Keluaran 39 - Eipomek

Allah el si eren aik pum tam, pil dona deiyok nang, sik imam-imam nang, sik ongon baju ati, nyabuk yupu

¹ Bezaleel ap, Aholiab ap, sikce imam nang, sik baju ongobuka, Allah el si eren aik pum tam bukni, Pia Teleb Lek Aik pil don talak ongon ati, baju wiprik. Abaju el urasin ara, pia teleb kain lenan baju uamuk. Ara, kain wol el urasin ara, warna biru ning ap, warna unggu ato ning ap, ining bi merah ning ap, deice deibuka wiprik. Ara, Allah Yahweh arye, Musa ati, “Imam nang anggun deiyoknye Harun, el ongon baju ton, winibuka-winibuka wipnamlume,” nyadeiamuk touk, ubuka wiprik.

² Harun el Efod baju wina ati ara, kain lenan teleb namin ning arye kwanipdongobuka wiprik. Awiprik ning deice ning ara, kain wol el urasin ara, emas ning ap, warna biru ning ap, warna unggu ap, ining bi merah ning ap, dobuka deiprikce wiprik.

³ Bezaleel ap, Aholiab ap, sikce dekna pia weik ning, el si emas dobuka, martalok arye teing-teing apdikba, pia mitik kup-kup ara, aning nirya sekdikba, benang tapu mitik tonun ubukopura, aning dopropdikce, kain lenan deice deibuka wiprik. Awiprik tapu, el urasin ara, warna biru ning ap, warna unggu ning ap, ining bi merah ning ap deice arye deibuka wiprik. Awina pil nirya ara, baju wina kel weiknye birye wibuk.

⁴ Aning akunum winipdikura, el dukulongon ning bitinye ton, Efod baju toupne deice dana-dana arye, dukdongobuka deiprikce, kitiprik. Ara, Efod baju ting dam kibuka, daralongona ati, Efod baju kouna dana-dana yanuka, deibuka dukdongopdik.

⁵ Imam deiyoknye Harun, el deiyatinga delina ati, namin kain lenan, pia teleb ning arye, kwanipdongobuka wiprik. Baju win ning arye, deibuka wiprik ning ara ani. Ara, kain lenan namin ning arye wiprik. Awiprik ning deice ara, kain wol el urasin ara, kat ning, el si emas ning ap, warna biru ning ap, warna unggu ning ap, ining bi merah ning ap, dobuka deiprikce wiprik. Awiprik ning ara, Efod baju deice uk binuka, tapakra deiprikba, abaju ap, adeiyatenga ap, baju urasin ara, tonok kibuka wiprik. Aning nirya ara, Allah Yahweh arye Musa ati, “Winibuka imam deiyoknye kiniklamle baju wipnamak,’ nyapdeibuk touk, sik anang bitinye arye, anyabuk touk ubuka wiprik.

⁶ Sik anang arye, urasin pia teleb keil, el si ara delima keil, doprobrikce, pia urasin teleb ubuka deiprikopura, kat ning el si ara, emas deice arye, kwatibuka ongodobuka deiprik. Tonda, sik apu koproba Yakub, el si ton Israel, elce deiamuk mapu 12 nang ara, sik si yuk-yuk bukni, akeil deice dana-dana sekdeiprik.

⁷ Winiprikura, akeil bitinye ara, Efod baju kibuka daralongona ati, tapu toupne deice tam, belepmok tapu arye, darabuka wiprik. Ara, ‘Nun Israel yala ninye, nun apu yapu nirya ara, 12 yala nang arye deipsikba, deipdanin yanganyap ninye unyabe, tenenamakʼ tenen, aning deiprik. Aning nirya ara, Allah Yahweh arye Musa ati, “Winibuka kintininalyame,” nyapdeiamuk touk, dobuka kintinibuka deiprik.

Taram dam kilongona baju ati, nyabuk yupu

⁸ Ura Bezaleel ap, Aholiab ap, sikce taram dam lelilongona ati, baju ton wibuka kintiniprik. Ara, Efod baju deice ongona ati, bukni abaju ara, ting urasin atonun ubuka wiprik. Tonda, ting atonun ning ara, Efod baju wiprik touk ubuka, kintinibuka deiprik. Aning wiprikce, kintiniprik ning ara, Efod deice taplakuka, deipmarika atonun ninguk dobuka, wiprikce kintiniprik. Ara, warna biru ning ap, warna unggu ning ap, ining bi merah ning ap, dobuka deiprikce wiprik. Tonda, aning deice wiprikce, memebuka deiprik ning babye, awiniprik ninguk dobuka deiprik.

⁹ Taram deice lelilongon ning, el urasin ting atonun ning ara, el urasin teleb una ati ara, sirik dana-dana talibuka, noutamak arye bitinye kibuka, kwanibuka kitipdongobdikba, segi empat kibuk. Tonda, segi empat kunum ubukopura, el cang babye, el pala babye, yuk-yuk bukni kiklipdikce, neiktoto 22 sentimeter ubuka, kiplipdeiprik.

¹⁰ Taram dam lelilongon ning, el urasin ting atonun ning deice ara, sik anang arye urasin pia teleb keil ara, yakna dumbarye baris kintinibuka deiprik. Winibuka empat baris deiprikopura, urasin pia teleb keil dobuka, yuk-yuk bukni, tonok-tonok kibuka, dumbarye deice arye, taram dam ongona ati, abaju deice palibuka deiprik. Ara, baris tonok ning taplakuka deiprik keil ara, milmil alamle keil, el si delima, ining bi merah ning ap, topas kil ap, tonda baiduri kil ap, min yuma ning dobuka deiprik.

¹¹ Keil dikna baris bitinye ning ati, taplakuka deiprik keil ara ani. Ting atonun ning deice, keil baris bitinye ning delina ati ara, Zamrud keil ap, Nilam keil ap, Intan keil ap arye, taplakuka deiprik.

¹² Keil dikna baris winilye ning taplakuka deiprik keil, el si ara ani. Lazuardi keil ap, Akik keil ap, Kecubung keil ap arye, taplakukapdikce deiprik.

¹³ Tonda, keil dikna baris dumbarye ning ati, bulubuka deiprik keil ara, ani. Pirus keil ap, Yakut keil ap, Ratna Cempaka keil ap arye deiprik. Aurasin teleb ubuka deiprik keil 12 nirya ara, dekna weik ning, emas aryuk taplakdikce, ongopdobuka bingkai memebuka deiprik.

¹⁴ Urasin teleb ubuka deiprik keil deice nirya ara, sik apunye Yakub el si ton, Israel ulamuk. Elce deiamuk mapu, akeil 12 deice arye, sik si yuk-yuk sekuka deiprik. Asekuka deiprik ning ara, ‘Nun Israel yala ninye, nun apu yapu, sikti, tuba tenenamap,’ tenena ati, sekuka deiprik.

¹⁵ Tonda, taram deice lelilongon ning, ting atonun ning ara, rantai tapu ato ning bitinye ara, kat ning emas arye deibuka doprik. Ara, aling tapu ongonyak atonun ubuka, deiprikce, doprik.

¹⁶ Tonda, sikce kat ning emas arye, toupne dama ato ning bitinye wiprik. Aning atonun, emas arye, cincin urasin atonun ning ton kintiniprik. Winiprikce, ataram deice delin baju, ting urasin ato ning ap, acincin ato ning ap dobuka, aning eitam sirik dana-dana deiprik.

¹⁷ Rantai tapu emas arye doprik ning ara, cincin urasin ato ning ubuka memepmarikce, ting atonun ning deice, sirik dana-dana kintinipmarik ning ara, emas rantai tapu arye, acincin bisik dongobuka deiprik.

¹⁸ Tonda, yukak kup-kup tam sirya, bitinye upmok rantai tapu ara, urasin teleb kat ning emas arye, kwatibuka deipmarik sukumuk, yanuka koupdongoprik. Winiprik ning ara, toupne dama atonun wipmarik emas rantai tapu ning ara, dukdongoprikce, Efod baju, el balye tam ning ap, taram tam ning ap, dukdongobuka kintiprik. Winiprika ati, emas rantai arye, Efod baju bukni, takunya deice, dana-dana tam dukdongobuka deiprik.

¹⁹ Tonda, teleb kat ning, emas arye, cincin urasin atonun ubuka, bitinye ton memebuka deiprik. Ara, taram dam lelina ati, baju utam bukni, dana-dana tam koupdongoprik. Acincin atonun ning ara, taram dam lelin baju utam akunum dukrikba, Efod baju dam ubuk. Aning Winiprik ning deiyok ara, Efod baju ap, ting atonun ning ap, neika darapdongopnamdika ati winipdik.

²⁰ Aning akunum winipdikura, kat ning emas arye, cincin urasin atonun ning ton, bitinye memebuka deiprik. Winiprikura, Efod baju urasin tam bukni, mulaja deice dana-dana tam koupdongoprik. Ara, ting ato ning ap, Efod baju ap, sirya daralongona ati, acincin kintinibuka deiprik. Tonda, akintinibuka deiprik ning ara, Efod baju deice tam ap, amu tam ap, dukdongobuka wiprika amu tam, deiyatinga delina dam bukni, aning deice tam deiprik.

²¹ Aning akunum winiprikura, Efod baju el daralongona tapu ati ara, ting atonun ning, el cincin ap, Efod mulaja damak ubuk cincin ap, dukdongobuka kouna ati ara, warna biru tapu arye, binuka kintinip dongopdik. Winiprikba, ataram damak lelina ati, baju ting urasin atonun ning ara, deiyatinga delina deice tam deiprik. ‘Awinibrika, deiyok ara, deiyatinga kipmakibuk, kwiribuka saklyak,’ tenena ati, aning koulongon ati koupdongoprik. Apil doprik ning nirya ara, Allah Yahweh arye, Musa ati, “Winipnalyame,” nyapdeiamuk touk winiprik.

Imam-Imam nang, sik bikna ati, baju yuk ning ton wina ati, nyabuk yupu

²² Tonda, Musa arye nyabukba, sik Israel yala weik kel bikamik nang arye, imam deiyoknye, el cang baju kurun ning ongoplirye, adeice ton ongolul baju, el si juba, warna biru ning ton wibikba ongolamuk. Aning deice tam ara, Efod baju ton ongolamuk. Apil nirya dobika ara, baju wina kel nang aryuk wibik.

²³ Cang baju wibik talak ara, ngang dam delina ati ara, kain sekroba, kat ning arye deibuka wibik. Aning ara, ‘Juba warna biru ngang dam ara, kwiliklyakʼ tenena ati, adiparyuk kwilikmanto kum ning arye, taplakuka deibikce wibik.

²⁴ Aning atonun, juba warna biru ning wibik talak ara, abaju utam sirya tam, urasin teleb una ati, pia teleb yo duk, el si ara, delima urasin atonun ubuka, wibuka dukdongobuka deiprik. Ara, kain lenan namin ning kwanibuka memepmek ning ap, baju wina ati, wol tapu warna biru ning ap, unggu ning ap, ining bi merah ning ap deice arye, delima yo duk urasin atonun ning wipdeibik.

²⁵ Aning akunum winibikura, dekna weik ning, emas arye bobuka, lilim nyan ning, el si lonceng, pia mitik ning ton, bita membikce, kintinibuka deibikce, kerik kwetebik. Ara, ajuba warna biru utam sirya piriripna tam nirya, delima yo duk ato ning krikwetepmikce, anyapcubuka danoutam arye, pia mitik lonceng ton krikdongobuka biyikce, aning bitinye-bitinye ubuka, diripdogobuka biyikce, sirya dakik.

²⁶ Winibik ati, juba warna biru utam mouse nirya, minopce delima yo duk ato ning kerik kwetepmekce, anyapcubuka danoutam ara, lelim nyan ning, pia mitik ning, el si lonceng ton, kerikikce, aning nirya sirya dakik. Ura, apil dobika nirya ara, Allah Yahweh arye Musa ati, “Winipnulyame,” nyapdeiamuk atonun winibik.

²⁷ Winibikce, sik baju wina weik kel bikamik nang aryuk, Harun ap, el mapu ap ati, sik nong deice ongonamik cang baju ati, kurun kemeja ton wibuka deibik.

²⁸ Tonda, imam weik deiyoknye, el kisok kitina ning ati, el si serban, pia teleb kain lenan, cang ning doprobikce, topi ato ning wibik. Aning atonun, el melina nang, anyaik pum tam pil donamik nang babye, sik kisok kitin kain lenan ton kintinibuka wibik. Tonda, sik baju pum tam bukni, nunukne celana dalam ning ap tabakuka, aning wina ati ara, kain lenan teleb ning arye, dobuka wibik.

²⁹ Winibikura, imam nang, sik deiyoknye ongonamuk deiyatinga delina ati ara, kain lenan, pia teleb namin ning ap, baju wina ati wol tapu, warna biru ning ap, unggu bol ning ap, ining bi bol merah ning deice arye, urasin pia telebubuka wipdeibuk. Aning babye, baju wina weik kel nang aryuk wibik. Aning nirya ara, Allah Yahweh arye, Musa ati, “Winipnalyame,” nyapdeiamuk touk winibik.

³⁰ Tonda, ‘Imam deiyoknye, el kisok kitin ning deice deibibyeba, ongonamleʼ tenen, dekna weik kat ning, el si ara emas, pia teleb ninguk bobuka, pakudakanyak ning, martalok arye, teing-teing abikba, mitikto pala kibuka memepdeibik. Winibikura, apala emas ning deice arye, ayupu puturuba memebikce sekuka deibik. Ayupu ara, ani. “Anye bira, Allah Yahweh el ninguk, pia teleb ulule,” nyabuka sekik. Winibuka, aning ton kintinibuka deibik.

³¹ Tonda, apala emas ning deice ara, ayupu akunum sekikce, kintinipmek ning ara, ‘Imam nang, sik weik deiyoknye, aning ongonamleʼ tenen, aning dobuka, el kisok kitin ning, serban urasin tamuk deibik. Adelina ati ara, kain wol warna biru ning dobuka, aemas ning, el kisok deice kitin ning serban ara, urasin tam kirikdongobik. Aning nirya ara, Allah Yahweh arye, Musa ati, “Winipnulyame,” nyabuk touk winibik.

Apil nirya dobuka, sirya dakik ning ati, lak nyabuk yupu

³² Allah Yahweh ap, ninye ap, elana ati, el si erena ati, tenda arye don aik dona ati, aning-aning nirya akunum memebuka deibikce, dolamika ani, sirya dakik. Ara, Allah Yahweh arye Musa ati, “Winipnamlulume,” nyabuk touk, sik Israel ninye nirya arye, anyapdeiamuk touk, akunum winibik.

³³ Allah el si erena ati, tia doltakna aik akunum dobikce, sirya dakikura, aning-aning nirya dobuka, Musa dam delilyanmek. Adelilyanmek ning ara ani. Anamin kain tenda aik ap, diripkwetepniba talen ning ap, ayukumna yo ap, wirikna yo ap, tonda, anyaik ayukumna yo, ‘Tuku bol piplyakʼ tenen, amu tam baribuka yangabuka delin ning ara, Musa dam boyanuka arebik.

³⁴ Tonda, anyaik siknilongona ati, kambing basam obuka, bol kobuka, ining bi ning likuka deipnarye wilamik ning ap, tonda aning deice kaluna ati, laut mek weken pum tam ulamle ning, el si lumba-lumba obuka, el bol arye deibuka, wilamik ning ap nirya ara, anyaik pum tam noutamak yuk-yuk wilina ati, cang kain el si gorden ap, aning nirya dobuka, Musa dam boyanuka arebik.

³⁵ Winibikce aning ara, Allah elce, “Aning ara, winipnalum, aning ara, pia kum winipnalum,” nyapdeiamuk yupu ara, asekamuk keil bitinye libuka, deiamik peti yo pum, el si ara Peti Perjanjian ap, apeti bobuka, boban yo ap, tonda, apeti yo pum deice tam bublan, ‘Allah arye nun malye unyap ning kilipnamsilirye, lyepnamsilʼ tenen, ining likuka, apeti el bublan tirikilongona deice likinamik ning ap, akintinipmek ning nirya ara, Musa el damuk boyanuka deibik.

³⁶ Tonda, meja memebuka deiamik ning ap, ameja delin ning nirya ap, tonda, ‘Allah nun dam aunamsilulʼ tenen, roti kwaning 12, ameja deice delin ning ap, Musa el dam boyanuka deibik.

³⁷ Tonda, upna lana deiyok ning, el urasin teleb kat ning, emas teleb ning arye domik ning ap, upna lan pil dona ati, memamik ning ap, aupna deice un ning, yala nirya ap, tonda, upna lana ati, minyak mek ap, kintinyamik ning, Musa dam bobuka yana deibuk.

³⁸ Atouk tonda, ‘Allah kekeplirye, kanye deipnamsilʼ tenen, siltong teleb nyan ning, uku dongonak ara, urasin teleb ning emas arye domik ning ap, tonda, ‘Allah el pil don nang wibuka delina ati, apil don talak likna minyak mek ap, siltong teleb nyan ning ap, Allah ap, ninye ap eldana aik, bublan dam bai tam delina ati, weik cang pala kain ap, kintinip deiamikce, Musa dam yanuka deibik.

³⁹ Tonda, ‘Allah arye nun malye ning kilipnamsilirye, lyepnamsilʼ tenen, el arin ning ati, kam ning obuka, uku dongonak mesba ap, teleb kat ning perunggu arye, kawat wilamak atonun ubuka, deimik ning ap, aning dam pil dona ati, alat aning-aning nirya ap, tonda, aning bobuka bana ati, ara yo ap, tonda sik imam nang taruk ap, yan ap, mek likna ati memebuka deiamik mek makau ap, amek makau amu tam dukdongobuka, delin ning ap, kintinip deiamikce, Musa el damuk boyanuka deibik.

⁴⁰ Tonda, Allah el si eren aik bukni, bai tam kain arye poka antanabuka dopnamik ning ati, cang kain dobuka lap kwetepnamik kain ap, akain ayukumna poka yo ap, ayukumna yo, ‘Tuku bol piplyakʼ tenen, el amu tam kat ning perunggu arye, palibuka delin ning ap, tonda, anyaik dam poka bublan dam lalkwetena ati, pala kaluna ap, kaluna kitina tapu ap, tonda, adoltakna aik bibikuka delina ati, tatca yo ap, aning nirya dobuka, Musa el dam boyanuka deibik. Ara, Allah el si eren aik pum tam upnamuk ning aning-aning nirya ara, akunum memebuka, Musa el damak boyanuka deiamik.

⁴¹ Aning nirya akunum deibikopura, Allah el si erena ati, Teleb Lek Aik talibuka, pil dona nang, imam nang arye apil donamik talak, sik ongon baju ton, wibuka kintinip deiamik. Ara, imam nang sik weik deiyoknye Harun ap, tonda, el melina ati, el mapu ap, sik imam pil talibuka don nang ongopnamik baju ati, wibuka memebuka deiamik ning, Musa el dam bobuka yana deibik.

⁴² Sik Israel yala ninye, weik kel bikamik nang nirya arye, apil nirya akunum dobuka sirya dakik. Ara, Allah Yahweh arye, Musa ati, “Winipnalyame,” nyamuk touk, aning nirya pil dobnin balamik ani, akunum sirya dakikce, aning nirya Musa ati bobuka arebik.

⁴³ Aning nirya akunum winibikura, Musa arye, apil dobik ning nirya dipdeyukce, aning nirya ara, dipkoprob Allah Yahweh arye, “Apil ara winibuka dopnamlume,” nyapdeiamuk atonun, winibuka dobik. Apil nirya akunum dobik ati, Musa arye sik Israel nang nirya ati, ‘Allah arye, ninye teleb keipnamleʼ tenen, yupu weik arye teleb kipdeibuk.