Keluaran 29 - Eipomek

Allah arye, “Na si eren aik talibuka pil dona ati, Harun ap, el mapu ap, wipdeipnulyame,” nyabuk yupu

¹ Musa ance, na Allah Yahweh si eren aik talibuka pil donamak nang, Israel ninye anggun malye un ning bikna ati, teleb arin ning arenamsiyak deiyok nang, anggun imam nang ara, Harun ap, el mapu ap, min kum wipminye talak ara, ‘Aning ara, Allah damak binuka, el kina ati, pil donamak ati, sik nong teleb kipdeipnuyapʼ tenen, anyapse atonun winipmince, sik anang ara, wibuka delinamlame. Ara, yim sapi basam tonok, kum nepmalye ning ap, tonda, domba basam yim ning, akunum nepmalye ning bitinye ap, dobuka kintipnamlyame. Abasam nirya, sik nong bol malye una kum arye, nong pia teleb ninguk dobuka yaminyeura, ‘Onamabʼ tenen, kintinipnamlame.

² Tonda, ataleaminye atalak, roti kwaning ap tabakuka, dan deiyok ning, tepung terigu ap, kintinibuka boyanamlyame. Bukni, atepung terigu noutamak ara, roti nena deiyok ning, el si ragi ap, tabakuka delina pia kume. Aroti dan ning tepung terigu, pia teleb ning boyamince, noutamak arye boknulyame. Winibuka bokminyeura, dan tam tepung terigu dopropmince, minyak zaitun ap tabakminyeura, roti kwaning den ning, el si kue ton dapnalyame. Winipminye ning ara, nena kum roti kwaning, pia mitik ning ton dapnulyame. Dapminyeura, aning deice arye, minyak zaitun likeipnamlyame.

³ Aroti kwaning den ning, akunum dapminye ning ara, tapu arye wilamak ning aling atonun ning, el si ara keranjang, aning pum bisik libuka deipnulyame. Winipminye ning ara, yim sapi basam opnalam ning ap, tonda, yim domba basam bitinye opnalam ning ap, roti dapminye ning ap, kue dapminye ning ap, dobuka na arena ati, na si eren aik damak boyanalyame.

⁴ Winipminye ning ara, ance Harun ap, el mapu ap ati, nyapnulyame, ‘Sik adiparyuk Allah ap, ninye ap, elana aik bublan damak bilulume, ‘nyapminyeba, ananguk, na ap, elana aik bublan damak yakcopura, anang sik nong nirya ara, ance mek kweipnulyame.

⁵ Aning, sik nong mek kweiminyeura, ance sik imam pil dona deiyok nang ongopnamak baju dobuka, ‘Harun birye, mambul pil donamleʼ tenen, Harun ati baju dobuka ongobuka deipnululume. Ara, na Allah ap, ninye ap, ansilina aik pil dona deiyoknye bira, Harun unamla ati, adibuk pia teleb cang baju, juba ongop deipnulye. Ara, el nong bol deice ongonamle baju kemeja ap, adeice ongonamle cang baju ap, abaju deice bukni, el taram dam deilin ning, el si Efod ap, tonda, sik weik kel nang arye, teleb tapu arye wilamik deiyatinga, el cang baju deice daralongona ning, aning nirya el nong deice ongopnulyame. Aning nirya, Harun el nong deice ongopdeipnulyame.

⁶ Tonda, imam pil dona deiyoknye, el ongonamle ning ara, cang kain arye kisok deice ongolamak ning, topi atonun ongolamak ning, el si serban ara, el kisok deice kitibuka deipnulyame. Winipmince, aserban urasin teleb una ati, urasin teleb kat ning, el si emas arye, teleb ubuka memebuka deiamikce, el si jamang arye, el serban deice palibuka darapdongopnulyame. Awinipmince, seknaminye yupu ara, ani. ‘Allah Yahweh, el ning uka,’ nyabuka, memebuka sekminyeura, el serban deice palibuka darapdongopnulyame. Ara, ‘Allah Yahweh el aik pum tam, pia teleb aik wekenamle,’ tenena ati, anye el tibuk winipnulyame.

⁷ Aning nirya akunum winipminye ning ara, ‘Anye bira, Allah el aik pil dona deiyoknye, imam akunum teleb winipnyeba, Allah el si eren aik pum tam wekuka pil donamle,’ tenena ati, zaitun yo duk minyak, teleb ning akunum kintinyaminye ning dobuka, el kisok deice dikuka deipmince, likipnalyame. Ara, ‘Anye bira, Allah el aik pum tam, pia teleb lekak pil donamle ati, akunum erepdeipne,’ tenepnulyame.

⁸ Imam nang, sik deiyoknye Harun biti, aning nirya akunum winipminyeura, Harun el mapu nirya babye, yukupminba, sik nirya yakcopura, ance el mapu nirya babye, sik nong bol deice ongonamak ning, teleb baju kemeja uk dobuka ongopdeipnulyame.

⁹ Tonda, sik deiyatinga ap, sik kisok kitilamak ning, serban topi ap, ongolinamlyame. Aning nirya ati, “Winipnulyame,” nyapdeipmasin touk, akunum winibikceura, Aning ara, imam pil donamak ati, Harun ap, el mapu ap, wibuka akunum deipmance, erepdeipne,’ tenenamlame. Ara, Harun ap, el mapu ap, ‘Sikda Allah ap, ninye ap, elana ati, Allah el si eren aik pil dona deiyok nang unamakʼ tenen, akunum wipdeipne,’ tenenamlame. Tonda, na Allah arye ayupu akunum wibuka deipsin ati, pia kum bataknalyame. Winipminyopura, atalak arye dukdongobuka dounalam talak noutamak nirya ara, Harun ap, el mapu ap, sikce deibikceba, dadeipdanin banamak nang, ara sik Lewi yala nang nirya babye, imam pil talibuka pia donamake.

¹⁰ Apil nirya akunum dominyeura, yim sapi basam kintinipmaminye ning ara, an adiparyuk na Allah ap, ninye ap elana aik bublan damak boyanamlyame. Winipminyeura, Harun ap, el mapu ap, sik nirya ara, asapi basam kisok deice, sik taruk deipnamake.

¹¹ Winibuka taruk deibikcopura, ance ayim sapi basam obikirye, na dam boyanamlume. Ara, na Allah Yahweh ap, ninye ap, elana ati, na si eren aik wekelban bisik bublan damak boyakce ning ara, ayim sapi basam ara opnulyame. Winibuka apil dopnuminye talak, “Na Allah Yahweh arye, aninguk dinamsine,” nyapsine.

¹² Asapi basam opminye sapi el ining ara, ton wibuka dopropmince, adopropminye ining ara, an taruk tatang arye, aining burubuka, na Allah Yahweh si erena ati, kam ning obuka, uku dongonak ati, keil pala tablakuka, yangabuka kintiniplumak dana-dana tatca belebuk deice likdeipnulyame. Ara anggunce, ‘Allah Yahweh elda, nun malye unyap ning lyepnamsilʼ tenen, el arena ati, kam ning obuka, uku dongona ati, keil pala tablakuka, yangabuka kintiniplum ning, el si ara mesba, adeice tam dana-dana taca belebuk deice ara, aining likdeipnulyame. Tonda, aining tupa auplyopura, ance dopmince, akeil pala tablakuka yangabuka, kintinip deiamunyak, mesba deiyok tam dikdeipnulyame.

¹³ Aning nirya, akunum winipminyeura, asapi basam kob ap, basam dei irin ning ap, tonda keil duk bitinye ap, talima irilamle ning ap, pia teleb ninguk, ance wibuka dopropmince, na Allah arena ati, kam ning obuka, keil pala deice uku dongona ati, kintiniplum ning, el si ara mesba, aning damak bobiminyeura, aning nirya binuka, uku dongopnulyame. Winipminyeura, uku arye, aning nirya dipnamle.

¹⁴ Bukni, ayim sapi basam el tup ap, bol ap, tonda el basam dei ap nirya ara, ance dobuka, anggun Israel ninye dolulum tenda aik arye batakuka, mitik bai tam bimince, adiparyuk uku dongopminyeura, uku arye dibuka sirya daknamle. Alake nyapmasin pil nirya dopminyeura, aning dobuka bai tam binuka uku dongonuminye deiyok ara, na Allah arye anggun imam nang ap, anggun Israel yala ninye nirya ap, anggun malye ululum ning namin kipnirye, lyepnamne ati, apil donamlame.

¹⁵ Ura, apil ton donamlulume. Ara, yim domba basam, akunum nemlye ning bitinye kintipmace ning ara, tonok ton dobuka yanulyame. Boyaminyeura, Harun ap, el mapu ap, sik taruk dobuka, adiparyuk ayim domba basam kisok deice deipnunyake.

¹⁶ Winibikceura, ayim domba basam ara, adiparyuk opnulyame. Opminyeura, ance aining dopropmince, na Allah arena ati, kam ning obuka, uku dongona ati, keil pala tablakuka, yangabuka kintiniplum ning, el si mesba damak, bobiminyeura, akeil kup-kup nirya binuka, dana-dana nirya, an taruk duk arye, aining purupdonokminyeba dulbinamlule.

¹⁷ Ayim domba basam ara, adiparyuk sekuka yuk-yuk kipdeipnulyame. Winipminye ning ara, domba basam dei ap, yan ap, kel yok ap, kisok ap, ance dopmince, teleb ubuka mek liknulyame. Mek likminyeura, adiparyuk aning nirya, basam dei ap, yan ap, kisok ap, tonokak deipnulyame. Ara, mitik-mitik sekuka deipmaminye ning damuk, aning ton tabakua deipnamlyame.

¹⁸ Ayim domba basam kalipmace ning nirya ara, ance na Allah si erena ati, kam ning obuka, uku dongona ati, keil pala tablakuka, yangabuka kintinibuka deipnulumakuk, el si mesba, adeice binuka deipnulyame. Abinuka deipminyeura, an adiparyuk dobuka, uku uk dongonamlyame. Winipminyeba, uku diplirye, siltong teleb ninguk welepliba, na Allah Yahweh arye, asiltong teleb ning kekepnyopura, na kanye pia teleb kinamnile. Winipnyeura, uku diplirye, kin-kin tong teleb ning ara, na damak welebiliba, na Allah Yahweh kekenirye, kanye delinamsine.

¹⁹ Aning nirya akunum pil dopminyeura, min kintinipmaminyebuk, batamaminye yim domba basam bitinye ning ara, aning babye dobuka yanulyame. Winipmince, yupu nyapminyeba, na Allah si eren aik pum tam pil dona ati, wibuka deipmaminye nang ati nyabibyeba, yakceura, Harun ap, el mapu ap, sik nirya arye, ayim domba basam, el kisok deice ara, sik taruk adiparyuk deipnunyake.

²⁰ Aning nirya akunum winibikceura, ance adiparyuk, ayim domba basam ara opnamlyame. Opminyeura, el ining mitik tonun, an taruk duk arye wipminyeura, Harun ap, el mapu ap, sik sirik amul damak amu tam, adeice likuka deipnulyame. Tonda, sik sirik taruk pamu deice likdeipnulyame. Aning atonun, sik sirik tam yan duk weik ning deice babye, likdeipnulyame. Aning akunum winipminyeura, aining ton tupa auplyeura, ance aning dobuka, na si erena ati, kam ning bopnarye, uku dongona ati, keil pala tablakuka yangapmunce, kentinip deipmamunyakuk, el si mesba, akeil deice dana-dana tam nirya, ining purupdonokminye dulbinamlule.

²¹ Tonda, winipminyeura, apil ton dopnulyame. Na Allah arin ning uku dongona ati, keil pala tablakuka, kintinibuka deiplumak, el si mesba, aninguk bimince, akam ning opmaminye tupa ton aupmal ining ara, mitik anun aryuk dopropnamlyame. Tonda, zaitun yo duk minyak ap, aining ap, tabaknamlyame. Aning bitinye, an taruk duk arye, mitik anun arye burupminye ning ara, Harun ap, el mapu ap, sik nong deice ining purupdonokminyeba, aining sik nong deice pulbinduka dupnamle. Aning atonun, sik ongopmakce baju deice, an taruk duk arye, aining purupdonokminyeba dulbilirye, sik baju deice poulbinamle. Winipminya deice arye, ‘Sik aning nirya ara, Allah el si eren aik pum tam talibuka, nun malye un ning kum kilina ati, pil donamsiyak,’ tenena ati winipnalame. Tonda, Harun ap, el mapu ap, sik baju deice ton winibuka likipnalama deiyok ara, na aik pum tam pil don nang teleb ulina ati winipnalame.

²² Yim domba basam bitinye ning opminye ning ara, Harun ap, el mapu ap, ‘Allah el si eren aik pil donamakʼ tenen, erepdeiminye talak, sik pil deiyok koupnamak talak opnalam yim domba ati, adomba kalimna ara, winipnalame. Ance, ayim domba basam opmaminye ning ara, meta telebakuk dopnulyame. Ara, amu damak ulamle meta ap, dei irinak palilamle meta ap, keilduk bitinye ap, akeil duk damak palilamle kob ap, talima irin ning cang tam ap, tonda sirik tam yan sekroba ap, aning nirya dopnalyame.

²³ Tonda, Allah Yahweh na si erena ati, nena kum roti kwaning arepmakcebuk akunum dabikirye, libuka delin ning, el si keranjang aling pum tam deipmace ning noutamak arye, dobuka deipnulyame. Tonda, aroti noutamak arye, nena kum roti kwaning tonok ning ap, zaitun yo duk minyak arye, likmince dapmaminye roti ato ning ap, tonda roti din ning, pia mitik kue ato ninguk dapmaminye ning ap, tonok-tonok dopropnalame. Ara, Allah Yahweh el dina ati, el aik pum tam, el dam deipmaminye ning arye dopropnulyame.

²⁴ Aroti kwaning nirya ap, yim domba basam kalipdoba ap, akunum dopminye ning ara, adiparyuk dobuka, Harun ap, el mapu ap, sik taruk deice deipmince “Nun ni Allah Yahweh dinamsilʼ tenen, el damak dobuka bilulume,” nyapminyeba, sik anang arye na kanye delina ati, taruk tatang deice deibuka, erebikirye, dipkoprob na Allah Yahweh uk tenebuka, arepnamniyake.

²⁵ Winibikceura, an adiparyuk, sik aning taruk deice arye, aroti kwaning nirya ap, yim domba basam kalimna ap nirya, talimakca ning ara, dopropnalyame. Doropminye ning ara, ‘Na arena ati, keil pala tablakuka, kintinibuka deiplumakuk, uku dongolyanamlyame,’ nyapsiba, kitinilumak el si mesba damak boyamince, ayangabuka deibik keil deice, uku dinmalye damak dongopnulyame. Winipminyeura, uku deiplyeba, siltong teleb welepliba, na Allah Yahweh kekepnirye, kanye teleb kinamnile.

²⁶ Tonda, ayim domba basamuk, el taram tup ara, ‘Nun ni Allah eipnusilʼ tenen, na Allah Yahweh, na si erena ati, na dam, taruk tatang deice deibuka, erebuka yan bobikirye, ‘Dipkoprop Allah Yahweh dinmasiliba, elti, akunum arepabe,’ tenepnamake. Utenepnamaka deice arye, ayim domba basam taram arepnamniak ning ara, aminyan anggun babye dina ati ara, anggun dam tamubuka bobimunce dinamlume.

²⁷ Tonda, na Allah si eren aik pil dona ati, imam nang sik deiyoknye, Harun ap, el mapu ap, wepmamunye ani, ‘Asum ara, aning erebibiba, dipkoprob apiluk deiyok koubuka donamakeʼ tenen, wipmunye talak ara, zaitun yo duk minyak arye, sik kisok deice akunum dikminyeura, sik anang ati arepnalam yim domba basam kalimna nirya dobuka, ‘Aning ara, pia teleb ning, Allah el ning atonun ululeʼ tenen, basam kalimna ara, wibuka deipnulyame. Ara, Allah si erena ati, yim domba basam taram ap, yan ap, sekuka kintipmaminye ning ara, an taruk arye, na unyak boyanuka, erebuka talipmince, ‘Allah el dinmasiliba, elti, akunum arepmabeʼ tenen, erebuka lake kipdeipmamunye ning nirya ara, aning nirya malye ning ton kum upmalirye, pia teleb ninguk ulula ati, aning ara, Allah el ninguk ulule,’ tenepmince, na aik pil don nang ati arepnalyame.

²⁸ Anyapmasin ning ara, na Allah arye, anggun Israel ninye ati, ‘Aninguk unamake,’ tenepsisa ati, dipkoprob ayim domba basam taram tup ap, keil yok tup ap dobuka, Harun ap, el mapu ap ati, aning pia arenamlyame. Aning nirya ara, pia kum bataknamlulume. Ara, na mapu, anggun Israel ninye, anggun malye winipmakce ning ati, ‘Nun ni koprop Allah arye, nun malye ning biksilirye, el ap teleb ubuka neika unamabe,’ tenebikirye, kam ning obuka arelyanganamak talak nirya ara, pia teleb ning nirya ara dobuka, Harun ap, el mapu ap ati arenamlyame. Anggun ti arenamlum bukni, tonda, na Allah Yahweh ati arelyanganamnilyame. Ara, anggun Israel ninye nirya arye, ‘Aning ara, nun malye ubupu ning ara, Allah kum kipdeipsilirye, nun ap, el Allah ap, teleb ubuka neika unamabe,’ tenebikirye unamake. Utenebuka arelyanganamak domba basam taram ap, yan ap ara, na si eren aik pil don nang, anggunuk, tenelanamlulum bukni, na Allah Yahweh ati, aning nirya, na si erena ati, arelyanganamake. Bukni, na si eren aik pum tam pil dona deiyok nang, sik imam nang aryuk, atup ning ara dinamnyake.

²⁹ Na Allah si eren aik talibuka, pil dona weik deiyoknye, imam Harun birye, na si eren aik pum tam pil tupa kum doptu ura, el ongolul cang baju ap, deiyatinga ap, Efod ap ara, abaju nirya kwiribuka, el mapu punupnamak nang arepminyeba, el mapu arye abaju ongobuka unamake. Winilamikca ani, elce deipliba, deipdanin banamak nang nirya ara, abaju ongobuka upnin banamake. Ara, ‘Aning ara, Allah el aik pum tam pil deiyok koubuka, pil dopnamakʼ tenen, erepdeipnamlum talak nirya, abaju ongobikceba, zaitun yo duk minyak kwebuka, sik kisok deice diklopmince, anang wibuka ereipnalame. Aning ara, pia ati, wininalame.

³⁰ Harun el mapu noutamak bukni, el li koprop, Harun punamlanye birye, na si eren aik koprop noutamak weklirye, apil talibuka, pil donamle. Tonda, Harun el punamlanye bira, na si erena ati, anggun ninye ap, na ap, neika elana aik noutamak bukni, teleb aik, el si Teleb Lek Aik, anyaik noutamakuk weknamlule. Wininamle talak, like tekbarye (7) sum noutamak nirya ara, abaju nirya ongonamle.

³¹ ‘Harun ap, el mapu ap, sik nirya na Allah si eren aik, dipkoprob pil donamakʼ tenen, wipdepmunye sum ara, akunum nyapdeipmakin touk, yim domba basamuk onalyame. Aopminye domba basam el tup ara, pia malye un ning nirya ara, bobana meme. Pia teleb ninguk, dobuka kintineip deimamunye ninguk, bobimunce, abasam tup nirya ara, danamlyame. ‘Aning ara, malye ning pia kumak, telebak unamleʼ tenen, akunum kintineip deiamunyakuk, adomba tup dabuka kintinip deipnalyame.

³² Ayim domba basam tup pia telebak, dapmaminye ning ara, na Allah ap, ninye ap, elana aik noutamak wekelbana ati, anyaik bisik bublan damak bobikceba, Harun ap, el mapu ap, sik dem dinamake. Tonda, atalak ara, nena kum roti kwaning dabuka, lin ning, el si ara keranjang, aning pum tam libuka deipmakceba, tupa aupmalye ning ap, dobuka dinamake.

³³ Sik adiparyuk, na aik pum noutamak pil dona ati, wipdeipnalam nang, sik imam-imam nanguk, adomba basam kalipdoba dapmaminye ning ap, keranjang aling pum tam dongomamunye, roti kwaning ap, dinamake. Yuk nang ton, aning kum diptinge. Aning nirya ara, ‘Nun ni Allah Yahweh arye, nun malye ning nirya kum kipdeipsilirye lyelonamsilʼ tenen, na Allah ati akunum arepmalyame. Ara, ‘Harun ap, el mapu ap arye, Allah el si eren aik pum tam, pil talibuka donamakʼ tenen, sik wibuka deilin sum ati, ‘Asum ap, apil ap, teleb upnamleʼ tenen, akunum arepmanulume. Tonda, Harun ap, el mapu ap, ‘Allah el pil pia donamakʼ tenen, aning wipdeipnamlam talak, arepmanulum yim domba basam kalipdoba ap, tup ap, roti kwaning ap ara, aninguk dinamake. Sik imam pil talibuka donamak nanguk, dina telebe. Bukni, yuk nang ara, pia kume. ‘Deiyok ara, aning ning nirya ara, ‘Naʼ tenen, ninguk ulula ati, yuk talye nang arye aning dina ara, pia meme,’ nyapsine.

³⁴ Tonda, ayim domba basam kalimna ap, nena kum roti kwaning ap, sik imam nang arye, asum aryuk dinmakca ani, tuba auplye ati, batakmaminye ning ara, beren tam talak ton, pia kum dinamake. Akwal batakmamunye ning ara, beren tam talak yamunce eipmunyeura, anggun adiparyuk dobuka, uku uk dongopmunba, uku arye dibuka, sirya daknamle. Deiyok ara, na Allah ati akunum arepmanulum ning ati, aning ara, pia lek ning atonun upmalula ati, yuk sum ton anggun tamubuka yamunyeura, kum dinamlume. Ara meme nyapsine. Uku dem dongopmunyeura, uku arye diplirye, sirya dakanamle.

³⁵ Narye, ‘Musa an ati, winibuka wininamlulume,’ nyapkisi touk, Harun ap, el mapu nirya ap, ‘Allah el si eren aik pum tam, pil donamakʼ tenen, wipdeipnamlam talak ara, tonok sum arye dukdongobuka, like tekbarye (7) sum noutamak nirya ara, narye, ‘Apil donamlulume,’ nyapkisi touk, adiparyuk apiluk pia donamlulume.

³⁶ Like tekbarye sum noutamak ara, anggun imam nang ap, Israel ninye nirya, ‘Sik malye winin ning, Allah arye namin kibuka kilipsilirye, lyelonamsilʼ tenen, asum-asum nirya, yim sapi basam tonok obuka, na Allah damak arelyanganamnulume. Anye onanamlum yim sapi basam ap, ining likuka delinamlum ning ap, na Allah arena ati, keil pala tablakuka, yangabuka kintiniplumakuk, ara uku seknamlumak, el si mesba, teleb ulinamlume. Ara, asapi basam el tup ap, ining ap ara, dopropmunce, uku dongonamlulume. Ara, Allah el arena ati, keil tablakuka, yangabuka kintinipmunyeura, ‘Teleb kilina ati unmabe,’ tenenamlume. Tonda, zaitun yo duk mek minyak teleb ulamle ning ara, keil pala tablakuka, yangabuka kintiniplumakuk, amesba deice diklopnamlume. Winipmunye ning ara, ‘Akeil deiplumak, amesba ara, Allah el ninguk ulule,’ tenenamlume. Winipmunye ning ara, na si erena ati, keil yangabuka kintipmaluma ara, teleb kilinamlume. Aning arye, na kanye pia teleb kinamnile.

³⁷ Anyapmasin ning ara, tonok sum arye deiyok koubuka unmamunya ani, tekbarye (7) sum uplyopura, apil sirya daknamlume. Winipmunyopura, na si erena ati dobuka arelyangan ning delinaka ara, akeil tablakuka, yangabuka kitiniplumak ara, malye ning pia kum ululce, ‘Pia teleb ubuka telebak unmale,’ tenenamlume. Winipnamluma deice arye, na arena ning deilinyaka ara, pia teleb, lekak atonun unamle. Tonda, adelinak ara, pia teleb unamla ati, yata nang do nirya, na si erena ati, akeil tablakuka, yangabuka deiplumak, amesba yanuka talipnamlanye babye, amesba talipnamle deice arye, anye teleb kilinamle. Pia telebnye unamle. Aning atonun, akeil tablakuka yangabuka deimamunyak, akunum teleb unamla ati, yata ning do nirya, amesba deice delinalam ning nirya babye, amesba bol pipnamla ati, aning babye telebuk unamle. Ara, yuk talye ning, apia teleb mesba bol piplyopura, adeice arye teleb unamle. Amesba ara, pia lekak ulula ati nyapne.

Asum-asum nirya beren tam talak ap, sintam talak ap nirya ara, kam ning obuka, arelyangana ati, nyabuk yupu

³⁸ Tonda, aketing tamun, aketing tamun noutamak nirya, tonok sum ara, na arena ati, kam ning obuka, keil pala tablakuka, yangabuka kintiniplum ning, amesba deice, uku dongonamluma ati, domba basam mi bitinye, keting tamun tonok wamlye ning obuka, na si erena ati, uku dongolyanamlulume.

³⁹ Ara, domba basam tonok opmunyeura, bokuka tonok ning ara, beren tam talak opmunce, arenamlume. Ton ning ara, sintam talak keting owekelbinulye talak ara, na arena ati, tonok basam mi ton obuka arepnumunce, uku dongomunyeura, na si erenamnulume.

⁴⁰ Tonok domba basam mi ara, beren tam talak opmunce, na si erena ati, keil pala tablakuka, yangabuka kintiniplumakuk, yanuka uku dongonamlulume. Atalakuk, aning ap tabakuka arenamlume. Ara, roti kwaning dan ati deiyok ning, el si ara tepung terigu, pia teleb ning nukuka, el ikin ara, tonok (1) kilogram ap, tonda, zaitun yo duk minyak pia teleb ning, tonok liter ap, tabakmunce, aning ara arepnamnulume. Tonda atalakuk, anggur tapu duk mek nukuka, tonok liter ap, dobuka yamunyeura, na arena ati, uku dongonamlulume.

⁴¹ Aning atonun, na si erena ati, domba basam mi bitinye ning ara, sintam onalume. Ara, beren tam talak winipmamunya atonun ubuka, apiluk donamlulume. Ara, roti kwaning dan ati tabakuka dalamak ning, el si tepung terigu, pia teleb ning, el ikin ara nukuka, 2 liter ap, tonda zaitun yo duk minyak pia teleb ning, tonok liter ap tapakmunce, aning ara, arepnamnulume. Tonda atalakuk, anggur tapu duk mek nukuka, tonok liter ap, dobuka yamunyeura, na arena ati, uku dongonamlulume. Aning nirya ara, beren tam talak winipmamunya atonun, sintam babye, apiluk dopmunce, na arena ati, aninguk wininamlulume. Winipmunyopura, uku diplirye, siltong teleb ning, na Allah Yahweh damak weleyaliba, kekepnyopura, na kanye pia teleb kinamnile.

⁴² ‘Aning nirya obuka na arena ati, uku dongonamnulume,’ nyapmasin ning ara, anggun imam deiyok nang arye, pia wininamlulume. Ara, anggunce deipmunba, dadeipdanin banamak imam yala nang nirya, apil atonun dobuka winilekirye, na Allah Yahweh ati arelyanganamniyake. Awininamak ning nirya ara, na si erena ati, na Allah ap, anggun ninye ap, elana aik bublan damak, yamunyeura, apil donamlulume. Tonda, asukumuk na Allah Yahweh ap, na si eren aik pum tam, pil dona deiyok nang, anggun imam nang ap, epdabirye, yupu talinamabe.

⁴³ Anyapmasin sukumuk na ap, na mapu koprop, Israel yala ninye nirya ap, anyaik damak epdanamabe. Ati aning ara, na Allah Yahweh, na weik dirina deice arye, anyaik pia teleb unmale. Ati, malye ning tonok babye, anyaik pum tam pia kum upnamle.

⁴⁴ Na si erena ati, tonda ninye ap, na Allah ap, neika elana ati, kain bol arye dopnamlum aik ap, tonda, na si erena ati, keil pala tablakuka, yangabuka deipmunce, kam ning obuka, uku dongonamlumak ap, Harun ap, el mapu ap ati, aning nirya ara, naryuk teleb kilinamne. Ara, ‘Na pia mambul pil talibuka donamak imam nang arye, anyaik pum tam imam pil donamake. Tonda, kam ning obikceura, amesba keil deice arye, uku dongobikirye, arenamakʼ tenen, naryuk anang ap, aning nirya ap ati, pia teleb kilinamne. Ati, narye, Harun ap, el mapu nirya ap ati, teleb ulinamne. Yuk nang ton wibuka kum deipnamne. Sik Lewi yala nang aryuk, na si eren aik pum tam pil talibuka, imam nang unamake.

⁴⁵ Winibuka unirye, nara, na mapu koprop Israel ninye, sik unyak kan-kan uk unamne. Na ap, sik ap, neika unamabe. Nara winibuka unirye, sik ni koprop, Allah Yahweh uniba, sikda na mapu koprop unamake.

⁴⁶ Winibuka uniba, sik Israel ninye arye na ati, ‘Dipkoprop, nun ni Allah Yahweh ara, el tonok ululeʼ tenen, biknamniake. Tonda, ‘Allah Yahweh el aryuk, nun Mesir mutuku noutamak ulamupu, ikin pil dilamsikba, weik imun kanye bobuka ulamupu bukni, el mikip weik deice arye, dobuka yanamsukaʼ tenen, kel kinamake. Mesir mutuku noutamak arye boyanamsa deiyok ara, talye ati kume. Ara, ‘Nara, sik deiyoknye Allah Yahweh, sik kan-kan noutamak uniba, sikda na mapu koprop unamake. Nara, sik ni Allah Yahweh unamne,’ tenyamse ati, Mesir mutuku noutamak arye, Israel ninye lyebuka boyase. Nara, dipkoprob sik ni Allah Yahweh unune. Sikda, na mapu koprop unamake. Allah Yahweh arye, Musa ati nyapdeibukba, Musa arye sik Israel ninye ati, lak nyabuk.