Keluaran 6 - Eipomek

Allah arye, “Na tenen nang lyepnamne” nyapdeibuk yupu

¹ Ayupu nyabukopura, Allah arye Musa biti ayupu ton nyabuk. “Nara an ni koproba Allah unun bukni, na si koproba ara, Yahweh unune,” nyabuk. Ayupu nyabukopura, Allah arye ayupu ton nyabuk. “Wini talak ara, na Allah arye Mesir mutuku ninye deiyoknye, Firaun biti, el deice ikin weik deipnamne ning ara, an ton eipmince biknalame. Ara, na mikip weik taruk deice mambul pil dopnyopura, Firaun birye, na mapu koproba, sik Israel nang ati, lopdeipliba amutuku batakuka bindopnamake. Dipkoprob, na mikip weik deice arye, pil dopneba, Firaun birye sik Israel nang nirya ati, ‘Na mutuku noutam unmaka ara, na lik ati, adiparyuk bindopnamake,’ teneplirye, yakuka dopkwetepliba, sikda Mesir mutuku batakuka yuk pera sukum bindopnamlulume.” Allah arye Musa biti nyabuk.

² Nyabukopura, Allah arye Musa biti, ayupu tonap dukgobuka nyabuk. “Nara Allah Yahweh unune.

³ Nara sik minop talak ulamik nang, sik si ara Abraham ap, Isak ap, Yakub ap, yuk-yuk bukni, sik dam talye karin arye tikuka nyalyangalamse. Sik dam nyalyangalamse bukni, sik dam binuka yupu nyalamse talak ara, ‘Nara, Allah unune. Tonda, narye aning-aning nirya talibuka, pia deice tam unirye, pia Mikip Weik Deiyoknye unune,’ nyabuka yangalamsiba, sikce bikamnik. Asi deice arye sikce bikamnik bukni, sik dam nyalyangalamse talak ara, ‘Sikce na si koproba moubuka biknamniak’ tenen, na si Yahweh ara, lak kibuka min kum nyalamsa ati, sikda na si koproba, Yahweh deice arye, kekebuka kum bikamnik. Na si Yahweh ara, sik dam lak kibuka kum nyalamsa atia.

⁴ Tonda, na Allah arye, Israel nang, anggun punun nang ati, nyalin yupu deice arye nyapse. ‘Israel yala nang nirya ati, Kanaan mutuku nirya arepnamsine. Amutuku nirya ara, sik talibikirye, amutuku ara anggun mutuku kipnamle’ nyapdeipse. Winibuka nyalin yupu deice arye nyapsirye, sik bobinuka, Kanaan mutuku noutam bobinuka deipseba, daulamik bukni, atalak ara, amutuku sik mutuku min kum ulule. Sik punun nang nirya talye tikilyangan nang, ninye asik nang ulamik touk, atalak babye sik Israel nang atonun tuba unyake.

⁵ Aninguk kum bukni, tonda wini talak ara, Mesir nang arye Israel nang ati, ikin pil dilamikba, dolamikce, malye nyalamik ning ara, akunum kekepse. Tonda tuba kekenune. Tonda, narye sikti, ‘Na tenen nang ubikiba, anang ati, pia teleb mutuku arepnamsine’ tenen, ‘Winipnamsine’ nyabuka nyalin yupu nyapdeipse ning ara, tuba teninune.” Allah arye nyabuk. Nyabukce, ayupu ton nyabuk.

⁶ Ati ara, Israel nang nirya ati, nyapnalame. Allah arye nyasulule, “Nara anggun ni koproba Allah, na si Yahweh unune. Na mikip deice arye, Mesir nang anggun nong deice ikin pil weik disinyak noutam ara, lyepdopnamsine. Ara, na mikip ap, mambul weik ning winipnamne deice arye, Mesir nang wenebuka opnirye, lyepnamsine.

⁷ Winipnye talak ara, dopropsinirye, anggunda na mapu koproba unamlume. Nara anggun ni koproba Allah unamne. Winipnye deice arye, anggun biknumunce, ‘Se dipkoprob Yahweh, elda nun ni koproba Allah usulule. El mikip deice aryuk, Mesir mutuku ikin pil dolamupu noutam arye akunum lyepdopnamsil’ tenen, biknamnululume.

⁸ Tonda, na taruk erepsirye, Abraham ap, Isak ap, Yakub ati, ‘Amutuku dipkoprob arepnamsine,’ nyabuka nyalin yupu mikip deice arye nyapdeiamse ning ara, anggun Israel nang nirya dobuka, amutuku bobinamsine. Winipnirye, amutuku nirya arepsinyeba, anggun mutuku pia upnamlume. Angguncuk, amutuku nirya talinaluma ati, anggun ninguk pia aunamle. Deiyok ara, na anggun ni koproba Allah Yahweh unirye, ayupu nyapmasina ati, dipkoprob nong upnamle.” Allah el si Yahweh arye, Musa biti nyabuk.

⁹ Allah arye Musa dam nyapdeiamuk ning nirya ara, Musa birye Israel nang dam binuka lak nyabukba, Israel nang arye el yupu kekebik bukni, diba kum tenebika ati, elti, tamubuka kum dobolbalamik. Deiyok ara, ikin pil dolamik ati, mambul kanye bobuka ulamik deice arye, talima mitang kibukba, teleb ubuka kum tenepmanto ulamikce, Musa biti diba kum tenebikce, ‘Musa birye talye yupu nyapmasile’ tenebik.

¹⁰ Winibikba, Allah el si Yahweh arye tamubuka Musa biti nyabuk.

¹¹ “Mesir mutuku ninye deiyoknye Firaun dam binuka nyapnulyame. ‘Israel nang batakminyeba, Mesir mutuku arye batakuka, yukak binamlume,’ nyapnulyame,” nyabuk.

¹² Allah arye nyabuk bukni, Musa birye tamubuka, Allah el si Yahweh ati tamubuka nyabuk. “Israel nang na yupu kum kekeniyaka atonun, na pia keil kumnye ununa ati, na yupu ara ikin aryuk nyanuna ati, Firaun babye, el dam talye nyaptinya babye, Firaun birye, na yupu kum kekepnamnile,” nyabuk.’

¹³ Allah, el si ara Yahweh arye, Musa ap, Harun ati, mambul yupu nyapdeibuk. Tonda, Mesir mutuku deiyoknye Firaun ap, tonda sik Israel nang nirya ati, ayupu lak nyabuk. Nyabukopura, sik Musa ap, Harun ati, nyabuk. “Musa ap, Harun ap akunum wipdeiamsise deiyok ara, Israel nang nirya bobuka, Mesir mutuku arye, lobuka bobinamrurume,” Allah arye nyabuk.

Musa ap, Harun ap, sik apu yapu ati, sekuk yupu

¹⁴ Israel nang sik punun nang si ara ani. Min ara, na Musa ap, Harun ap, nun apu yapu asukum sekne. Ara, Yakub birye deibuk mapu dumbarye ara ani. Yakub birye min deiamuknye bira, Ruben. Ruben birye deibuk nang ara, Henok ap, Palu ap, Hesron ap, Karmi ap, deibuk. Anang ara, Ruben yala nang, sik apu yapu ulamik.

¹⁵ Ura, Simeon birye Kanaan tam kil dobuka, sik bitinye arye deiamrik mapu ara, pinbarye mapu deiamrik. Simeon elce deibuk nang ani. Ara, Yemuel ap, Yamin ap, Ohad ap, Yakhin ap, Zohar ap, tonda Saul ap deibuk. Anang ara, Simeon yala nang, sik apu yapu ulamik.

¹⁶ Ura, Lewi birye deibuk nang ara, winilye deibuk. Lewi birye deibuk nang ara, Gerson ap, Kehat ap, Merari ap deibuk. Anang ara, Lewi yala nang, sik apu yapu ulamik. Lewi bira, keting tamun yupa weik, seratus tiga puluh tujuh (137) tahun wisi danamuk bukni, dibuk.

¹⁷ Lewi birye deibuknye, el si Gerson, elce deibuk sal mapu bitinye. Sik si ara Libni ap, Simei ap ulamrik. Sik akunum neprikura, kil doprikce, mi ton deiprik. Sikce deiprikba, dadeipdanin yangalamik mapu ara, weike. Ara, sik abitinye mapu Libni ap, Simei ap, sik mutuku nang arye, mapu pia weik tonun deibik.

¹⁸ Lewi birye deibuknye, el si Kehat, elce deibuk sal mapu ara, dumbarye ulamik. Elce deibuk nang, sik si ara ani, ara, Amram ap, Yizhar ap, Hebron ap, Usiel ap deibuk. Kehat bira, keting tamun yupa weik, seratus tiga puluh tiga (133) tahun wisi danamuk bukni, dibuk.

¹⁹ Lewi birye deibuknye, el si Merari, elce deibuk sal mapu ara, bitinye ulamrik. Elce deibuk nang, sik si ara ani. Ara, Mahli ap, Musi ap, deibukba, ulamrik. Ura, asukum arye deice tam akunum nyabuka sekse nang ara, Lewi birye deibukba, sikce yuk-yuk bukni, deiamik mapu nirya ati, anang sik si akunum sekse.

²⁰ Ura, ninye si Amram, anye birye, el li koproba, el kwit kil dobuk. Akil el si ara, Yokhebed ulamuk. Ati, na Musa ap, na du Harun ap ara, nun ni koproba el si ara Amram, nun nin el si ara Yokhebed. Nun ni koproba Amram bira, keting tamun yupa weik, seratus tiga puluh tujuh (137) tahun wisi danamuk bukni, dibuk.

²¹ Ninye si Yizhar, elce deibuk nang ara ani. Ara, Horah ap, Nefeg ap, Zikri ap deiamuk.

²² Ninye si Uziel, elce deibuk nang ara winilye, sik si ara ani. Ara, Misael ap, Elsafan ap, Sitri ap deiamuk.

²³ Harun arye domuk kil, el si ara Eliseba. Ara, sal si Aminadab birye deibuk kilmu atia. Eliseba el ka bira Nahason ulamuk. Akil Eliseba birye deiamuk mapu ara, dumbarye ulamik. Sik si ara, Nadab ap, Abihu ap, Elieser ap, Itamar ap, winibuka nang ulamik.

²⁴ Ninye si Korah, elce deiamuk nang ara, winilye ulamik. Sik si ara, Asir ap, Elkana ap, Abiasaf ap ulamik. Anang dumbarye ara, Korah yala nang, sik apu yapu ulamik.

²⁵ Harun birye deibuknye, el si Eleasar. Eleasar birye domuk kil ara, sal mapu Putiel birye deibuk mi ara, kil dobuk. Eleasar ap, Putiel yala kil ap, tonoknye deiprik. Anye el si ara, Pihehas ulamuk. Ura, asukum arye deice tam ara, Lewi yala nang arye deibikba, dadeipdanin, yangalamik nang ara, sik si akunum sekdeipne.

²⁶ Na Musa ap, Harun ap, nun ni koproba Allah Yahweh arye, nun bitinye ati, nyapsuk. Ara, “Anggun bitinye akunum wipdeipmasina ati, narye, ‘Wininamrurume,’ nyapmasin touk, anggunce Israel nang, sik yala-yala nirya, yuk-yuk aunyak touk bobuka, Mesir mutuku batakmunce, panabuka banmamunyeba, Israel yala nang nirya, sik aminyan dobolyanganamake. Israel nang dobuka, yuk pera mutuku bobinamluma ati nyapsine.” Allah Yahweh arye nyapdeibuk.

²⁷ Nyapdeipnuka ati, nun bitinye arye, Mesir mutuku nirya taleamuk deiyoknye, Raja Firaun biti, el dam binuka, “Firauno, nun ni koproba Allah Yahweh arye, akunum nyapdeipkuk ning ara ani. Ara, ance sik Israel yala nang nirya batakminyeba, sik nirya ara, amutuku batakuka, yuk pera mutuku binuka unamake,” nyapnumu.

²⁸ Ura, Allah Yahweh arye, Mesir mutuku noutam ara, na dam yanuka, na Musa biti, lak nyapnuk yupu ara, ani.

²⁹ Ara, Allah arye, na Musa biti nyapnuk. “Narye nyapmakinye bira, Allah unune. Na si koproba ara, Yahweh unune. Narye, ‘Winibuka nyalbinulyame,’ nyapkinye touk, ance Mesir mutuku taleamuk ninye deiyoknye, Raja Firaun dam bimince, ayupu uk lak nyapnalyame,” nyapdeipnuk. Ara, “Ance Firaun biti, ‘Aning-aning nirya talibuka, ulya deiyoknye Allah arye nyapdeiamnuk yupu ara, narye anti nyapkine,’ nyabuka, lak nyalbinamlyame.” Allah arye nyapnuk.

³⁰ Nyapdeipnuk bukni, na Musa birye, Allah el dam tiksirye, tamubuka nyapse. “Se, na ni koproba Yahweh, an akunum biknulume. Nara, mambul yupu teleb kibuka nyapmantonye kum unune. Aning ara, an bikmanilame, yata wiribuka Mesir mutuku ninye deiyoknye Firaun birye, na nyaptinye yupu moubuka kekepnutu do? Kume, ara winipmanto kume. Narye nyaptinya babye, Firaun birye kum kekepnamnile,’ tenepne,” nyapse.