Kidung Agung 2 - Eipomek

Wel kil arye nyabuk yupu

¹ Nara urasin pia teleb kil ununa ati, winipmanto ara, Saron mutuku talye palamle kita ning, urasin pia teleb ning atonun unune. Diba, mutuku taram bukni, pala weik noutam palamle kita, urasin pia teleb kita, el si ara bunga bakung ulamle touk, na babye urasin pia teleb kil unune.

Welnye birye nyabuk yupu

² Dip nyapmalame. Yuk wel kilapu ton, yupa pia weik daunyakce, mitik teleb unyak bukni, sik kan-kan noutam uminya ara, anda pia teleb kil ulyame. Winipmanto ara, bai tam pia tace ning, weik palamlye noutam ara, urasin pia teleb kait ning tonok bongobuka tiklirye, urasin pia teleb ulamle touk, anda urasin pia teleb kil ulyame. Ara, yuk wel kilapu nirya ara, mitik teleb unyak bukni, anda urasin pia teleb kil ulyame.

Wel kil arye, nyabuk yupu

³ Se, na dopnamnilamnye bira! Wel anto nang ton, yupa pia weik daunyak bukni, sik nirya ara, mitik teleb unyake. Bukni, sik kan-kan noutam ara, anda urasin pia telebnye ulyame. Winipmanto ara, bai tam talye tiklamle yo kan-kan noutam ara, pia duk teleb moulamle yo el si ara, Apil yo tikturye, pia teleb ulamle atonun, yuk wel nang ara, mitik teleb unyak bukni, anda pia teleb ulyame. Tonda, winipmanto ara, ayo si Apel yo dam keting koa buktiniba, elce lelipnutuba, keting buppu arye kum dipnutue pia kanye deibuka uptinye. Na dopnamnilamnye bira, aning atonun, an dam unye talak nirya ara, anti pia kanye deibuka unune. Apel yo duk diptiniba, to weik nyapnutuba, kanye deibuka ulamtinye touk, an ap neika unimnye talak ara, pia kanye deibuka unune.

⁴ Na dopnamnilanye birye, na dobuka, weik kwalya kwalibuka, dilamak aik pum tam bobinuka deipnukba, neika unmanumu. Anyaik bobinuka deiyok ara, ‘Pia bico tenenulula ati, na ap, el ap, neika unamanamʼ tenen, bobinuka deipnukba, pia kanye deibuka unmase.

⁵ Se, na dopnamnilamnye bira! Neika unmanama ani, pia kanye deipdanuka neika unmanama ati, na nong ara, mitang upmanile. Ati ara, na nong mikip una ati, pia to nyalamle din ning, anggur duk kolubuk ning el si ara, kismis ap, tonda Apel yo duk ap arepnutumba, akunum dipnyopura, na nong mitang ara, tuba tamubuka mikip kipdeipnamnile.

⁶ Se, na patapnil ning ara, ‘Na dopnamnilanye birye, el kwanim tam taruk arye, na kisok tam erebuka talipnutue,’ tenenune. Tonda, ‘Na dopnamnilanye birye, el sirik tam taruk arye, na nong talibuka iripnutuba, kanye deibuka uptinyeʼ tenen, patanulule.

⁷ Se, anggun Yerusalem weik asik noutam ululum wel kilapu nirya ara, moubuka kekepnamnulume. Ara, anggunce nati, nyalin yupu deice arye nyapnamnulume. Ara, talye nyaltakna kum bukni, bai tam kam ulye ning, el si ara rusa basam ap, kijang basam ap, sik si deice arye nyalin yupu nyapnamnulume. Ara, anggunce nyapnamnulume, “Kume, an ap, ance kanye delilyamnye ap, neika unamrum talak nirya ara, nunce anggun dam talye karin arye, pia kum yanamabe. Neika mapmarumunya ani, akunum buknamrum talak ara, anggun dam yanamabe,” nyabuka nyalin yupu deice arye nyapnululume, nyapsine.

Bico tenelana ati, mot bitinye ning, nyabuk yupu Wel kil arye, nyabuk yupu

⁸ Se, na bico tenenunye birye, elce yupu nyanmalbuk kekenmane. Anggun nirya babye, omutuku kon deice dinamlume. Na dopnamnilanye bira, mutuku kon deice bikbik abuka yanganmalbuk eipmane. Diba, na kanye delinunye bira, cang mutuku kon deice kirikuka, na dam yangana ati, bikbik abuka yanganmala atia!

⁹ Na dopnamnilanye bira, pia mikip arye bikbik abuka yangalula ati, elda kijang basam pia bikbik abuka balamle touk ubuka, bikbik abuka balule. Diba, bai tam kam ulye ning, el si ara rusa basam mi bikbik abuka balamle touk ubuka, yangalule. Anggun ton otam elilulume. Na bico tenepnirye, pia kanye delinunye bira, nun aik dam dobupu poka dam tikmalce, na aik tamuk pia dinmale. Ara, na aik abilinga noutam bocamik kin-kin, jendela bisik arye dinulule. Tonda, na aik abilinga kin-kin bisik uamuk noutam arye tikuka, ‘Na kil anyaik pum tam unmal do?’ tenen, moubuka dilule.

¹⁰ Na bico tenenirye, pia kanye delinunye, na dopnamnilanye birye, na aik dam yalirye, nati yukunulule. Elce, “Na dopnamkin kilo, anyaik mapmalam bukni, wini talak ara, bukmince, yanulyame! Anda, urasin pia teleb kil ulyama ati, narye anti weik tonun bico tenekinirye, kanye delikunune. Ati, wini talak ara bukmince, an ap, na ap neika binuname,” nyabuka yukunulule.

Welnye birye, nyabuk yupu

¹¹ Dipdelyame! Moul li ara, akunum sirya dakmala ati, mok weik tonun ton, kum cenamle. Ati an ap, na ap neika banamaname.

¹² Moul li akunum kum danin banmala ati, nun wa wibuka kounyam mutuku noutam nirya ara, urasin pia teleb kita akunum bongobuka palule. Ati ara, nun mutuku nang nirya arye, kanye deibikirye, kil-kil mot nyanamake. Tonda wini talak ara, dou mapnamla ati, yalma maka arye, el yupu nyaplyeba, nun mutuku noutam nirya ara, el yupu kekenyabe.

¹³ Tonda, nun mutuku noutam duk moulamle yo nirya ara, duk tuba mounauk unamle. Ara kwarang yo duk atonun, yo el si ara yo ton, el duk moupnamle. Aning atonun, tonda anggur duk moupnamla ati, anggur tapu deice ara, el kita akunum olule. Akita nirya ara, akunum deiyok koubuka polula ati, akita poplirye, nintong teleb nyalamle ning ara, banmalak, nintong teleb ning akunum kekepmabe. Na dopnamkin kilo, anda urasin pia teleb kil ulyama ati, narye anti weik tonun bico tenekinirye, kanye delikunune. Ati, wini talak ara bukmince, an ap, na ap neika binuname,” nyabuka yukupmanile.

¹⁴ Tonda, na dopnamnilanye birye nyanulule. “Se akilo! ‘Ance nyalyam yupu ara, kekeptinyeʼ tenen, patanulule. Tonda, ‘An pia urasin teleb ara, tuba ton ap eiptinyeʼ tenen, patanulule. Ance nyalyam yupu ara, pia teleb ati, aning kekepnyopura, kanye delinune. Tonda, an urasin ara, pia teleb ukulula ati, aning ton eipnyopura, pia kanye deibuka unune. Winipmanto ara, anda yalma maka atonun kil ulyame. Ara, cang weik mutuku kon ara, yalma arye, ‘Ninye eipnikcakʼ tenen, ilil upliba, keil deiya pum tam duknubuka ulule. Bukni, amaka ara yupu pia telebuk nyalule. Tonda, yalma maka ara, urasin pia teleb maka ulula ati, amaka duknuptua babye, akunum eibiyopura, nunce kanye deibuka unyabe. Aning atonun, narye anti eipkinyopura, kanye deibuka ununa ati, anda yalma maka atonun kil ulyame nyapkine. 1

¹⁵ Na dopnamkin kilo! Wini talak ara, nun anggur tapu nirya ara, akunum kita onmalba, lak unmala ati, nun anggur wa windam dilbinuname. Tonda, anggur wa windam binimnyopura, bai tam kam ulye ning, kam koproba mi urasin atonun ning ara, el si ara rubah, ‘Elce nun anggur tapu daklirye, anggur duk dibuka sirya daksilyakʼ tenen, nun bitinye arye amitik rubah tomolbinamname. Ati, buklyame. Adiparyuk binuname,” nyapkine.

Wel kil arye, tamubuka nyabuk yupu

¹⁶ Narye na dopnamnilanye biti, weik tonun bico tenenirye, elti, na kanye delinune. El tonok ara, na ning ulule. Yuk nang ton pia kum patanulule. Aning atonun, na kanye delinunye birye, nati, weik tonun bico tenenilirye, nati kanye delilule. Ati, nara, el kil unune. Yuk kilapu nirya ara, pia kum patalule. Nun bitinye arye, pia bico tenelanauk unimirye, kanye delilanauk unyame. Winipmanto ara, domba basam weina deiyoknye birye, el domba basam bobalirye, urasin teleb kita, el si ara bunga bakung noutam deipliba, dinmakiba, eiplirye kanye delilamle touk, narye moun dinun nye birye, na si bam bol deice mutupnilye talak ara, pia kanye deibuka ulule.

¹⁷ Se, na dopnamnilamnye bira! Alukunyan talak noutam nirya ara, neika mapmanumu bukni, berekninbau talak ara, moul kumanya pu aplmoba, dua ap, kunukna ap ara, kum danmoe. Ati ara, ‘Na mutuku nang arye eipkikcakʼ tenen, anda bikbik abuka bindopnulyame! Winipmanto ara, rusa basam ap, kijang basam ap, sikce pia minop bikbik abuka balamak touk, an babye, mikip arye, bikbik abuka bindopnulyame. Na aik batakmince, tamubuka binuminye talak ara, ‘Weik mutuku el si Beter mutuku dup ara, kirikuka bindopnulyamʼ tenen, nyapkine amio.