Keluaran 5 - Eipomek

Musa ap, Harun ap, Mesir mutuku deiyoknye dam, birik yupu

¹ Aminyan talak ara, Musa ap, Harun ap, Mesir mutuku deiyoknye, Firaun dam birikce nyaprik. “Nun Israel ninye, nun ni koproba Allah, el si Yahweh arye nyapmakil yupu nyapnuname. Ara, ‘Ance Israel nang ati, “Telebe,” nyapminba, ninye kum unyakak pata mutuku bikirye, na si erena ati, kwalina kwalibikirye, na si erenamniyake.’ Allah arye nyapdeibuke,” nyaprik.

² Nyaprikba, Firaun birye tamubuka nyabuk. “Allah el si Yahweh nyapmarumnye bira, yatato mikipnye ati do? Tonda ‘Na yupu kekepturye Israel ninye bataktue’ tenen, nyanmanil do? Kume. Anggun nyapmarumnye Yahweh ara, na walwalnye. Ati ara, Israel ninye kum batakloptiniba bitinge. Aning kum winipnamne,” nyabuk.

³ Nyabukura, Musa ap, Harum ap arye tamubuka nyaprik. “Nunda Ibrani nang, nun ni Allah, el si ara Yahweh. Nun ap, neika ansinibuka yupu talibupu. Ati ara, ance, ‘Telebe,’ nyabuka bataksiminba, ninye una kumak pata mutuku bisik, like winilye mabuka bibyopura, nun ni Allah el si Yahweh erena ati, kam ning obuka, el diamuk arenamabe. Aning kum winibipyopura, Allah arye nun wenena ati, nun damuk dipna deiyok ning arepnamsil do? Akumopura, ‘Elce nyapliba, nun mal olan nang arye, parang ya arye, dobuka olyanamsiyak do?’ tenen, ilil kanye bobuka unyaba ati, nyapname,” nyaprik.

⁴ Firaun arye Musa ap, Harun ap ati, nyabuk. “Yata deiyok ati ayupu nyaprum do? ‘Israel nang sik pil kum donamak’ tenen, nyaprum do? Anggun birurume, anggun babye, pil dona ati, dolbirurume,” nyabuk.

⁵ Firaun arye ayupu nyabukce, ayupu ton dukdongobuka nyabuk. “Israel ninye amutuku weik akunum unyak bukni, anggun bitinye arye, yupu weik nyanmaruma deice arye, Israel ninye ara, talye urdemuk unmake. Sik pil kum donmake. Teleb ning ara, ikin piluk doptinge,” nyabuk.

⁶ Winibuka tenebuka ati, asum aryuk, Mesir mutuku deiyoknye birye el melina nang ati yupu arebuk. Ara, Israel nang pil dona ati, Mesir mutuku kalikne nang ap, pil dona yupu bokolina deiyok nang ap ati, Firaun arye yupu arebukce, ayupu nyabuk.

⁷ “Anggunce Israel nang ati, ‘Batu telah dopnamak’ tenen, maning sekelilamluma kume. Wini talak ara anggun batakmunyeba, tuku pinin ning sik bidamang aryuk ebukabikirye, keil pala memepnunyake,” nyabuk. Nyabukce ayupu ton nyabuk.

⁸ “Batu telah keil pala kina ati, sik bidamang aryuk maning elbinamak bukni, arukmunyeba keil pala ara minop talak memelamik touk memepnamake. ‘Mitik anunuk memebicak’ tenen ati, moubuka kalikinamlulume. Deiyok ara, Israel nang sik pil dona lik ati ara, sikce wini talak nirya malye nyabikirye, ‘Se, Firaun arye telebe nyapsutuba bitibirye, nun ni Allah si ereptibye,’ nyanamake.

⁹ Ati ara, min arye ikin pil dobik bukni, wini talak ara, pia ikin weik pil tonap tabakuka sik nong deice deipmunyeba, sik Israel nang ara, apiluk dopra bakirye, talye-talye nyanmace yupu tonap kum kekenamake. Sik pil sirya dakan ninguk tenenamake.” Firaun birye nyabuk.

¹⁰ Firaun birye nyabuka ati ara, Israel nang pil dona ati, Mesir mutuku kalikne nang ap, pil dona deiyok nang ap biyikce nyabik. “Ninye deiyoknye Firaun birye nyapmasila ara, ‘Batu telah keil kina ati, maning kel-kela ning anggunti tuba kum arenamsine.

¹¹ Aning ati yatato ak do, anggun bidamang aryuk, kel-kela ning elbilulume. Bukni, anggun pil donamlum ning ara, mitik anun babye, kum bataknamlulume. Min arye batu tehel weik moubuka memepdeiamlum touk, tuba weika arye memepnamlulume.’ Firaun birye nyapmasil touk wininamlulume,” nyabik.

¹² Nyabika ati ara, Israel nang Mesir mutuku dana-dana nirya biyikce, ‘Kel-kela ning dan do?’ tenen, pia elbalamikce maning atonun ning bulubuka deibikce batu tehel keil weika arye memelamik.

¹³ Apil dolamik talak nirya ara, Mesir mutuku pil dona kalikna nang arye nyabik. “Kel-kela ning uamuk talak ara, keil memena ati, pil like tonok deice weika arye dolamlum atonun, tuba weika arye memepnamlulume,” nyabik.

¹⁴ Mesir mutuku deiyoknye, el mapu arye, ‘Israel nang pil weik donamak’ tenen, Israel nang noutamak bukni, pil kalikna deiyok nang wipdeibik. Ara, Israel nang wipdeibik ning ara, ‘Sik kayapu moubuka dinamak’ tenen, deibik. Israel kalikna ati wipdeiamik nang ara, Firaun el mapu arye kama dobuka sik nong deice kulabuka olamikce, ayupu nyabuka asibik. “Anggunda yata ati do? ‘Batu tehel keil pala winibuka-winibuka dopnamlulume’ nyabupu touk kum memepmalume. Atalak noutamak nirya, arup babye, ambusum babye, mitik anun uk dopmalumce sirya kum dakmaluma ara, yata ati do? Nun nyabupu touk weika arye kum memepmaluma ati, yata ati do? Min arye ulamluma atonunuka,” nyabuka wenelamik.

¹⁵ Winibuka daulamika ani, aobik ning ati, Israel ninye, sik pil dona deiyok nang, sik Mesir mutuku deiyoknye dam biyikce, ayupu nyabik. “Naio nunda an amu tam ubirye, an piluk donyap nang anya arye, yata ning ati nyapmalamba, an melin nang arye opmasiak do,” nyabuka asipdeyik. Tonda nyabik.

¹⁶ “Naio, an piluk dokinyap bukni, atalak ara kel-kela ning kum boipmasiak diparyuk, an pil deiyok nang arye, ‘Keil pala memeplulume,’ nyabuka nyasinyaka ara, yata deiyok ati do? Talyauk kulabuka osinyak bukni, nun malye winina kume, an mutuku nang aryuk malye winipman diparyuk osinyake,” nyabik.

¹⁷ Nyabikopura, Firaun arye, “Diba na kele, anggunda pil dona lik ninye uk ululume. Anggunce, ‘Se na nio, telebe nyapsutumba, bitibirye nun Ni Allah el si erena ati, kam un ning obuka, Allah ati areptibye’ nyabuka moronululum bukni, anggunda pil dona lik umunya deice aryuk ayupu nyanululume.

¹⁸ Ati ara, ayupu nyana bataklulume. Wini talak aryuk buru bimunce, na aruksise pil dolbilulume. Batu tehel keil pala deice memena ati, kel-kela ning tonap kum arepnamsiak buk, keil pala deice memena ara minop talak weika arye memelamluma atonun tuba winipnamlulume. Mitik anun arye, keil memena meme,” Firaun arye nyabuk.

¹⁹ Nyabukura, Israel pil dona deiyok nang arye kel bikikce, ‘Se, diba nunda kanye imun deice arye keil pala weika arye memenamabe. Elce, ‘Minop talak weika arye memelamlum atonun tuba weika arye memepnamlulume,’ nyapmasila ara, ikin weik unmabe,’ tenebik.

²⁰ Firaun dam arye batakuka biyik talak ara, Musa ap, Harun ap sikti, kalikuka bukmarikak biyikba epdayik.

²¹ Israel pil dona deiyok nang arye sik bitinye nang ati nyabik. “Nun patapsil ning ara ani. Ara, anggun winirumunye ning ara Allah el si Yahweh arye kel bikisulul ati ara, elce anggunti weneptue, nyapsiyabe. Deiyok ara anggun nyarumunye yupu ap, anggun winirumunye ning ap deice arye, Firaun ap el melin nang ap arye, nun nirya ati, ‘Nun like’ tenen, like tenesinyake. Wini talak ara, nun opmanto usinyaka ara deiyok anggunca,” nyabik.

Allah arye, “Na tenen ninye lobuka lyepnamne,” nyapdeibuk yupu

²² Musa tamubuka Allah el si Yahweh dam biyukce, Allah morona deice arye nyabuk. “Se na nio, yata ati Israel nang dam kanye imun ning weik deipmasilam do? Tonda ance ‘Musa ara Firaun dam yupu nyaplyopura, Israel nang sik nong deice ikin ning weik tonap deipnamle’ tenen, wipdeipnulum do?

²³ Na an si deice, Mesir mutuku deiyoknye dam nyalbise talak arye deiyok koubuka, anyapce dipdongobuka, anoutam talak nirya ara, Firaun arye ikin pil tuba arukunmasilce, kanye imun ning aresulule. Tonda, nun Israel ninye ara, an mapu unyap bukni, ance kum melibuka lyepmasilbuk, ikin weik tuba unyabe.” Musa birye Allah ati nyabuk.

²⁴ Ayupu nyabukopura, Allah el si Yahweh arye, Musa biti ayupu ton nyabuk. “Wini talak ara, narye Firaun ati wenebuka winipnamne ning ara, eipnalame. Na mikip weik pia weik ununa anya arye, na taruk mikip deice mambul pil dopneba, Firaun arye Israel ninye batakdongopnamle. Firaun arye, ‘Na like’ teneplirye malye kibuka wininamle bukni, na mikip taruk deice pil dopneba, elce Israel ninye batakuka el mutuku noutamak arye bobinamle.” Allah arye nyabuk.