Keluaran 35 - Eipomek

Pil dona kumce, dikdik sen sum, Sabat sum winina ati, nyabuk yupu

¹ Musa birye, Israel ninye ati, “Buluplulume,” nyabukba, sik nirya bulubuka yayikopura, ayupu nyabuk. “Allah el si Yahweh arye, anggunti nyapsil ning ara, ani.

² Naku barye (6) sum noutam nirya ara, talye kanye bobuka, anggun pil koproba uk donamlulume. Bukni, tekbarye (7) sum ara, pil yuk-yuk ning nirya pia kum donamlulume. Anggun pil koproba batakuka, anggun adiparyuk, dikdik senamlulume. Asum ara, na Allah Yahweh si erena ati, kintinip deipse sum ati, anggunce, ‘Asum ara, pia mambul teleb sum, Allah el sumuk,’ tenepmunce, na siuk erenamnulume. Bukni, yatanye do nirya, tekbarye (7) sum noutam pil donmalinye bira, wenebuka opnamlume.

³ Asum noutam nirya ara, anggun aik pum babye, uku pia kum sekenamlulume, nyapsile.” Musa birye nyabuk.

Allah Yahweh ap, ninye ap, antamdiana ati, tia dolina tenda aik noutam arelyangana ati, nyabuk yupu

⁴ Musa birye, sik Israel ninye nirya ati, ayupu ton dukdongobuka nyabuk. “Allah Yahweh arye, ‘Winipnamlulume,’ nyapdeipmasil yupu nyapnusine.

⁵ Ara, anggun Israel ninye nirya arye, Allah el si erena ati, tenda aik memena ati, anggun talimunye ning babye, ongolulum ning babye, aning noutam arye bobuka, ‘Nun ni Allah Yahweh ati, kanye deibuka arepnuyapʼ tenen, aning-aning arelyanamlulume. Ara, yata ninye do nirya, anggun kanye pum tam arye, ‘Nun talinyap ning ara, Allah Yahweh ati arepnuyap,’ tenebikce nang ara, sik adiparyuk bobuka arelyanganamake. Anyarilyanganamak ning ara, urasin pia teleb dekna weik ning, el si emas ap, namin dekna ning, el si perak ap, teleb kat ning, el si perunggu ap dobuka, Allah ati arelyanganamake.

⁶ Tonda, namin kain, el si lenan ap, tonda kain wol, el urasin ara, warna biru ap, warna unggu tua ap, ining atonun warna merah ning ap, tonda kambing basam potong arye wibuka delilamak kain ato ning ap ara, anggunce bobuka arelyanamlulume.

⁷ Atouk tonda, yim domba basam obuka, bol lokuka kain wipmanto ning bobuka, warna merah ning likinamak ning ap, tonda laut mekwen pum tam ulamle kam ning, el si lumba-lumba, el bol namin ulamle ning arye, deibuka wilamak ning ap, tonda akasia yo ap, boyanuka arelyanamlulume.

⁸ Tonda, lampu upna una ati, zaitun yo duk minyak boyanuka arelyanamlulume. Tonda, Allah el si eren aik pum tam ulye ning, teleb kilina ati ara, nintong teleb ning, el si rempah-rempah ton memepdeipmunce, teleb minyak ap tabakuka, kintinilinyak ning ap, tonda siltong teleb nyana ati, uku dongonamak ning ap, boyanuka arelyanamlulume.

⁹ Tonda, urasin teleb mirin keil, el si delima ap, yuk urasin teleb dekna weik keil ap, doyanuka arelyanamlulume. Akil nirya ara, efod baju deice taplak deipnamlume. Ara, sik imam nang, sik weik deiyoknye, el nong deice cang baju ongonamak ap, el deiyatinga atonun ning, ongonake baju Efod ap, tonda aning deice, ‘Allah arye tenesilya ning, kel bikna ap, tenena ap, unamapʼ tenen, moubuka kekena ati ara, aning nirya boyanuka, Allah ati arelyanamlulume. Musa birye nyabuk.

Allah arye, el si eren aik pum tam, pil don ning kintinilina ati, nyabuk yupu

¹⁰ Anggun, neika umunye nang noutam ara, Allah el si erena tenda aik, anyaik dona ati, “Winibuka-winibuka donamnulume,” nyapsuk ning yala nirya, kel weik kibikce, donyak nang ara, sikcuk, anyaik dolyanamnyake. Allah arye, anyaik ning donamnulume,’ nyapsuk ning ara ani.

¹¹ Ara, Allah el si eren aik dona ati, anyaik tenda bol ap, anyaik duma ati siknin ning ap, moubuka talikina ap, tonda, anyaik ikna yo ap, wirikna yo nirya ap, tonda dana-dana tam deibuka tikilin yo ap, ‘Ayo tuku bol piplyakʼ tenen, cang yo amu tam delina ati kat ning ap, boyanamlume.

¹² Tonda, Pia Teleb Lek Aik pum tam upnamle ning, Allah arye nyalin yupu nyabukba, libuka deipnamlum marikna yo pum, Peti Perjanjian tam ap, apeti yo bobanamlum talak bobana ati, ara yo bitinye ton kintinip deipnamlume. Tonda, apeti bublan atonun tirikina ati, apeti yo pum deice siknilongona ati ara, ‘Allah arye, nun malye un ning kilipnamsilʼ tenen, ining likinamak ning ap, kintinip deipnamlume. Tonda, apeti marikna yo, el si Peti Perjanjian, deipnamlumak ara, ‘Talye nang wekikcakʼ tenen, el lilinlongona ati ara, cang kain lenan ton kintinibuka lalkwetebuka deipnamlume.

¹³ Aning atonun, Teleb Lek Aik pum tam ara, roti kwaning dabuka, delin ning delinak ati, yo arye meja memenyak ning ap, ameja ara, yo deice arye bobana ati, cang yo bitinye ap, kintinip deipnamlume. Winipmunce, ameja deice delin ning, ‘Allah elda nun dam aunamleʼ tenen, asum-asum nirya dabuka, delinamlum roti kwaning 12 babye, minopce kintinip deipnamlume.

¹⁴ Tonda, Allah el si eren aik pum tam deipnalum lampu upna lanamle ning, el delina deiyok ning ap, aupna pil don ning, aning nirya ap, kintinibuka deipnamlume. Winipmunye ning ara, upna lan ning ap, minyak ap, kintinip deipnalume.

¹⁵ Tonda, Allah el si erena ati pil don talak, nintong teleb nyana ati, uku dongonamlum ning ap, ‘Aning ara, Allah el ninguk ululeʼ tenen, likeipnamlum minyak ap, tonda anintong teleb nyan ning, uku dongopnamlum ning bobana ati ara, cang yo bitinye kintinip deipnamlume. Tonda, Allah el si erena ati tenda aik, bai tam bublan lelina ati, lalkwetebuka deipnamlum weik pala cang kain lenan ap, kintinip deipnalume.

¹⁶ Tonda, ‘Allah arye nun malye unyap ning, kilipsilirye, lyepnamsilʼ tenen, kam ning opmunce, ining likdeipnamlum ning ap, aining ning uku dongonak ning ap ati, kat ning, el si perunggu arye, aning memebuka deipnalum ning ap, aning ara yo deice arye bobana ati, cang yo ap, adeice pil dona ati sikop ap, lukulin ning ap, yuk alat ning nirya ap, kintinipnamlume. Tonda, Harun ap, el mapu ap, sik yan ap, taruk mek likna ati deiplup mek makau ap, amek makau talena ati, deiplup deiyok ning ap, kintinip deipnamlume.

¹⁷ Tonda, Allah el si eren aik, kup-kup dana-dana tam nirya, antanap dongobuka dopnamlum poka yo ap, ‘Ayo ara, tuku bol piplyakʼ tenen, amu tam yangabuka deipnamlum kat ning perunggu arye, kintinip deipnamlum ning ap, adeipmunya deice ara, cang kain lenan arye, kirikdongopnamlum ning ap, kintinipnamlume. Tonda, anyaik dana-dana tam, kup-kup antanap dongobuka donamlum cang kain lenan noutam ara, bublan kintinina ati, potokmunce, apoka bublan terikna ati, weik pala cang kain ap nirya, kintinip deipnamlume.

¹⁸ Tonda, Allah el tia ati don tenda aik dona ati, tapu bibikuka kirikina ati, iknamlum yo ap, anyaik dopmunce, poka dopnamlum ning, el tapu bibikuka kirikina ati, ikamlum ning ap, tapu ap ara, kintipnamlume. Ara, atenda ara aik ap, apoka cang kain lenan ap, yo ikuka tapu kirikmunce dona ati, kintinip deipnamlume.

¹⁹ Tonda, imam nang, anggun deiyoknye Harun ap, el mapu ap arye, Allah el Teleb Lek Aik ap, Pia Teleb Lek Aik ap, apia teleb aik pum tam wekuka, pil donamak talak ati, pia teleb baju ton wipmunce, kintinip deipnamlume. Ara, Harun ap, el mapu ap, ‘Sikda Allah el pil talibuka donamakʼ tenen, sikuk ongonamak baju ton, yuk-yuk kitibuka deipnamlume. Musa birye, sik Israel ninye ati nyabuk.

“Anggun Israel ninye nirya arye, Allah el si erena ati, teleb ning arelyanamlulume,” nyabuk yupu

²⁰ Musa birye ayupu akunum nyabukopura, sik Israel ninye nirya, Musa el dam yayikce, bulubuka wekmekce, ayupu nirya akunum kekebikopura, sik adiparyuk tamubuka yukak biyik.

²¹ Biyikce, daunmeka ani, aminyan talak, yatanye do nirya, el kanye aryuk teneplirye, Allah Yahweh el si erena ati, ninye ap, Allah ap, neika eren aik pil dona ap, anyaik deiyok nang ongonamak ning baju ap, anyaik noutam pil dona ap ati, ‘Aning arepnun,’ tenepnanye bira, aning-aning nirya boyanuka arelyangalamik. Ara, ‘Aning nirya ara, Allah Yahweh el tibuk arepnuyapʼ tenen, aning-aning nirya boyanuka arelyangalamik.

²² Aning atonun, yata ninye do, ninye nirya ara, sal babye, kilapu babye, el kanye aryuk, ‘Aning ara, Allah Yahweh ati, arepnun,’ tenepnanye bira, arelyangalamik. Ara, sikce arelyangalamik ning ara ani. Ara, dekna weik ning, el si emas arye, memebuka deiamik ning, anting-anting amul potokuka dongolamak ning ap, cincin taruk duk deice dongolamak ning ap, tonda, karakanyak ning el si kalung ap, arelyangalamik. Winibuka arelyangalamik talak ara, ‘Nun ni Allah dinamsilcaʼ tenen, aning nirya ereptalibuka, boyangalamik.

²³ Ninye sik yuk-yuk taleamik ning ara, namin kain el si lenan, warna unggu tua ap, kain warna biru ap, kain warna kirmizi lenan halus ap, el nong urasin ara, warna kam ning merah ap, tonda kambing potong arye deibuka wilamik kain ato ning ap, tonda, kambing potong arye deibuka wilamik baju ato ning ap, yim domba basam obuka, el bola arye wilamikce, warna ining bi merah ning, liklamik ning ap, laut mekwen pum tam ulye ning, el si lumba-lumba, bol arye wilamik ning namin ning ap, aning nirya ara, awamuk touk Israel ninye arye, aning nirya boyanuka arelyangalamik.

²⁴ Aning atonun, ninye nirya arye, yuk-yuk bulubuka, delilyangalamik ning ara, dekna teleb namin ning perak ap, kat teleb ning perunggu ap, boyanuka delilyangalamik. Anang nirya arye, ‘Nun ni Allah Yahweh atibuk boyanganamabe,’ tenelamikce, arelyangalamik. Tonda, akasia yo awamuk ning ara, ‘Allah Yahweh el aik dona ati, patapsil touk arepnuyapʼ tenen, aning babye, boyanarye arelamik.

²⁵ Yata kilapu do, tapu ona weik kel kilapu nirya ara, sikce urasin teleb ning ara, baju win tapu, el si wol, el urasin ara, kain warna biru ap, warna unggu tua ning ap, ining bi kain warna merah ap, sik akilapu arye, akunum kintinyamik ning ara, aning babye boyanuka arelyanganmik.

²⁶ Tonda, yata kilapu do nirya, ‘Apil ara, na kel ati, na ton winamne,’ tenelamik kilapu nirya, sik akilapu adiparyuk, kambing basam potong doprobikce, abaju ato ning ton wipnarye, yanuka arelamik.

²⁷ Tonda, Israel ninye, sik ninye deiyok kibuka talimik nang ara, sikce urasin pia teleb keil, dekna weik keil, el si delima ap, yuk urasin teleb-teleb keil nirya ap, boyanuka, arelamikce, sik kel nang arye, imam nang, sik deiyoknye, el nong deice ongolamuk baju ap, ‘Allah tenelye ning kel biknunʼ tenen ati, ‘El taram deice ongonamle baju, el si Efod ap, taplakalinamakʼ tenen, urasin teleb dekna weik keil ton, bulubuka boyanarye, arelamik.

²⁸ Tonda, sik aning adiparyuk, nintong teleb nyan ning ati, el si rempah-rempah ap, lampu upna lana ati, zaitun yo duk minyak ap, delilamik. Ara, ‘Anintong teleb ning ap, minyak mek ap dobuka boyanarye, ‘Anye bira, Allah el pil donamleʼ tenen, ninye nong deice likililamik minyak mek ap, tonda, siltong teleb nyan ning, uku dongonamak ning ap, kintinipnamakʼ tenen, arelyangalamik.

²⁹ Sik Israel yala ninye nirya arye, Allah Yahweh el si eren aik pil dona ati, sik talimik ning noutam arye, dan tam bokuka, Allah arena ati, Musa dam boyanuka arelyangalamik. Ara, sik kanye aryuk, ‘Allah arepnuyapʼ tenen, kanye deibuka, arelyangalamik. Aning nirya ara, ‘Allah arye Musa biti, ‘Winimunce, na aik dopnamnulume,’ nyabuka, nyapdeiamuk touk, ‘Aninguk winipnamapʼ tenen, aning boyangalamikce, arelamik.

Allah Yahweh el aik pil dona ati, Bezaleel ap, Aholiab ap, wipdeibuk yupu

³⁰ Israel ninye arye, aning nirya akunum winibikopura, Musa birye Israel ninye ati nyabuk. Allah Yahweh arye, el aik pil dona ati, Hur birye deiamuknye Uri, el mi Bezaleel bira, Yehuda birye deiamukba, dadeipdanin yangalamik nang arye deiamuk yalanye binyak akunum wipdeipmale.

³¹ Anye bira, Allah Yahweh, el pia teleb el Pia Teleb, Lek Dip Kanye, weik tonun arebukba, el kanye wekuka langdibuk deice arye, kel weik bikna deiyok ning ap, pil dopmanto deiyok ning ap, urasin teleb ning memebuka, pil dona deiyok ning ap, talye arebukba, anye bira, kel weik bikamuk. Aning nirya teninyak ning ap, kel bikinyak ning ap, ‘Aning ara winibuka-winibuka winitibyeba, urasin teleb uptue,’ tenenyak ning ap, deiyok ning arebukba, kel weiknye ulule.

³² Anye Belazeel kel bikamuk ning ara, ani. Ara, ‘Anye deice arye, winibuka-winibuka doptinyeʼ tenen, dekna weik teleb kat ning, emas ap, urasin teleb kat ning perunggu ap, dekna teleb namin ning perak ap deice arye, aning-aning nirya puturupka, teleb kibuka delilule.

³³ Tonda, apil dona ati ara, urasin teleb keil aning-aning nirya, kat ning arye, memebuka deiplirye, urasin pia teleb ning moubuka memelilule. Tonda, weik kel bikna deice arye, yo deice arye memelul ning babye, pia teleb ubuka pil dolule. Tonda yuk-yuk pil yala dopnamle ning nirya ara, urasin pia telebuk ulule.

³⁴ Aninguk kum bukni, Allah arye Belazeel ap, tonda Dan yalanye, Ahisamak el mi ara, Aholiab ap ati, kel weik bikna deiyok ning ap, tonda yuk nang ati peterena deiyok ning ap, weik tonun areamuk. Allah Yahweh arye aninye bitinye ati, kel weik bikna deiyok ning areamuk deice arye, pia teleb ubuka pil dodurake. Tonda, yuk nang ati, teleb ubuka petererurake.

³⁵ Ura, Allah Yahweh arye, sik anang ati, kel weik bikna deiyok ning areamuka deice arye, apil don ning, aning-aning nirya, pia teleb kibuka dolamdik. Ara, yo boyanuka puturun pil dona ap, tonda, ‘Aning ara wininamak, winipnamak,’ tenenyak ning ap, namin kain warna biru ap, kain warna unggu tua ap, tonda kain lenan halusnye kam ning warna merah ap, tonda yuk yala kain ap, ‘Winibuka wipnarye, kintinibuka pil dopnanane,’ tenelamdike. Sik anang arye, ‘Aning ara, winibuka-winibuka dopnaname,’ tenena deiyok ning, kel bikdika deice arye, aning nirya pil dorurake. Dipkoprob, Bezaleel ap, Aholiab ap, yuk nang ap, sikti, Allah Yahweh arye, pil dona ati, kel weik bikna deiyok ning areamuk. Winyamuk deice arye, Allah Yahweh el si eren aik dona ati winin ning, aning-aning nirya pil dolamdike. Sik anang nirya ara, dipkoprob kel weik bikamik nang ati, anang ara, peterena deiyok nang unyake. Musa birye sik Israel ninye ati lak nyabuk.