Keluaran 9 - Eipomek

Allah arye, Mesir mutuku basam dipna arebuk yupu

¹ Aminyan talak, Allah el si Yahweh arye, Musa biti nyabuk. Anda Firaun dam bimince, nyapnamlyame. Allah arye, nyapkile. “Na Allah arye nyapkine. Ibrani ninye arye, na si ereninyak Allah arye nyapkine. Israel ninye ati bico tenenirye, kalikuka melinune. Ance aninye ati lopdongopminba, yukak binuka na si erepnamniake,” nyapkine.

² Ati ance, ‘Sik aninye batakniba kum binuyake,’ tenepmince, tuba talipminyopura, na Allah arye ikin weik ning arepnamkine.

³ Ara, na Allah arye, yu upniliba, Mesir mutuku ninye arye, weilamak ning deice dipna deiyok ning deipnamane. Aweik arye pirinamle ning ara, kuda basam ap, keledai basam ap, unta basam ap, sapi basam ap, domba basam ap, kambing basam ap, aning nirya ara, dipna arenamane.

⁴ Na Allah arye winipnaman bukni, narye apiring ning nirya bokuka, yuk-yuk deipniba, winipnamale. Ara, Mesir ninye sik weilamak ning nirya ara dipnamle. Israel ninye, sik weinyak ning ara, tonok babye kum dipnamale. Allah arye, Musa biti nyabuk. Nyabukce, aning ton nyabuk. “Firaun dam bimince, ‘Allah arye nyapkile,’ nyabuka, anyapmakin yupu nyapnamalyame,” Allah arye, Musa biti nyabuk.

⁵ Ati ara, Allah arye nyabuk. “Ambusum ara, dipkoproba anyapman touk, Mesir mutuku noutamak nirya winipnamane,” nyabuk.

⁶ Sik mapmeka ani akunum berekukopura, Allah arye asum talak nyapmok touk winibuk. Mesir ninye ara, sik basam ayala-yala nirya ara, dipna uk kibuk bukni, Israel ninye sik basam ara, tonok ning babye kum dibik, nirya kam tuba ubuk.

⁷ Winibukba, Firaun birye, ‘Israel ninye basam tonok ning babye kum dipmale,’ nyapmaniaka ara, ‘Dib do, tilila do?’ tenen, ninye ton wibuka dopdeibukba, sik dilbiyikbuk, dipkoprob sik Israel ninye weilamik basam ara, tonok ning babye, ton kum dipmikce, kam tuba unmikak eibik. Aning eibikce laka nyalbiyikba, Firaun kekebuk bukni, el kanye talima tuba malye kibukce, “Kume, ‘Israel ninye ur bilulume, kum nyapnune,’ tenebukce, bana kume,” nyabuk.

Allah arye, Mesir mutuku ninye nong deice, torok weik arebuk yupu

⁸ Allah arye Musa ap, Harun ap ati, nyabuk. “Sikce, aik uku seklamakak birumunce, uku kalum ap, uku sice ap, binuka dopropnurume. Doproprumunce, Firaun el dinak adiparyuk Musa dopropliba, asice butbuta weleplirye, weik danamale.

⁹ Ati uku sice dobuka, Musa birye talye dikdonokliba, auku sice butbuta weleplirye, Mesir mutuku nirya bindaknamle. Bindaklirye, Mesir mutuku nirya binamle. Winipliba, Mesir mutuku ninye nong deice ap, sik basam nong deice ap palipliba, weik torok mouplirye barye suse ara, dinamle,” Allah arye nyabuk.

¹⁰ Nyabukura, Musa ap, Harun ap, sik bitinye arye uku sice dobuka, Firaun dam birikce, Musa birye, uku sice yamupdonokukba, auku sice bindakuk. Bindakukce, ninye nong deice ap, basam nong deice ap pakukba, torok pia weika arye moubukce barye suse weik dilamuk.

¹¹ Winibukba, Mesir mutuku sik asing keten nang weik kel nang ara, adiparyuk Musa dam binuka kum tekmanto ubik. Ara, sik nong deice torok weika arye moubukce, ikin weik ubukba, kum binmanto kibuk. Aning atonun, Mesir ninye nirya, sik nong deice babye torok weik moubuk.

¹² Bukni, Allah arye, Firaun biti arebukba, el talima kat kibuka malye kibukce, tuba kum kekebuk. Ara, Allah arye, ‘Winipnamle’ nyabuk touk, kum kekepmanto ubuka ati, Allah arye nyabukba, Musa ap, Harun ap, sik yupu nyaprika babye, kum kekebuk.

Allah arye, Mesir mutuku weik dekne duk-duka purwu mok ning, arebuk yupu

¹³ Aminyan talak, Allah el si Yahweh arye, Musa ati nyabuk. Ambusum beren tam, bukukapmince, anda Firaun dam biminyopura, nyapnamlyame. “Allah arye, nyapdeipmakile. Ibrani ninye arye, si ereninyak Allah arye nyapkine. Israel ninye ati, bico tenepnirye, kalikuka melinune. Ance aninye ati lopdongopminba, yukak binuka na si erepnamniake nyapkine.

¹⁴ Nyapmakin bukni, anda malye winibuka, na yupu kum kekepnimince, ‘Israel ninye bana kume,’ nyapminyopura, anggun mutuku noutamak nirya, na mikip deice arye kanye imun ning pia weika arye arepnamasine. Ara, an ap, an pil dona deiyok nang ap, anggun amu tam unyak ninye nirya ap, ikin weik unamlume. Winipnamna deiyok ara, an ap yuk ninye nirya ap, ‘Se, Allah ara, tukwak mutuku im sirya, mutuku sirya nirya noutamak ara, el atonunye ton kum ulule’ tenen, kel biknamnululuma atia.” Allah arye Musa biti, “Ayupu ara, Firaun dam laka nyalbanamlyame,” nyabuk.

¹⁵ Allah arye ayupu ton nyabuk. “Ara talye ati kum nyapkine. Na tenepnirye, Firaun an ap, an mutuku ninye nirya ap, ikin weik uk arepneba, an babye, an amu tam unyak ninye nirya babye ati, weik uk dipliba, dipna deiyok ning akunum arepmasitinyopura, dipkoprob akunum dibuka sirya dakmatume. Aning ara, adiparyuk akunum winipmatinye bukni, min kum winipmasine.” Allah arye nyabuk. Aning ton nyabuk.

¹⁶ “Akunum obuka sirya dakmasitinye bukni, narye an wipdeipkisa deiyok ara nyapnune. Ara, tuba kam uminya ara, ‘Narye mikip weik ning arepneba, Firaun birye eipnamle,’ tenepkise. Tonda, anirya winipniba, ninye tukwak mutuku im sirya, mutuku sirya nirya arye, ‘Se, Allah ara, weik mambule’ tenen, mambul kanye bobuka, ‘Na si ap, na wininye ning ap ati, laka nyalbanamake’ tenen, kum oplopkise.

¹⁷ Ura, anda pia dobuka, talima erena uk upkiliba, ‘Aninye batakniba, kum binuyake,’ tuba tenemince, malye ulyame.

¹⁸ Ati ara, dipkoprob ambusum beren tam, aunmanam keting anyuk, narye weik dekne duk-duka purwu mok arepnamakine. Aning ara, na dam arye dobuka dopdeipnamane. Dopdeipniba, weik ikin ning, Mesir mutuku noutamak deiyok kouna talak arye dipdongobuka, wini talak nirya kum ulamuk ning winipnamane.

¹⁹ Ati ara, narye nyapkine. Ance an amu tam unyak ninye nirya ati nyapnamlyame, ‘Amutuku weilulum ning ayala-yala nirya ap, anggunce talibuka weilulum basam nirya ap, buru tam weilulum ning babye, laka weilulum ning babye, aning nirya bulubuka, aik pum bisik do, anggun dam do, dobuka delilyanululume. Aik pum bisikuk dongopmunba weknunyake,’ nyapdeipnamlume. Deiyok ara, ambusum dekne duk-duka purwu mok dopkwetepniba, bai tam ap, lakak ap ulul ning nirya opliba dipnamake. Ara ninye babye, anggun weilulum ning babye nirya ara, dekne duk-duka purwu mok arye opliba, aning nirya dipnamake.” Allah arye Musa ati, “Firaun dam nyapnulyame,” nyapdeibuk.

²⁰ Allah nyapmok yupu, Musa birye nyabukura, Firaun ap, el mapsilip ap nirya kekebikce, Firaun dam pil dolamik nang bukni, Allah nyalamuk yupu ati, ‘Mambule’ tenen, ilil ubuk ninye nirya ara, sikce sik melina ninye ap, sik weilamik ning ap nirya dobuka, aik dongobik.

²¹ Ilil ubukba ulamik ninye arye winibik bukni, yata barye ninye do nirya, Allah arye nyapmok yupu kekebik bukni, ‘Kume, tonda daupmalye’ tenepmek ninye ara, sik melina nang ap, basam ap nirya, talye kanye bobuka buru tam tuba unmek.

²² Allah arye Musa biti, nyabuk. “An taruk erebuka, im deice pukminyeba, weik dekne duk-duka purwu mok Mesir mutuku cepnamale. Ceplirye ninye ap, ninye weinyak ning ap, tonda sik wa win dam palamle ning ap, talye buru palamle ning ap, adeice nirya saknamale. Tonda Mesir mutuku noutamak nirya saknamle.” Allah arye, Musa biti nyabuk.

²³ Nyabukura, Musa el kama im deice pukukba, Allah arye weik liman ap, bebeya lakna ap, weik dekne duk-duka purwu mok ap, tabakuka tukwak mutuku dopkwetebuk. Allah arye, Mesir mutuku weik dekne duk-duka purwu mok dopkwetebukba, Mesir mutuku nirya weika arye langdibuk.

²⁴ Ton ning ara, weik dekne duk-duka purwu mok babye, bebeya lingum ana babye, aning-aning nirya tabakuka, weika arye dopkwetebuk. Aning ara, Mesir mutuku noutamak ton kum winilamuk ning winibuk. Winibukba, ikin weik ubuk.

²⁵ Allah arye, dekne duk-duka purwu mok dopkwetebukba, amutuku sakukce obuk. Ara, aning-aning nirya buru palamle ning ap, ninye ap, ninye arye weilamik ning ap, ninye arye koulamik ning nirya ap, sik deice obukba malye kibuk. Tonda yo aning-aning nirya, dekne duk-duka purwu mok sakuka obukba, yo bok nirya kum kipdeibuk.

²⁶ Israel ninye ulamikak uk ara, Gosyen mutuku ara, weik dekne duk-duka purwu mok tonok babye, pia kum sakuk. Amutuku tonok ara, teleb ubuk.

²⁷ Winibukba, Firaun birye Musa ap, Harun ap ati, yukubuk. Sik yarikura, Firaun birye nyabuk. “Wini talak ara, narye malye upmane. Allah arye ikin ning, na deice deipmanil ning ara, dipkoprob telebuk upmanile. Bukni na ap, na amu tam unyak ninye ap arye, malye wininyabe.

²⁸ Nun dam ikin ning weik, liman ap, dekne duk-duka purwu mok ap weik wininmasilba, ilil upmasila ati, aning nirya ‘Kum upnamle’ tenen, Allah moropnamsurume. Narye anggun batakdongopsinyeba, binamlume. Tonap talipsiniba, amutuku pia kum unamlume,” Firaun birye nyabuk.

²⁹ Musa birye tamubuka, Firaun biti nyabuk. “Na minopce amutuku weik kota noutamak arye binuka, yukak binirye, na taruk erebuka, narye Allah ati moropnyopura, liman ap, dekne duk-duka purwu mok ap, adiparyuk kum danamale. Winiplya deice arye, an kel biknamlame. Ara, ‘Diba mutuku-mutuku nirya ara, Allah el si ara Yahweh, elcuk talibuka ulule’ tenen, kel kipnamlame.

³⁰ Aning winipnamne bukni, na kele, an ap, an pil dona deiyok nang ap, anggun nirya ara, ‘Allah, el mikip weik ulule’ tenen, el Yahweh ati ilil kum usulule.” Musa arye, Firaun biti nyabuk.

³¹ Ura, Allah arye dekne duk-duka purwu mok dopkwetebuk talak ara, Mesir mutuku nang arye, wa wibuka kouamik ning nirya ap, talye palamle ning sikil ap, malye kibuk. Ara, palamle talye dobuka dilamak ning, el si celai ap, pabuka duk mouplirye, weik ulamle ning ara, dekne duk-duka purwu mok sakukce obuk. Tonda, sikil atonun ning, el si erami pabukce, kita pobuk talak ara, dekne duk-duka purwu mok sakuka, obukba malye ubuk.

³² Bukni, paplirye duk moulamle ning ara, gandum ap, yuk yala ning ap, kum obuka ati ara, min kum winibuk. Ara, li kabul talak atia.

³³ Musa el yupu nirya akunum nyabukce, Firaun dam batakuka, yuk bai mutuku yukak biyuk. Biyukce, el taruk erebukce, Allah ati morobukba, atalak ara, liman ap, dekne duk-duka purwu mok ap, talye mok ap, tukwak mutuku ton kum dopkwetebuk.

³⁴ Atalak babye, Firaun dinmokba, weik dekne duk-duka purwu mok ap, talye mok ap, liman ap, adiparyuk tunimabukba eibuk. Eibukopura, pia mandipna kanye dobuka kum kekamna atonun malye kibuk. Ara, el ap, el amu tam pil dona deiyok nang ap, pia malye kibuka, winibuka talima kat ubik.

³⁵ Firaun pia mandipna kanye dobuka, kum kekamna atonun, el talima kat ubuka ati ara, Allah arye nyapdeibukba, Musa birye nyabuka atonun, Firaun kum kekebukce, ‘Israel ninye batakniba kum binamake,’ tenebukce nyabuk.