Keluaran 7 - Eipomek

¹ Musa arye ayupu nyabuka ati, Allah el si Yahweh arye Musa biti, tamubuka nyabuk. Teneipdelyame, na dipdekisirye ereipkise. Aning ati, narye anti yupu nyapkiniba, ance an du Harun biti, laka nyapminba, elce Firaun dam nyapnamle. Firaun arye anti, ‘E anye Musa birye nyanulul yupu ara, Allah arye nyapnamnutua atonunuka,’ tenenamkile. Tonda, an du Harun bira, na tenepnye yupu nyapkiniba, ance elti, nyapminyopura, elce an melina ati, Firaun el dam nyanamle. Ance nyapminba, Harun birye, ‘Allah arye nyapsile,’ nyabuka, Firaun ap, yuk nang ap ati, laka nyanamle. An melina ati, elda nabi atonun kibuka unamle. Anirya ara, na Allah winipnamnarya.

² Na Allah arye, ‘Aning ara wininamlulume,’ nyabuka, nyalinamkin yupu nirya dobuka, an du Harun biti, laka nyapnulyame. Ayupu kekebuka laka nyapminba, Harun birye melipkilyopura, Mesir mutuku ninye deiyoknye, Firaun dam nyalbinamlyame. Nyapnamlyame, ‘Firaun anda adiparyuk Israel ninye unyaka batakdongopminba, yuk mutuku ubuka binamake. Allah arye nyapdeipmakile,’ nyabuka nyalbinamlyame.

³ Nyapnamle bukni, narye, ‘Firaun kum kekepnamle’ tenen, talima malye un ning, Firaun biti arepnyopura, el kum kekenamle. Narye ninye winipmanto kum ning, weik mambul ning ap, kanye imun ning ap, weika arye tabakuka, Mesir mutuku deipnamne.

⁴ Weik kanye imun ning, weik areptinya babye, Firaun kum kekepnamsile. Ati ara, na yu dobuka, Mesir mutuku deipnirye, mikip arye wenepnamne. Weik ikin ning deipnamne deice arye, ‘Naʼ tenen, ninye, Israel ninye Mesir mutuku unyakce, ikin pil donyak noutamak lobuka, yuk mutuku lyebuka bobinamne.

⁵ Aning nirya akunum winipnyopura, adeice arye, Mesir mutuku nang eibikirye, kel biknamake. Ara, ‘Se, anye mikip weik arye, kanye imun ning weika arye deipmasilnye bira, ara dipkoprob Allah Yahweh, elda Allah ulule. Atalak ara, ‘Na Allah arye, Mesir ninye noutamak arye, Israel ninye, sik ayala-yala nirya lobuka bobinyopura, Mesir mutuku ninye nirya kel kipnamniyake.’ Allah arye, Musa biti nyabuk.

⁶ Ura Musa ap, Harun ap, Allah el si Yahweh arye, “Aning ara winipnururume,” nyapdeibuk touk, aninguk winiprik.

⁷ Sik bitinye, Firaun dam nyalbirik talak ara, Musa el keting tamun ara, 80 tahun kibuk. Aning atonun, el du Harun bira, el keting tamun 83 tahun kibuk.

Harun El kama ati, nyabuk yupu

⁸ Ura, aminyan talak ara, Allah el si Yahweh arye, Musa ap, Harun ap, ati, nyabuk.

⁹ “Musao, Firaun birye, ‘Ninye kum winipmanto ning winipminba eipnune,’ nyapnamkile. Nyapsilyopura, ance, Harun biti nyapminba, Harun birye, ninye kum winipmanto ning wininamle. Ara, Harun el kama dobuka, Firaun dinmalyak tukwak deipdongopliba, adiparyuk akama ara, kwatima danamle,” Allah arye nyabuk.

¹⁰ Musa ap, Harun ap, Firaun dam birikce, Allah el si Yahweh arye, ‘Aning winipnamrurume’ nyapdeipmok touk winiprik. Ara, Harun el kama dobuka, Firaun ap, el pil dona deiyok nang ap, sik dinmekak tukwak deiplobukura, adiparyuk kwatima dayukba, sik nirya eibik.

¹¹ Winibukopura, Firaun birye, ninye kum winipmanto ning weik kel bikuka, Mesir mutuku ulamik nang ap, asing keten nang nirya ap yukubukba, yayik. Yayikopura, sik Isa Mutuku Dongonye mikip deice arye, aning atonun winibik. Sik yuk-yuk bukni, sik kama nirya tukwak deiplobikba, kwatima dayuk.

¹² Sik bomik kama yuk-yuk deiplobikba, akama nirya ara, kwatima dayuk. Kwatima dayuk bukni, Harun el kama arye, sik anang kama nirya dibuk.

¹³ Winibuk bukni, Firaun el talima kat kibukce, ‘Sik nyapmarak yupu ara, kum kekepnune’ tenebuk. Malye kibuka kekena kum ubuka deiyok ara, Allah el si Yahweh arye, Musa ati, ‘Firaun kum kekepnamsile’ nyapdeiamuk touk winibuk.

Allah el si Yahweh arye arebukba, mek si Nil mek ara, ninye ining atonun kibuk yupu

¹⁴ Yahweh arye, Musa biti, nyabuk. “Firaun talima kat uplirye, Israel ninye bana ati, ‘Telebe dabilulume,’ pia kum nyapnamle,” nyabuk.

¹⁵ Wini talak ara, an Firaun dam biminyopura, beren tam talak el minopce, Nil mekin balamlakuk bimince, ‘El yanul’ tenen, asukumuk binuka dinamalyame. Tonda, an boplum kama deiplopminba, kwatima danalye kama talibuka binulyame.

¹⁶ Daunmaminyebuk, Firaun weiknye yalyopura, ance elti, nyapnamalyame, “Israel ninye talibuka ulul Allah Yahweh arye, na wipdeipnuke. Allah arye nyapnuke. ‘Firaun kekena ati, ayupu nyalbinamle,’ nyapnuka ati, wini talak an kekena ati, nyapnukine. Allah arye anti nyapkile. ‘Israel ninye arye, na si erepnamniak’ tenen, ‘Ance aninye ati, batakdongoplyame, ninye kum mutuku noutamak binamake,’ nyapkise. Ayupu tuba nyakinyap bukni, atalak arye dipdongobuka, otalak noutamak nirya ara, na yupu kum kekepmanto ulyame.”

¹⁷ Allah el si Yahweh arye nyapkile. ‘Na winipnamne ning eipminya deice arye, ‘Kume, Yahweh ara, dipkoprob Allah ulule’ tenen, kel biknamlame. Mambul ning winipnyeba eipnalame. Na Allah ununa ati, Musa bolye kama dipdelyame. Musa el kama arye, Nil mek deice deiplopliba, aminyan ninye ining atonun upnamle.

¹⁸ Winipliba, Nil mek noutamak ulul mekwen pum bal nirya dipnamake. Winiplyopura, Nil mek pum nirya, tong weik welepnamle. Winipliba, Mesir ninye, sik mek dina ati, kum dipmanto upnamake. Kanye imun upliba, malye kanye bopnamake.’ Allah arye, Musa biti nyabuk.

¹⁹ Ura, nyabuk aminyan talak ara, Allah el si Yahweh arye Musa biti, ayupu ton nyabuk. “Ance, Harun biti nyapminba, el kama dobuka, Mesir mutuku noutamak aubuk mek nirya, talye balamle mek babye, talye mekwen babye, mek durun mek babye, weik ning ap, mitik ning ap nirya ara, kama arye, Mesir mutuku aubuk mek deice kulaplopliba, amek nirya, ninye ining atonun danamle. Mesir mutuku noutamak aubuk mek nirya ara, ember makau pum bisik noutamak kwepmace ning babye, dokola delina ning ati, makau pum bisik dikdongobik ning babye nirya ara, ninye ininguk danamle.” Allah arye nyabuk.

²⁰ Nyabuka ati, Musa ap, Harun ap, Allah el si Yahweh arye nyabuk touk, winiprik. Harun birye akama dobuka, Firaun ap, el amu tam ninye deiyok nang nirya ap, sik dinmekak arye, Nil mek deice deplobukba, amek nirya, ninye ining atonun kibuk.

²¹ Winibukopura, Nil mek noutamak ulamuk mekwen pum bal nirya dibikba, Nil mek pum nirya tong weik welebuk. Pia malye ubuka ati, Mesir ninye, sik mek dina ati, amek kum dipmanto ubik. Nil mek ap, Mesir mutuku noutamak balamuk mek ap, talye aubuk mek nirya ara, ninye ining atonun ubuk.

²² Bukni, Mesir mutuku aning-aning nirya weik kel nang, Asing kwa keten nang ap, sik Isa Mutuku Dongonye mikip deice arye, aninguk, ninye kum winipmanto ning, mek ining dayuk ning ara, atonun winibik. Winibika ati ara, Firaun el talima kat ubuka deice arye, malye kipdeibukba, sik bitinye Musa ap, Harun ap nyaprik yupu kum kekebuk. Firaun kum kekepmanto ubuk ning ara, Allah el si Yahweh arye, nyabuk touk winibuk.

²³ Firaun sik yupu kum kekebukce, malye kibukce, el weik deiyoknye aik pum bisikuk tamubuka biyukce, ‘Awinipmal ning ara, mambul kume. Daupmalye kum kekepnune. Aning ara, talye ning uka,’ tenebuk.

²⁴ Winibuka anya arye, Mesir ninye nirya arye, Nil mek noutamak balamuk mek kum dipmanto ubuka ati, amek balamukak kup-kup binuka, ‘Mek ara tuku pum bisik aupmal do?’ tenen, palibuka dipre biyik. Bukni, Nil mek noutamak balamuk mek ara, kum dipmanto ubuk. Ati ara, sik mek dina ati, tuku palibikba mekwen deibukopura, kwebuka dilamik bukni, Nil mek ara, pia kum dipmanto ubukba, kum dilamik.

²⁵ Allah el si Yahweh arye, Nil mek malye kipdeibukura, like tekbarye sum deice arye, amek nirya ara, teleb kum kibukce, amek nirya pia malye ubukba, kum dipmanto ubuk.