Keluaran 8 - Eipomek

Allah el si Yahweh arye, Mesir mutuku Yakai, weik arebuk yupu

¹ Ura daulamika ani, Yahweh arye Nil mek malye kipdeibuk sum arye nukuka, like tekbarye sum akunum ubukba, Allah arye, Musa biti nyabuk. Anda Firaun dam bimince, nyapnamlyame. “Allah el si Yahweh arye, nyapkile. ‘Israel ninye arye, na si erepnamniak’ tenen, ance aninye ati batakdongopminyeba, ninye kum mutuku noutamak binamake, nyapkise.”

² “Ati, anda na yupu kum kekepnimince, ‘Bana kume,’ nyapniminyopura, narye anggun mutuku noutamak nirya, yakai pia weik arepnamkine.

³ Nil mek pum bisik arye, yakai nukmanto kum pia weik uplirye, mek pum bisik arye yakai weik weleplirye, Firaun an weiknye aik bunak ap, an manak ap, yakai weika arye, langdipnamle nyabuk. An amu tam pil dona deiyok nang, sik aik pum ap, Mesir mutuku ninye sik din aik ap, sik din dan aik ap, sik un aik nirya ara, yakai weik weknamle.”

⁴ “Yakai anirya bulubuka, an dam weik yanuka wekicopura, an ap, an pil dona deiyok nang ap, Mesir mutuku ninye nirya ap, anggun nong deice welepsikba, anggun nirya malye kanye bopnamlume.” Allah arye Musa biti, akunum nyapdeibukce, “Firaun dam nyalbinulyame,” nyabuk.

⁵ Aminyan talak Allah el si Yahweh arye, Musa biti, nyabuk. “Ance, Harun biti nyapnulyame. An taruk deice boplum kama ara dobuka, Mesir mutuku mek deice nirya lumupnulyame. Ara, talye balul mek deice ap, talye delilamle mekwen deice ap, mitik mek mekwen nirya ap deice lumupminyeba, yakai weik weleplirye, Mesir mutuku nirya langdipnamle,” nyabuk.

⁶ Nyabuk touk, Musa birye Harun biti nyabukba, Harun el dungulamuk kama arye, Mesir mutuku noutamak uamuk mek nirya deice lumubukba, yakai weik welebukce, Mesir mutuku nirya langdibuk.

⁷ Winibukura, sik Mesir mutuku noutamak, ninye kum winipmanto ning, asing keten nang kele weik nang arye, sik babye atonun, Isa Mutuku Dongonye mikip deice malye pil dobikba, yakai pia weik Mesir mutuku nirya langdibuk.

⁸ Winibukopura, Firaun birye, Musa ap, Harun ap ati, yukubukura, sik akunum yarikopura, nyabuk. “Anggunce, Allah el si Yahweh ati moropdumunyopura, yakai nirya kum danamle. Na dam ap, na mapu dam ap ara, kum uplyopura, narye an mapu Israel ninye batakniba, anggun bitinye ap, bitinge. Bimunyopura, anggunce kam ning obuka, Allah Yahweh, el si erena ati, Allah arepnamlume,” nyabuk.

⁹ Firaun birye nyabukura, Musa birye, tamubuka nyabuk. “Anda weiknye uminya anya arye, ance, ‘Asum teleb’ tenen, wibuka nyapniminyopura, narye Allah moropnamane. Winipniba, an pil dona deiyok nang ap, an ap, Mesir mutuku ninye nirya ap, anggun aik ap, talye sukum nirya ap, yakai pia weik upmal ning ara, kum uplirye, tamubuka Nil mekinuk wekelbinamake,” nyabuk.

¹⁰ Musa nyabukura, Mesir mutuku ninye deiyoknye Firaun birye, nyabuk. “Ambusum Allah moropnamnurum do?” nyabuk. Nyabukura, Musa birye tamubuka nyabuk. “An nyapmanilama atonun winipnamane. Ara, ‘Allah yuk ton kum ulule. Sik ni Yahweh, Allah el tonok ulula’ tenen, kel kipnamalama ati, Allah moropnamakine.

¹¹ Allah moropnyopura, yakai kum danamle. Ati ara, yakai anggun asik ap, anggun dam ap upamala ara, an ap, an pil dona deiyok nang ap, Mesir mutuku ninye aik pum upmala ning nirya ap, nirya kum danamle. Anirya ubuka, Nil mekinuk wekelbinamake,” Musa birye nyabuk.

¹² Musa ap, Harun ap, weiknye Firaun batakuka yukak birikce, Musa birye Yahweh biti, morobukura, ‘Firaun dam yakai weik areplumba weik ubuk ning ara, kum kibuka deiptume,’ nyabuka, morobuk.

¹³ Morobukura, Allah el si Yahweh kekebukce, aning nirya, Musa nyabuk touk winibuk. Winibuka deice arye, Yakai weik aik pum bisik upmok ning ap, asik dam upmok ning ap, sik wa win dam upmok ning ap, bai tam talye upmok ning ap, anirya aunmekakuk dibik.

¹⁴ Mesir mutuku ninye ulamikak arye, yakai weik dibik. Yakai pia weik dibikba, amutuku ninye arye, sik nong bulubuka deibikba, pia weik ubuka ati, akunum lyubukce, amutuku-amutuku nirya, tong weik welebukce, tong weik nyalamuk.

¹⁵ Anirya winibuk bukni, weiknye Firaun birye, yakai nirya akunum dibikba eibuk. Eibukopura, ‘Naie, winira kanam asa upsile,’ tenebukce, Allah arye winipmok ning kum tenebukce, el talima tuba kat kibuka malye kibuk. Allah arye, “Firaun malye kibuka wininamle,” nyabuk touk, Musa ap, Harun ap, sik nyaprik yupu kum kekebuk. Tuba talima kat kibuka, mandipna kanye bobuk.

Allah arye, Mesir mutuku, suma weik arebuk yupu

¹⁶ Allah el si Yahweh arye, Musa biti nyabuk, “Ance Harun biti nyapminba, el kama tuku deice kulapliba, Mesir mutuku noutamak ubuk tuku butbuta nirya ara, suma danamle,” nyabuk.

¹⁷ Nyabukura, Harun el kama arye, tuku deice kulaplobukba, Mesir mutuku kal-kal alamuk tuku butbuta nirya, suma dayuk. Suma dayukce, Mesir mutuku nirya, suma pia weik arebukba, suma ubuka langdibuk. Langdibukba, ninye ap, sik weilamik ning ap, anirya amubuk.

¹⁸ Winibukba, aning-aning nirya, asing keten nang weik kel nang arye, ‘Nun babye, atonun ubibiba, tuku kel-kela arye deibum danamle’ tenen, sik babye Isa Mutuku Dongonye mikip deice arye winipdeyikbuk, kum winibuk. Piripdeyik bukni, suma kum ubuk. Sik malye pil deice kum bukni, amutuku nirya noutamak ara, ninye ap, sik weilamik ning ap, suma weika arye amulamik.

¹⁹ Winibuka ati, sik weik kel nang arye, Firaun biti, nyabik. “Se, diba Allah mikipnye, el taruk deice arye, amalye ning arebukba usulule,” nyabik. Nyabik bukni, Firaun tuba talima malye kibukce, kat kibuk ati, ‘Allah arye nyapdeibukba, Musa ap, Harun ap, nyarurak ning ara, kum kekepnune’ tenebuk. Ara, Allah el si Yahweh arye, “Firaun malye kibuka, mandipna kanye bopnamle,” nyabuk touk winibuk.

Allah arye, Mesir mutuku noutamak nirya, deibum arebuk yupu

²⁰ Allah el si Yahweh arye, Musa biti nyabuk. Ambusum beren tam bukukapmince, weiknye Firaun mekinak bilye talak ara, an babye bimince, Firaun eipminyopura, nyapnamlyame. Nyapnulyame, “Allah el si Yahweh arye, nyapkile. ‘Israel ninye arye, na si erepnamniak’ tenen, ance aninye ati batakdongopminyeba, binamake.

²¹ Anda malye kibuka upmince, na yupu kum kekepnimince, ‘Israel ninye bana kume,’ nyapminyopura, narye sik mutuku noutamak nirya deibum weik arenamane. Arepneba, an ap, an pil dona deiyok nang ap, anggun amu tam unyak ninye nirya ap, Mesir ninye sik aik noutamak nirya ap, sik unyak mutuku nirya ap, deibum weik arepneba, langdibuka weik upnamle. Allah arye nyapdeipmakile.” Allah arye Musa biti, “Ayupu Firaun dam nyalbinulyame,” nyabuk.

²² Nyabukce, ayupu ton nyabuk. “Deibum weik arepnamkin talak ara, narye Israel ninye unyak mutuku, mutuku si Gosyen mutuku noutamak ara, deibum weika arye kum arepnamkine, Firaun an mutuku koproba uk, arepnamkine. Winipnya deice arye, anda, ‘E dipkoprob Allah el si ara Yahweh, nun mutuku noutamak pil donamasile’ tenen, kel biknamlame.

²³ Narye pil yuk-yuk bokdeipnamne. Israel ninye ap, Firaun an amu tam unyak ninye ap ati, atonun kum winipnamne. Firaun an amu tam ninye unyakak ara, deibum weik upnamle. Israel ninye unyakak ara, deibum kum upnamle. Aning, ambusum ninye kum winipmanto ning, na dem aryuk winipnamane. Winipniba ninye nirya arye, ‘E dipkoproba Allah aryuk apil dopsile’ tenen, kel biknamake. Tonda, Firaun an bidamang arye eipnamalame,” Allah arye Musa biti nyapdeibukba, Musa kekebukce, Harun biti laka nyabukba, Harun birye, Firaun ati nyalbiyuk.

²⁴ Allah el si Yahweh arye, nyapdeipmok touk winibuk. Ara, amutuku deibum weika arye, arebukba, Firaun el weik aik ninye deiyoknye aik ap, el amu tam pil dona deiyok nang sik aik ap, Mesir mutuku dana-dana nirya deibum pia weika arye arebukba, Mesir mutuku nirya, pia malye kibuk.

²⁵ Winibukopura, Firaun birye, Musa ap, Harun ap ati, yukubuk. Yukubukce, nyabuk, “Ura akunuma, yuk mutuku kum bukni, na mutuku noutamakuk bimunce, anggun Allah si erena ati, kam un ning obuka arepnamlume,” nyabuk.

²⁶ Nyabuk buk, Musa birye tamubuka nyabuk. “An nyapmalama ara, nunce kum winiptibye. Nun Israel nang arye, Allah si erena ati kam ning obuka, Allah ati arepnamap ning ara, Mesir ninye arye, ‘Se, pia malye ning wininmake’ tenebikirye, yu upliba, keil dobuka opsitingopura, yata wiriptibye do? Malye tenepsicopura, kum opnamsiyak do?” nyabuk.

²⁷ “Nun adiparyuk yini mutuku bukni, yukak ninye una kum mutuku like winilye, bitipyopura, nun ni koproba Allah si erena ati, kam ning obuka, elti, areptibye. Allah el si Yahweh arye nunti, ‘Aning ara winiplulume,’ nyasilye touk, winipre banamabe atia,” Musa birye nyabuk.

²⁸ Nyabukba, Firaun birye tamubuka nyabuk. “Yo telebe. Narye anggun batakdongopsiniba, ninye kum unyak mutuku noutamak binamlume. Winibuka bimunce, Yahweh el si erena ati, kam ning obuka arepnamlume. Binamlum bukni, anggun adiparyuk, pia pera mutuku kum binamlume. Damtoto sukum bana ara telebe. Tonda, anggun ni koproba Allah, el si Yahweh arye, ‘Firaun melipnamle’ tenen, anggunce nati Yahweh moronamnulume,” Firaun birye Musa biti nyabuk.

²⁹ Nyabuk buk, Musa birye tamubuka nyabuk. “Aning akunumopura, nun binamaba ati, an dam akunum batakuka binirye, narye Yahweh moropnyopura, ambusum ara, deibum nirya an dam ap, an pil dona deiyok nang ap, anggun amu tam unyak ninye nirya aubuk ning ara, kum danamale. Nyabuka moropnamakin bukni, ance nunti talye nyaplopsimince, ‘Israel nang ara, Allah el si Yahweh, el si erena ati kum binamake,’ nyapsiminyopura, ikin upnamkile,” Musa birye Firaun biti nyabuk.

³⁰ Akunum nyabukopura, Musa birye Firaun dam batakuka, yukak biyukce, Allah el si Yahweh ati morobuk.

³¹ Musa birye, Yahweh morobukba, Musa moropmok touk, deibum ara, Firaun dam ap, el pil dona deiyok nang ap, sik amutuku ulamik nang nirya ap ara, sik dam arye ubuka deibum bindobik. Deibum tonok ning babye, ton kum ubuk.

³² Bukni, atalak babye, Firaun birye, aning babye kum kekebukce, el talima tuba malye kibuk. Kibukce nyabuk. “Aninye ara, pia kum binamake,” Firaun birye nyabuk.