Keluaran 4 - Eipomek

Allah el mikip, Musa deice deibuk yupu

¹ Musa arye, Allah ati nyabuk. “Sik Israel ninye, na yupu kum kekepnitingce, kum diba tenepnitinge. ‘Allah el si Yahweh, an dam yanatikukba kum eipmome,’ nyapnitingopura, yata winipnamne do?” nyabuk.

² Nyabuk buk, Allah el si Yahweh arye tamubuka, Musa biti nyabuk. “An taruk talipmalama ara, yata ning upmakil do?” nyabuka asipdeyukbuk, Musa birye, “Ara kama uk talipmane,” nyabuk.

³ Nyabukura, Yahweh arye nyabuk, “Abopmalam kama tukwak deiplyame,” nyabukba, Musa arye dobuka adeiplobukba, adiparyuk akama kwatima dayukba, Musa el ilil ati, kwarabuka biyuk.

⁴ Winibukba, Allah el si Yahweh arye, tonap nyabuk. “Tamubuka yamince, akwatima amu taliplyame,” nyabuk. Nyabuka ati, Musa birye akwatima amu talibukba, adiparyuk akwatima tamubuka kama dayuk.

⁵ Kama dayukba, Allah el si Yahweh arye ayupu ton nyabuk. “Awinipnamle ning ara, winipminba Israel ninye eibicopura, ‘E diba, nun ni koproba Allah, Musa dam yanuka tikukba eibuka ati, dib nyapmasile. Dipkoprop Allah el si Yahweh arye, nun apu yapu nang Abraham ap, Isak ap, Yakub ap ati, kalikuka melipnin yangalamuk Allah ara, Musa dam akunum yanuka tikukba eibuke,’ utenebuka, kel biknamake.” Allah arye nyabuk.

⁶ Nyabukopura, Allah el si Yahweh arye Musa biti, ayupu ton nyabuk. “An deice ongopmalam baju pum bisik, an ataruk dongoplyame,” nyabuk. Nyabukura, Musa taruk el baju pum bisik dongobukba, el taruk adiparyuk barye suse atonun, uk si kusta ibuka anya arye, dipna ning atonun kurun weik ubuk.

⁷ Winibukba, Allah arye Musa biti nyabuk. “Ura, ila tuba tonap, an taruk an baju pum bisik dongoplyame,” nyabuk. Nyabukura, Musa anyapmok touk, taruk dongobukba, el taruk adiparyuk barye suse atonun ning, el si ara kusta, kum dayukce, el nong nirya teleb kibuk touk, ila tuba tonap el taruk babye, telebuk kibuk.

⁸ Winibukba, Allah el si Yahweh arye nyabuk. “Ura, Israel ninye arye, ‘Kume, Allah arye pil dopmasile’ tenen, ninye kum winipmanto ning, kama kwatima danamlye ning winipminba, Israel ninye diba kum tenepkicopura, aminyan talak ninye kum winipmanto ning bitinye ning, winipdenamlyame. Taruk kweten ning kipnamlyame. Ara, Israel ninye arye, ‘Kume Allah arye pil dopmasile’ tenepnamake. Winipminba, ninye winipmanto kum ning don pil, like bitinye ning eibicopura, diba tenepnamak do, kum do?

⁹ Israel ninye arye, ‘Kume, Allah arye pil dopmasile’ tenen, na ninye winipmanto kum ning don pil, na arepnamkin bitinye ning winipminba, eipnamak bukni, an yupu diba kum tenebikirye, kum kekepkicopura, Nil mek mitik tonun kwebukapmince, katak yanuka diklopminba, amek tamubuka ining danamle,” Allah arye nyabuk.

¹⁰ Musa birye, Allah el si Yahweh ati, nyabuk. “Anyapmanilam bukni, na yupu nyana ara, minop talak arye dipdongobuka, wini talak ance ayupu nyapmanilam talak babye, na si bam bol ap, sitang ap, ikin upniliba, yupu teleb kibuka kum nyanune. Ati, yuk nang, na yupu kum kekepnamniyake,” nyabuk.

¹¹ Nyabuk buk, Yahweh arye tamubuka nyabuk. “Yatanye birye ninye sitang ap, yupu nyana ap, arelul do? Yatanye birye, ninye amul kunukna ap, yupu kum nyapmanto kina ap arelul do? Yatanye birye, ninye asing el lina ap, asing kuna ap arelul do? Kume, aning-aning nirya ara, malye ulina ap, teleb ulina ap nirya ara, na dem aryuk arenune. Nara Yahweh, nara Allah. Na uk ununa ati ara, yatanye birye ton, aning winiptu do? Kume, kum winiptue.

¹² Ati ara, wini talak binulyame. Ance nyapnamlam ning nirya ara, narye melibuka peterepkiniba, nyanamlyame,” nyabuk.

¹³ Nyabuk bukni, Musa birye tonap tamubuka nyabuk. “Naio na wini talak arye nyapkine. Na dolinina kume, yuk nang dopreipnulyame,” nyabuk.

¹⁴ Nyabuk buk, Allah el si Yahweh arye Musa biti, yu ubukce, nyabuk. “Lewi yalanye Harun bira, an du bitia? Na kele, elda yupu nyana weik kelnye dipkoprob ulule. El bisik noutam yanganmala ati ara, epdarumunyopura, elce anti kanye deipnukile,” nyabuk.

¹⁵ Nyabukce, ayupu ton nyabuk. “Aminyan talak ara, ance elti, nyapminyopura, elce nyanamle. Narye anti nyapkisa atonun nyapnulyame. Tonda, anggun yupu nyanamrum ning ap, pil donamrum ning ap nirya ara, narye melisinyopura, anggun pil dobuka, yupu nyanamdurume.

¹⁶ Elce an melina ati, nyanamle. Ara, an si deice ninye nirya kekenak, yupu nyapliba, sik nirya kekenamkiyake. Ance elti, nyapminye ning nirya kekebuka, ‘Allah arye yupu nyapnile,’ tenebuka, Harun kekenamkile.

¹⁷ Ati ara, ance akama bobuka balamince, ninye kum winipmanto ning winilaminba, ninye nirya kel biknamake. Ara, Israel ninye arye, ‘Kume, Allah arye pil dosulule,’ tenepnamak atia,” Allah arye Musa biti nyabuk.

Musa Mesir mutuku batakuka, biyuk yupu

¹⁸ Musa tamubuka, el yamal koproba Yitero dam biyukce nyabuk. “Wini talak ance nati, “Telebe,” nyapniminba, ‘Na asik nang tuba unyak do?’ tenen, Mesir mutuku dilbinamne,” nyabukba, “Yo, telebe, adiparyuk dabilyame. ‘Danirya teleb kipnamkil’ tenen, Allah moronamkine,” nyabuk.

¹⁹ Ura, Allah el si Yahweh arye, Musa biti aminyan talak ayupu akunum nyalamuk. “Midian mutuku yanuminye talak ara, nyapdeiamkise touk, tamubuka Mesir mutuku binulyame. ‘Musa opnamabe,’ tenelamkik nang nirya ara, akunum dibike,” nyabuk.

²⁰ Nyabukopura, Musa el kil ap, el mapu ap, sik mapu silip nirya ap, keledai basam deice bukuka, Mesir mutuku biyik. Sik biyik talak ara, Allah arye nyapdeiamuk touk, Mesir mutuku Musa el kama ap, bobuka biyuk.

²¹ Allah el si Yahweh arye, Musa biti nyabuk. ‘Ninye winipman kum pil donamle’ tenen, na mikip an deice arelamkisa anya arye, an Mesir mutuku biminye talak ara, ninye kum winipmanto ning nirya, Mesir mutuku nang, sik deiyoknye Firaun dam binuka wininamlame. Winipnamlam bukni, narye elti, kat kanye ning arepneba, elce, ‘Yo telebe. Israel nang Mesir mutuku batakuka bitinge,’ pia kum nyapnamle. Anggun talina uk unamsile.

²² Winibuka malye uplyopura, ance Firaun biti, ayupu nyapnamlyame. “Firauno, Allah arye nyapmakile, Israel ninye ara, Allah el mapu du mapu atonunuk unyake.

²³ Narye nyapkise. Aninye ara, na du mapu atonun ati, batakminba, sik bindopnamake. Bikcopura, na si erepnamniaka ati, sik bataknamlyame, akunum nyapkise. Akunum nyapkise bukni, anda malye kibuka weik upkukba, na mapu Israel ninye ati, ‘Kume, kum bataknamne,’ nyapmalama ati, narye an du mi babye opnamne. Allah arye Musa biti, Firaun dam ayupu nyalbinamlyame,” nyabuk.

²⁴ Allah arye nyabukura, Musa bisik banmok talak, bisik noutamak, yuk nang aik domikak mapnuyuk talak ara, Allah el si Yahweh yanuka, ‘Musa opnamane’ tenen, kintinibuk.

²⁵ Utenebukce, opnuyuk talak aniryuk, el kil Sipora birye, kurun keil dobukabukce, sik mi den bam bol mouse ning sekukabukce, Musa yan deice deibukce nyabuk. “Dipkoprop, anda na akanye. Ara, nun ni Allah arye anti, ‘Opnune,’ tenepmakil bukni, nun mi, koproba, el ining deice arye lyepmaken atia,” nyabuk. Ara, Sipora birye ayupu nyabuka deiyok ara, Israel ninye, sik mapu den bam bol mouse ning sekna tenena ati, ‘Anda na akanye, nun bidamnye ining atia,’ nyabuk.

²⁶ Sipora birye ayupu nyabuka deice arye, atalak ara, Allah el si Yahweh arye Musa biti, ‘Opnaman,’ tenepmok ning ara batakuke.

²⁷ Atalak ara, Allah el si Yahweh arye, Harun biti nyabuk. “Anda ninye kum unyak mutuku noutamak bimince, an weit koproba Musa ap, epdanamarurume,” nyabuk. Nyabuka ati, Allah arye nyapmok touk, Harun kekebukce, amutuku binuka, Allah min yuma talak yanuka tikamuk mutuku dam biyukba, Musa ap epdarikce, Israel ninye ulamik touk, sik telebe nyana ati, Musa biti mutubuk.

²⁸ Epdarikopura, Musa birye Harun biti, Yahweh arye, ‘Nyapnamlyame,’ nyapmok yupu nirya laka nyabuk. Tonda, Allah el si Yahweh arye, ‘Ninye winipmanto kum pil donamlum ning ara, aning ton, aning ton,’ nyabuk ning nirya babye, Musa birye Harun el kekena ati laka nyabuk.

²⁹ Akunum winiprikopura, Musa ap, Harun ap arye, Sinai mutuku batakuka, Mesir mutuku ila tamubuka birikce, Israel ninye sik wisi nang, yupu deiyok nang nirya yukuprikba, yayik.

³⁰ Yayikopura, Allah el si Yahweh arye, Musa biti nyapmok yupu nirya ara, Harun birye, sik Israel deiyok nang ati, laka nyabuk. Lak nyabukba, aninye nirya dinmikakuk, Musa birye Allah arepmok mikip deice arye, ninye kum winipmanto ning, ninye winipmanto kum pil dobukura, sik nirya eibikce, ‘E dipkoproba, Musa bira, Allah el mikip deice arye apil dopmasile’ tenebik.

³¹ Sik eibika deice arye, diba tenebik. Tonda, Musa ap, Harun ap arye, “Kume, Allah el si Yahweh arye, nun ikin usilye ning ap, kanye imun kanye bolamupu ning ap ara, aning nirya Yahweh akunum kel bikamukce, nunti bico tenepmasilce, melinamsile,” nyabuka, laka nyaprikba, kekebikopura, sik Israel ninye nirya arye, gutam tuku dipdongobuka, Allah el si Yahweh ati, el si erebik.