Keluaran 28 - Eipomek

Imam-Imam nang, sik ongolamak baju ati, nyabuk yupu

¹ Allah arye, Musa biti nyabuk. Israel ninye kan-kan arye, an du Harun ap, tonda, el mapu ara, Nadab ap, Habiu ap, Eleasar ap, tonda Itamar ap nirya ati, anang arye Allah ap, ninye ap, eldana ati, ‘El si eren aik pum tam, pil donamakʼ tenen, ance ananguk wipdeipnamlyame. Winipminyopura, sik anang ara, na Allah si eren aik pum tam, na dam mambul pil don nanguk unamake.

² Musa an adiparyuk nyapmenyeba, na Allah Yahweh si eren aik, pil dona deiyok nang arye, ongonamak baju ara, Harun el ongona ati, teleb baju wipdeipnamake. Winipminyeba, Harun bira abaju ongopliba, ninye nirya eibikirye, ‘Elda, Allah si eren aik pil dona deiyoknye ulula ati, elda mambulnyeʼ tenen, elti, telebe nyabuka, kanye delinamake.

³ Musa ance, baju wina ati, weik kel nangak yukupminba yacopura, ance, sik anang ati nyapmenyeba, sikce na Allah si eren aik, pil dona deiyok nang ongonamak baju, Harun el ongona ati, wipnamnyake. Narye abaju win nang ati, weik kel ongona deiyok ning akunum areamsibuk, baju pia teleb arye winyake. Ati, ance anang ati, ‘Wipnamlume,’ nyabuka lak lepdeipminyeba, sik akel nang arye, Harun el ongonamle baju wipnamake. Ara, ‘Harun birye, Allah el si eren aik pil taliplirye, deiyok koubuka dopnin banamleʼ tenen, erepdeipnamlam sum ara, Harun birye ongonamle baju wipnamake.

⁴ Tonda, ance sik abaju wina kel nang ati nyapminyeba, wibuka kintinipnamak baju ara ani. Tonok ning ara, nong nirya lilina ati, cang baju ton wipnamake. Awibikce baju deice ongonamle ning ara, koubuka daralongon ning ton kintinip deipnamake. Adeice ara, dekna weik keil duk ton, taplak dongobikirye, aning el si Efod ton kintineip deipnamake. Tonda, namin teleb kain arye, kemeja ton wipnamake. Tonda, topi kisok kalulamak ning, cang kain arye kisok kitina ati, el si serban ap, baju deice deiatinga delilamak ning ap, nirya memepdeipnamake. Ara, sik imam nang ongona ati, cang baju wibicopura, an du koproba Harun ap, el mapu ap, sik ongona ati, adiparyuk wibuka kintineip deipnamake. Winibikiba, sik anang ara, na Allah si eren aik pum tam, na dam yakirye, anyaik talibuka, apil dona deiyok nang unamake.

⁵ Abaju wina ara, sik adiparyuk, baju win tapu el si wol tapu, el urasin ara, mirin koprop warna biru ning ap, mirin unggu ap, ining bi ning ap arye dobuka wipnamake. Tonda, urasin teleb ning, emas deice arye memepmace baju, tapu arye dobuka wipnamake. Tonda, pia teleb namin baju, el si lenan, abaju wina ati dobuka wipnamake. Allah arye Musa biti nyabuk.

Allah si eren aik deiyoknye ongonamle ning, Efod ati, ‘Winibuka kintinipnamlume,’ nyabuk yupu

⁶ Allah arye Musa biti nyabuk. Allah si eren aik pum tam, pil dona deiyoknye, el taram deice ongonamle ning, el si Efod ati, winibuka wibuka kintinipnamlume. Pia namin teleb kain, el si lenan dobuka, Efod wipnamlume. El urasin teleb una ati, baju win tapu, el si wol tapu, el urasin ara, mirin koprop ning ap, mirin ning unggu ap, ining bi ning ap arye, dobuka wipnamake. Tonda, urasin teleb ning, emas deice arye memepmace baju win tapu arye, dobuka wipnamake. Aning nirya ara, baju wina kel weik nang arye, abaju winamake.

⁷ Allah aik pil dona deiyoknye, taram lilina ati memepnamle ning, el si Efod, aning takunya deice, sirya dana-dana ara, tapu welepliba takunya deice koulongona ati, tapu ton kitibuka wipnamake.

⁸ Tonda, akintinipmamunye ning, Efod, el deiatinga ton wipnamake. Winipnamaka ati, namin teleb kain lenan aryuk, wipnamake. Adeiatinga ap, Efod ap, dukdongobuka tonok atonun winipnamlume. Abaju wina ara, anggun adiparyuk, baju win tapu, si wol tapu, urasin ara, mirin koprop ning ap, mirin unggu ap, ining bi ning ap arye dobuka wipnamake. Tonda, urasin teleb ning, emas deice memelamak baju win tapu arye dobuka wipnamake. Tonda, namin pia teleb kain, el si lenan, akain arye winamake. Aning kintinip deipmunyeba, urasin tonok kiplirye, teleb upnamle.

⁹ Efod deice taplakuka deipnamlum ning ara, winibuka kintinip deipnamake. Minop ara, urasin pia teleb mirin keil, el si delima bitinye dobuka kintinipnulume. Akeil bitinye deice, sik apu koproba Yakub, el si ton ning ara, Israel elce deiamuk nang, sik si nirya ara, yuk-yuk kibuka akeil deice sekeipnamlume.

¹⁰ Israel, elce deiamuk nang, sik si nirya, amirin keil deice seknamlum ning ara, minop deiamuknye, el si sekdeipmince, anye bukni aminyan talak deipninyanamuk nang nirya, sik si ton yuk-yuk sekuka delinamlume. Aning atonun, dan tam keil deice nakub barye (6) mapu sik si sekminyopura, otam keil deice sik nakub barye nang aminyan talak deiamuk nang, sik si ton yuk-yuk seknamlume.

¹¹ Yakub el si ton ning ara, Israel, elce deiamuk mapu, sik nirya ara, 12 nang anya arye, sik si ara, 12 ubuka seknamlum ning ara, dekna weik urasin teleb keil deice, weik kel nang arye, ninye urasin atonun kibuka sekenyak touk winibuka, asi nirya sekenamlume. Asi akunum sekmunyopura, akeil bitinye dana-dana, dekna weik ning, el si emas dobuka, urasin teleb ning, el si bingkai arye memepdeipmunce, aning dobuka akeil bitinye, sirik tam taplakuka delinamlume. Winipminyopura, urasin pia teleb upnamle.

¹² Akeil bitinye akunum kintinibicopura, aning dobuka, Efod baju takunya deice binuka delinamlume. Ara, Israel ninye arye, akeil deice seknamlum si nirya eibikirye, ‘Se, sik anang ara, nun apu yapu arye deiamikba, dadeipdanin yangalamikba, nun babye dua belas yala nang unyabeʼ tenen, bikinamake. ‘Winipnamakʼ tenen, akeil ap, efod ap, moupdeipnamlume. Efod akunum kintinipmunyopura, Harun bira aning ongonamle. Efod ongonamle talak nirya ara, akeil el takunya deice, lakak upliba, sik apu yapu nang si ton lakak upliba eipnyopura, na Allah Yahweh arye, anggun apu yapu ap, anggun Israel yala ninye nirya ap ati, tuba tenenamsine.

¹³ Yuk ning bitinye ton, urasin teleb dekna weik kat ning, emas arye taplakuka deipmace ning ton dopropnamniyake. Doprobikirye, aemas arye urasin teleb ning, el si bingkai memebuka kintinipnamlume.

¹⁴ Tonda, dekna weik kat ning, emas ton dobuka, kat tapu rantai bitinye kintineip deipnamlume. Aning ara, basam turya bolamaka urasin atonun ubuka, kintineip deipnamlume. Arantai emas tapu akunum kintinipminyopura, arantai bitinye dobuka, urasin teleb ning, el si bingkai deice taplak deipmince, efod ara, mulaca deice wibuka dukdopnamlume.

Allah Yahweh el si erena aik, pil dona deiyoknye, imam el taram dam ongon baju ati, nyabuk yupu

¹⁵ Allah si eren aik, pil don nang, anggun deiyoknye bira, ‘Allah el tenelye ninguk, moubuka kekepnirye, kel biknamneʼ tenen, unamle talak nirya ara, aning kel bikna deiyok ning ton, weik kel nang arye kintinip deipnamake. Ara, Efod baju ara, taram dam ongonamle baju kintinip deipmamunye touk, aning babye atonun ubuka wipnamlume. Ara, abaju wina ara, anggun adiparyuk, baju win tapu, el si wol tapu, el urasin ara, warna biru ning ap, warna unggu ap, ining bi ning ap arye, dobuka wipnamake. Tonda, urasin teleb ning, emas deice arye wipmace baju win tapu arye, dobuka wipnamake. Tonda, pia namin teleb baju, el si lenan, abaju wina ati dobuka wipnamake. Winipminyopura, taram dam ongonamle ning ap, Efod baju ap, urasin pia teleb ning aryuk dobuka wipnamlyame. Aning ara, Efod deice birilkwetenamle.

¹⁶ Allah tenelye ning kel bikna ati, melin ning ara, lenan teleb baju dobuka, kup-kup kintinideipmunce, wipmunyopura, dana-dana yuk-yuk bitinye kwanipdongbuka deipnamlume. Akunum winipmunyopura, abaju el cang ap, el pala ap ara, yuk-yuk bukni, atonunuk 22 sentimeter dem dekuka kintinipnamlyame.

¹⁷ Winipdeipminyopura, urasin pia teleb keil dobuka, yuk-yuk bukni, lelepdeibuka, dumbarye deice arye, taram dam ongon baju deice kintinibuka wipnalame. Ara, lelebuka delina ati, tonok taplakuka deipnamlam keil ara, lep-lep aplirye, mel dakuka mereng-mereng alamle keil, el si delima merah ap, topas ap, tonda baiduri ap, dobuka lelepdeipmunce, memepdeipnamlame.

¹⁸ Aning deice lelelina bitinye ning delina keil ati ara, Zamrud ap, Nilam ap, Intan ap arye, deibuka taplakuka memepdeipnamlume.

¹⁹ Aning deice lelelina winilye delina ati keil ara, Lazuar ap, Akya ap, Kecubung keil ap arye, deipmunce, taplakuka memepdeipnamlume.

²⁰ Nelina dumbarye ning, tablakalina keil ati ara, Pirus ap, Yakut ap, Ratna Cempaka ap, taplak deipmunce, kintinipnamlume. Urasin teleb obarye keil dana-dana nirya ara, dekna weik kat ning, el si emas arye dobuka, aning el si bingkai puturupdeipmunce, memepdeipnamlume.

²¹ Aurasin teleb keil, obarye (12) deice nirya ara, Yakop, el si ton ning ara, Israel, elce deiamuk nang, anang sik si yuk-yuk sekipnamlume. Tonye biti ara, el si ton keil deice, tonye biti ara, el si yuk keil deice sekmince, winibuka seknin banmaminya ani, sirya daknalame. Ara, Israel ninye arye, akeil deice seknamlum si nirya eibikirye, ‘Se, sik anang ara, nun apu yapu arye deiamikba, dadeipdanin yangalamikba, nunda obarye yala nanguk unyabeʼ tenen, biknamak atia.

²² Tonda, taram dam lelildongon ati ongonamak baju kitina ati, urasin teleb ning, emas arye dobuka, rantai tapu bitinye kintinipnamlume. Arantai memena ati ara, basam turya tapu bolamak atonun ubuka, bopmince kintinipnamlume.

²³ Winipmunyopura, aning bitinye ara, taram dam lelina ati, ongon baju akunum kintinipmunyopura, aning kitina ati ara, dekna weik teleb ning emas deice arye, cincin atonun ning, tupne atonun kibuka wipmunce, ongobuka memepdeipnamlume. Winipmunyopura, taram deice ongonamle baju, itam sirya dana-dana bitinye ara, wibuka deipnamlume.

²⁴ Winipmunyopura, dekna weik ning emas arye, min kintinipmamunye rantai tapu bitinye dobuka, emas deice arye cincin ato ning, tupne ongobuka wipmunce, aning atonun kibuka memepmamunye ning, taram deice ongonamle ning bukni, deice tam sirik tam wipmunye ning ara, rantai tapu arye dukdopnamlume. Acincin kintinipmamunye bisikuk, arantai binuka dongobuka deipnamlume. Ara, taram deice ongopnamle ning, sirya dana-dana deice tam binuka dongopdeipnalame.

²⁵ Tonda, arantai tapu sirya yuk tam ning ara, Efod baju akunum kintinipmamunye ning ara, takunya deice emas ning arye, wibuka deipmamunye sukumuk, arantai tapu ara, koupdongopnamlume. Ara, Efod urasin tam koupdongopnamlume. Winipmunyeba taram dam lelina ati ongolamak baju mitik tonun ting atonun ning ara, balye tam arye lapkwetebuka, taram tam dukdongopnamlume.

²⁶ Tonda, urasin teleb ning, emas deice arye cincin ato ning bitinye wipnamlume. Wipmunyeura, taram lelina ati baju wipmamunye taram tam, deipnamlume. Ara, Efod baju upmalye sukumuk deipnamlume.

²⁷ Aning nirya akunum winipmunyeura, urasin teleb ning, emas deice arye, cincin atonun ning, tupne dam ongopdongobuka wilamakto, bitinye wipnamlume. Awipmunye ning ara, Efod baju mulaca yok deice kintinipmamunye mirin keil bitinye ning ara, aning amu tam wipnamlume. Ara, emas tapu bitinye kintinipmunye ning ara, el koulongona ati, amu tam yan koupdongopnamlume. Winipmunyopura, Efod baju taram tam bukni, deiyatinga dukuldongonak itam libuka dukdongopnalume. Ara, taram deice lelipnamle ning koulongona ati, mirin koprop tapu arye, dukuldongon amu tam dukdongobuka deipnalume.

²⁸ Winipnaluma deiyok ara ani. Ara, taram dam daralongona ati, emas cincin amu tam ning ara, adiparyuk mirin koprop tapu arye, Efod baju emas cincin kirikdongopmamunye sukumuk libuka dukdongopnalume. Winipmunyopura, atapu arye, imamnye ongonamle deiatinga, binuka dukdongobuka deipnalume. Winipmunyeba, taram dam lelilongona ati, abaju deice, keil 12 taplak deipnamlum ning ara, deiatinga itam kipnamle anya arye, ‘Taram deice uk tuba aupnamle ning ara, kwiribuka saklyakʼ tenen, winipnamlume.

²⁹ Atalak-atalak nirya, Harun bira, Allah el si erena ati, Teleb Lek Aik Wekelyanganamle talak nirya ara, Harun adiparyuk, Israel yala nang, sik si sekuka deiamice keil ara, el taram deice ongonamle baju ongoplirye, anyaik wekelbanamle. Abaju deice arye, ‘Allah el tenelye ning moubuka tenipnirye, kel bikinamneʼ tenen, ongonamle. Winibuka, anyaik weklyopura, na Allah Yahweh arye, ‘Sik Israel 12 yala nang, sik apu yapu deiyok nang si nirya eipnyopura, sik Israel ninye ati, sikda na mapu koprop unyake,’ tenepnirye, tuba tenenamne.

³⁰ Tonda, Harun bira, Teleb Lek Aik wekelyanganamle talak ara, na Allah Yahweh dam atonun yanganamle anya arye, el taram dam lelina ati ongon baju taram tam ara, Urim ap, Tumim ap, deiplirye, wekelbanamle. Aning bitinye ning ara, el taram deice lelipnamle baju, amu tam bukni, el baju deice, el talima dam deipnamle. Winibuka yalyeura, Harun elda, ‘E, Allah arye nun Israel ninye ati, aning winiptinge, aning kum winiptinge tenen, moubuka kel biknamlule. Kel biklirye, Israel ninye ati, lak nyalbanamle.

“Na aik pil dona ati, imam nang baju yuk ning ton wiplulume,” nyabuk yupu

³¹ Na aik pum tam pil dona deiyok nang ati, ongonamle cang baju ara, Efod amu tam ongonamle ning ara, acang baju memena ati ara, wol tapu el urasin ara, warna biru ning arye dobuka wipnamlume.

³² Acang baju warna biru ning ara, el ngang dam ara, baju kat ning arye, deipdongobuka wipdongopminyeba, daralbilya deice arye, min kum dakmanto unamle.

³³ Winipmunce, acang baju warna biru ning ara, kup-kup utam nirya ara, urasin teleb una ati, adiparyuk, wol tapu el urasin ara, warna biru ning ap, unggu tua ning ap, ining bi ning ap arye, yo duk el si delima, yo duk moulamle atonun ubuka, wipnamlume. Winipminyopura, kat ning emas arye, mitik lelim lelamle ning, el si geling-geling ton memebuka, kirik kwetepnamlume.

³⁴ Winipmunye talak ara, acang baju warna biru ning, kup-kup utam nirya ara, min yo duk delima atonun ning, wibuka deipmunyopura, aminyan lo upmalyak ara, lelim lelamle ning, geling-geling memepmamunye ning kiriknamlulume. Aning atonun ubuka, aning bitinye wipmunce, abaju sirik tam nirya, kirikdongopmunce, antanapdongobuka denepnamlume.

³⁵ Acang baju mirin ning koproba ara, Harun el imam pil donamle talak nirya ara, adiparyuk ongonamle. Tonda, Harun bira, na Allah Yahweh dam, na Teleb Aik yan wekuka, pil dopnulya ati, wekelyanulye talak babye, tonda yan pil donmalya ani, binulye talak babye, Harun el cang baju utam sirya dolopkwetcamikce ning, el si geling-geling arye, binuka lelim leplyeura, na kekepnamne. Aning kekepnyopura, Harun kum dipnamle. Aning kum winiplyopura, Harun dipnamle. Ati ara, ‘Harun el anyaik, “Lek Pia Teleb Aik” pum tam pil donmalye talak ara, Allah Yahweh el dam unamalula anya arye, Harun diplyak tenena ati, acang baju mirin koprop ning, lelim len ning geling-geling kirikdongobuka, dolopdeipnamlum ning ara, pia ongonamlule. Aning kum bataknamlule.

³⁶ Tonda, urasin teleb dekna weik ning, emas deice arye, mitik yo lakase atonun ning kentinipnamlume. Aning deice arye, meterai atonun ning ubuka, anyapnukin yupu sekuka, laka kipdeipnulyame. Ayupu ara ani. ‘Allah Yahweh, an ‘Naʼ tenen ning, pia teleb ulule,’ nyabuka sekeipnamlume. Aning deiyok ara, ‘Aning ongonamlanye bira, Allah el ninguk ulule. Tonda, malye ning tonok babye kum upmalibuk, pia telebuk ululeʼ tenen, aemas ning deice arye, ayupu laka kibuka sekeipnamlume.

³⁷ Aning nirya akunum ongopminyopura, kisok kalun ning ara, warna biru tapu arye, Harun el kisok deice ongonamle cang baju urasin tamuk koupdongopnamlume.

³⁸ Tonda, urasin teleb ning, emas arye laka ongon ati, anyapmakin yupu sekuka deipmunce, Harun bira, anyaik pil donamle talak nirya ara, el kisok deice koupdongopnamle ning, el si serban taram tam, koupdongobikcopura, aning pia ongonamle. Ayupu sekuka moupdeipmamunye ning ara, Harun el kisok kalulamak bukni, el asok deice tam deipnamlume. Winibuka deiplyopura, anggun Israel ninye arye, malye wininyak ning deiyok ara, el Harun deice winipnamlume. Ara, Israel ninye arye, ‘Allah arye nun malye unyap ning namin kipsilirye, lyepnamsilʼ tenen, kam un ning obuka, nati arelyanganam ninyak ning, aning-aning weik aupnamle bukni, anggun malye wining deiyok ara, Harun el deice uk deipniba, aupnamle. Ati ara, laka kina ati, emas deice amambul yupu sekuka deipminba, Harun el kisok deice ongonamle ning ara, na Allah Yahweh, ayupu eipnirye, sik nirya ati, ‘Telebe, Israel ninye sik malye ning kum kipdeipnam narya. Ati, na dam yatinge,’ tenenamle. Tonda, adeice arye, sik Israel ninye malye unyak ning aupmalibuk, teleb aren ning, na Allah Yahweh dam arelyanamnulum ning nirya babye, ‘Teleb,’ tenepnirye dolonamne.

³⁹ Harun el nong dam ongonamle kemeja baju ara, cang baju lenan urasin teleb ningak wibuka kentinipnamlume. Tonda, aning atonun, el kisok kalun ning, si serban topi babye, namin teleb kain lenan ning arye wibuka memepdeipnamlume. El deiatinga ara, baju wina weik kelnye biryuk, urasin teleb ubuka arye wipnamle.

⁴⁰ Aning atonun, Harun el mapu babye, sik ongon ati kemeja baju ap, deiatinga delina ap, tonda kisok koulongon kain ap, wibuka kintinipnamlume. Winipmunyeba, Israel ninye anang eibicopura, ‘Se, sik anang ara, mambul pil don nang unmake,’ tenebikirye, anang ati telebe nyabuka kanye delinamake.

⁴¹ Abaju ara, an du Harun ap, el mapu ap, sikti, ongopdeipnulyame. Akunum ongopdeipminyopura, minyak zaitun yo duk mek dobuka, sik kisok deice yuk-yuk dikeipnulyame. Winipminya deice arye, sik anang wipdeipminba, na si eren aik noutam talibuka, pil dona ati, imam nang unamake. Tonda, winipminyeura, sik anang ati, teleb kilinamlyame. Winipminyopura, na Allah dam yakirye, na si eren aik pum tam pil talibuka donamake.

⁴² Tonda, sik anang ongon ati, sik nunukne baju ning wipnumunyopura, (mitik tonun arye nunukna celana atonun ning ara), kain lenan dobuka wipmunce, kintinibuka deipnamlume. Abumang celana el cang ara, der dam arye dipdongobuka, keil dam sukdopnamlula anya arye, aning atonun ubuka, mitik cang arye wipnamlume. Winibuka wipmunyeba, ongonamak talak ara, anyaik pum pil donmakce talak, lak kipmanto ak ara, lelilongonamle.

⁴³ Sik, aimam nang ara, na Allah si eren aik ara, na aren ning uku dongona dam binukce talak ap, na Allah Teleb Lek Aik noutam bukni, anyaik si Teleb Aik binukce talak ara, nunukne baju ap, celana ap nirya ongobuka binamnyake. Nunukna baju ap, celana ap, kum ongobikcopura, malye una deiyok ning, sik nong deice tuba aupmalyeura, elce sikti, wenebuka opnamne. Ura, na Allah arye, ‘Abaju ongopnamake,’ nyapdeipmakin yupu nirya ara, Harun ap, el mapu ap, sikce pia wininamake. Tonda, sikce deibikiba, dadeipdanin banamak nang nirya babye, na aik pum tam pil don talak nirya ara, aninguk talibuka, pia winipnin banamke. Atalak arye dipdongobuka, dounamle keting tamun noutam nirya ara, Israel ninye arye, ayupu pia kum bataknamake. Allah arye Musa biti ayupu nirya lak nyabuk.