Keluaran 30 - Eipomek

Siltong teleb ning uku dongonak, el si mesba ati, nyabuk yupu

¹ Allah arye, Musa biti nyabuk. Na Allah si erena ati, siltong teleb ning, uku dongonak, el si ara mesba, kat yo el si ara, Akasia yo arye, memepnamlume.

² Asiltong teleb ning, uku dongonak ara, el cang arye, kup-kup dana-dana kintinibuka memepnamlume. Tonda, aning el cang ap, el pala ap ara, kikliba neikto touk, 45 sentimeter kiklibuka kintinipnamlume. Atouk tonda, tikilin yo, el cang ara, 90 sentimeter dekuka kintinipnamlume. Winipmunce, siltong teleb ning uku dongonak ara, kup-kup sirya (segi empat) kintinipmamunyak nirya ara, sapi basam kisok tace belalamla ato ning, memeplum ning ara, tabakuka deipmunyeba, atace ap, mesba nong ap, tonok kipnamlule.

³ Amemebuka deipmunye ning, itam kup-kup ara, dumbarye sirya tam ara, sapi basam kisok tatce atonun, ubuka memepdeipmunce tabakuka tonok kipnamlume. Winipmunce, el aning deice nirya ara, urasin teleb kat ning, emas pia teleb ning aryuk, taplak deipnamlume. Tonda, aning kup-kup nirya ara, dekna weik kat ning emas arye, ‘Urasin teleb upnamleʼ tenen, el si bingkai arye memepmunce, kwanibuka ongopdongopnamlume.

⁴ Siltong teleb ning uku dongonak, el si mesba ati, memeplum ning, amu tam dana-dana arye, pala yo dongona ati, cincin ato ubuka, talin ning tupne dam bitinye atonun ubuka deipmunce, kintinipnamlume. Acincin ara, mesba talibuka bobana ati winipnamlume. Tonda, yo cang dongona ati, acincin ato ning ara, urasin teleb ning, el si bingkai kwanibuka, ongopdongopmamunyak, amu tam deipnamlume.

⁵ Talibuka asiltong ning uku dongonak, bobanak ati, kat weik yo, el si akasia yo aryuk, dopnamnyake. Winibicopura, ayo deice ara, dekna weik teleb ning, emas arye taplak deipnamlume.

⁶ Asiltong teleb ning uku dongonak ati, kintineip deiamlum ning ara, Allah arye Musa biti, “Aning ara, wininamlume, aning ara, pia kum wininamlume,” nyabuka, nyalin yupu nyapdeibukba, marikna pum arye libuka deiplum aik koproba, Pia Teleb Lek Aik pum tam binuka deipnamlume. Anyaik wilibuka lelina ati, cang kain lalkwetemunyak bukni, otam aik pum tam binuka deipnamlume. Tonda, ayo marikna pum, el bublan deice ara, kam ning obikirye, ining burubuka likinamakak, aning urasin tam, siltong teleb ning, uku dongonak memepmamunye ning bobuka, asukumuk binuka deipnamlume. Winipmunyeba, anyaik pum tam asukumuk, na ap, imam deiyoknye ap, epdananame.

⁷ Asum-asum nirya, Harun beren tam talak arye, weisa lan ning upna kintinilina ati yanganamle talak ara, Harun el adiparyuk siltong teleb ning, uku dongonak dam yalirye, uku dongonamle.

⁸ Beren tam talak winipmalya atonun, sintam babye atonun, weisa lana ati yanganamle talak nirya ara, asiltong teleb ning uku dongonak dam yalirye, uku dongonamle. Aning ara, wini talak arye dipdongobuka, doyanamle talak nirya ara, apil nirya atonun donamlule.

⁹ Siltong teleb ning, uku dongonak deice ara, siltong teleb ninguk uku dongonamlume. Yata ning do nirya, aning deice ton, pia kum delinamlume. Ara, yuk yala kam ning do, roti kwaning ap tabakuka, dana ati dongon ning terigu do, asiltong ning uku dongon deice, pia kum delinamlume. Tonda, aning atonun, na Allah arena ati, anggur mek babye amesba deice ara, pia kum dikilinamlume. Amesba deice ara, siltong teleb ninguk, uku dongolyanganamlume.

¹⁰ Bukni, tonok keting tamun noutamak, like tonok sum ton, Harun bira, kam ning oplirye, ining burubuka, asiltong ning uku dongonak, amesba el dana-dana tam tatce ning upmalyak deice, ining likeipnamlule. Ara, talye kam un ning ona kum bukni, aining ara, sik Israel ninye ati, ‘Nun malye unyap ning namin kipsilirye, kum daneipnamsilʼ tenen, kam un ning obuka boyanamle talak, like tonok talak ara, aining dobuka, sapi basam kisok tatce atonun ning memebuka deiamicak deice, binuka likuka delinamlule. Apil donamle ning ara, aketing tamun, aketing tamun nirya bukni, like tonok sum arye, apiluk donamlule. Tonda, apil donamak ning ara, atalak arye dipdongobuka doyanamle talak babye, tuba donamake. Winibuka dobikiba, aning ap, apil dona ap ara, pia telebuk unamlule. Winipmunyopura, na Allah Yahweh arye, ‘Aning nirya ara, pia telebuk ulule. Malye ning ara, pia kum upmale,’ tenepnirye, kanye deipnamsine. Allah arye Musa biti nyabuk.

Allah Yahweh, el si eren aik pil melinamik nang ati, yo bok arenamika ati, nyabuk yupu

¹¹ Allah el si Yahweh arye, Musa biti ayupu nyabuk.

¹² ‘Israel yala ninye ara, yate barye unyap doʼ tenen, anggun nirya nukmince, anggun si sekna pil dopnumunye talak nirya ara, Israel ninye nirya, sal babye, kilapu babye, sikce, ‘Nun nong dibipyakʼ tenen, sik pununa ati, dekna yo bok ton, na Allah ati arenamninyake. Winipmunya deice arye, anggun nong nirya nukmunce, anggun si seknamlum talak ara, weik uk, anggun nong deice ton, pia kum deipnamsine.

¹³ Israel ninye nukmince, sik si seknamlum talak ara, yata ninye do nirya, akunum nukikirye, sik si sekdobice nang ara, sik anang adiparyuk aning dekna ati, keil uang, el si syikal, arepnamake. Na si eren aik noutam arena ati, ‘Akeil uang el ikin ara, 20 geram nukuka arenamninyake,’ nyabuka, akunum lak nyapdeipsiba, wininyaka atonun ubuka, akeil uang syikal (setengah syikal) arepnamnyake. Aning arenamniyak keil uang ara, na Allah Yahweh, na ning koprop ati, aning buluka delinamniake.

¹⁴ Israel ninye, sik si seknamlum talak arye, akunum nuknamak nang ara, keting tamun dua puluh tahun eitam nanguk nuknamnyake. Winibuka nukicopura, sikda batakana kum diparyuk, yo bok keil uang, el si siyakal bulubuka, na aik delin ning ati, kintinibuka arelyanganamninyake.

¹⁵ Tonda, sik bona weik talin nang ara, keil uang pia weik tonun kum aremake. Atonunuk, sik bona talina kum ninye babye, sik nong ati dekna arenamak talak ara, mitik tonun arena kume. Sik bona weik talin nang babye, bona talina kum ninye babye atonunuk, keil uang el si syikal noutam ninguk bulubuka, nati arepnamake. Ara, “Allah Yahweh arye, ‘Nun malye unyap ning ati, wenebuka opsilyakʼ tenen, sik pununa ati, akeil uang arenamninyake,” nyapne.

¹⁶ Israel yala ninye nirya arye, bulupdeibice, keil uang nirya ara, na si erena ati, ninye ap, na ap, el dan aik pum tam boyamunce, na aik noutam un ning ap, anyaik pil dona ap atibuk, akeil uang dolonamlume. Aning nirya ara, anggun mining nong deken ning atibuk wininamake. Winibikirye, na Allah Yahweh ati arepnicopura, adeice narye anggun Israel ninye nirya ati, wenebuka kum opnamsine. Pia tuba tenepsinirye melinamsine. Allah arye Musa biti nyabuk.

“Taruk mek likna ati, mek delin ning, perunggu pia teleb ning arye, memepnamlume,” nyabuk yupu

¹⁷ Allah el si Yahweh arye, Musa biti ayupu nyabuk.

¹⁸ Mek kwebuka, delin ning tonok ton, kat teleb ning perunggu arye memepnamlume. Memepmunyopura, adeice taplakan ning ara, perunggu aryuk, taplak deipmunce, memepnamlume. Akunum memepmunyopura, aning dobuka, Allah si erena ati, Allah ap, ninye ap, el dan aik otam, kam ning obuka uku dongona ati, keil yangabuka, taplak deiplumak, atam uplibuk, dana tam lilun binuka, amek makau delin ning, asukumuk deipnamlume. Amek makau ap, el delina ap, akunum kintinibuka deipmunyopura, mek kwebuka amakau pum tam dikilongonamlume.

¹⁹ Adikilongonamlum mek ara, Harun ap, Harun el mapu nirya ap, sikcuk amek dopropbikirye, sik taruk ap, sik yan ap, mek likica deice arye, teleb kililanamake.

^20-21 Allah na si erena ati, ninye ap, na ap el dan aik wekelbinukce talak babye, tonda, ‘Allah arena ati, ining ning uku dongopnuyapʼ tenen, kam ning obuka, na Allah Yahweh aren ning, uku dongona ati, kintinip deibika dam bobinukce talak ara, Harun ap, el mapu ap arye, sik yan ap, taruk ap ara, adiparyuk mek liknamnyake. Sik anang arye, aning winibikcopura, narye sikti, wenebuka opniba, kum dipnamake. ‘Aning ara, winipnamlume,’ nyapdeipmakin yupu ara, Harun ap, elce deibuk mapu arye deibikiba, dadeipdanin banamak nang nirya ara, aninguk moubuka talibikirye, pia ati winipnin banamke. Aning ara, kum bataknamake. Batakicopura, wenebuka opniba, sik dipnamakca. Allah arye Musa ati nyabuk.

Aning ara, teleb kilina ati, teleb minyak mek deice arye likna ati, nyabuk yupu

²² Allah el si Yahweh arye, Musa binyak nyabuk.

²³ Wini talak ara, nintong pia teleb ning, aning-aning nirya ara, tonok el si mur mek, el ikin ara, 6 kilo ap, tonda nintong pia teleb nyalul yo, el si ara kayu manis 3 kilo ap, tonda kwei nintong teleb nyalamle ning, 3 kilo ap, tonda, yo si teja yo, 6 kilo ap, dobuka kintinipnamlume.

²⁴ Winipmunyopura, aning nirya ara, na si erena ati, tia doltakne aik pum tam arena ati, ‘Dekne keil uang el si syikal, winibuka ikin nuknamlume,’ nyabuka, lak nyapse touk, ateleb ning kiklipnamlume. Tonda, zaitun yo duk teikikceba, el minyak, empat liter ton tabaknamlume.

²⁵ Anintong teleb ning nirya akunum bulubuka, kintinibicopura, siltong teleb ning kintinina weik kel nang ati arepminyeba, aning nirya tabakuka, bikirye, likin minyak mek, pia teleb ning kintinipnamake. Winibikcopura, aning ara, ninye wipdeipmince, laka kina ati, pil donalume. Alikinamak minyak mek ara, nintong teleb nyalamle ning memebuka, kintinip deipnamlume. Aminyak mek ara, na Allah ninguk winipnamnuluma ati, narye aning pia teleb ulinamne. Aminyak mek ara, ‘Anang arye weik mambul pil donamakʼ tenen, ninye erelin sum ara, sik kisok deice likilinamlume. Aning atonun, yata ning do nirya, ‘Aning ara, Allah el ninguk unamleʼ tenen, aminyak dobuka, aning deice likeipnamlume.

²⁶ Asiltong teleb minyak akunum memebuka deipmunyopura, anggunce aning dobuka, ‘Aning ara, Allah el ninguk unamleʼ tenen, na si erena ati, ninye ap, na ap, eldana ati aik ara, tenda bola aik deice likdeipnamlume. Aning atonun, na Allah arye Musa biti, ‘Sik Israel ninye ara, aning ara, wininamake, aning ara, pia kum wininamake,’ nyapdeipse yupu dobuka, peti marikna el si Peti Perjanjian pum tam dongoplum ning, Pia Teleb Lek Aik noutam deipmunyopura, amarikna deice, aminyak mek likdeipnamlume.

²⁷ Tonda, Teleb Lek Aik noutam deipmunye meja ap, ameja deice deiplum ning nirya ap, tonda weisa lan ning, upna deiyok ap, aweisa deiyok deice ubuk ning nirya ap, el pil don ning ap, tonda anyaik pum tam siltong teleb ning uku dongonak mitik ning, el si mesba ap, akintinip deipmalum ning deice nirya, aminyak mek likdeipnamlume.

²⁸ Aning atonun, ‘Allah arye nun malye wininyap ning, namin kipsilirye, lyepnamsilʼ tenen, kam ning opnarye, uku dongonak, el si mesba ap, aning deice delin ning ap, aning pil don ning, aning nirya ap ara, aminyak likdeipnamlume. Tonda, sik imam nang arye, sik taruk ap, yan ap mek likna ati, mek kwebuka delina ati kintinip deiplumak, el si bak ap, el talina ati, kintinibuka deiplum ning ap nirya ara, nintong teleb minyak arye likdeipnamlume. Winipnamluma deice arye, ‘Aning nirya ara, Allah el ning koprobuk unamleʼ tenen, apil winipnamlume.

²⁹ ‘Aning nirya ara, ‘Allah el ning koprop unamleʼ tenen, apil doplum ning nirya ara, na ning atibuk kintinibuka deipnamlume. Winimunyopura, narye aning nirya teleb kipdeipniba, pia teleb lek weiknye unamle. Ati ara, yata ning do nirya, aning el si mesba dam upnamle ning ara, pia teleb lekuk upnamle. Ara, na Allah ara, na ning pia lek ning dam ulul ati, aning babye, narye pia teleb kilinamne ati nyapne.

³⁰ Tonda, Harun ap, el mapu nirya ap, ‘Allah el aik pum noutam pil talibuka donamaka ati, Allah el ninguk unamakeʼ tenen, sikti, wipdeipmince, ateleb minyak mek, sik kisok deice dikeipminba, imam yala nang kibikirye, na pil pia donamake.

³¹ Tonda, anggun Israel yala ninye nirya kekena ati, nyapnamlyame, ‘Yuk talak nirya ara, ateleb minyak mek ara, talye ninguk kum ulule. Ara, ‘Allah el ninguk ulule,’ nyabuka lakak aryuk, lak nyapnamlyame. Na Allah atibuk, pil donamnulume. Ara, atalak arye dipdongobuka, dounamle keting tamun nirya ara, ateleb minyak kintinipnamlum ning ara, na ninguk unamalula anya arye, aning ara, kum bataknamlume.

³² ‘Winibuka kintinipnalame,’ nyapkise ning ara, teleb minyak ara, talye-talye nang, sik nong deice ara, kum dikeipnamlyame. Tonda, ‘Aminyak teleb upnamleʼ tenen, ‘Aning nirya bulubuka tabakmince, teleb minyak mek kintinipnalame,’ nyapkise minyak ara, yuk minyak ning ap arye, ateleb ning noutam ara, pia kum tabakanamlume. Na Allah arye aminyak mek ara, pia teleb kipdeipniba, lek weik mek dem upnamla ati nyapkine. Ati anggun nirya arye, ‘Kume, aminyak mek ara, Allah el pia teleb ninguk ulule,’ tenenamlume.

³³ Anintong teleb minyak, ato mek kintinibuka delinyak nang ap, tonda, imam yala nang kum bukni, yuk talye daunyak nang, sik nong deice deibikcopura, awinipmace nang ara, Israel ninye kan-kan una meme. Anang ara, yakmunyeba, yukak binamyake. Aning ara, pia dipkoprob nyapne. Awinipmace nang ara, na mapu koprop atonun, pia kum unamnyake. Bataknirye, wenebuka opnamne. Allah arye, Musa binyak nyabuk.

Siltong teleb ning, uku dongonamik ning ati, nyabuk yupu

³⁴ Allah el si Yahweh arye, ayupu nyabukopura, ayupu ton dukdongobuka, Musa biti nyabuk. Na arena ati, nintong teleb-teleb nyalamle ning, winibuka dobuka kintinipnamlume. Ara, Damar yo el pia ap, tonda, Lokan yo bola ap, tonda, Rasamala yo el pia ap, tonda nintong pia teleb nyalamle ning, el si dupa ton dobuka kentinipnamlume. Aning-aning nirya, el ikin ara, atonunuk nukuka, kintinipnamlume.

³⁵ Anintong pia teleb ning nirya arye tabakuka, uku dongon ning ati, siltong teleb nyana ati memepnamlume. Tonda, siltong teleb likna ning memepnamikcopura, weik kel nang aryuk, aning kintipnamake. Aning akunum kintinibikcopura, garam uwa ap tabaknamlume. ‘Aning ara pia teleb, murni upnamleʼ tenen, yuk ning ton pia kum tabaknamlume. Aning akunum memepmunyeba, narye teleb kipniba, aning pia telebuk unamle. Winipliba anggunce, ‘Kume, aning ara, pia teleb ning ulula anya arye, Allah el ninguk unamle,’ tenenamlume.

³⁶ ‘Siltong teleb nyan ning kintinipnulyame,’ nyapkise ning nirya ara, akunum tabakuka kintinipmunyopura, noutam arye ton wilibuka dobikirye, teikne ning arye teikinmamunye ani, uku kalum atonun akunum teleb uplyopura, adiparyuk na ap, ninye ap, eldana ati tenda bola arye dolktakne aik dam boyamunce, Pia Teleb Aik weknamlume. Anyaik noutam ara, na Allah arye Musa biti, ‘Aning ara wininamlume, aning ara, pia kum wininamlume,’ nyabuka, yupu nyapdeipsiba, Musa bira aseksi yupu libuka, deibuk marikna pum, Peti Perjanjian tam upmalyak ara, el urasin tam yan deipnamlume. Asukum ara, na ap sik imam nang, sik deiyoknye ap, buknimirye, yupu sisikinaname. ‘Asiltong teleb ning ara, Allah el ninguk ulula ati, pia teleb lek weik ning ulule,’ tenenamlume.

³⁷ Asiltong pia teleb ning atonun ara, pia kum memepnamlume. Yata nang do nirya, ‘Nun ning ton kintinibibirye, nun tenepmapye touk uku dongopnamabe pia kum tenenamake. Aning ara, pia dipkoprob mem nyapsine. Sik Israel yala ninye nirya arye, asiltong teleb ning ati, Kume, aning ara nun ni Allah Yahweh, el ninguk ulula anya arye, pia teleb lek ning unamle tenenamlume. Nintong teleb nyalamle ning ati, atonun ubuka memenyak nang ara, na mapu pia kum unyake.

³⁸ Yata nang do nirya, asiltong pia teleb nyana ning, atonun ubuka memenyak nang ara, na mapu koprop, ara pia kum wininamake. Aning ara, anggun Israel yala ninye kan-kan kum unamake. Anggun kan-kan arye yakmunyeba, narye amalye winibikce nang ara, wenebuka opnamne.