Keluaran 34 - Eipomek

Winiryuk keil bitinye deice, Allah arye mambul yupu sekuka, arebuk yupu

¹ Allah el si Yahweh arye Musa biti nyabuk. “Minop talak narye mambul yupu sekuka, keil bitinye arepkise bukni, ance dobuka telebloplume. Ati, minop ning atonun, ila tuba keil teleb uka memepdeipmince, akunum kintinipmaminyeba, na mambul yupu tonap sekeipnamkine. Ara, min arye nyapkisa yupu uk, akeil bitinye deice sekeipnamne. Sekeipnyeba, minop talak aubuk touk upnamle,” Yahweh arye nyabuk.

² “Memebuka, kintinip deipmaminye buk, ambusum beren tam ara, Sinai mutuku deice welepnululume. Mutuku dup welebuka yanuka tikmaminyeba, epdananame.

³ Amutuku welepnuminye talak ara, yuk nang tonap tabakuka kum yatinge. An ap tonoknye babye, melibuka welena pia kume. Tonda ninye tonok babye, omutuku dam lake kina pia meme. Domba basam babye, sapi basam babye nirya ara, amutuku dam maning dina kume,” Allah arye Musa biti nyabuk.

⁴ Nyabukopura, Musa birye minop keil pala bitinye uamuk touk, winiryuk ning babye, keil pala bitinye puturubuka memebuk ning dobuka, beren tam talak Sinai mutuku dup welebuk. Ara, Allah el si Yahweh arye minop talak nyamuk touk, akeil bitinye el taruk koproba arye talibuka, Sinai mutuku deice welebuk.

⁵ Sinai mutuku welebukopura, Allah dua kan-kan koulukukce, Musa tikmokak yayukce, “Na si ara, Yahweh unune,” nyabuka, Musa biti yanuka nyabuk.

⁶ Allah arye Musa tikmokak urasin tam yayukce nyabuk. “Na si ara Yahweh, Allah unune. Narye ninye ati bico tenebuka, weikto arye melinune. Malye ubica babye, min pola arye yu kum unulule. Tonda min pola aryuk kum wenesunune. Aning kum bukni, narye, ‘Wininamsine,’ nyapsise touk, ninye ati bico tenena ap, batakna kum diparyuk melina ap, weik unune.

⁷ Na mapu ati yupa pia weik, kum nukmanto, beribu-ribu ati, batakna kum diparyuk, pia bico tenenune. Sik malye winin ning ati, tuba-tuba namin kinune. Na mapu tukwak ninye arye, malye winipmace ning ap, nati, ‘Nun like’ tenebikirye, na yupu yanibikirye, malye ubica babye, ila tuba tonap namin kisunune. Aning nirya ati, minopce arye yu upniliba, kum wenesunune. Bukni, sik talima pia malye nang, tuba-tuba malye wininyak ninye ati kum bataknamne. Ara, sikce malye winibicopura, anang ap, sikce deipnamak mapu ap, amapu arye deipkirik danin balamica mapu ap, sikce deibuka dadaeipdanen, deipra banamak mapu ap, ninye dika winilye ning ap, ninye dika dumbarye ning ap, sik nirya ati wenepnamne. Ara, sik ni yapu arye, malye ulamica atia,” Allah arye nyabuk.

⁸ Nyabukura, adiparyuk Musa ilil weik ubuk ati, ‘Allah el si erepnun’ tenen, tuku deice mabukce, Allah si erebuka nyabuk.

⁹ “Se na Ni Allaho, dipkoprob an ‘Naʼ tenen, kanye, na deice deipnutumopura, pia telebe. Kanye deipminyopura, an ap, nun ap, neika bitibirye, melipsutumopura, pia telebe. Israel nang ara, malye pia weik nang bukni, sik malye wininyak ning ap, malye tenenyak ning ap, namin kipsilyame, na nio. Namin kipsutumce, ance, ‘Na tenena ninye,’ tenepsiminyopura, pia telebe. Na nio, ‘Namin kipsutum,’ tenen, moropkine,” Musa birye nyabuk.

¹⁰ Nyabukura, Allah el si Yahweh arye, Musa biti nyabuk. “Wini talak ara, narye, ‘Wininamlulume,’ nyapdeipsin yupu deice arye, nyalin yupu ton arepsine. Ara, Israel ninye din sukumuk, ninye kum winipmanto ning winipnamne. Sik dam unamne ara, yuk mutuku-mutuku nirya kum winibukba kum eibik bukni, sik dam weik mambul ning winipnyopura, anggun dam unamak nang eibice, adeice arye kel biknamake. Ara, ‘Se Allah el si Yahweh arye, sik Israel nang melina ati, sik noutamak mambul pil dolye ning ara, pia teleb’ tenen, kel kipnamniyake,” Allah arye nyabuk.

¹¹ Nyabukce, ayupu ton nyabuk. “Ati, arup arye na mambul yupu nyapmasin ning ara, kekebuka pin-pin asa arye, anggun moubuka talipmunyopura, na mikip deice Amori nang ap, Kanaan nang ap, Het nang ap, Feris nang ap, Hewi nang ap, Yebus nang ap, yakuka dopkwetepnamne. Ara, na mikip deice melipsinirye, amutuku nang nirya yaknamlume,” Allah arye nyabuk.

¹² “Amutuku bimunyopura, ‘Sik amutuku noutamak unyak nang ap melilanamabe’ tenen, ‘Winipnamsiabe, winipnamsululume’ nyabuka nyalin yupu ton, kum nyapdanamlulume. Deiyok ara, winipmunyopura, anang arye malye-malye winilamaka atonun, ‘Anggun babye atonun winipmunyak’ tenen, nyapsine,” Allah arye nyabuk.

¹³ “Anya arye aning ara, winina kum bukni, anggunce amutuku bimunce sik Isa Mutuku Dongonye, el si Asyera, el si erena ati dobik aik ap, yo deiyok iklamak ning ap, kam ning obuka, Isa Mutuku Dongonye arena ati, keil pala dobuka, pala keil bulubuka yakdeibik ning ap, tonda, sik isa si erena ati, puturubuka delilamik ning nirya ap, weplopnalulume,” Allah arye nyabuk.

¹⁴ “Anggun si erelulum Allah ara, na Yahweh tonoka ununa ati ara, yuk ning ati, ‘Allah atonuna,’ nyabuka, si erena pia meme. Winipmunyopura, na yu weik unulule. Winipmunyopura, aning ati, ‘Daupmalye,’ pia kum nyaptinye. Nara, Allah na tonok unun ati, nyapsine,” Allah el si Yahweh arye nyabuk.

¹⁵ Nyabukopura, ayupu ton nyabuk. “Amutuku bimunyopura, ‘Sik amutuku noutamak unyak nang ap, kum opdanamabe. Melina uk unamap’ tenen, ‘Kum opdanamabe,’ nyabuka, anang ap nyalin yupu ton kum nyapdanamlulume. Deiyok ara, winipmunyopura, anang arye sik isa si erena ati, kutam tuku deice deibuka, nong kanupdongobuka kibikirye, sik Isa Mutuku Dongonye arena ati, teleb kam ning obuka arebice talak ara, nyapnamsiake. ‘Anggun neika nun ap dipnuyabe,’ nyabikibuk, anggun Israel nang arye sik isa ati arece ning, dipmunyopura, ara pia malye atia. Ara, sik malye winilamaka atonun, ‘Anggun babye atonun winipmunyak’ tenen, moubuka unamlulume, nyapsine,” Allah arye nyabuk.

¹⁶ “Aning atonun, anggun Israel nang arye, anggun mapu kil dona ati, aminyan binamlum mutuku, tikilyangan nang sik kilmapu dopropmunce, anggun mapu arepmunba, dobikcopura, aminyan talak na bataknikirye, sik kilapu si erenyak Isa Mutuku Dongonye ninguk, ‘Sik ton erebikcak’ tenen, nyapsine. Ara anggun mapu, sik kilapu yupu kekebikirye, sik Isa Mutuku Dongonye si erebikirye, malye winibicak ati, moupnamlulume, nyapsine,” Allah arye nyabuk.

¹⁷ “Kat ning dopropmunce, talye-talye ning urasin teleb kipdeibuka, aning ati, si erena meme,” Allah arye nyabuk.

¹⁸ “Nena kum roti dina ati, dan sum pia tenenamlume. Asum kiplyopura, like tekbarye sum noutamak nirya ara, roti nen ning, kum dongobicopura, dabuka dinamlulume. Ara, narye nyamse touk wininamlulume. Wala si ara, Abib wala noutamak bukni, na wipdeipse tanggal deice deiyok koupnamlulume. Deiyok ara, awala noutamak arye Mesir mutuku batakuka yanamluma atia,” Allah arye nyabuk.

¹⁹ “Kam un ning do, ninye mi do, min yuma deipnamak ning ap, deipnamlum ning ap nirya ara, na ning koproba upnamnile. Ara, anggun min yuma mapu ap, anggun sapi basam yuma ning ap, anggun maka min yuma ning ap, yuma mi yim ning ara, min yuma deipnamak nirya ara, na ning koproba anya arye, arenamnululume. Na dam yanumunye talak nirya ara, talye diamuk yangana meme. Min yuma ning bobuka yanamlulume,” Allah arye nyabuk.

²⁰ “Keledai basam mi min yuma deiplye ning ara, ‘Kum opnuyabe,’ tenepmunyopura, akeledai mi pununa ati, adiparyuk domba basam mi dobuka opmunyopura, arenamnululume. Akeledai basam mi nati, deken ning kum arepnumunyopura, adiparyuk akeledai mi, ngang kotokuka onamlulume. Anggun sal mi min yuma deipnamlum ning nirya ara, na ning koproba anya arye, anggun nong pununa ati, dekna ning arenamnululume. Na tenen ning pununa ati ara, na dam yangana ara, urdemuk kum yanamlulume. Deken ning libuka boyanamlulume,” Allah arye nyabuk.

²¹ “Like nakub barye sum ara, anggun pil donamlulume. Bukni, like tekbarye sum ara pil dona kume. Asum ara dikdik uk senamlume. Wa win talak babye, wa wina lin talak babye, tekbarye sum ara pil kum donamlulume. Dikdik senuk unamlulume,” Allah arye nyabuk.

²² “Anggun wa wilamunya ani, min yuma ning lipnumunye talak ara, kwalya kwalipnamnululume. Atalak ara, anggun gandum wa wilamunya duk, min yuma ning akunum engoplyopura, duk min yuma ning dakuka, nati arenamnululume. Tonda keting tamun tonok ning sirya daknulye talak ara, aning-aning nirya, anggun wa lin ning sirya dakmunye talak ara, din kwalya ton kwalipnamnululume. Ara, na si erebuka, kwalya kwalipnamnululume,” Allah arye nyabuk.

²³ “Tonok keting tamun noutamak ara, like winilye talak, Israel ninye nirya, Allah na si Yahweh, na dam yanganamake. Ara, Israel ninye anggun Ni Yahweh arye, kalikuka melisunun Allah, na dam Israel nang yakirye, si erenamniyake. Nara, aning-aning nirya talibuka erebuka Weik Deiyoknye ununa atia,” Allah arye nyabuk.

²⁴ “Narye nyapsinye touk, tonok keting tamun noutamak, like winilye talak na dam bimunce, na si Yahweh erepnumunyopura, narye wininamsine. Tonok ning ara, yuk mutuku yala ninye nirya yakuka donoknyeba, amutuku ara anggun Israel ninye uk talinamlume. Bitinye ning ara, anggun talinamlum mutuku, weika arye tonap tabakuka arenamsine. Winilye ning ara, na kaliksinyeba, yuk mutuku ninye nirya arye, anggun Israel ninye unamlumak nirya, ‘Se aning ara nunda doproptibye’ tenen, kum patapnamle. Na nyapse touk, na si erepnumunyopura, aning nirya ati, melibuka arepnamsine,” Allah el si Yahweh arye nyabuk.

²⁵ “Kam ning obuka, ining dopropmunce, aining ara, na si erena ati arepnumunye talak ara, roti nena deiyok ning ap tabakna pia meme. Tonda, ‘Mesir mutuku ulamupu talak, Allah el malaikat arye, nun min yuma mapu kum oplopsuke’ tenena ati, Kaplina ati, kwalina talak ara, kam ning obuka arenamnulum bukni, anggunce dabuka dinamlum ning ara, kwal delina meme. Obuka dapmunye ning ara, alukunyan aniryuk sirya dakuka, nirya dinamlulume. Tonok babye ton deipmamumya, ‘Anyuku sum dinamabe’ tenen, dokola delina meme,” Allah arye nyabuk.

²⁶ “Aketing tamun, aketing tamun nirya, anggun wa wiamunya, min yuma ning ara bobuka, anggun ni koproba Allah, Yahweh arena ati, el aik arelbanamlulume. Tonda, ‘Kambing basam mi obuka, tup dapnuyap,’ tenepmunyopura, kambing basam tup ap, akambing el lin moum yung ap, tabakuka yuna meme,” Allah el si Yahweh arye nyabuk.

²⁷ Allah el si Yahweh arye ayupu nirya akunum nyabukopura, Musa biti nyabuk. “Anyapne yupu nirya seknamlyame. Deiyok ara, ayupu deice arye, na ap, an ap, Israel nang ap, ‘Teleb kibuka neika unamabe. Narye anggun kalikuka melinamsine’ nyabuka, nyalin yupu akunum nyapdeipsine. ‘Allah arye nyapdeiamsuk ning ara, asukum pia tenenamluma,’ atia,” Allah arye Musa biti nyabuk.

Musa Sinai mutuku arye koulukuk talak ara, el urasin dirina weik ubuk

²⁸ Musa ap, Allah el si Yahweh ap, neika ulamdikce, yupu sisiklamdik talak ara, like yupa tonok keba koklom dikin, 40 sum arye, lukunyan ap, keting noutam ap, neika ulamdik. Musa bira, aulamuk talak ara, din bulang dem ulamukce, din ap, mek ap, pia kum dilamukce, urdemuk ulamuk. Tonda, atalak ara, Allah arye, ‘Aning ara wininamlulume, aning ara kum wininamlulume,’ nyapdeibukce, el mem yupu, deiyok tagu barye nyalilamuk ning nirya, keil pala bitinye deice sekamuk. Tonda, ayupu ara, Allah arye Israel ninye ati, “Winipmunyopura, narye pia kalikuka melinamsine,” nyabuka, nyalin yupu deiyok yupu atia.

²⁹ Allah arye ayupu akunum sekukopura, Musa arebukba, Musa birye bobuka tamubukce, Sinai mutuku deice arye koulukuk. Koulukuk talak ara, Allah el mem yupu sekeipmok ning, keil pala bitinye bobuka yayuk. El koulukuk talak ara, keting delilamle touk, el urasin deice ara, Allah dirina upmok. Aning deiyok ara, el li Yahweh ap yupu taleamdika anirya. Bukni, el urasin dirina weik upmok ning ara, Musa kum eipdanmok.

³⁰ Atalak ara, Harun ap, Israel nang ap arye, Musa eibik talak ara, Musa el urasin deice ara, Allah el dirina ubukba, sik ilil weik ubuka ati, el dam kum banmek.

³¹ Musa el urasin dirin weik ubuk bukni, Musa birye sik anang ati yukubukba, Harun ap, Israel ninye sik deiyok nang nirya ap ara, el dam yayikba, sikti, yupu nyabuk.

³² Yupu akunum sisikinmekba, Israel nang nirya bulubuka, el dam yanuka wekikba, Allah el si Yahweh arye, “Aning ara wininamlulume,” nyabuka, Sinai mutuku nyalamuk yupu nirya, Musa birye sikti, laka nyabuk.

³³ Ayupu akunum nyabukopura, Musa birye baju dobuka, el urasin nirya lelipdobuk. Deiyok ara, ‘Na urasin dirin upmanil ning ara, kum danapnin baliba, aninye eipnicak’ tenen, winibuk.

³⁴ Winibuk bukni, Musa ap, Allah el si Yahweh ap, yupu sisikinamrik talak nirya ara, Musa el urasin baju arye lelipmok ning ara, kwiribuka deipna arye, yupu sisikinmana ani, ila tuba lelipna arye buru benura, Allah arye, “Aning ara wininamlulume,” nyapdeipmok yupu nirya, sik Israel nang ati laka nyalamuk.

³⁵ Yata talak do nirya, Musa bira Allah unmokak arye, tamubuka buru tam yayuk talak nirya ara, Israel ninye arye, Musa el nong bol deice dinmekopura, el urasin dirina ara, keting deipna arye, dirina ulamle touk, winipmokba eilamik. Akunum eibikopura, Musa adiparyuk, ila tuba el baju bol arye, el urasin lelipdongolamuk. Daulamuka ani, el ap, Allah el si Yahweh ap, yupu sisikinurik talak nirya ara, ila tuba ton, el urasin lelipdongopmok baju kwiribukabukce, Allah dam biyukba, sik yupu talilamdik.