekmakiba, nintong pia teleb nyalamle touk, narye moun dinun nye babye, el nong bol deice nintong teleb nyalule. Nintong teleb nyalamle ning el si ara, mur ap, kemenyan ap, nong bol deice likin minyak mek ap, aning yuk-yuk ning nirya ara, nintong pia teleb nyalamle touk, na dopnamnilanye babye, el nong bol deice ara, nintong teleb nyalule.

⁷ Tonda, anggun nirya dipdelulume! Otam mutuku arye yangalye ning ara, talye ning kuma! Ara, nun ninye deiyoknye Salomo, ‘Elda yuk-yuk mutuku banamla ati, memebuka domik bun ning erebuka boyanganmake. Abun ning dana-dana tam nirya ara, Israel yala nang bukni, kel weik bikamik yin talen nang ara, ninye yupa weik enam puluh (60) nang arye, abun ning erebuka, sik takunya deice deipmakce boyanganmaka atia!

⁸ Ayin talen nang nirya ara, sik ninye olan ning weik tonun akunum kel bikamik. Ati, sik ninye on parang ya ap, top nong ap, sik keil deice, tapu arye koupdongopmakce, kintinibuka yanganmake. Sik anang nirya ara, ninye on ning nirya, weik tonun akunum kel bikamik. Ara, talye ati kum bukni, deiyok ara, ‘Lukunyan noutam ara, yata malye ning ap, yata mutuku yu nang ap arye, nun deiyoknye Salomo biti, ‘Anye optibye,’ tenebikirye, nun dam yanuka opsiting do?’ tenen, kintinibuka kalikil yanganamake.

⁹ Nun mutuku weik deiyoknye, Salomo birye nyapdeibukba, el amu tam pil dona kel weik nang arye, el yuk-yuk mutuku bana ati, aning deice bukuka ban ning, el si ara tanduk, memepdeibik. Ara Libanon mutuku biyikce, pia urasin teleb ap, kat ap ulye yo webukabikce, abun ning memepdeibikba, adeice bukuka balule.

¹⁰ Raja Salomo birye, “Winipnamlume,” nyapdeibukba, el mutuku kel weik nang arye, abun ning, el si ara kursi, ‘El yan ara, urasin pia teleb upnamleʼ tenen, dengna weik ning, el si ara perak dobukabikce, abun ning el yan ara, yo deice taplak deibik. Tonda, abun ning, kursi deice tam nirya ara, dengna weik ning, el si ara emas dobukabikce, teleb yo deice tam taplak deibik. Tonda, akursi bun deice ara, ‘Gat uplyakeʼ tenen, namin ning el si ara bantal memepdeibik. Aning ara, dengna pia weik, ining bi baju, el si ara unggu dobuka, abantal nirya kitipdeibikba, Salomo birye aning deice bulule. Yerusalem mutuku kilapu arye, ‘Salomo biti ara, nunce teleb kanye deibuka unyabe,’ tenen, aning-aning nirya ara, pia teleb kibuka memepdeiamik.

¹¹ Se, anggun Yerusalem mutuku ululum wel kilapu nirya ara, anggun aik pum tam arye batakuka, abisik dam yamunce, Salomo yanamla ara, moubuka elinamlume. Ara, anggun Sion mutuku noutam ululum kilapu nirya, anggun nirya arye, Raja Salomo el kisok deice kalulul ning, el si ara mahkota, moubuka elinamlume. Aning ara, pia urasin teleb ulule. Salomo birye kil dobuk talak ara, el lin koproba arye, akisok kalun ning, el si ara, mahkota dobuka, ‘Na mi Salomo bira, amutuku nirya taliplirye, ninye deiyoknye Raja unamsilʼ tenen, bikilina ati, akalun ning ara, el kisok deice kalupdeibuk. Dipkoprob asum ara, Raja Salomo bira, pia teleb kanye bobukce, pin-pin asa ulamuk.