Keluaran 32 - Eipomek

Kat ning, el si ara emas arye, sapi basam mi urasin atonun memepdeibuka, si erelamik ati, nyabuk yupu

¹ Atalak ara, Israel nang arye, ‘Musa ara, dan talak yanamle do?’ tenen, pia dilamika ani, el Sinai mutuku kon ouku weik ulamuk. Ulamukce, sik dam tamubuka min kum yayukce, ouku weik mabuk ati, sikce Harun dam bulubuka yayikce, elti, nyabik. “Musa ara, Sinai mutuku kon arye nun dam kum yayuk ati, yata wiripnuyap do? Ance, yuk Allah atonun ning ton, nun dam memepminba eibibirye, aning si erenamabe. Aning ara, nun deiyoknye usilirye, menekuka balibuk, nunda aminyan banamabe. Nun deiyoknye unamsile. Deiyok ara, Musa Mesir mutuku arye bobuka yasuknye, elda talinye binya. Elda, Sinai mutuku kon arye tunim abuka ati, ‘Elda, tamubuka nun dam yanamle do, kum do?’ tenen, nun walwale. Ati, Musa el pununa ati, yuk allah atonun ning ton, memepra deipsutumba, aning arye, ‘Winiplulume,’ nyanamsile. Ara, ‘Musa akunum dibuk do, kam ulul do?’ tenen, nun walwale atia,” nyabik.

² Nyabikba, Harun birye tamubuka nyabuk. “Anggunce nyabuka moropmanulum ning ati ara, anggun kilapu ap, mapu ap, anggun kilmapu ap, urasin teleb ning emas ara, sik amul dongonyak ning nirya ara, bulubuka na dam boyanamalume,” nyabuk.

³ Nyabuka ati, sik Israel ninye nirya kekebikce, sik urasin teleb ning, amul dongolamik emas nirya bulubuka bobukabikce, Harun dam boyayik.

⁴ Aning nirya bulubuka, Harun dam boyayikba, doprobukopura, Harun birye dekna weik ning, emas nirya uku dabukba, mitang kibukopura, elce moubuka, kat ning emas arye puturubukabukce, sapi basam mi urasin atonun kipdeibuk. Awinibuk ning ara, Israel nang arye nyabik, “Asapi basam urasin atonun ning ara, nun ni Allah atonun unamsile. Mesir mutuku arye bobuka yanamsuknye, Allah kume. Ara, yuknye kum bukni, wini talak Harun birye, emas dobuka memepdeipsuk sapi basam ara, lyepsuknye atia. Aning ara, nun ni Allah atonun unamsile,” nyabik.

⁵ Anyanmek ning kekebukopura, Harun birye aning urasin dam, keil pala dobukabukce, pala keil taplakakuka, yangabuka moupdeibuk. Ara, ‘Kam ning obuka, akeil deice deibibirye, asapi mi atonun ning si erepnamap’ tenen, keil pala yangapdeibuk. Keil yangabuka moupdeibukopura, nyabuk. “Ura kekepnululume. Ambusum ara, nun ni Allah el si Yahweh ati, el si erepnamapa ati, kwalya kwalibuka dinamabe,” nyabuk.

⁶ Nyabukopura, mapmeka berekukura, pia beren tam koproba arye, sapi basam obuka boyayikopura, ‘Allah arye nun malye ning kilipnamsil’ tenen, ‘El kanye teleb kina ati, arepnuyabe’ tenen, aopmek basam dobuka keil pala yangaeiamikak deice uku dabik. Tonda, ‘Allah ap, nun ap, yuk nang ap, teleb kibuka neika uptibye’ tenen, kam ning yuk ning obuka arebik. Bukni, uku kum dibuke. Aning nirya ara, Allah ati, arebik. Akunum arelbinmikce, din ning ap, kanye wangan mek ap, dinmikce, talye ubula kilapu yolana ap, yuk malye-malye winina weik tonap wininmeke.

⁷ Wininmekba, Allah el si Yahweh arye eibukce, Musa biti, nyabuk. “An Mesir mutuku arye boyanamlum ninye, sik unyakak ara pia malye-malye akunum wininyaka deice arye, malye winililanmak ati, anda min pola amutuku dup arye, sik unamakak kouluka bilyame,” nyabuk.

⁸ “Narye, ‘Aning ara wininamlulume, aning ara kum wininamlulume,’ nyabuka nyalamse yupu ara, sikce akunum batakuka, yuk bisik akunum banmaka anya arye, na nyamse touk kum winibikirye, sik dem aryuk, sapi basam urasin atonun ning, emas arye memebuka, aning si erenmakce, aning ati si erebuka, kam ning obuka aning ati arenmake.” Allah arye nyabuk.

⁹ Nyabukce, ayupu ton nyabuk. “Na kele anang ara, sik malye pia weik wininyake. Tonda, na yupu kum kekeninyake,” Allah Yahweh arye nyabuk.

¹⁰ “Ati ara, anda na dam batakuka yuk mutuku binamlyame. Amalye wininmak ninye ati, na yu weik upnile. Ati, ‘Anang nirya obuka sirya daknune,’ tenenmane. Amalye ninye obuka, sirya daknaman bukni, Musa anda, mapu deipminba, dadeipdanin, balamikca ani, deipnamak ninye ara, weik kipra balamlya ani, kum nukmanto unamake. Narye anti teleb kipdeipkiniba, telebuk unamlyame,” Allah arye Musa biti nyabuk.

¹¹ Ayupu nyabukba, Musa birye, Allah el si Yahweh arye, ‘El tenepmal kanye ara, namin kipturye bataktue’ tenen, ayupu nyabuka, Allah ati morobuk. “Se na ni Yahweh, an yu weik upkiliba, ‘Israel ninye wenebuka opnamne,’ tenepmalam ning ara, yata deiyok ati do? ‘Yu upmakil ning ara, bataktum do?’ tenen, moropkine. Aninye nirya ara, Mesir mutuku noutamak ulamik ani, an taruk mikip deice arye boyanamsulume. Tonda, ninye kum winipmanto ning, mikip weik pil dopluma deice, dalubuka boyanamlum ninye ati, ‘An yu aninye deice kum deipnamlyam’ tenen, moropkine,” Musa birye Allah ati nyabuk.

¹² Nyabukce, ayupu ton dukdonobuka nyabuk. Ance aninye wenebuka opminyopura, Mesir mutuku nang arye nyanamsiyake. “Se, Allah arye Israel ninye ati, nun mutuku noutam arye lyebuka bobinamuk bukni, wini talak ara, yu kanye bobukce, ‘Anang ara weik mutuku noutamak oplopnirye, sirya daknyopura, tukwak mutuku im sirya, mutuku sirya nirya noutam, sik pia kum upnamake,’ tenenmale,” nyabuka nyanamsiyake. Aning tenebuka nyapsitingopura, pia malyeto nyapsitinge, na nio. Ati ara, an yu upmakilba, ‘Aninye opnamane,’ tenepmalam ning ara, pia bataknamlyame, na nio. Na ni Allah Yahweh, ‘Ance wipdeiamlum Israel ninye nirya ara, obuka sirya kum daknamsilyame’ tenen, moropkine na nio. Musa birye Allah ati nyabuka morobuk.

¹³ Musa birye nyabukce, ayupu ton dukdongobuka, Allah ati nyabuk. Na nio, an mapu Abraham ap, Isak ap, Yakub ap ati, ‘Wininamsine,’ nyabuka, nyalin yupu nyalamlum ning ara, ila tuba teneipdenulyame. An si koprop deice arye nyalamlume. “Anggunda, ‘Na ninye pia unamlume’ tenen, narye anggunti, wipdeiamsise. Anggunce deipmunba, anggun mapu arye deipdanin banamak ninye ara, pia weik arepnamsine. Arepnamsin ninye nirya ara, yupa pia weik unamak ati, kum nukmanto unamake. Kurya im deice yupa weik tiklamla atonun unamake. Tonda, na nyalamsise atonun, ‘Awiniryuk mutuku nirya arepsiniba, anggunce amutuku pia talibuka, anoutam anyuk pia unamak,’ nyabuka nyapdeiamsulum ning ara, luba kina kume na nio,” Musa birye Allah ati nyabuk.

¹⁴ Musa birye, Allah el si Yahweh ati, ayupu nyabuka ati ara, Yahweh arye, ‘Yo, amalye ning wininmak ninye nirya wenepnirye, obuka sirya daknamane,’ tenepmanua ara, bataknirye, ‘Akilisal kum opnamane,’ tenebuk. Utenebukce, Allah arye yu upmok ning nirya ara, aninye sik nong deice ikin ning kum deibuk. Winibukce, Allah el yu upmok ning ara, batakukce, tonap teleb kanye bobuk.

¹⁵ Atalak ara, Musa Sinai mutuku kon arye tamubukabukce, sik Israel kili sal ulamikak kolukuka yanuyuk talak ara, keil pala bitinye dobuka koulukuk. Abokmok keil bitinye pala deice ara, Allah arye, ‘Wininamlulume, aning ara kum wininamlulume,’ nyalamuk mem yupu ara, Allah el taruk koproba arye, akeil deice dana-dana tam nirya sekukabukce, Musa biti arebukba, aning bobuka koulukuka yayuk.

¹⁶ Akeil pala bitinye nong ara, Allah arye memepdeibuk. Tonda, akeil deice yupu sekeibuk ning ara, Allah elce nyalamuk yupu koproba, el taruk koproba arye, akeil pala deice ara, Allah elce nyalamuk yupu koproba sekeibuk.

¹⁷ Musa ap, Yosua ap, amutuku dup arye koulukrik talak ara, Israel ninye arye tuba malye-malye wininmikce, weik yupu nyanmekba, Yosua birye ayupu kekebukopura, Musa biti nyabuk. “Se, yupu kekepmana ara, ninye arye olanmakirye, lelim nyalamak touk nyanmaka ati ara, Israel ninye unmakak olanmakba kekepne,” nyabuk.

¹⁸ Nyabuk bukni, Musa birye tamubuka nyabuk. “Kume yupu kekenmanama ara, yu nang arye ninye obuka malye kibikirye, sik kanye lon mot selamak atonun kume. Tonda opdongobice tam nang anirye ngaluklamak atonun kum nyanmake. Aning kum bukni, sikda kanye deibuka talye mot senmake,” Musa birye nyabuk.

¹⁹ Nyabukopura, Yosua ap, Musa ap banmarika ani, ortam birikopura, Musa doltakna aik dam biyukce, dinmokba, sapi basam nong atonun puturubuka memepdeipmik ning ati, si erenmikce, mot senmek ning ati eibukce, Musa bira yu weik ubuk. Yu ubukba, Allah el yupu sekiamuk keil pala bitinye dobukabukce, donokukba, Sinai mutuku dam arye Allah arye sekiamuk keil pala bitinye teleb uka sice buklobuk.

²⁰ Abinuka poubukopura, sik sapi basam nong atonun memebuka deipmek ning binuka dobukabukce, uku dongobukba, uku arye dibukabukce, sice buklobuk. Sice dayuk ning ara, dobuka, mek pum tam dongobukba, yung-yunga bukukopura, purubukabukce arebukba, Israel nang ati “Amek ara, anggun nirya diplulume,” nyabukba, sik aninye nirya, malye kanye bobuka aning dobuka dinmek.

²¹ Atalak ara, Musa birye Harun biti nyabuk. “Aning ara, sikce yata ning ton wiripmakiyak ati do? Yata wiripmakiyaka deice ati, ance sikti, malye kilinmalam do? Ance anang bobuka yanamlum diparyuk, pia malye wininmalam ning ara, weik mambule. Aning ara, pia ikin weik, malye ulin ning sik nong deice deipmalam ara, yata deiyok ati winipmalam do?” Musa birye Harun biti nyabuk.

²² Nyabuk buk, Harun birye Musa biti nyabuk. “Na nio ance na deiyoknye ulama ati, nati wanina meme. Aninye sik malye wininyak ning ara, an babye akunum kel kiplume. Aninye ara sik bidamnye arye, ‘Malye winiptibye,’ tenena uk unyake,” nyabuk.

²³ Sikce nyabuka moropnike. “Ance yuk Allah atonun ning ton nun dam memepminba eibibirye, aning si erenamabe. Aning ara nun deiyoknye unamsile. Aning menekuka balibuk, nunda aminyan dobolbanamabe. Deiyok ara, Musa Mesir mutuku arye bobuka yasuknye, elda talinye binya. ‘El tamubuka yanamle do, kum do? Dibuk do, kam tuba ulul do?’ tenen, nun walwal atia. Ati nun talibuka unamsil ning ton memepdeipsilyame,” nyabuka moropnikba, sapi basam mi urasin atonun puturubuka memepdeipse.

²⁴ Nyapnika ati, narye sikti, nyapse. “Ura yatanye do nirya, emas ning auplye nang ap, kilapu ap nirya ara, aning dobuka bulubuka boyanululume.” Nyapsiba, sik amul birilamek ning kwerya nirya kwiribuka arepnikba, uku noutamak talye dongopsopura, talye karin arye, sapi basam urasin atonun ning dayukce, el yuk arye tikilyayuk. Harun birye tilila ati, Musa binyak nyabuk.

²⁵ Atalak ara, Musa birye kel kibuk. Harun birye aninye teleb kibuka kum talibukce, batakukba, sik Israel nang malye winipmik. Malye wininmik ning ara, basam poka taleamya deiyoknye birye kum kalikliba, el basam poka paklobuka buru tam talye balamla atonun, kanye bona kum diparyuk, malye-malye ning weik wininmik. Tonda, amalye-malye wininmik ning ara, ‘Yuk mutuku nang eipsikirye, nalibuka akutusinyake’ tenen, kel kibuk.

²⁶ Aning nirya kekebuka bikuka anya arye, Musa sik doltakna aik bublan dam tikukabukce, nyabuk. “Yata nang do, ‘Allah el si Yahweh, el diamuk talinamsile. El yupu kekebuka, el siuk erenamabe,’ tenebice nang nirya ara, na dam yanululume,” nyabuk. Nyabukura, Lewi yala nang nirya, Musa el dam yayik.

²⁷ Yayikba, Musa birye anang ati nyabuk. “Israel ninye talibuka melisulul Allah, el si Yahweh arye nyasulule. ‘Anggun nirya parang ya dopropmunce, Israel ninye sik doltakna aik noutamak nirya bimunce, atam ap, otam ap, dana-dana tam nirya bamunce, sik malye-malye wininmak ninye nirya opnamlulume. Ara, anggun kwit capu babye, anggun du yapu nang babye, anggun kayapu nang babye, anggun dam unmakce, malye wininyak ninye babye nirya, adiparyuk olbilulume.’ Allah arye nyapmasila ati, anggun Lewi yala ninye arye winiplulume nyapsine,” Musa birye Lewi yala nang ati nyabuk.

²⁸ Allah arye nyapdeipmok touk, Musa birye, Lewi yala nang ati, ‘Winipnamlulume,’ nyabukba, sik Lewi yala nang arye, malye unmek ninye nirya, yupa pia weik 3.000 ninye ya arye sekuka obikba dibik.

²⁹ Winibikba, Musa birye Lewi yala nang ati, ayupu ton nyabuk. “Arup arye deiyok koubuka, Allah el si Yahweh, el bidamang ‘Na’ tenen nang ati wipdeipmasile. Deiyok ara, anggun dam unmangu ninye bukni, anggun mapu koproba ap, anggun du yapu ap, anggun kwit capu ap nirya, opmaluma deice arye, arup Allah Yahweh arye melipmasil deice arye, tuba tonap teleb kipdeipmasile,” Musa birye nyabuk.

Musa arye, ‘Allah arye, Israel ninye ati, bico tenebuka melinamsil’ tenen, Allah ati morobuk yupu

³⁰ Sik mapmeka, berekukopura, anyuku sum ara, Musa birye sik tuba kam unmek ninye, Israel ninye ati nyabuk. “Anggunda akunum weik malye winipmalum bukni, wini talak ara, ‘Anggun malye ning Allah arye namin kipnamsil do, kum do?’ tenen, Sinai mutuku welepnirye, Allah el si Yahweh ap epdanimnyopura, narye, ‘Anggun malye winin ning kilibuka namin kipnamsil’ tenen, aning pununa ati, Allah moropnamasine,” nyabuk.

³¹ Nyabuk touk, Musa birye Allah Yahweh el dam ila tuba welebiyukce nyabuk. “Se anang ara, pia weik malye winipmak ning ara, laka nyapnukine. Sikce sik bidamang ati, sapi basam urasin atonun ning, emas dobuka memepmekce, aning ati, ‘Nun ni Allah atia’ tenen, aning si erenmek.

³² Winipmek bukni, wini talak, ‘Ance sik malye winipmek ning ati, namin kiptum’ tenen, moropkine. Na moropmakin ning ati, winipminyopura, teleb uka. Bukni, ‘Namin kum kipnamsine,’ tenepsiminye ning ara, Israel nang sik pununa ati, kam unamak ninye sik si sekelin buku, kam unamak nang buku noutamak sekeipnulum ning ara, kilipnilyame,” Musa birye Allah ati, nyabuka morobuk.

³³ Nyabukura, Allah el si Yahweh arye, Musa biti nyabuk. “Yatanye do, nati malye kipdeipnilyopura, el si ara, kam un buku noutamak sekse ning ara kilipnamne,” Allah arye nyabuk.

³⁴ Nyabukce, ayupu ton nyabuk. “Wini talak ara, Musa anda, Israel ninye sik dam bimince, aninye bobuka bobimince, narye, ‘Ateleb mutuku arepnamkine,’ nyabuka, nyalin yupu nyapdeiamkise mutuku, anyuk binamlume. Ara, narye dopkwetepniba, na pil dona malaikat arye menekuka, melibuka balibuk, anggunda el aminyan tam bimunce, narye nukise mutuku binamlume. Unamlum bukni, sik malye winipmangu ninye ara, sapi basam urasin atonun, puturubuka memepdeibikce, aning si erenmek ning ati, na tenyamse talak akunum uplyopura, anang nirya ati, weik arye wenebuka opnamne,” Allah arye nyabuk.

³⁵ Aminyan talak ara, Allah el si Yahweh arye nyabuk touk, weik kanye imun uk, uk talina deiyok ning, Israel ninye sik nong deice deibukba, pia weik uk dilamuk. Deiyok ara, Harun birye kat ning, el si emas arye, sapi basam urasin atonun ning memebuka deibukba, sikce, aning ati si erenmek ninye ara, pia kanye imun ning arebukba, uk dilamukba Israel ninye weik diplamik.