Keluaran 37 - Eipomek

Allah Yahweh nyalin yupu libuka, delin marikna pum, Peti Perjanjian memena ati, nyabuk yupu

¹ Allah el si Yahweh arye, “Aning wininamlume, aning ara, kum wininamlume,” nyapdeibukce, sekeiamuk yupu, libuka delina ati, marikna pum ara, Bezaleel birye memebuk. Ara, akasia yo arye deibuka dobuk. Ayo marikna el cang ara, 110 sentimeter deice arye memebuk. Ton el pala ap, asukum arye ubuka eitam cang (tinggi) ap ara, 66 sentimeter memebuka dobuk.

² Amarikna pum, noutam babye, bol deice tam babye nirya ara, dekna weik kat ning, emas pia teleb ning aryuk, taplak deibukce, memebuk. Amemebuk ning deice bukni, kukup tam nirya ara, emas aryuk deibuka kwanipdongobuk.

³ Tonda, amarikna yo taplakna dana-dana ara, urasin teleb ning, emas arye, toupnedama wilamaka atonun ning, tonda cincin atonun ubuka, dumbarye (4) puturubuka memebuk. Ara, bokoba ato ning bitinye dan tam ning ton, dan tam ning ton, ongolongon ning kintibuk. Amemepdeibuk ning ara, cang yo abisik dongobuka, tali bana ati kintibuk.

⁴ Anyalin yupu lin marikna pum, Peti Perjanjian, cang yo arye talibuka bobana ati ara, Bezaleel birye, akasia yo adiparyuk dobuka memebuk. Winibukce, acang yo bol deice ara, ‘Urasin teleb upnamleʼ tenen, dekna weik kat ning, emas aryuk tablakdeipbuk.

⁵ Acang yo dobukabukce, anyalin yupu lilin yo pum tam, taplakna ati toupnedama atonun ubuka, puturubuka kintinip deiamuk, kin-kin bisik dongobuka deibuk. Ara, amarikna Peti Perjanjian bobana ati winibuk.

⁶ Winibukopura, amarikna el si Peti Perjanjian deice tam, bublan siknilongona ati ara, emas pia teleb ning deice arye memebuk. Abublan el cang ara, 110 sentimeter. Abublan el pala ara, 66 sentimeter kiklibuka dobuk.

⁷ Winibukopura, amarikna bublan sinilongon deice ara, sirya tam delina ati, malaikat urasin atonun ning, el si Kerub, puturupdeibuk. Ton tam tonok, ton tam tonok deibuk. AKerub ara, emas arye dobuk bukni, emas deice nirya, ‘Urasin teleb upnamleʼ tenen, kat ning martalok arye, teing-teing abuka, memebukce, dongobuk.

⁸ Kerub bitinye kintinip deibukce, amarikna bublan sinilongon ati, deipmok ning ara, ton ning atam sirya, ton ning ara, atam sirya, ton ning ara, otam sirya deibuk bukni, abublan ap, aKerub bitinye ap ara, nong tonok dukdongobuk.

⁹ Winipdeibukba, aKerub bitinye, sik pol ara, apeti marikna deice ara, otam arye, atam arye, dam koprobuk epdarik. Winibukba, aKerub sik pol sirya tam ara, yanuka epdadikce, dam koprobuk kipdik. Akerub pol otam arye, atam arye epdadik ning ara, Allah arye, “Aning ara, winilamlume, aning ara, pia kum wininamlume,” nyapdeibukce, sekdeibuk yupu, Musa birye, apeti yo marikna pum tam dongobuk ning deice ara, lelipdongoprik. Apil nirya ara, Bezaleel birye dobuk.

Roti kwaning dabuka, delinak meja memena ati, nyabuk yupu

¹⁰ Tonda, Bezaleel birye, roti kwaning dabuka, deilin meja ara, akasia yo aryuk memebuk. Ameja el cang ara, 88 sentimeter kiklibuka dobuk. Tonda, el pala ara, 44 sentimeter kiklibuka dobuk. Tonda, outam arye tikilin ati ara, ameja el cang ara (tinggi), 66 sentimeter uk kiklibuka dobuk.

¹¹ Ameja deice ara, urasin pia teleb kat ning emas, pia teleb ning aryuk, taplak deibukce dobuk. Tonda, ameja sirya tam nirya ara, urasin teleb kat ning, emas aryuk taplakukabukce, ongobuka kwanipdongobuk.

¹² Ameja piriripna tam, el pala ara, 7,5 sentimeter deibuka dobuk. Winibukce, ameja deice sirya tam nirya ara, urasin teleb kat ning, emas aryuk taplakukabukce, kwatibuka ongopdongobuk.

¹³ Aning akunum winibukopura, urasin teleb kat ning, emas arye, toupnedama wilamaka atonun ubuka, dumbarye (4) puturubuka, ayo kum-kum tam deibuk. Ameja deiyok tam, kwatina dana-dana sirya tam nirya ara, toupnedama atonun ubuka, wibuk ning ara, cang yo dongobuka deibuk.

¹⁴ Aning emas toupnedama ato ubuka puturubuk ning ara, ameja kup-kup tam barina ati, tirikdongobuk. Ara, ameja bobana ati, cang yo arye bobuka, tali ban talak ara, ‘Aning arye, talibuka bobanamak ningʼ tenen, winibuk.

¹⁵ Ameja cang yo bobana ati ara, el si akasia yo aryuk dobuka kintinibuk. Winibukce, acang yo deice ara, urasin teleb kat ning, emas arye taplak deibuk.

¹⁶ Winibukopura, din ning lukuka delina ati, ara piring ap, mitik mek makau, el si cangkir ap, tonda, mek dikuka delina ati, weik cang mek makau, el si kendi ap, mek kwebuka din makau mangkok ap, nirya kintinibuk. Ara, Allah ati, arenamik ning, anggur mek dikuka delina ati, kintinibuk. Aning nirya ara, urasin teleb kat ning, emas pia teleb ning deice aryuk, moubuka memebuk.

Lampu weisa deiyok koubuka, memebuk yupu

¹⁷ Bezaleel birye, lampu weisa deiyok koubuk. Ara, alampu weisa yuk ning ap, yangabuka delin ning ap ara, emas pia teleb ning aryuk, kat ning martalok arye, teing-teing abuka moubuka memebuk. Adeice ara, yo kita opnulya ati, bulamle ning atonun ning ap, bangku atonun ning ap ara, urasin teleb kat ning emas arye, puturubuka deibukba tonok kibuk.

¹⁸ Alampu weisa noutam ara, deiyok tonok welebuk bukni, adeice arye, kwa nakub barye (6) memebuka deibuk. Ara, dantam lilun kwa winilye, dantam lilun babye, kwa winilye ton kintinibuka deibuk. Akwa winililye, winililye ubuk ning ara, ansinibukak nirya nakub barye buk (6), aning noutam deiyoknye ara, tonok ning uka.

¹⁹ Akwa kintinibuka deibukak talina ati ara, keit ning, el si bunga badam, dumbarye (4) puturubuka deibuk. Winibukce, adumbarye ning nirya ara, el kita olamle atonun ning ap, el kait popnulya ati, irin ning yoklamle ning ap, el irin ning ap, yuk-yuk kintinibuka deibuk. Atonun, anakubarye (6) kwa noutam deiyok arye, belebuk ning nirya ara, akeit lelamle ning, urasin atonun ning puturubukce deibuk.

²⁰ Alampu weisa kwa lekuk ning dam ara, bunga badam atonun ning, dumbarye kintinibuk ning ara, el kait popnulya ati, irin ning yoklamle ning ap, el irin ning ap, kintinibuka deibuk.

²¹ Akwa yuk-yuk lekuka welebukak nirya ara, bunga badam, el kait popnulya ati, irin ning yoklamle ning ap, el irin ning kintinibuka deipmok ning arye, deipnin welebuk. Ara, ton kwa bitinye welepbuk ning amu tam babye, atonun ubuka deibuk. Atonun, ton kwa bitinye welepbuk ning amu tam ara, tonok bunga badam, el irin ning kintinibuka deipmok ning deibuk. Atonun, kwa welebuk ning amu tam ton deibuk. Kwa welepbuk ning nirya ara, nakub barye (6) ubuka deibuk.

²² Lampu weisa noutam ubuk deiyok ap, bunga badam, el irin ning atonun ning ap, el kwa ap nirya ara, nong tonok atonun ubuka deibuk. Aning nirya teleb urasin kina ati ara, kat ning, emas arye dobuka, teikuka memebukce, kintinibuka deibuk.

²³ Alampu weisa deiyok tonok welebuk bukni, el weisa lana ati ara, tekbarye (7) kintinibuk. Ara, dana-dana tam winilye bukni, noutam ning ara, tekbarye ning memebuk. Winibukopura, weisa uku lapmalye ani, uku arye el tapu dipliba kat uplyopura, atouk sekna ning ap, uku akapsaklye ning kum danalina ning ap, emas arye memebuk. Ara, alampu weisa pil don ning nirya ara, dekna weik ning, teleb kat ning emas arye moubuka memebuk.

²⁴ Lampu weisa deiyok ap, el kwa lekuk ning nirya ap, mouna ati ara, urasin teleb kat ning, emas el ikin ara, 35 kilogram, pia teleb ninguk kintinip deibuk.

Siltong teleb ning dobuka, uku dongonak memelina ati, nyabuk yupu

²⁵ Allah el arena ati, siltong teleb ning uku dongonak ara, Bezaleel birye, akasia yo arye memebuka dobuk. Aning mouna ati ara, yang beleipnin biyukce memebuk. Ayang beleipnin biyuk ning, el cang ap, el pala ara, neiktoto 45 sentimeter ubuka, deibukce memebuk. Aning outam arye, el tikilin yo ara, 90 sentimeter kintinibuk. Asiltong teleb ning, uku dongona ati memepdeibukak, urup tam ara, sapi basam kisok tatce belelamle atonun ubuka, tace memepdeibukba belebuk. Winibukce, aning deice uk tabakeibukba, nong tonok ubuk.

²⁶ Eitam yang beleipmok dam dumbarye (4), sirya tam belepmalya deice, sapi basam kisok tatce belelamla atonun ubuka deibuk ning ara, urasin teleb kat ning, emas arye taplak deibukce, memebuk. Tonda, sirya tam dana-dana nirya ara, urasin teleb ning, emas arye kwatibuka ongopdongobuk.

²⁷ Tonda, siltong teleb ning, uku dongona ati, memepdeipmok ning, taplakna tam ara, toupnedama atonun ning, urasin teleb kat ning, emas arye bitinye yuk-yuk, dana-dana wibuka kintinibuk. Ara, aning cang yo deice bobuka, ban talak talina ati, moubuka memebuk.

²⁸ Asiltong ning uku dongona ak ati, cang yo boban yo ara, akasia yo aryuk, dobuka kintinibuk. Winibukce, acang deice ara, urasin teleb ning, emas aryuk talakdeipbuk.

‘Aning Allah el ninguk unamleʼ tenen, nintong teleb minyak mek likin ning ap, siltong teleb ning ap, mouna ati, nyabuk yupu

²⁹ Bezaleel elcuk, Allah si erena ati, siltong teleb ning, uku dongobikiba, nintong teleb nyalamle ning ap, ‘Aning ara, Allah el ninguk upnamleʼ tenen, minyak teleb ning, likinamik ning ap, aning nirya tabukukabuce, memepdeibuk.