Keluaran 27 - Eipomek

Yahweh el si erena ati, kam ning obuka, uku dongonak dona ati, nyabuk yupu

¹ Allah arye Musa ati, ayupu lak nyabuk. Na Allah ati, kam ning obuka, uku yanganak dona ati ara, winibuka dopnamlume. Ara, akasia yo arye dobuka moupdeipnamlume. Amemena ati ara, el mouse yuk-yuk memepdeipmunce, el cang ap, el pala ap ara, neiktoto nun kiplildebuka bitinye karin 2,2 meter kintineip deipnalume (Ara, empat segi neiktoto upnamle). Tonda, atam arye, itam tikilin yo ara, el cang ara, 1,3 meter kiklipdebuka sekmince, kintineip deipnalyame.

² Na Allah ati, kam ning obuka boyakiba, uku dapnaminya ati, dopminye aik deice tam ara, sapi basam kisok deice arye, tace ning belelamle atonun, kintineip deipnalyame. Amemepdeipnalam ning, sirik dana-dana dumbarye nirya ara, yuk-yuk belepdeipnalyame. Winipmunyeura, adelina ap, el tace ap ara, nong tonok atonun kipnamlyame. Tonda, ‘El urasin teleb unamleʼ tenen, teleb kat ning, el si ara perunggu arye, palipdeipmince, memepdeipnamlyame.

³ Tonda, kam ning obuka uku dolyanganak ara, ani pil donamak ning nirya ara, teleb kat ning tembaga arye mupdeip palyame. Ara, uku diplyeba, sice bulamle lukulin ning, el si kuali ap, tonda, el sikop ap, ining kwen ning mangkok ap, tup ning lukna ati, el si garpu ap, tonda uku seknak ap, aning nirya ara, urasin teleb kat ning perunggu aryuk dobuka memepdeipnalyame.

⁴ Winipmunyeura, urasin teleb kat ning, perunggu arye, dobikirye, uku dongon yo deilinak ati, el si anyaman kawat tapu arye wibuka kintineipnamlyame. Aning dobuka deipmunyeura, dekuka atonun ning ati, perunggu arye aning dumbarye memebuka kintineip deipnalyame. Ara, dana-dana tam nirya, ara bobana babye, otam babye, utam babye, itam sirik nirya ara, kintinibuka deiamunyak, ara ayo cang apum dongonamlulume. Ara, auku dongonak bobana ati, ubuka kintinipnamlulume.

⁵ Awibuka ketenepnamlum kawat, el si anyaman, aning nirya ara, akunum winipmince, kam ning obuka, uku delinak noutam dongopnalyame. Aning perunggu arye wipnalam kawat deice tam babye, amu tam babye, mitik lo ton lopdipnalyame. Awimamunye kawat ara, uku dongonak, el noutamakuk, yangabuka deipnalame.

⁶ Aning dobuka bobana ati, akasia yo cang bitinye kintineipnulyame. Amoudeiplum yo deice ara, urasin pia teleb kat ning, perunggu arye, palibuka deibuka dopnamlume.

⁷ Ining ning obuka, uku dongonak dobuka binuminye talak ara, aining ning uku dongonak, el dana-dana tam potokamunce, memebuka kitinyamunye cang yo binuka dongopmunce, erebuka bobanamlume.

⁸ Ining ning obuka, uku dongonak ara, pala yo arye deibuka memepnamlume. Winipmunce, uku dongona ati noutamak ara, talye lo kipnamlume. Ara, na Allah arye, an Musa ati, Sinai mutuku deice arye, “Winibuka dopnamlume,” winibuka lak nyamse touk, ubuka dopnulyame.

“Allah el si erena ati, tenda arye dolina aik dam nirya ara, cang kain arye, poka dana-dana arye, dobuka antanap dongonamlume,” nyabuk yupu

⁹ Na si erena ati, ninye ap, na ap neika una ati ara, noutam upnamle bukni, anyaik sirik dana-dana tam nirya ara, poka arye dobuka antapdongopnalume. Winipmunce, arah selatan tam ati ara, apoka el cang ara, dopmunyeba, 44 meter upnamle. Aning deice ara, cang kain lenan gorden ara, urasin pia teleb ninguk, kirikuka lapkwetepnamlume.

¹⁰ Akain lenan gorden talena ati ara, acangnye yo nakub dikin dobuka, yana kintineipnamlulume. Akintineibuka deipmunye cang yo ara, ‘Tuku bol piplyakʼ tenen, el amu tam, urasin teleb kat ning perunggu arye, el delinak ning ara, 20 memebuka delinamlume. Tonda, ayo nirya deice tam ara, moubuka talena ati, dekna weik namin ning, el si perak aryuk, moubuka kintineip deipnalyame. Tonda, ayo deice nirya ara, buna atonun ubuka winipmunye arye, kin-kin botopdeipnamlume.

¹¹ Awinipmunye touk, utam babye, atonun ubuka deipnululume. Ara, apoka el cang ara, atonun 44 meter dekuka wipnamlume. Tonda, adeice arye, kain lenan gorden lapkwetenamlyame. Alenan kain talena ati ara, acang yo anakupdikin dobuka, yana kintineipnamlulume. Akintineibuka deiplum ayukumna yo ara, ‘Tuku bolpiplyakʼ tenen, el amu tam ara, urasin teleb kat ning, el si perunggu arye, el delinak taplakna ning ara, 20 ton memebuka delinamlulume. Tonda, ayo deice tam nirya ara, moubuka talena ati, dekna weik namin ning, el si perak aryuk, moubuka kintineip deipnalume.

¹² Apoka keting wekelban tam babye, cang kain, urasin pia teleb ning, el cang ara, (22) meter kintineip deipnululume. Tonda, acang yo takubarye (10) kintineip deipnululume. Winipmunce, adeiplum acang yo ara, ‘Tuku bol piplyakʼ tenen, el amu tam, urasin teleb kat ning perunggu arye, el delinak ara, 10 ton memep deipnamlulume. Ayukumna yo deice ara, el kain lenan gorden babye, memepdeipmunce, lapkwetenamlyame.

¹³ Tonda, keting yangan tam, bisik bublan botobuka dopnamlumak babye, el poka cang ara, 22 meter uk memepnamlume.

^14-15 Abisik bublan botoknamlyam ning ara, dana-dana tam, el pala ara, 6,6 meter kiklipldebuka dopnalyame. Aning atonun, otam babye 6,6 meter kiklipdebuka kintineip deipnalyame. Abisik dana-dana tam noutam ara, acang yo wilinye memepdeipmunce iknalyame. Iknamlum cang yo ara, ‘Tuku bolpiplyakʼ tenen, el amu tam ara, urasin teleb kat ning perunggu arye, el delinak memen ning ara, 3 ton memebuka deipnamlume. Aning winimunyeura, abublan dana-dana tam, iknalam yo cang weik nirya ara, nakub barye (6) upnamle.

¹⁶ Anyaik bublan dam lalkwetena ati, urasin pia teleb kain lenan, el cang ara dekuka, 9 meter arye moubuka lapkwetepmunce, lelipdongopnamlulume. Ara, kain lenan win tapu teleb ning, el urasin ara, warna (biru) ap, ton ning ara unggu ap, ining bi ning merah ap arye, kain lenan wina kel weik nang arye, wibikceba, kirikuka lapkwetepnalyame. Tonda, bublan dam antapdongopmamunye kain lenan ati ara, acang yo dumbarye kintineip deipmunyeura, ayo ‘Tuku bol piplyakʼ tenen, amu tam ara, urasin teleb kat ning, perunggu arye, el delina ati taplakalin ning ara, 4 ton memep deipnamlulume.

¹⁷ Anyayukumna dana-dana tam nirya ikuka, antapdeipnalum ayukumna yo nirya ara, akain lenan gorden lalkwetena ati ara, aning arye arekuka lalkwetena ati ara, dekna weik namin teleb ning, el si perak arye, kintineip deipmunyeura, memepdeipnalyame. Tonda, ayo yuk-yuk bukni, aning nirya ‘Tuku bolpiplyakʼ tenen, ayo amu tam nirya ara, urasin teleb kat ning perunggu arye, ayo el delinak ati, memepdeipnamlume.

¹⁸ Na si erena ati, ninye ap, na ap, neika una ati, dopnalam aik noutam upliba, el dana-dana bai tam kintineip deipnamlum, el cang ara, 44 meter kipnamlyame. El pala ara, 22 meter kipnamlyame. Anyaik sirya dana-dana nirya ara, poka uk dobuka antanap dongopnamlulume. Anyaik deice lapkwetepnamlam kain lenan, kat ning arye tikilin ning, el cang utam arye, itam welen ning ara, 2,2 meter kibuka lapkwetebuka, antanap dongopnamlume. Antanap dongopnamlam kain lenan, el cang ara, dan tam 44 meter, dan tam 44 meter sekmince, ato touk lapkwetepnalyame. Keting kumulbalamle tam ap, keting panalyangan tam ap ara, el pala ara, 22 meter dekuka lapkwetebuka, antanap dongopnamlume. Winipnamlum ati, anyaik dam bai tam, dana-dana nirya ara, cang kain namin ning, el si kain lenan arye, kirikuka antanap pongopnamlume. El ayukumna yo ikamlumak nirya ara, ‘Tuku bol piplyakʼ tenen, ayo nirya amu tam ara, kat ning perunggu arye, el delinak taplakalin ning ara, memepdeipnamlume.

¹⁹ Na Allah ap, ninye ap, elana aik ap, na si eren aik ap ati, tenda arye dopnalam aik pum pil donamak ning, aning-aning nirya ap, bai tam pil donamak ning, aning-aning nirya ap ara, kat ning el si perunggu arye, kintinipnamlume. Tonda, tenda aik ap, anyaik dana-dana tam lapkwetepnamlam kain lenan, el si gorden ap, aning nirya bibikilina ati, el tapu kirikna ati, tuku pum tam iknamak tatca ning babye, perunggu arye memebuka kintinipnamlame.

Lampu weisa lana ati, “Winamlume,” nyabuk yupu

²⁰ Allah arye Musa biti nyabuk. Ance Israel ninye ati nyapnulyame. ‘Anggunce, zaitun yo duk teikitceura, el mek pia teleb uplye ning dobuka, na Allah ati, si erena ap, ninye ap neika elana aik, noutamuk yanuka, upna delinamlume. Weisa pia teleb ubuka lana ati ara, zaitun yo duk purubikiba, minyak mek kiplyeura, teleb ninguk arelyanganamlume.

²¹ Na Allah ap, ninye ap, neika una ati, kintinipnamlum aik noutam bukni, narye Musa biti, “Aning ara, wininamlulume, aning ara, pia kum wininamlulume,” nyapsiba, Musa birye, kil bitinye deice seksiba, ayupu libuka boyanamuk marikna, el si Peti Perjanjian pum tam deipnamle aik, Pia Teleb Lek Aik nyanyap ati ara, anyaik wilina ati, lapkwetepnamlam cang kain, gorden bai tam atonun upnamle ara, lampu weisa delinamlulume. Alampu upna kalikin nang ara, Harun ap, el mapu ap, sikcuk, ‘Aupna tangaplyakʼ tenen, sikcuk sintam arye dipdongobuka kalikuka, pil donmakcebuk, beren tam kinamle. Atalak noutam nirya ara, anyaik deipnamle upna, pia lana uk unamlulume. Aupna pia lapliba, na Allah Yahweh arye, aupna lapliba, pia dinamne. Narye aupna ati, lak nyapnamkin yupu ara, pia kum bataknamlyame. Ati, atalak arye dukdongobuka, dounalam keting tamun noutam nirya ara, Israel ninye arye, apil pia donamake. Ara, Harun birye deipliba, deipdanin banamak ninye nirya babye, nyapse touk pia ati wininamnyake. Allah arye Musa biti laknyabuk.