Keluaran 33 - Eipomek

Allah arye nyabukba, Israel nang Sinai mutuku arye batakuka, yukak biyik yupu

¹ Aminyan talak ara, Allah el si Yahweh arye, Musa biti nyabuk. “Wini talak, amutuku batakmunce, Israel nang nirya, Mesir mutuku boyanamlum nang bobuka, narye nyamsise mutuku bobimince, wekelbinamlume. Amutuku ara, anggun apu yapu Abraham ap, Isak ap, Yakub ap ati, ‘Amutuku ara anggun mapu arepnamsine’ nyabuka nyalin yupu deice arye, sikti, nyalilamse. Tonda, sikce deibikiba, dadeipdanin banamak ninye nirya ati, amutuku nukunamsine, nyalilamse. Adiparyuk amutuku wekelbinamlulume,” Allah arye nyabuk. Nyabukce ayupu ton nyabuk.

² “Narye Allah, na im deici pil don nang, sik si malaikat tonok ton wipdeipniba, el ap bimunba, na mikip deice arye el melinamsile. Allah el malaikat menekuka bilirye, obinamlum mutuku noutamak unyak ninye, Amori nang ap, Het nang ap, Feris nang ap, Hewi nang ap, Yebus nang ap nirya ara, malye kibuka obuka yaknamne,” Allah arye nyabuk.

³ “Anggun wini talak ara, pia teleb mutuku binulume. Yata teleb ning do nirya, mong mek ap, sapi basam moum yung ap,ura, aning-aning nirya, teleb ning ayala-yala nirya amutuku noutamak ulule. Bukni, na ap neika kum binamabe. Deiyok ara, sik Israel ninye malye weik wininyak ninye anya arye, na lik upnilyopura, bisik noutamak arye yu upniliba, ‘Anggun oplopsinyak’ tenen, ilil unulul ati, na ap neika kum binamabe,” Allah arye nyabuk.

⁴ Allah arye ayupu nyabukba kekebikopura, sik mambul kanye bobuka, engenmikce, atalak noutamak nirya, tonoknye babye karakna ning ton kum karakamik.

⁵ Aning deiyok ara, Allah el si Yahweh arye, “Anggun malye winilulum ninye anya arye, anggun karakna ning kwiriplobuka binamlume. Bisik binumunye talak ara, anang ati, lik upniliba, ‘Anang opnamne do, kum do?’ tenenamsina ati, ‘Anggun opsinyak’ tenen, na ap kum binamabe,” nyabuk. Tonda Allah arye, “Anggun Israel ninye malye weik umunya ati, na lik upnilyopura, ‘Bisik noutamak arye yu upniliba, anggun oplopsinyak’ tenen, ilil unulul ati, na ap neika kum binamabe. Anggun bimunye talak uk, aminyan winipnamsin ning ati, tenenamne,” Allah arye nyabuk. Nyabuka ati, Israel ninye nirya, mambul kanye bobuka, sik adiparyuk kanye lamapdongobuka balamik.

⁶ Tonda, Allah arye nyabuka ati ara, atalak ara Israel ninye Horeb mutuku unmekak uk, sik karakna ning nirya kwrilobuka, talye urdemuk banmek. Aning ton kum karakmekce biyik.

Musa cang kain arye dobuka, domuk doltakna tenda aik, Allah ap yupu talipnamik ati, nyabuk yupu

⁷ Horeb mutuku ulamik talak ara, ninye weik ulamik noutamak kum bukni, Musa cang baju arye doltakna aik dobukabukce, ‘Allah el si Yahweh ap, yupu talinamap’ tenen ati, mitik tonun yukak dopdeibuk. Dobukce nyabuka ara, “Anyaik ara, Allah ap yupu talina ati, barasik dopne,” nyabuk. Yata ninye do nirya, ‘Allah arye na ikin unilye ning yupu bokeipnute’ tenen, patapne nang ara, anyaik dam yangalamik. Adoltakna aik ara, sik Israel ninye ulamik dam kum bukni, mitik tonun yukak dobuk.

⁸ Musa adoltakna aik binman talak ara, Israel nang sik aik koproba cang kain aik, bublan dam tikna arye, bita dinmanabuk, Musa yukak dolilamik aik, Allah ap yupu talin aik wekelbalamuk.

⁹ Musa akunum weknopura, im deice arye mitikto dua bum ayukumna atonun kibuka yana arye, el doltakna aik bublan dam yanuka tunim apneba, adua kan-kan Musa ap, Allah el si Yahweh ap neika yupu talilamdik.

¹⁰ Atalak ara, Israel nang dinmanabuk, Musa yukak oudopreiamik aik pum tam wekna arye, anyaik bublan dam adua yanopura, sik Israel ninye adiparyuk, sik ning koproba cang kain aik dam, yuk-yuk tikuka dinmana ani, Allah el si erelamik.

¹¹ Musa ap, Allah el si Yahweh ap yupu sisiklamdik talak ara, ninye ton el kwit ap, yupu neika epdakirye, sisiklamdaka atonun winilamdik. Yupu akunum talipnopura, Musa tamubuka Israel ninye ulamikak balamuk bukni, el melinanye el si Nuk arye deiamuk mi, kamnye el si Yosua bira, Allah ap ansinibuka yupu sisikna aik damuk ulamuk.

Musa birye, Allah el dirina eibuka ati, nyabuk yupu

¹² Tonok sum ton Musa birye Allah el si Yahweh ati nyabuk. “Ance nati nyamnuluma ara, ‘Anang dobuka narye nyalamse mutuku bobinamlam,’ nyamnulum bukni, anang bobana ati, melipnamnilanye bira, yatanye wipdeipnamlam do? Anye si min kum nyapnulume. Tonda, Allah ance nyamnuluma ara, ‘Narye an si kel bikisirye, na kanye ara, an deice deipkise,’ nyamnulume.

¹³ Ati wini talak ara, ance na deice an kanye akunum deiamniminyopura, ance winiminye ning peterepnutume. Peterepnutumba, adeice arye na kel kipkitinye. Tonda, an teneminye bisik, ‘Diksukumuk ulul bisik ani,’ nyapniminba, narye anti moubuka kel kipnamkine. Winipnyopura, an kanye ara na deice tuba delinamnilame. Aning moropmakina ara, talye ati kume. Na bobinamne ninye, sik Israel nang ara, an ninguk unamake,” Musa birye Allah ati nyabuk.

¹⁴ Nyabukura, Allah el si Yahweh arye tamubuka nyabuk. “Narye an dam yanuka upnirye, neika binamname. Narye anti, teleb kanye bobuka, nimalye dakeiyam asa un deiyok ning tuba arepkiniba, kanye imun kanye bobuka kum unamlame. Teleb uk unamlame,” Allah arye Musa biti nyabuk.

¹⁵ Nyabukura, Musa birye tamubuka Allah ati nyabuk. “Naio, an ap, nun ap, neika kum bibirye, nun kum melipsiminyopura, ‘Amutuku batakuka, yuk mutuku bilulume,’ nyana ara kume,” nyabuka morobuk.

¹⁶ “An ap, nun ap, neika kum bibyopura, yata wiribipya deice arye, yuk ninye eipsikirye, ‘E Musa ap, sik Israel ninye ap ara, Allah el kanye sik deice delilule’ tenen, kel kipsiting do? Aning atonun, na ap Israel nang ap, an ap, neika kum bibyopura, yata wiribuka yuk ninye nirya arye, ‘E sik Israel ninye ara, dipkoprob Allah el ‘Naʼ tenen, nang unyake’ tenen, kel kipsiting do? Sikce nun nirya ati, ‘Kume, anang babye talye ninye dem uka. Sikda, tukwak unyak ninye, yuk yala ninye nirya atonun unyake. Sikda ninye unyak noutamak arye, weik mambul ninye dipkoprob kum unyake. Sikda talye ninye uka,’ tenepnamsiyake.” Musa birye nyabuk.

¹⁷ Nyabukura, Allah el si Yahweh arye, Musa biti nyabuk. “An moropmanilam ning ara, aninguk narye melipnamsine. Deiyok ara, na kel kipkisirye, na kanye an deice deipkisa atia,” nyabuk.

¹⁸ Nyabukopura, Musa birye tamubuka Allah ati morobuk. “Wini talak ara, an dirina koproba ara, ‘Na eiptinye’ tenen, nati lak kipdeipnilyame,” nyabuk.

¹⁹ Nyabukura, Allah el si Yahweh arye tamubuka nyabuk. “Na mikip ap, pia teleb wininye ning ap, weik mambul ning ap, an dam winipnin banirye, na si koprop Yahweh laka nyapnamakine. Tonda, ‘Naʼ tenen, ning ap, na kanye delin ning ap, bico tenenamne ning ap ara, na wibuka deipnamne ninye ati, aning arepnamne. Aning atonun, sik malye winibiceba, adiparyuk oploptinye bukni, bico tenepnirye, namin kipnamne ninye babye, na dem aryuk wipnamne. Nara Allah ununa ati nyapkine,” Allah arye nyabuk.

²⁰ Nyabukce, ayupu ton nyabuk. “Na dirina ap, na teleb unun ning ap, eipnalam bukni, na urasin ara, ance lakoprop kum eipnutume. Ara, talye ati kume. Deiyok ara, na urasin lakoprop kibuka eipnutunye bira, yata wiribuka kam tuba uptu do? Kume, anye bira dibina uka,” Allah arye nyabuk.

²¹ Nyabukopura, Allah el si Yahweh arye, ayupu ton nyabuk. “Musao, na aunmana dam arye, ortam mutuku bimince, mutuku pungkona dam deice tikmince, dinamnilyame.

²² Wininmaminya ani, na dirin ap, mikip ap, an dam lakoprop kibuka yanyopura, eipnuminyopura, narye an dobuka, amutuku dam keil deiya pum tam dongopkinirye, na taruk arye lelipdongopkinyopura, bisibuka binamkine.

²³ An unmaminyak akunum bisibuka binyopura, na taruk lopdopnyeba, na donga tam uk eipnamnilam bukni, na urasin ara pia kum eipnutume,” Allah arye nyabuk.