Keluaran 26 - Eipomek

‘Allah Yahweh el si erepnamakʼ tenen, tenda aik dona ati, nyabuk yupu

¹ Allah Yahweh arye, Musa biti, nyabuk. Na si erena ati, na ap, ninye ap eldana ati aik, dopnamnulume. Anyaik ara, tenda kain, el si ara lenan, pia teleb ning takubarye (10) sekuka, kintineip deipnamnulume. Ara, pia teleb namin kain lenan ap, tonda, kain win tapu mirin koprop ning, warna biru ning ap, warna unggu ning ap, tonda ining bi ning ap, nirya kintineip deipnamlume. Atenda kain deice nirya ara, malaikat atonun ning, el si Kerub ton, wina kel weik bikamlinye birye, Kerub urasin atonun kibuka, akain deice wibikirye, gambar deibuka kintineipnamlume.

² Anyapman tenda kain arye kintineipnamlum ning ara, anyaik pum tam wilina ati, cang kain, el si ara gorden, kintineipnamlume. Acang gorden kain, el cang nirya ara, atonunuk 12,5 meter dekuka sekenamlume. Tonda, el pala ara 2,8 meter uk dekuka sekenamlume.

³ Tenda kain arye kintineipnamlum aik pum tam ara, aik yuk-yuk wilina ati, kintineipnamak gorden ning ara, takubarye (10) arye yuk-yuk sekuka wipnamlum bukni, aning nirya arye bokuka, ton tam pamubarye (5) dopmunce, dukdongobuka wipmunyeba, tonok cang weik ning kipnamle. Ton tam pamubarye ara atonun, dukdongobuka wipmunyeba, cang weik ning kipnamle. Winipmunyopura, el pala kilina ati ara, ansinibuka bitinye wipnamlume.

⁴ Winipmunyopura, minop seklopmamunye, warna biru kain sekdoba ara, cang weik ning bitinye kipnamle ati, abitinye cang kain atonun, kain sirya ning bukni, el kup-kup dana-dana ara, warna biru ning dobuka, kisok ning kipmunce, el talin ning ton, wibuka kintineipnamlume. Ara, deice tam arye dukdongobuka, danutam nirya wipnin banmamunya ani, utam ara, kisok ning kilina ton wipnamlume.

⁵ Akain lenan cang weik ning, sirya itam arye dukdongobuka, utam dopkwetepnamlum ning, sirya tam arye, acang kain talin ning ara, limapuluh (50) wibuka kintineipmunce, deipnamlume. Aning atonun, otam deipnamlum cang kain babye, el talin ning ara, yupa bitinye, limapuluh (50) arye wibuka kintineipmunce, deipnamlume. Dan tam kain ap, dan tam kain ap, el ongopdongomunce, bumang kibuka wipnamlum talin ning, akunum kintineipmunyopura, agorden kain bitinye, urasin damak deibuka kintineipnamlume. Winipmunyeura, tonokak dukdongopdanamle.

⁶ Aning akunum kintineipmunyopura, acang lenan kain, dana-dana dukulongona ati ara, arekuka talin ning ton kintineipnamlume. Ara, atam arye deipmunyeba, otam ning dukdongobuka delina ati, arekuka talin ning ara, urasin pia teleb dekna weik ning, el si ara emas, limapuluh (50) arye merekuka, kintineip deipnamlume. Winipmunyopura, atam ning ap, otam ning ap, dukdongobuka tonok wipmunyeba, tonok ning kipnamle. Winipnamluma deice arye, na si erena ati, tenda arye doltakna aik ara, tonok dem kipnamle.

⁷ Anyaik don tenda, aik deice tam ara, amnyok atonun dona ati, kambing basam potong arye winyak kain bol ara, sebelas (11) kintineipnamlume.

⁸ Akambing potong arye wipnamak kain, dobuka seknamlum ning ara, el cang yuk-yuk kiklipdemunce, el cang ara 13,5 meteruk dekuka seknamlume. El pala ara, atonun ubuka kiklipdemunce, 2,8 meteruk seknamlume.

⁹ Tenda kain mirin ning ton tam ati, pamubarye (5) dobuka, taruk talina kintineipmamunye arye, ongopdongobuka kintineipmamunye ning deice, dukdongobuka deipdongomunce, kintineipnamlume. Aning ato bukni, otam unamle kain ara, cang kain nakub barye (6) arye dobuka, el talin ning ati kintineipmamunye ning deice, binuka dukdongobuka, deipdongomunce, kintineipnamlume. Winimunyopura, atam pamubarye babye, otam nakub barye babye, dukdongobuka tonok kipdeipmunyeba, pala tonok kipnamlume. Tonda, otam deipnamlum ning, nakub barye (6) kain kintineipmamunye ning ara, sirya ning dobuka, kitibuka bitinye kipmunce, koulongonamlume. Naku barye ning tonok, kitibuka, bitinye deipmunye ning ara, na si erena ati, tenda arye dolalum aik dopmamunyak, bisik botolin tam deipmunyopura, bisik bublan atonun tirikilongona ati, lapkwetepnamlume.

¹⁰ Akain lenan cang weik ning, kup-kup tam akunum dukdongobuka deipmunyopura, acang kain sirya tam ara, itam arye dukdongobuka, utam dopkwetepnamlum ning, sirya tam arye, acang kain, el talin ning ati, ongopdongobuka deipmunce, 50 wibuka kintineip deipnamlume. Aning atonun, otam deipnamlum cang kain ara, el talin ning ati, kwanibuka koupmunce, 50 wibuka kintineipmunce, deipnamlume. Danoutam kain ap, dana tam kain ap, sirya dana-dana ongopdongobuka, deiyok wipnamlum talin ning akunum kintineipmunyopura, acang gorden bitinye ara, urasin tam noutam dukdongopmunce, tirikdongopnamlume.

¹¹ Winipmunyopura, akain kup-kup tam, dukdongobuka tirikildongona ati, urasin teleb kurun ning, el si tembaga arye, arekuka talin ning ton nukuka, limapuluh (50) arye kintineipnamlume. Winipmunyopura, acang kain lenan ning deice, sirik tam mirin kain arye ongopdongobuka wipmamunye talin ning noutam, winiryuk tembaga arye kintineipmamunye, arekdongobuka talin ning ara, dobuka atam cang kain ap, otam cang kain ap, kwarepdongobuka deipmunce, anyaik bublan atonun ubuka, tirikdongopnamlume.

¹² Tonda, acang kain nirya akunum dukdongobuka deipmunyopura, danoutam weik tam ton, tuba aupmalye ning ara, atenda aik el amnyok tam noutamuk, lililongona ati, asukumuk deipnamlume.

¹³ Atenda aik dopmamunya, dumdam tam kup-kup, tuba bisipmalirye, bomtikinmalye ning ara, el cang ara, 50 sentimeter anya arye, anyaik el amnyok tam noutamuk, lililongona ati, asukumuk batakanamlume.

¹⁴ Ura, bai tam dolamak tenda aik, el duma atonun ning ati, bai tam siknilongon ning ara, pia cang ning bitinye kintineip deipnamlume. Tonok ning ara, yim domba bola pia teleb ning, koplopmunce, weik tonun bulubuka delinamlume. Ara, domba bola uk bukni, kam ning likuka deibikirye, dukdongobuka wibikirye, kintineipnamlume. Adeice tam ara, el duma bitinye atonun ning ati, laut mekwen pum tam ulamle ikan, el si lumba-lumba, el bola teleb ning ton koplopmunce, aning ara weik tonun dopropmunce, anyaik dumu deice tam ara, sinipdongopnamlume.

Anyaik yo ikuka dona ati, nyabuk yupu

¹⁵ Anyaik ikuka dona ara, bita lipsisikuka, teleb kipdeibuka dopnamlume. Ara, akasia yo cang aryuk kentinipmunce, dopnamlume.

¹⁶ Allah ap, ninye ap eldana aik dona ati, asukum arye ubuka, eitam tikilin yo, el cang ara, 4,5 meter dekuka kintineipnalume. Tonda, anyaik dona ati, el ikuka tikeipnamak yo, el si rangka, el pala ara, kiklipdemunce, 66 sentimeter uk, kiklibuka dopnamlume.

¹⁷ Anyaik dukdongobuka donak nirya ara, yo nong deice bisik bitinye, yuk-yuk potokuka kintineipnalume. Winyamunya arye, ton tam ning arye, ton tam ning yangapdeipbuka, dukdongpnamlume.

¹⁸ Allah el si erena ati, kain arye doltakna aik, eitam (arah selatan) deibuka iknamlum ning, ayukumna yo, el si rangka, nakub dikin (20) yo sekuka kintineipnamlume.

¹⁹ Abilinga pina ati ayukumna yo, el si rangka, dua puluh (20) kentineibuka deipmunce, dopmamunyak ara, ‘Ayo tuku bol piplyakʼ tenen, ayo amu tam ara, el taplak dongobuka, urasin pia teleb namin ning, el si perak, takubarye empat puluh (40) kentineip deibuka, aning arye makdongobuka dopnamlume. Tonda, abilinga pina ati ayukumna yo, el si rangka, el deiyok tam ara, dekna teleb namin ning, el si perak arye, el angnulongona ati, bitinye-bitinye kintineip deibuka deipmunce, taplakuka dopnamlume.

²⁰ Aning atonun, Allah el si erena ati, tenda aik outam kup-kup tam, abilinga deibuka, ayukumna ikuka pipnumunye ayukumna yo, el si rangka nirya ara, nakub dikin (20) yo sekuka kintinipnamlume.

²¹ Tonda, abilinga pina ati ayukumna yo, el si rangka, ‘Tuku bol piplyakʼ tenen, el amu tam lelilongona ati, urasin pia teleb namin ning perak arye, yupa tonok kepdopnye takubarye (40) puturbuka kintineipnamlume. Aning atonun, tonda, abilinga ayukumna yo, el si rangka, deiyok tam taplakuka delina ati ara, perak arye, el taplakuka, yupa tonok kepdopnye takubarye (40) kentineibuka deipnamlume. Ara, ayukumna yo deiyok tam, bitinye-bitinye delina ati, moubuka kintineip deipnamlume.

²² Tonda, Allah el si erena ati, el tenda aik, keting wekelban tam bukni, anyaik bai tam dona ati ara, el ayukumna yo ara, yo nakub barye (6) deibuka, kentineipmunce dopnamlume. (Ara kain lenan ayo deice lapkwetebuka deipnaluma atia.)

²³ Winipmunyopura, anyaik sirya tam, dana tam dukulongonak ara, ayukumna deice arye, ayukumna yo bitinye ton, tabakuka kentinipmunce, ton tam tonok, ton tam tonok, deipmunce dopnamlume.

²⁴ Anyaik el kup-kup dana-dana tam bitinye upmalyak ara, tikilin ayukumna yo ara, bitinye deipmamunya ani, deiyok tam, utam babye, itam ara, tonok ansinibuka deipdongomunce, tatce ketepnamlume. Ara, yin tapu barina ning, el si bokoba atonun ning arye, itam babye, utam babye, kintineipmamunyakuk, deipnamlume. Winipmunyopura, ‘Aning sirya dukulongona ati upmake,’ tenenamlume.

²⁵ Ati, ayukumna yo nirya ara, pinbarye (8) kintineipnamlume. Tonda, ‘Ayo deiyok tam tuku bol piplyakʼ tenen, urasin pia teleb namin ning, el si perak arye, taplakalongona ati, enam belas 16 puturbuka deipmunce, kintineipnamlume. Akintineipmamunye perak ara, tonok rangka ayukumna yo amu tam ara, dana tam arye, dana tam arye, makalongon ning perak ning arye, deipdongobuka taplaknamlume. Ara, pinbarye (8) rangka ayukumna yo amu tam, el makalongon ning nirya ati, bitinye-bitinye kibuka, deipdongobuka taplaknamlume. Aranka pinbarye nirya ara, atonun ubuka dopnamlume.

²⁶ Tonda, anggunce Allah el si eren aik, sekelina ati, deipnumunye yo ara, akasia yo 15 kintineipnamlume. Akintineipnalum yo ara, tonok tamuk pamubarye (5) wirikdeipmunce, cang kain arye dobuka, anyaik abilinga ati, ayukumna yo deice deibuka lapkwetepnamlume.

²⁷ Awirikeipnalum touk, Allah el si eren aik, otam ara atonun, ayukumna yo, el si rangka sekelina ati, yo pamubarye ton sekuka deipnamlume. Tonda, aning atonun, keting wekelban tam babye atonun, wirikilin yo pamubarye dem kintineibuka deipnamlume.

²⁸ Winipmunyopura, anyaik el kolokon yo, noutam deipnamlum ning ara, abilinga noutam-noutamuk delinamlume. Allah ap, ninye ap eldana aik noutam nirya ara, atonunuk winibuka, deipmunce dopnamlume.

²⁹ Anyaik dona ati, ayukumna yo ikuka, abilinga pipnamlung ning ap, el aik apanya yo ap, deipnamlum ning nirya ara, urasin teleb kat ning, el si emas arye, ayo bola deice nirya taplakalinamlume. Aning atonun, anyaik wirikin yo deipmunce, talina ati, tupnedama atonun wina ati, urasin pia teleb ning, emas aryuk wipnamlume.

³⁰ Na Allah Yahweh arye, na si erena ati, ninye ap, na ap, el dan aik dona ati, “Musa anti, wininamlyame,” nyabuka, lak nyapkise touk, anggun adiparyuk anyaik dopnamlume. Ara, Sinai mutuku deice arye, yupu talipmanume talak arye, nyapkise touk, anyaik ara, dopnamlume.

³¹ Na Allah si eren aik bublan ati, lalkweten ning ara, el urasin teleb una ati, aling win tapu, el si wol tapu, urasin mirin koprop warna biru ning ap, unggu tua ning ap, ining bi merah ning ap arye, pia teleb cang kain, el si lenan, pia namin ning wipnamlume. Winimunyopura, kain deice ara, malaikat urasin atonun ning, el si Kerub, gambar kibuka, baju kain wina kel weik nang arye, wibuka deipnamnyake.

³² Tonda, bublan dam deilin yo ara, akasia yo cang ning dumbarye (4) kintineipmunce, iknamlulume. Ayo deice ara, dekna weik kurun ning, el si emas arye taplak deipnamlume. Winipmunce, ayo deice uk, lalkwetena ati, emas arye merekuka kintineipnamlume. Tonda, acang yo amu tam, namin una ati, dekna weik boun ning, el si perak arye, puturubuka delinamlume. Winipmunyeura, acang lenan kain ara, anyaik bublan tirikna ati, asukum lalkwetenamlume.

³³ Allah Yahweh, el Pia Teleb Aik, ayo rangka dopmunya deice, lalkweten ning ara, tembaga arye kintineipmunye, adikil talin ning ara, cang kain arye lapkwetepmunyeba, dolopnamlule. Akain doloplirye, leliplye noutam ara, na Allah arye Musa biti, ‘Aning ara, wininamlume, aning ara, pia kum wininamlume,’ nyapdeipsirye, nyalin yupu nyapsirye, keil pala bitinye deice sekdeipsi ning ara, marikna pum liplum ning ara, bobuka agorden amu tam bukni, anyaik noutam deipnamlume. Acang kain dolipkwetepnamlum ning deiyok ara, anyaik bokuka, aik bitinye kipnamlula anya arye, acang kain, el si gorden, dolipkwetepnamlume. Atam aik ara, Teleb Aik nyapnamlume. Acang kain el si gorden, amu tam upnamle aik ara, ‘Pia Lek Teleb Aik,’ nyapnamlume. Atalak-atalak nirya, Allah ap el dan aik bitinye ara, noutam wilina ati, cang kain, el si lenan, gorden arye, lapkwetepnamlume.

³⁴ Allah Yahweh arye, Musa biti, ‘Aning ara, wininamlume, aning ara, pia kum wininamlumeʼ tenen, nyalin yupu nyapdeibuk ning, libuka deiplum marikna, el si Peti Perjanjian pum tam ara, bublan merekuka singnipdongopmunce, asukumuk delinamlume. Abublan deice ara, ‘Sik Israel ninye malye winibikce ning ara, Allah arye namin kipsilirye, lyepnamsilʼ tenen, kam ning obuka, imam deiyok nang ati, aining likdongobuka, ayo pum bublan deice likeipnamlume. Ati, amarikna Peti Perjanjian ara, anyaik noutam bukni, Allah el Pia Teleb Lek Aik pum tamuk delinamlume.

³⁵ Allah Yahweh ati aren ning, arelyakiba, dobuka delinak ati, doplum meja ara, Allah Yahweh el Teleb Aik pum tam, malye ning pia kumak ara, kum delinamlume. Aning ara kum bukni, acang kain lenan, el si gorden, bai tam asum-asum nirya, kam ning obikirye, aining arelyanganamak aik, utam uk deipnamlume. Ara, Allah ap, ninye ap, el dan aik bukni, utam uk deipnamlume. Winibuka deipmunyopura, upna lana deiyok ati, memepmunyeura, anyaik bukni, itam (arah selatan) bina deipnamlume. Winimunyopura, ameja utam, aweisa deiyok ning itam, (arah selatan) unamlule. Anyaik ara, ‘Teleb Aik,’ nyapnamlume.

³⁶ Anyaik bitinye wilibuka dopnamluma anya arye, Teleb Aik atam, atonun ton, Pia Teleb Aik otam, dana tam wilina ati, pia teleb kain lenan gorden ton wipnamake. Anyaik bublan bitinye dam atonun ati, kirikilkwetena ara, aling win tapu, el si wol tapu, el urasin ara, mirin koprop ning ap, unggu tua ap, ining bi ning ap arye, pia teleb cang kain el si lenan, pia namin ning wipnamake. Ara, kain wina kel weik nang arye wibicopura, aning dobuka anyaik bitinye wilina ati, dana tam lapkwetepnamlume.

³⁷ Tonda, anyaik bublan dam welen yo ara, akasia yo pamubarye, sekuka kintineipnamlume. Ayo deice ara, dekna weik kat ning, el si emas arye, taplakalinamlume. Winimunce, ayo deice uk, arekuka talina ati, lalkweten ning, emas arye, memebuka kintineipnamlume. Tonda, ayo namin kina ati, kat ning el si ara, perunggu arye taplakna ati, kintineip deibikiba, aning dobuka, ayo amu tam delinamlume. Winipmunyeura, cang kain gorden ara, anyaik bublan tirikna ati, asukumuk lalkwetenamlume. Allah arye, Musa biti lak nyabuk.