Keluaran 38 - Eipomek

Allah el si erena ati, kam ning obuka, uku dongonak memena ati, nyabuk yupu

¹ Bezaleel birye, kat yo, el si ara akasia yo dobukabukce, Israel ninye ara, ‘Allah arye, nun malye unyap ning, namin kipsilirye, lyepnamsilʼ tenen, Allah el si arena ati, kam ning obuka uku dongonak, el si ara mesba, memebuka dobuk. Amesba dona ati, kup-kup dana-dana kiklipdeyukce, el cang ap, el pala ap nirya ara, sik yuk-yuk bukni, el kiklina ara, tonok 2,2 meter kiklibukce, sekuka dobuk. Tonda, amesba el anirye eitam tikilin yo, el cang ara, 1,3 meter kiklibuka sekuk.

² Ining ning obuka, uku dongonak, el si mesba, memebuk talak ara, el kup-kup itam dana-dana nirya ara, sapi basam kisok tatce belelamle ning atonun ubuka, memebuka deibuk. Adobuka deibuk ning nirya ara, nong tonok ubuka dukdongobuka debukce, urasin teleb kat ning, el si perunggu arye taplak deibukce dobuk.

³ Tonda, Besaleel birye, kam ning obuka, uku dongonak mesba memebuka deibuk ning ara, tup ning dan ati, el si ara kuali, ton memebuk. Tonda, uku kalum luna sekop ap, ining burubuka likin makau mangkok ap, tonda tup lukuka dolon ning, el si garpu ap, tonda uku sekenak ap nirya, memebuk. Aning nirya memena ati ara, urasin teleb kat ning, perunggu deice aryuk puturubukce, aning nirya dobuka memebuk.

⁴ Tonda, uku dan yo delinak ati, perunggu arye moubukabukce, mesba deice deibuk. Tonda, kam ning obuka, uku dongonak amu tam, yangabuka delina ati ara, kawat tapu arye wilamak touk, perunggu arye dobuka, wibukabukce, moupdeibuk. Aning wibuk ning ara, aning ara, mesba memebuk outamuk dobuka, bini deibuk.

⁵ Besaleel birye, aning winibukopura, cang yo arye, aning dongopdongbuka bobana ati, utam kup-kup dana-dana ara, tupne dama urasin pia teleb ubuka wilamak touk ubuka, urasin teleb kat ning, el si ara perunggu, aryuk deibuka dobuk. Aning atonun, taruk dukdongolamak ning, cincin atonun ning, dumbarye (4) memebuka kintinibukce, amesba dana-dana tam, bitinye dukdongobuka deibuk.

⁶ Cang yo bobana ati ara, akasia yo arye memebuk. Winibukopura, ayo bol deice ara, urasin teleb kat ning, perunggu arye taplak deibuk.

⁷ Acang yo bitinye kintinibuka, deibuk ning ara, tupne dama atonun ubuka, dana-dana wibuka memebuk pum bisik, asukumuk, ayo dobuka dongobuk. Ara, amesba cang yo deice arye bobana ati, apil dobuk. Aining ning obuka, uku dongonak memena ati ara, pala yo aryuk memebuka dobukce, ayo deice nirya ara, kat ning perunggu arye, taplak deibuk bukni, ayo pum tam noutam nirya ara, talye pum diamuk ubuk.

Perunggu deice arye, mek delin ning memena ati, nyabuk yupu

⁸ Besaleel birye, “Winipnamlume,” nyapdeibukba, bak mek deilinak ara, urasin teleb kat ning, perunggu deice aryuk memepdeibuk. Tonda, amakau amu tam tikilina ati ara, utam arye dipdongobuka, itam tikilin ning babye, perunggu aryuk memebuka dobik. Adeibuka dobik perunggu ara, Allah ap, ninye ap, ansinina ati, sapi bol arye doktakne tenda aik, adomik aik bisik bublan dam melilamik kilapu arye, sik dam deibuka urasin elilamak ning, el si ara cermin, aning ara perunggu arye memebuka deiamik anya arye, aperunggu aryuk, dobuka memebik.

Allah ap, ninye ap, antamdina ati, doltakne tenda aik dam, cang kain poka dona ati, nyabuk yupu

⁹ Bezaleel birye, Allah ap, ninye ap, eldana ati, el tia ati doltakna aik dam nirya ara, teleb namin kain lenan aryuk, poka ara, adiparyuk memebuk cang yo deice arye alapkwetebukce, anyaik dana-dana nirya aknapdongobuk. Ara, aknapdongobuk ning ara, cang kain lenan weik pala ning, kain gorden delilamak touk winibuka, wipdongobukce, alapkwetebuk. Agorden iknapye tam (arah selatan) poka dona ati, kain lenan el cang ara, 44 meter kiklibuka deibuk.

¹⁰ Apoka ayukumna yo nirya ara, anyaik yo 20 arye ikuk. Tonda, ‘Ayo tuku bol piplyakʼ tenen, ayo amu tam, kat ning perunggu arye, ayo yangalin ning puturubuka memebuk. Tonda, akain lenan gorden kwaribuka, talin ning ap, aning amu tam cincin atonun ning ap, acang yo deice deibuk. Ara, dana-dana arye dukdongobuka, talina ati ara, dekna weik ning, perak arye memebukabukce, acang yo deice ikdongobuka deibuk.

¹¹ Outam batakana babye, aning dobuka deibik atonun ubuka, memepdeibuk. Ara, apoka ayukumna yo nirya ara, anyaik yo 20 yekuka deibukce, ‘Ayo tuku bol piplyakʼ tenen, ayo amu tam, kat ning perunggu arye, ayo el yangalin ning puturuka memebuk. Tonda, alenan kain gorden dobuka talina ning ap, aning amu tam cincin atonun ning ap, acang yo deice deibuk. Ara, agorden talin ning ati ara, dekna weik ning, perak arye memebukabukce, acang yo deice ikdongobuka deibuk.

¹² Tonda, keting wekelban tam lelina ati, kain lenan pia teleb ning, el cang ara, 22 meter kibuk ninguk, dobuka deibuk. Tonda, acang ayukumna yo 10 ap teikeipbukce, ‘Ayo tuku bol piplyakʼ tenen, ayo amu tam yangabuka delin ning, el yangalin ning 10 ap, perunggu arye puturubuka deibuk. Tonda, ayo deice gorden duknak talin ning ap, aning amu tam cincin atonun ning ap, dukuka delinak memen ning ap nirya ara, dekna teleb ning, perak aryuk memebuka deibukce, acang yo deice ikdongobuka deibuk.

¹³ Tonda, keting yangan tam, bisik bublan botopdeibik tam ara, pala kain lenan gorden, el cang ara, atonunuk 22 meter uk kiklibuka deibuk. Ati, keting wekelban tam ap, keting yangan tam ap ara, el cang ap, el urasin ara neiktoto ubuka memebuk.

^14-15 Abublan dam kwanim tam babye, sirik tam babye, dana-dana tam nirya ara, cang pala weik kain lenan arye lapkwetebuk. Alapkwetebuk kain kiklipdeyukura, el cang ara, 6,6 meter kiklibuka sekukce, deibuk. Aning delina ati ara, ayukumna yo winilye ap, tonda, ‘Ayukumna yo tuku bol piplyakʼ tenen, el amu tam yangabuka delin ning ati, winilye perunggu arye, puturubukce, kintinip deibuk.

¹⁶ Anyaik dam poka dobuka, antanap dongobukce, apoka yo deice lapkwetebuk cang kain lenan ara, pia teleb namin aryuk, wibuka deibuk.

¹⁷ Anyaik dam deibuk ayukumna yo nirya ara, ‘Tuku bol piplyakʼ tenen, ayo amu tam yangalina ara, teleb kat ning, perunggu arye memebuka deibuk. Tonda, gorden arekilongon ning ap, dukulongona cincin atonun delin ning ap, ayukumna yo deice tam ap nirya ara, dekna teleb namin ning, perak aryuk dobukce deibuk. Poka ikuk yo nirya ton ning arye, ton ning arye, dukdongobuka talina ati ara, perak aryuk memebuk.

¹⁸ Anyaik dam wekelbana ati bublan bisik dam ara, weik pala kain lenan namin ning kintinip deibuk. Akintinip deibuk kain lenan ara, wol tapu el urasin ara, mirin warna biru ning ap, unggu tua ning ap, ining bi merah bol ning ap, kintinip deibuk. Akain el cang ara, 9 meter memebukce, anirye eitam delina ati ara, 2 meter kintinip deibuk. Tonda, poka deice delina ati, weik pala kain babye atonun, ubuka kiklipdeyukce, memebuk. Akintinip deibuk kain deice ara, ‘Urasin teleb upnamleʼ tenen, win deice arye, puturubuka deibuk.

¹⁹ Abublan dam deibuk kain talina ati ara, ayukumna yo dumbarye (4) memebuk. Tonda, ayukumna yo, ‘Tuku bol piplyakʼ tenen ati, ayo amu tam deipniba, talina ati ara, perunggu arye el yangalin ning dumbarye arye memebuka deibuk. Atonunuk tonda, yo mouse, dana-dana talin ning ap, kwarilongon ning ap nirya ara, weik deklamak ning, perak aryuk memebuka deibuk.

²⁰ Bukni, Allah ap, ninye ap, ansinina ati, sapi bol arye domik tia doltakne tenda aik bibikuka, delin tapu kitina ati, ikamik tace ning ap, anyaik dam dana-dana tam nirya, antanabuka deibik cang kain, gorden bibikilin, tapu kitina ati, ikamik tace ning babye, kat ning perunggu aryuk puturubuka deibik.

Allah el si eremna ati, doltakna tenda aik dobik talak, dekna weik ning yanuka arelamik ning ati, nyabuk yupu

²¹ Allah ap, ninye ap, eldana aik, el si erena ati, tia doltakna tenda aik ara, dekna ning weik tonun arelamika deice arye, anyaik dobik. Anyaik pum tam ara, Allah arye, “Aning ara, wininamlume, aning ara, pia kum wininamlume,” nyapdeiamuk nyalin yupu, elce sekamuk keil pala bitinye kintinip deibuk ning ara, anyaik pum tam noutamuk deibik. Anyaik dona ati ara, Musa bira, “Dekna weik ning, winibuka arepnamlume,” nyabuka, atonun ubuka arebik. Aning arebik talak ara, Musa bira, sik Lewi yala nang ati, “Arepmak ning nukmunce, aning nirya sekuka deipnamlume,” nyabuk touk, aning nirya sekuka deibik. Aning nirya sekik talak ara, imam Harun el mi Itamar birye, deiyoknye kibukura, yuk nang ap apil dobik.

²² Hur birye deibuknye, el si Huri, el mi Bezaleel bira, Yehuda yalanye ulamuk. Allah Yahweh arye Musa biti, “Winibuka pil dopnamlume,” nyapdeibuk ning nirya ara, Bezaleel elcuk apil nirya dobuk.

²³ Tonda, Ahisamak el mi Aholiab bira, Dan yalanye ulamuk. Winilamukce elda, Bezaleel el pil melinanye ulamuk. Anye Aholiab bira, puturun pil dona deiyok ning ap, kanye moubuka tenipdenarye, winina kel ning ap, tonda, kain lenan urasin pia teleb ubuka win ning kel, pia weiknye ulamuk. Ara, kain wol el urasin mirin warna biru ning ap, mirin unggu tua ning ap, ining bi warna merah ning ap, wina kelnye ulamuk.

²⁴ Allah ap, ninye ap, epdanuka, Allah si eren aik dona ati ara, Israel ninye arye, bulubuka arelyangalamik emas nirya, el ikin ara, dekna pia weik, 1.000 kilogram kiamuk. Aning nirya ara, Allah el arena ati, aning ereptalipnarye, ‘Allah ati arepnamabe,’ nyabuka, arelyangalamik. Boyanuka arelyangalamik kilogram nukuka sekik ning ara, min talak Allah arye Musa biti, “Na aik noutam arye, ‘Aning ara, el ikin yata wiribuka do?’ tenena ati, ikin kel bikna ati, aning kiklibikirye, ikin winibuka-winibuka nyapnamaka ara ani,” nyapdeipmuk touk, nukuka arelyangalamikba, delilamik.

²⁵ Tonda, ‘Israel ninye, yata winibuka unyak do?’ tenena ati, sik si sekna pil don talak arye, bulubuka delilamik dekna weik ning, el si perak arelyangalamik ning nirya ara, 3.430 kilogram bulubuka deiamik. Aning deiamik ning babye, ikin dolona ati, el kiklina ara, min talak Allah arye Musa biti, “Na aik noutam arye, ‘Aning ara, el ikin yata wiribuka do?’ tenena ati, kiklibikirye, ikin winibuka-winibuka nyapnamaka ara, ani,” nyapdeiamuk touk nukuka, arelyangalamikba, kiklibikce, “El ikin winibuka upmale,” nyabuka, sekdeibik.

²⁶ Sik Israel ninye, si sekna pil dolamik talak arye seklamik touk, aning nirya weik tonun boyangalamik. Ara, sik anang nirya ara, min arye, “Winibuka arenamlume,” nyapdeiamuk touk, sik atalak ara, ninye kam ulamik touk nukuka, tonok-tonok bukni, 5,5 gram nukuka arelamik. Tonda, min talak, Allah arye, “Na aik aren ning, el ikin ara, winibuka-winibuka nukmunce, dolonamlume,” nyapdeiamuk touk, ubuka dololamik. Ati ara, ninye si sekna pil donmek talak arye, Yordan mek otam arye, mek koubuka, Kanaan tam bana ati, yayik nang, sik ninye si sekik nang ara, dekna weik, enam ratus tiga ribu, lima ratus lima puluh (603.550) nang, si sekik. Asi sekik nang, sik keting tamun umur ara, 20 tahun itam ulamik nanguk, sik si sekik. Anerye utam umur nang ara, si kum sekik.

²⁷ Adekna weik ning perak, tiga ribu empat ratus (3.400) kilogram kintinibuka deibik ning aryuk, Allah el si eren aik dona ati, anyaik ayukumna yo ap, cang kain gorden ap, ayo delina ati, ayo amu tam yangabuka delin ning ara, seratus (100) arye memebuka deibik. Tonda, bublan wekelbanak cang kain lapkwetebik yo, el yangalin ning nirya ara, aperak arye memebuka deibuk. Ayo amu tam yangabuka delilamik ning babye, yuk-yuk bukni, el ikin ara, tigapuluh empat (34) kilogram deice arye, kintinibuka deibik.

²⁸ Aperak tuba upmok ning, el ikin ara, tigapuluh (30) kilogram aubuk. Winipmokba, Bezaleel birye aperak dobukabukce, itam tikilin yo dukulongon ning, cincin urasin atonun ning ap, kain lenan lapkwetepniba, talin ning ap, tonda ayukumna yo eitam singin ning ap, dobuka deibuk.

²⁹ Tonda, urasin pia teleb kat ning, el si perunggu, Allah el arena ati, dobuka ereptalibuka, arelyangalamik ning nirya ara, dua ribu empat ratus dua puluh lima (2,425) kilogram aubuk.

³⁰ Aboyanuka delilamik perunggu ara, Allah el si erena ati, tenda aik bublan dam, el tikilin yo, ‘Tuku bol piplyakʼ tenen, ayo amu tam yangalin ning, el si alas kaki ton, puturubuka deibik. Tonda, ‘Allah arye nun malye ning namin kipsilirye, lyepnamsilʼ tenen, kam ning obuka, uku dongonak delina ati ara, teleb kat ning perunggu arye, amesba dobuk. Tonda, amesba pil don ning, kawat tapu wilamak atonun ubuka, deibuk ning ap, tonda, kam ning obuka uku dongonak pil don ning aning-aning nirya kentinip deibuk.

³¹ Tonda, Allah el si erena ati, tenda tia dolamik aik dam, antanabuka wiamik poka deice, deibik cang kain lenan deibuka lalkwetena ati, ikik yo ara, ‘Tuku bol piplyakʼ tenen, asukum arye, eitam tikilin ayukumna yo amu tam, baribuka delin ning, el yangalina nirya ap, tonda anyaik bublan wekelban bisik dam, tikdeibuka ikik yo, el amu tam delilamak ning, yangalina ap, tonda anyaik cang kain bibikuka delina ati, tapu kitina ati, tace ning ikik ning nirya ap, aning nirya dona ati, Bezaleel birye, aperunggu dobukabukce, aning nirya puturubuka memebuk.